Mga Pangutana Gikan sa mga Magbabasa

Unsay angay nga panglantaw sa usa ka Kristohanon bahin sa pagpangayam ug pagpangisda?

Wala idili sa Bibliya ang pagpangayam ug pagpangisda. (Deuteronomio 14:4, 5, 9, 20; Mateo 17:27; Juan 21:6) Bisan pa niana, angayng tagdon sa mga Kristohanon nga mangayam o mangisda ang pipila ka prinsipyo sa Bibliya.

Ang Diyos nagtugot kang Noe ug sa iyang mga kaliwat sa pagpatay ug pagkaon sa mga mananap, basta ila kining paagasag dugo una kaonon. (Genesis 9:3, 4) Kining sugoa nagpasiugda nga ang kinabuhi sa mananap angayng pabilhan tungod kay kini naggikan sa Diyos. Busa, ang mga Kristohanon dili mopatay ug mananap ingong lingawlingaw lamang o sa walay igong hinungdan.—Proverbio 12:10.

Aduna pay laing butang nga atong tagdon maylabot sa atong tinamdan. Ang mga apostoles nga mga mangingisda lagmit nalipay sa dihang sila daghag kuha. Apan, walay timailhan nga sila nanghambog sa ilang abilidad o sila nangisda aron makigkompetensiya sa uban, aron pamatud-an ang ilang pagkalalaki, o aron mobatig kaukyab.—Salmo 11:5; Galacia 5:26.

Busa, mahimong pangutan-on nato ang atong kaugalingon: ‘Ako ba usa ka maayong panig-ingnan sa pagpakitag pagtahod sa panglantaw ni Jehova sa kinabuhi? Ang pagpangayam ba o ang pagpangisda maoy kanunay nakong gihunahuna o gihisgotan? Ang ako bang paagi sa pagkinabuhi nagpakita nga mas bililhon kanako ang pagpangayam o ang pagpangisda kay sa pag-alagad sa Diyos? Mas nasuod ba ako sa mga dili-magtutuo o napasagdan ang akong pamilya tungod sa pagpangayam o pagpangisda?’—Lucas 6:45.

Sa pipila ka nasod, adunay panahon nga gitakda sa balaod alang sa pagpangayam o pagpangisda. Ang uban nga mangayam o mangisda alang sa pagkaon mobati tingali nga makataronganong ihiklin una ang espirituwal nga mga butang nianang panahona. Apan, kita nagpakita ug pagtuo ug pagsalig sa Diyos kon dili nato tugotan ang bisan unsa nga mobabag kanato sa pag-una sa kabubut-on sa Diyos. (Mateo 6:33) Dugang pa, ang mga Kristohanon motuman sa tanang balaod ni “Cesar” maylabot sa pagpangayam ug pagpangisda, gipatuman man kini sa mga awtoridad o wala.—Mateo 22:21; Roma 13:1.

Aron masunod ang panglantaw ni Jehova labot sa pagpangayam ug pagpangisda, kinahanglan tingaling bag-ohon sa uban ang ilang panghunahuna ug ipahiuyon kini sa mga sukdanan sa Diyos. (Efeso 4:22-24) Sa laing bahin, kinahanglang tahoron nato ang tanlag sa uban. Haom niining kahimtanga ang tambag ni apostol Pablo: “Dili na kita maghinukmanay sa usag usa, hinunoa himoa kini nga inyong desisyon, nga dili magbutang atubangan sa igsoon ug kapandolan.” (Roma 14:13) Ang pagpakitag dili-mahakogon nga gugma ug pagtahod makapatunhay sa kalinaw diha sa kongregasyon ug makapahimuot sa atong Magbubuhat, ang Tuboran sa tanang kinabuhi.—1 Corinto 8:13. a

[Footnote]