Ang Pagkasoberano ni Jehova ug ang Gingharian sa Diyos
Ang Pagkasoberano ni Jehova ug ang Gingharian sa Diyos
“Imo, Oh Jehova, ang pagkadako ug ang pagkagamhanan ug ang katahom ug ang kahalangdon ug ang dignidad . . . Imo ang gingharian, Oh Jehova.”—1 CRONICAS 29:11.
1. Nganong si Jehova ang may katungod nga magmando ingong Soberano sa uniberso?
“SI Jehova lig-ong nagtukod sa iyang trono didto sa kalangitan; ug ang iyang gingharian nagagahom ibabaw sa tanang butang.” (Salmo 103:19) Nianang mga pulonga, gipadayag sa salmista ang kamatuoran kon kinsay magmamando. Tungod kay si Jehova nga Diyos ang Maglalalang, siya gayod ang may katungod nga magmando ingong Soberano sa uniberso.
2. Sa unsang paagi gihubit ni Daniel ang pagmando ni Jehova sa langit?
2 Siyempre, aron mahimong magmamando ang usa, kinahanglan nga aduna siyay mga sakop. Sa sinugdan, ang ginsakpan ni Jehova mao ang espiritung mga persona nga iyang gilalang—una, ang iyang bugtong Anak ug dayon, ang daghan kaayong manulonda. (Colosas 1:15-17) Paglabay sa taas nga panahon, nakita ni manalagnang Daniel diha sa panan-awon nga si Jehova nagmando didto sa langit. Siya nag-ingon: “Ako nagpadayon sa pagtan-aw hangtod nga dihay mga trono nga gibutang ug ang Karaan sa mga Adlaw milingkod. . . . Dihay kaliboan ka libo nga nag-alagad kaniya, ug napulo ka libo ka napulo ka libo nga nagbarog diha sa iyang atubangan.” (Daniel 7:9, 10) Sulod sa dugayng panahon, si Jehova, “ang Karaan sa mga Adlaw,” nagmando ingong Soberano sa iyang dako ug organisadong pamilya nga gilangkoban sa iyang espirituhanong mga anak. Sila mga “alagad” ni Jehova nga nagbuhat sa iyang kabubut-on.—Salmo 103:20, 21.
3. Sa unsang paagi gipasangkad ni Jehova ang iyang pagmando?
3 Sa ngadtongadto, gipasangkad ni Jehova ang iyang pagmando pinaagi sa paglalang sa dako ug kuti kaayo nga uniberso, lakip na sa yuta. (Job 38:4, 7) Sa panan-aw sa usa nga nagpuyo sa yuta, hapsay ug tukma kaayo ang pag-obra sa mga bituon ug mga planeta nga daw wala sila magkinahanglan ug usa nga mogiya o mokontrolar kanila. Apan, ang salmista miingon: “[Si Jehova mismo] nagsugo, ug nalalang sila. Ug siya nagapabarog kanila hangtod sa kahangtoran, hangtod sa panahong walay tino. Siya naghatag ug usa ka regulasyon, ug dili kini mahanaw.” (Salmo 148:5, 6) Sukad sa sinugdan, gipasundayag ni Jehova ang iyang pagkasoberano pinaagi sa pagdumala sa langitnong mga linalang ug sa pagkontrolar sa uniberso.—Nehemias 9:6.
4. Sa unsang paagi gipasundayag ni Jehova ang iyang pagkasoberano ngadto sa mga tawo?
4 Sa dihang gilalang sa Diyos ang unang magtiayon, iyang gipasundayag ang iyang pagkasoberano sa lain pang paagi. Gawas nga gitagan-an niya sila sa tanan nilang gikinahanglan aron mabuhi nga malipayon ug matagbawon, si Jehova naghatag usab kanilag awtoridad ibabaw sa ubos nga mga linalang sa yuta. (Genesis 1:26-28; 2:8, 9) Kini nagpakita nga ang pagmando sa Diyos dili lamang maayo ug maluloton kondili naghatag usab kinig pasidungog ug dignidad sa mga sakop niini. Kon padayong magpasakop si Adan ug Eva sa pagkasoberano ni Jehova, sila mabuhi sa paraisong yuta sa walay kataposan.—Genesis 2:15-17.
5. Unsay atong ikahinapos maylabot sa pagmando ni Jehova ingong Soberano?
5 Busa, unsay atong ikahinapos? Una, si Jehova nagmando ingong Soberano ibabaw sa tanan niyang mga linalang sukad pa sa sinugdan. Ikaduha, ang pagmando sa Diyos maluloton ug naghatag ug dignidad sa mga sakop niini. Ikatulo, ang atong pagsunod ug pagpaluyo sa pagmando sa Diyos moresultag dumalayong mga panalangin. Mao diay nga si Haring David sa karaang Israel miingon: “Imo, Oh Jehova, ang pagkadako ug ang pagkagamhanan ug ang katahom ug ang kahalangdon ug ang dignidad; tungod kay ang tanang butang sa mga langit ug sa yuta imo. Imo ang gingharian, Oh Jehova, ang Usa usab nga nagpataas sa imong kaugalingon ingong pangulo ibabaw sa tanan.”—1 Cronicas 29:11.
Nganong Gikinahanglan ang Gingharian sa Diyos?
6. Sa unsang paagi nalangkit ang Gingharian sa pagkasoberano sa Diyos?
6 Sanglit si Jehova, ang Soberano sa Uniberso, mao gihapon ang nagmando, nganong gikinahanglan pa man ang Gingharian sa Diyos? Ang usa ka magmamando sagad mogamit ug usa ka ahensiya sa pagmando sa iyang ginsakpan. Busa, ang Gingharian sa Diyos maoy usa ka instrumento o ahensiya nga gigamit ni Jehova sa pagmando, ingong Soberano, sa tanan niyang linalang sa tibuok uniberso.
7. Nganong nagpatungha si Jehova ug bag-ong paagi sa pagmando?
7 Gipasundayag ni Jehova sa lainlaing paagi ang iyang pagkasoberano sa lainlaing panahon. Siya nagpatungha ug bag-ong paagi sa pagmando tungod sa bag-ong panghitabo. Kini nahitabo sa dihang ang rebelyoso nga espiritung anak sa Diyos, si Satanas, milampos sa paghaylo kang Adan ug Eva sa pagrebelde batok sa pagmando ni Jehova. Kadto maoy usa ka hagit sa pagkasoberano sa Diyos. Ngano man? Sa pagsulti kang Eva nga ‘dili gayod siya mamatay’ kon siya mokaon sa gidili nga bunga, si Satanas nagpasangil nga si Jehova dili matinud-anon ug busa dili kasaligan. Si Satanas midugang pa sa pag-ingon: “Nasayod ang Diyos nga sa mismong adlaw nga kamo mokaon gikan niini ang inyong mga mata mangabuka ug kamo mahisama sa Diyos, nga mahibalo sa maayo ug sa daotan.” Sumala pa ni Satanas mas moayo kono ang ilang kahimtang kon sila mosupak sa sugo sa Diyos ug motalikod kaniya. (Genesis 3:1-6) Kana maoy direktang paghagit sa katungod sa Diyos sa pagmando. Unsay gibuhat ni Jehova?
8, 9. (a) Unsay buhaton sa usa ka tawhanong magmamando kon may morebelde? (b) Unsay gibuhat ni Jehova sa dihang nahitabo ang pagrebelde sa Eden?
8 Unsay atong madahom nga buhaton sa usa ka magmamando kon may morebelde? Kadtong sinati sa kasaysayan lagmit makahinumdom ug pipila ka pananglitan. Inay pasagdan ang mga rebelde, sagad nga ang usa ka magmamando—bisan unsa pa ka maayo—maghukom gayod kanila nga sad-an sa pagbudhi sa nasod. Dayon, mahimong magtudlo siya ug usa nga maoy modakop sa mga rebelde ug mopasig-uli sa kalinaw. Sa samang paagi, gipakita ni Jehova nga kontrolado niya ang kahimtang pinaagi sa paghukom dayon sa mga rebelde. Iyang gihukman si Adan ug Eva nga dili takos sa gasa nga kinabuhing dayon ug Iyang gipapahawa sila sa tanaman sa Eden.—Genesis 3:16-19, 22-24.
9 Sa dihang gihukman ni Jehova si Satanas, iyang gibutyag ang bag-ong paagi sa pagmando nga maoy iyang gamiton sa pagpasig-uli sa kalinaw ug kahusay sa tibuok niyang dominyo. Ang Diyos miingon kang Satanas: “Ibutang ko ang panag-away tali kanimo ug sa babaye ug tali sa imong binhi ug sa iyang binhi. Siya magsamad kanimo sa ulo ug ikaw magsamad kaniya sa tikod.” (Genesis 3:15) Busa gipadayag ni Jehova nga katuyoan niya nga hatagan ug awtoridad ang “binhi” sa paglaglag kang Satanas ug sa iyang mga demonyo ug sa pagpamatuod nga matarong gayod ang Iyang pagmando.—Salmo 2:7-9; 110:1, 2.
10. (a) Kinsa ang “binhi”? (b) Unsay gisulti ni Pablo bahin sa katumanan sa unang tagna?
10 Sa ulahi, ang “binhi” nailhan nga mao si Jesu-Kristo ug ang kauban niyang mga magmamando. Sila naglangkob sa Mesiyanikong Gingharian. (Daniel 7:13, 14, 27; Mateo 19:28; Lucas 12:32; 22:28-30) Apan, kining tanan wala dayon ipadayag. Sa pagkatinuod, ang katumanan sa unang tagna nagpabilin nga “sagradong tinago nga gitipigan sa hilom sulod sa dugay nang kapanahonan.” (Roma 16:25) Sulod sa daghang siglo, ang mga tawo nga may pagtuo sa Diyos naghulat sa panahon nga ipadayag ang “sagradong tinago” ug matuman ang unang tagna nga magbindikar sa pagkasoberano ni Jehova.—Roma 8:19-21.
“Ang Sagradong Tinago” Anam-anam nga Gipadayag
11. Unsay gipahibalo ni Jehova kang Abraham?
11 Paglabay sa panahon, anam-anam nga gipadayag ni Jehova ang pipila ka bahin sa “sagradong tinago mahitungod sa gingharian sa Diyos.” (Marcos 4:11) Lakip sa mga tawong gipahibalo ni Jehova bahin niini mao si Abraham, nga gitawag sa Bibliya nga “higala ni Jehova.” (Santiago 2:23) Gisaaran ni Jehova si Abraham nga Siya ‘maghimo ug usa ka dakong nasod’ gikan kaniya. Sa ulahi, gipahibalo sa Diyos si Abraham nga ang ‘mga hari mogula gikan kaniya,’ ug ‘pinaagi sa iyang binhi ang tanang nasod sa yuta tinong magapanalangin sa ilang kaugalingon.’—Genesis 12:2, 3; 17:6; 22:17, 18.
12. Sa unsang paagi mitungha ang binhi ni Satanas human sa Lunop?
12 Sa panahon ni Abraham, ang mga tawo misulay na sa pagmando ug paggahom sa uban. Pananglitan, maylabot kang Nimrod nga apo sa tuhod ni Noe, ang Bibliya nag-ingon: “Siya ang nagsugod sa pagkahimong gamhanan diha sa yuta. Siya nagpadayag sa iyang kaugalingon nga usa ka gamhanang mangangayam nga supak kang Jehova.” (Genesis 10:8, 9) Tin-aw nga si Nimrod ug ang uban pang mga magmamando nga wala pilia ni Jehova daw mga kiko lamang sa kamot ni Satanas. Sila ug ang ilang mga tigpaluyo nahimong bahin sa binhi ni Satanas.—1 Juan 5:19.
13. Unsay gitagna ni Jehova pinaagi kang Jacob?
13 Bisan pa sa paningkamot ni Satanas sa pagpatungha ug tawhanong mga magmamando, si Jehova nagtuman gihapon sa iyang katuyoan. Pinaagi kang Jacob nga apo ni Abraham, si Jehova nagpadayag: “Ang setro dili mobiya gikan kang Juda, ni ang sungkod sa komandante gikan sa taliwala sa iyang mga tiil, hangtod nga moabot si Shilo; ug kaniya ang pagkamasinugtanon sa mga katawhan maiya.” (Genesis 49:10) Ang pulong “Shilo” nagkahulogang “Siya nga May Katungod; Siya nga Nanag-iya Niini.” Busa, kining matagnaong mga pulong nagpakita nga moabot ang usa nga may katungod sa pagdawat sa “setro,” o pagkasoberano, ug sa “sungkod sa komandante,” o pagmando, ibabaw sa ‘tanang katawhan.’ Kinsa Siya?
“Hangtod nga Moabot si Shilo”
14. Unsang pakigsaad ang gihimo ni Jehova uban kang David?
14 Sa mga kaliwat ni Juda, ang unang gipili ni Jehova nga mahimong hari sa iyang katawhan mao ang magbalantay nga si David, nga anak ni Jese. a (1 Samuel 16:1-13) Bisan pa sa iyang mga sala ug kasaypanan, si David giuyonan ni Jehova tungod kay maunongon siya sa pagmando ni Jehova. Sa paghatag ug dugang kahayag maylabot sa tagna sa Eden, si Jehova nakigsaad kang David, nga nag-ingon: “Ako magbangon gayod sa imong binhi sunod kanimo, nga mogula gikan sa imong kahiladmang mga bahin; ug tukoron ko gayod nga malig-on ang iyang gingharian.” Dili lang ang anak ug manununod ni David nga si Solomon ang gitumong niini, tungod kay ang pakigsaad nag-ingon: “Tukoron ko gayod nga malig-on ang trono sa iyang gingharian hangtod sa panahong walay tino.” Kini nga pakigsaad kang David nagpakita nga ang sinaad nga “binhi” sa Gingharian maggikan sa kaliwatan ni David.—2 Samuel 7:12, 13.
15. Nganong ikaingon nga ang gingharian sa Juda naghulagway sa Gingharian sa Diyos?
15 Si David ug ang mga hari nga mipuli kaniya gidihogan ug balaang lana. Busa sila matawag nga mga dinihogan, o mga mesiyas. (1 Samuel 16:13; 2 Samuel 2:4; 5:3; 1 Hari 1:39) Ang Bibliya nag-ingon nga sila milingkod sa trono ni Jehova ug nagmando ingong mga hari alang kang Jehova sa Jerusalem. (2 Cronicas 9:8) Niana nga diwa, ang gingharian sa Juda naghulagway sa Gingharian sa Diyos ug maoy usa ka instrumento aron ipasundayag ni Jehova ang iyang pagkasoberano.
16. Unsay resulta sa pagmando sa mga hari sa Juda?
16 Sa dihang ang hari ug ang katawhan magpasakop sa pagmando ni Jehova, sila makatagamtam sa Iyang proteksiyon ug panalangin. Sa paghari ni Solomon, naglungtad ang talagsaong kalinaw ug kauswagan. Kini naghulagway sa pagmando sa Gingharian sa Diyos sa dihang mawala na sa bug-os ang impluwensiya ni Satanas ug mabindikar na ang pagkasoberano ni Jehova. (1 Hari 4:20, 25) Ikasubo, ang kadaghanan sa mga hari nga kaliwat ni David wala mosubay sa sukdanan ni Jehova, ug ang mga tawo nahulog sa idolatriya ug imoralidad. Sa kataposan, gitugotan ni Jehova nga malaglag ang gingharian sa Juda sa kamot sa mga Babilonyanhon niadtong 607 W.K.P. Tungod niana, daw milampos si Satanas sa pagdaot sa pagkasoberano ni Jehova.
17. Unsay nagpakita nga si Jehova gihapon ang magmamando bisag napukan na ang Davidikong gingharian?
17 Ang pagkapukan sa Davidikong gingharian—ug ang naunang pagkapukan sa amihanang gingharian sa Israel—maoy pamatuod, dili sa kapakyasan sa pagmando ni Jehova, kondili sa mapait nga mga bunga sa impluwensiya ni Satanas ug sa pagbiya sa tawo gikan sa Diyos. (Proverbio 16:25; Jeremias 10:23) Aron pamatud-an nga siya gihapon ang magmamando, si Jehova nag-ingon pinaagi kang manalagnang Ezequiel: “Kuhaa ang purong, ug kuhaa ang korona. . . . Kagun-oban, kagun-oban, pagahimoon ko kini nga kagun-oban. Ug kon bahin niini usab, walay magapanag-iya niini hangtod nga moabot siya nga may legal nga katungod, ug ihatag ko kini kaniya.” (Ezequiel 21:26, 27) Kining mga pulonga nagpaila nga ang sinaad nga “binhi,” ang Usa nga “may legal nga katungod,” wala pa moabot.
18. Unsay gipahayag sa manulondang si Gabriel ngadto kang Maria?
18 Dayon, pagka 2 W.K.P., ang manulondang si Gabriel gipadala ngadto sa ulay nga si Maria nga taga-Nasaret—usa ka siyudad sa Galilea sa amihanang Palestina. Siya miingon: “Tan-awa! ikaw manamkon sulod sa imong tagoangkan ug manganak ug usa ka anak nga lalaki, ug pagatawgon mo ang iyang ngalan nga Jesus. Kini siya mahimong bantogan ug pagatawgong Anak sa Labing Hataas; ug ihatag kaniya ni Jehova nga Diyos ang trono ni David nga iyang amahan, ug magamando siya ingon nga hari sa balay ni Jacob hangtod sa kahangtoran, ug walay pagkatapos ang iyang gingharian.”—Lucas 1:31-33.
19. Sa pagkatawo ni Jesus, unsang kulbahinam nga panghitabo ang hapit nang matuman?
19 Sa kataposan, mabutyag na gayod ang “sagradong tinago.” Ang Usa nga maoy pangunang bahin sa sinaad nga “binhi” hapit nang motungha. (Galacia 4:4; 1 Timoteo 3:16) Siya pagasamaran ni Satanas sa tikod. Apan sa baylo, ang “binhi” magasamad sa ulo ni Satanas, nga maglaglag kaniya ug sa tanang midapig kaniya. Siya magpamatuod usab nga pinaagi sa Gingharian, ang Diyos magwagtang sa tanang kadaot nga gipahinabo ni Satanas ug magbindikar sa Iyang pagkasoberano. (Hebreohanon 2:14; 1 Juan 3:8) Sa unsang paagi kini himoon ni Jesus? Unsang panig-ingnan ang iyang gihatag nga angay natong sundogon? Pagatubagon kini sa sunod nga artikulo.
[Footnote]
a Si Saul nga unang gipili sa Diyos nga magmamando sa Israel naggikan sa tribo ni Benjamin.—1 Samuel 9:15, 16; 10:1.
Makapatin-aw Ka Ba?
• Nganong si Jehova ang may katungod nga magmando ingong Soberano sa uniberso?
• Nganong gitukod ni Jehova ang Gingharian?
• Sa unsang paagi anam-anam nga gipadayag ni Jehova “ang sagradong tinago”?
• Unsay nagpakita nga si Jehova gihapon ang magmamando bisag napukan na ang Davidikong gingharian?
[Mga Pangutana sa Pagtuon]
[Hulagway sa panid 23]
Unsay gitagna ni Jehova pinaagi kang Abraham?
[Hulagway sa panid 25]
Nganong ang pagkapukan sa Davidikong gingharian wala magpasabot nga napakyas ang pagmando ni Jehova?