May Bibliya ba si Jesus?

WALA. Nganong wala man? Tungod kay sa panahon ni Jesus wala pay kompletong Bibliya nga sama sa atong nabatonan karon. Apan, ang mga sinagoga nagtipig ug linukot nga mga basahon sa mga sinulat nga nahimong bahin sa atong Bibliya karon. Gibasa ni Jesus ang linukot nga basahon ni Isaias didto sa sinagoga sa Nasaret. (Lucas 4:16, 17) Si apostol Pablo naminaw sa “publikong pagbasa sa Balaod ug sa mga Manalagna” didto sa Antioquia sa Pisidia. (Buhat 13:14, 15) Dugang pa, ang tinun-ang si Santiago miingon nga ang mga sinulat ni Moises “ginabasa sa makusog diha sa mga sinagoga sa matag igpapahulay.”—Buhat 15:21.

Ang mga tawo ba sa unang siglo adunay personal nga kopya sa linukot nga mga basahon sa Balaang Kasulatan? Ang Etiopianhong eunuko sa palasyo ni Rayna Candace dayag nga aduna niana, kay siya “naglingkod sa iyang karo ug nagbasa sa makusog sa basahon sa manalagnang si Isaias” sa dihang nakita siya sa tinun-ang si Felipe diha sa dalan paingon sa Gaza. (Buhat 8:26-30) Gihangyo ni apostol Pablo si Timoteo nga dad-on “ang mga linukot nga basahon, ilabina ang mga pergamino.” (2 Timoteo 4:13) Bisag wala isulti ni Pablo kon unsang matanga kadto sa mga linukot nga basahon, lagmit mga bahin kadto sa Hebreohanong Kasulatan.

Si Alan Millard, nga propesor sa mga pinulongan sa mga Hudiyo, miingon nga “ang inilang mga tawo sa Palestina, ang mga edukado, pipila ka Pariseo ug mga magtutudlo sama kang Nicodemo” mao lamang ang dunay personal nga mga kopya sa linukot nga mga basahon sa Kasulatan. Ang usa ka hinungdan mao ang kamahal niini. Gibanabana ni Millard nga “ang usa ka kopya sa basahon ni Isaias mokantidad ug unom ngadto sa napulo ka denario” ug siya miingon nga ang kompletong Hebreohanong Bibliya “moabot ug 15 ngadto sa 20 ka linukot nga basahon,” o mobalor ug duolan sa katunga sa usa ka tuig nga suweldo.

Walay gisulti ang Bibliya kon si Jesus o ang iyang mga tinun-an nakabaton bag mga linukot nga basahon. Apan, dili-malalis nga si Jesus batid sa Kasulatan, nga makahimo sa pagkutlo o pagmemorya niini. (Mateo 4:4, 7, 10; 19:4, 5) Dili ba angay kining magpalihok kanato sa pagsinati usab sa Bibliya, sanglit kini sagad nga barato ra ug daling mabatonan?