Unsay Makahatag ug Katagbawan sa Imong Kinabuhi?

SI Kenny nagtrabaho sa usa ka malamposong kompaniya nga tigbroker, nagdrayb ug mahalong imported nga kotse, ug may balay diha sa dapit sa mga sapian sa usa ka dakong siyudad. Ingong hanas nga skydiver, ganahan kaayo siyang moambak gikan sa ayroplano nga linibo ka metro didto sa itaas. Tugob ba ang iyang kinabuhi? Sumala sa The Wall Street Journal, siya miingon: “Ako 45 anyos na, ug walay direksiyon ang akong kinabuhi . . . Kini haw-ang.”

Si Elyn nagsigeg bansay aron mahimong hanas nga ice skater. Nahimo gayod siyang inila ug iyang naangkon ang kabantog nga iyang gipangandoy. “Apan hain man ang kalipay nga angay kong bation?” nagmulo siya. “Ako mamingawon kaayo. Sa kadugayan matigulang na ako ug, bisan pag daghan kog kuwarta, ang kinabuhi mahimong haw-ang kaayo kon kini ra ang katuyoan sa akong kinabuhi.”

 Si Hideo ilado sa iyang mahanasong paggamit ug mga kolor diha sa iyang mga buhat sa arte ug halos ang tanan niyang panahon iyang gigugol diha niana. Wala niya ibaligya ang iyang mga ginama kay iyang gituohan nga kana makapaubos sa iyang mga prinsipyo ug sukdanan sa arte. Sa hinapos nga bahin sa iyang kinabuhi nga 98 anyos, iyang gidonar ang kadaghanan sa iyang mga ginama ngadto sa usa ka museyo. Iyang gigugol ang halos tibuok niyang kinabuhi sa paggamag mga buhat sa arte. Bisan pa niana, wala siya magmatagbawon, kay naghunahuna nga dili gayod siya makagamag hingpit nga mga buhat sa arte.

Ang pipila ka tawo puliki kaayo sa pagtabang sa uban. Tagda, pananglitan, ang usa ka ehekutibo sa paggamag mga pelikula sa Hollywood. Ingong bise-presidente sa usa sa labing dagkong mga kompaniya sa pelikula sa Tinipong Bansa, kanunay niyang kauban ang mga tawong inila ug nagpuyo siya sa usa ka mahal ug maluhong residensiyal nga dapit. Sa dihang mibakasyon siya sa Cambodia, giduol siyag usa ka batang babaye nga nagpakilimos samtang siya nagkaon sa usa ka restawran sa Phnom Penh. Gihatagan niyag usa ka dolyar ug soft drink ang bata. Nalipay niadto ang bata apan pagkasunod gabii, didto na usab siya nga nagpakilimos gihapon. Nakasabot ang maong ehekutibo nga mas dako pang hinabang ang gikinahanglan.

Paglabay sa usa ka tuig, midesidir ang ehekutibo sa pagbag-o sa iyang karera pinaagi sa pagbiya sa industriya sa pelikula aron motabang sa mga kabos sa Cambodia. Mitukod siyag usa ka eskuylahan nga nag-atiman sa puy-anan, mga pagkaon, ug edukasyon. Bisan pa niana, kanunay siyang nakigbisog sa nagkasumpaking mga emosyon—kalipay ug katagbawan tungod sa iyang nalampos duyog ang kaguol ug kapakyasan tungod sa nagkadaghang suliran nga kinahanglan niyang sagubangon.

Kanang upat ka tawo nga bag-o pang gihisgotan nagtuo nga sila nasayod kon unsay buot nilang mapalampos sa kinabuhi. Bisan pa niana, mibati silag kahaw-ang sa dihang nakab-ot nila ang tumong nga ilang gihagoan pag-ayo. Unsay katuyoan sa imong kinabuhi? Unsay imong prioridad sa kinabuhi? Segurado ka bang dili nimo pagabasolan sa ulahi ang paagi sa imong pagkinabuhi karon?