Aduna Ka bay Espirituwal nga Magtutudlo?

SA EDAD nga 16, si Uzzias nahimong hari sa habagatang gingharian sa Juda. Siya nagmando ug kapin sa 50 ka tuig, sukad sa 829 hangtod sa 778 W.K.P. Sukad sa pagkabata, si Uzzias “nagpadayon pagbuhat kon unsay matarong sa mga mata ni Jehova.” Unsay nakaimpluwensiya kaniya sa pagsunod sa matarong nga dalan? Ang asoy sa kasaysayan nag-ingon: “[Si Uzzias] padayong nakiling sa pagpangita sa Diyos sa mga adlaw ni Zacarias, ang magtutudlo diha sa pagkahadlok sa matuod nga Diyos; ug, sa mga adlaw sa iyang pagpangita kang Jehova, ang matuod nga Diyos naghimo kaniyang mauswagon.”—2 Cronicas 26:1, 4, 5.

Gawas niining asoya sa Bibliya, wala nay laing impormasyon nga naghisgot bahin kang Zacarias, ang magtatambag sa hari. Hinuon, ingong “ang magtutudlo diha sa pagkahadlok sa matuod nga Diyos,” si Zacarias adunay maayo kaayong impluwensiya sa batan-ong hari sa pagbuhat kon unsay matarong. Ang The Expositor’s Bible nag-ingon nga si Zacarias dayag nga “usa ka tawong sinati sa Kasulatan, daghag kasinatian bahin sa relihiyon, ug may katakos sa pagpaambit sa iyang kahibalo.” Usa ka eskolar sa Bibliya nakahinapos bahin kang Zacarias: “Sinati kaayo siya sa tagna ug . . . utokan, debotado, maayong tawo; ug, lagmit, adunay dakong impluwensiya kang Uzzias.”

Ang pagkamatinumanon ni Uzzias miresultag daghang panalangin, ug siya “nagpasundayag ug kusog sa talagsaon nga sukod” tungod kay “ang matuod nga Diyos nagpadayon sa pagtabang kaniya.” Oo, ang kalamposan sa iyang paghari nagdepende sa iyang malamposong pagsubay sa diyosnong dalan “sa mga adlaw ni Zacarias.” (2 Cronicas 26:6-8) Apan dihang nagmauswagon na pag-ayo si Uzzias, iyang gitalikdan ang mga pagtulon-an sa iyang magtutudlo nga si Zacarias. Ang “kasingkasing [ni Uzzias] nagmapahitas-on hangtod nga kini nagpahinabog kadaot.” Tungod sa usa ka mapangahasong buhat, siya gitaptan ug sanla mao nga wala na siya makahimo sa tanan niyang katungdanan ingong hari.—2 Cronicas 26:16-21.

Aduna ka bay magtutudlo nga nag-impluwensiya kanimo “sa pagpangita sa Diyos”? Mahimong aduna kay magtutudlo bisan kon batan-on ka pa o hamtong na, lalaki ka man o babaye. Mahala siya, tungod kay ang iyang tambag makatabang kanimo sa pagbuhat kanunay sa kon unsay matarong sa mga mata ni Jehova. Patalinghogi kining hamtong nga Kristohanon, ug pamalandonga pag-ayo ang iyang tambag. Hinaot dili nimo isalikway ang maalamong mga pulong sa maong “magtutudlo diha sa pagkahadlok sa matuod nga Diyos.”—Proverbio 1:5; 12:15; 19:20.