Andam Ka na ba Alang sa Adlaw ni Jehova?
Andam Ka na ba Alang sa Adlaw ni Jehova?
“Ang dakong adlaw ni Jehova haduol na. Kini haduol na, ug nagadali sa hilabihan.”—SOFONIAS 1:14.
1-3. (a) Unsay giingon sa Bibliya bahin sa adlaw ni Jehova? (b) Unsa ba kanang “adlaw ni Jehova” nga atong gipaabot?
ANG adlaw ni Jehova dili 24 oras. Kini maoy taas nga yugto nga sa maong panahon laglagon sa Diyos ang mga daotan. Ang mga dili diyosnon angayng mahadlok nianang maong adlaw sa kangitngit, mabangis ug nagsilaob nga kasuko, kasakitan, ug kagun-oban. (Isaias 13:9; Amos 5:18-20; Sofonias 1:15) “Pagkaalaot sa maong adlaw,” matod sa tagna ni Joel, “tungod kay ang adlaw ni Jehova haduol na, ug kini moabot sama sa usa ka paglaglag gikan sa Usa nga Labing Gamhanan!” (Joel 1:15) Apan, nianang dakong adlaw si Jehova mahimong usa ka Manluluwas sa mga “matul-id ug kasingkasing.”—Salmo 7:10.
2 Ang pamulong “adlaw ni Jehova” mapadapat sa pagpatuman sa paghukom sa Diyos sa lainlaing panahon. Pananglitan, midangat ang “adlaw ni Jehova” sa dihang iyang gigamit ang mga Babilonyanhon sa pagpatuman sa iyang hukom diha sa mga molupyo sa Jerusalem sa 607 W.K.P. (Sofonias 1:4-7) Ang susamang pagpatuman sa hukom sa Diyos nahitabo niadtong 70 K.P. sa dihang gigamit sa Diyos ang mga Romano aron ipatuman ang iyang hukom sa Hudiyohanong nasod nga nagsalikway sa iyang Anak. (Daniel 9:24-27; Juan 19:15) Ang Bibliya nagtagna usab ug usa ka “adlaw ni Jehova” sa dihang siya ‘makiggubat batok sa tanang kanasoran.’ (Zacarias 14:1-3) Ubos sa inspirasyon, gilangkit ni apostol Pablo kanang adlawa sa presensiya ni Kristo, nga nagsugod sa pagmando ni Jesus ingong langitnong Hari niadtong 1914. (2 Tesalonica 2:1, 2) Kay duol na kaayo ang adlaw ni Jehova, haom gayod ang tinuig nga teksto sa mga Saksi ni Jehova sa 2007. Kini mabasa sa Sofonias 1:14: “Ang dakong adlaw ni Jehova haduol na.”
3 Sanglit ang dakong adlaw sa Diyos haduol na, panahon na karon sa pagpamatuod nga ikaw andam na alang niana. Sa unsang paagi makapangandam ka alang nianang adlawa? May kinahanglan pa ba kang buhaton aron maandam alang sa adlaw ni Jehova?
Pamatud-i nga Ikaw Andam
4. Unsa ang dakong pagsulay nga gipangandaman ni Jesus?
4 Sa iyang tagna bahin sa kataposan sa sistema sa mga butang, giingnan ni Jesu-Kristo ang iyang mga tinun-an: ‘Pamatud-i ninyo nga kamo andam.’ (Mateo 24:44) Sa gipamulong kana ni Jesus, siya mismo andam na alang sa usa ka dakong pagsulay—ang iyang kamatayon ingong usa ka halad lukat. (Mateo 20:28) Unsay atong makat-onan gikan sa paagi sa pagpangandam mismo ni Jesus?
5, 6. (a) Sa unsang paagi makatabang kanato ang gugma alang sa Diyos ug sa mga tawo sa pagpangandam alang sa adlaw ni Jehova? (b) Bahin sa paghigugma sa silingan, unsang panig-ingnan ang gipakita ni Jesus?
5 Si Jesus nahigugma kang Jehova ug sa Iyang matarong nga mga sukdanan sa bug-os nga kasingkasing. Mahitungod kang Jesus, ang Hebreohanon 1:9 nag-ingon: “Gihigugma mo ang pagkamatarong, ug gidumtan mo ang pagkamalapason. Mao nga ang Diyos, ang imong Diyos, nagdihog kanimo sa lana sa kasadya labaw kay sa imong mga kauban.” Tungod kay iyang gihigugma ang iyang langitnong Amahan, si Jesus nagpabiling maunongon kaniya. Kon kita may susamang gugma alang sa Diyos ug nagtuman sa iyang mga kinahanglanon, siya magapanalipod kanato. (Salmo 31:23) Ang maong gugma ug pagkamasinugtanon makatabang kanato nga maandam alang sa dakong adlaw ni Jehova.
6 Ang gugma alang sa mga tawo maoy usa ka dayag kaayo nga bahin sa personalidad ni Jesus. Gani, “siya naluoy kanila, tungod kay sila pinanitan ug nagkatibuagsa sama sa mga karnero nga walay magbalantay.” (Mateo 9:36) Busa, giwali ni Jesus ang maayong balita ngadto sa mga tawo, sama ra nga ang gugma magdasig kanato sa pagmantala sa mensahe sa Gingharian ngadto sa atong mga silingan. Tungod sa gugma alang sa Diyos ug sa atong mga silingan kita magpadayong aktibo ingong Kristohanong mga ministro ug busa kita matabangan sa pagpangandam alang sa dakong adlaw ni Jehova.—Mateo 22:37-39.
7. Samtang nagpaabot kita sa adlaw ni Jehova, nganong mahimo kitang magmalipayon?
7 Si Jesus nalipay sa pagbuhat sa kabubut-on ni Jehova. (Salmo 40:8) Kon aduna kitay samang tinamdan, malipay kitang mohatag ug sagradong pag-alagad sa Diyos. Sama kang Jesus, kita mahimong manggihatagon, ug makalipay gayod kana kanato. (Buhat 20:35) Oo, “ang kalipay ni Jehova mao ang [atong] salipdanan.” Tungod sa maong kalipay, kita mas maandam alang sa dakong adlaw sa Diyos.—Nehemias 8:10.
8. Nganong angay kitang makigsuod kang Jehova pinaagi sa pag-ampo?
8 Ang tim-os nga pag-ampo sa Diyos nakatabang kang Jesus nga maandam alang sa mga pagsulay sa pagtuo. Nag-ampo siya sa dihang siya gibawtismohan ni Juan. Tibuok gabiing nag-ampo si Jesus sa pagpili niya sa iyang mga apostoles. (Lucas 6:12-16) Ug kinsa bay tigbasag Bibliya nga dili makadayeg sa kinasingkasing nga mga pag-ampo ni Jesus sa kataposang gabii sa iyang pagkinabuhi sa yuta? (Marcos 14:32-42; Juan 17:1-26) Kanunay ka bang mag-ampo sama kang Jesus? Sangpita kanunay si Jehova, ayaw pagdalidali sa pag-ampo, magpagiya sa balaang espiritu, ug sunda dayon ang giya niini sa dihang madayag na kini. Ang lig-ong relasyon uban sa atong langitnong Amahan hinungdanon kaayo niining makuyaw nga panahon sa dihang tuling nagsingabot ang dakong adlaw sa Diyos. Busa, ayaw paglangan sa pagpakigsuod kang Jehova pinaagi sa pag-ampo.—Santiago 4:8.
9. Nganong angay kitang maikag sa pagbalaan sa ngalan ni Jehova?
9 Ang kaikag ni Jesus bahin sa pagbalaan sa ngalan ni Jehova nakatabang usab kaniya nga maandam alang sa iyang mga pagsulay. Gani, iyang gitudloan ang iyang mga sumusunod nga ilakip sa ilang mga pag-ampo sa Diyos kini nga hangyo: “Pagabalaanon unta ang imong ngalan.” (Mateo 6:9) Kon dulot natong gitinguha nga mabalaan ang ngalan ni Jehova, paningkamotan gayod natong dili makabuhat ug bisan unsa nga makapasipala sa iyang ngalan. Ingong resulta, mahimong mas maandam kita alang sa dakong adlaw ni Jehova.
Angay Ka Bang Mohimog mga Kausaban?
10. Nganong nahiangay ang pagsusi sa atong pagkinabuhi?
10 Kon moabot na ugma ang adlaw ni Jehova, andam ka na ba gayod alang niana? Angayng susihon sa matag usa kanato ang iyang pagkinabuhi aron makita kon duna bay mga buhat o mga tinamdan nga angayng usbon. Tungod sa kamubo ug kawalay-piho sa kinabuhi sa tawo karon, ang matag usa kinahanglang magmaigmat sa espirituwal kada adlaw. (Ecclesiastes 9:11, 12; Santiago 4:13-15) Busa atong hisgotan ang pipila ka butang sa atong kinabuhi nga angay tingali natong tagdon.
11. Unsay imong tumong bahin sa pagbasa sa Bibliya?
11 Ang usa ka hinungdanong butang nga atong tagdon mao ang tambag sa ‘matinumanong ulipon’ nga basahon ang Bibliya kada adlaw. (Mateo 24:45) Tingali imong himoong tumong ang pagbasa ug pagpamalandong sa Kasulatan gikan sa Genesis hangtod sa Pinadayag kas-a kada tuig. Pinaagi sa pagbasag mga upat ka kapitulo kada adlaw, imong mabasa ang 1,189 ka kapitulo sa Bibliya sa usa ka tuig. Ang matag hari sa Israel gisugo sa pagbasa sa Balaod ni Jehova “sa tanang adlaw sa iyang kinabuhi.” Dayag nga si Josue nagbuhat usab niana. (Deuteronomio 17:14-20; Josue 1:7, 8) Pagkahinungdanon nga ang espirituwal nga mga magbalantay magbasa sa Pulong sa Diyos kada adlaw, kay kini makatabang kanila sa pagtudlo ug “makapahimsog nga pagtulon-an”!—Tito 2:1.
12. Tungod sa kaduol sa adlaw ni Jehova, angay kang madasig sa pagbuhat sa unsang mga kalihokan?
12 Ang kaduol sa adlaw ni Jehova angayng magdasig kanimo sa pagtambong kanunay sa Kristohanong mga tigom ug sa pagpakigbahin niana sa bug-os. (Hebreohanon 10:24, 25) Kana makatabang kanimo sa pagpauswag sa imong mga kahanas ingong magmamantala sa Gingharian sa pagpangita ug sa pagtabang sa mga tawong mahigugmaon sa pagkamatarong alang sa kinabuhing walay kataposan. (Buhat 13:48) Tingali mahimong mas aktibo ka diha sa kongregasyon sa ubang mga paagi usab, sama sa pagtabang sa mga tigulang ug pagdasig sa mga batan-on. Kini makapatagbaw gayod kanimo!
Imong Relasyon sa Uban
13. Unsang mga pangutana ang mahimo natong isukna sa atong kaugalingon bahin sa pagsul-ob sa bag-ong pagkatawo?
13 Sanglit nag-angat na ang adlaw ni Jehova, kinahanglan ka bang mas maningkamot sa ‘pagsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon’? (Efeso 4:20-24) Samtang imong ginaugmad ang diyosnong mga hiyas, lagmit makita sa uban nga ikaw ‘naglakaw pinaagi sa espiritu sa Diyos’ ug nagpasundayag sa mga bunga niini. (Galacia 5:16, 22-25) Ikaw ba ug ang imong pamilya may espesipikong gibuhat nga nagpakita nga kamo nagsul-ob sa bag-ong pagkatawo? (Colosas 3:9, 10) Pananglitan, nailhan ka ba tungod sa malulotong mga buhat ngadto sa mga isigkamagtutuo ug sa uban? (Galacia 6:10) Ang makanunayong pagtuon sa Kasulatan makatabang aron imong maugmad ang diyosnong mga hiyas nga mag-andam kanimo alang sa adlaw ni Jehova.
14. Nganong angayng mag-ampo ang usa ka tawo alang sa balaang espiritu samtang siya nagapaningkamot sa pag-ugmad sa pagpugong-sa-kaugalingon?
14 Unsa man kon ikaw masuk-anon ug nakasabot nga nagkinahanglan kag dugang pagpugong-sa-kaugalingon? Kana maoy usa ka hiyas nga ikapatungha sa balaang espiritu sa Diyos diha kanimo. Busa, pag-ampo alang sa balaang espiritu, nga nahiuyon sa mga pulong ni Jesus: “Padayon sa pagpangayo, ug kini igahatag kaninyo; padayon sa pagpangita, ug kamo makakaplag; padayon sa pagpanuktok, ug kini pagabuksan kaninyo. . . . Kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!”—Lucas 11:9-13.
15. Unsay angayng himoon kon may panagbingkil tali kanimo ug sa imong isigkamagtutuo?
15 Pananglitan may panagbingkil tali kanimo ug sa imong isigkamagtutuo. Nianang kahimtanga, paningkamoti gayod nga magkauliay kamo aron motunhay ang kalinaw ug panaghiusa diha sa kongregasyon. (Salmo 133:1-3) Ipadapat ang tambag ni Jesus nga natala sa Mateo 5:23, 24 o Mateo 18:15-17. Kon gipasalopan mo pa sa adlaw ang imong kasuko, husaya dayon kana. Kasagaran, ang gikinahanglan mao lamang ang kaandam sa pagpasaylo. Si Pablo misulat: “Magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa ingon nga ang Diyos usab pinaagi kang Kristo kinabubut-on nga nagpasaylo kaninyo.”—Efeso 4:25, 26, 32.
16. Sa unsang mga paagi ipakita ang pagkamabination diha sa panagtiayon?
16 Diha sa panagtiayon, ang bana ug asawa kinahanglang magpakitag pagkamabination ug pagkamapinasayloon. Kon kinahanglang pauswagon mo pa ang pagkamahigugmaon ug pagkamabination sa imong kapikas, paningkamoting mapauswag kini sa tabang sa Diyos ug sa iyang Pulong. May angay ka pa bang buhaton aron makatuman sa 1 Corinto 7:1-5 aron mamenosan ang di-pagsinabtanay ug malikayan ang pagluib sa kapikas? Usa gayod kini ka bahin sa kinabuhi nga ang bana ug asawa kinahanglang “magmalumo uban ang pagkamabination.”
17. Unsay angayng himoon kon ang usa nakahimog seryosong sala?
17 Apan komosta kon nakahimo kag seryosong sala? Lihok dayon aron matul-id kana. Pagpatabang sa Kristohanong mga ansiyano. Ang ilang mga pag-ampo ug tambag makatabang aron mapasig-uli ang imong maayong relasyon sa Diyos. (Santiago 5:13-16) Pag-ampo kang Jehova nga may mahinulsolong tinamdan. Kon dili nimo kini himoon, magpabilin ang imong pagbati sa pagkasad-an ug ang natugaw nga tanlag. Kana ang nasinati ni David, apan sa dihang iyang gisugid ang iyang mga sala kang Jehova, nahupayan gayod siya! Si David misulat: “Malipayon siya kansang kalapasan gipasaylo, kansang sala gitabonan. Malipayon ang tawo nga kaniya wala ipahamtang ni Jehova ang kasaypanan, ug sa iyang espiritu walay panglimbong.” (Salmo 32:1-5) Si Jehova magpasaylo sa mga makasala nga tim-os nga maghinulsol.—Salmo 103:8-14; Proverbio 28:13.
Pagpabiling Dili Bahin sa Kalibotan
18. Unsay imong panghunahuna bahin sa kalibotan?
18 Seguradong naghinamhinam ka nga nagpaabot sa kahibulongang bag-ong kalibotan nga gisaad sa atong langitnong Amahan. Nan, unsay imong panghunahuna bahin sa dili-matarong nga katawhan nga nahimulag sa Diyos? Si Satanas, “ang magmamando sa kalibotan,” dili makaarang sa paggahom kang Jesu-Kristo. (Juan 12:31; 14:30) Dili gayod nimo gusto nga ang Yawa ug ang iyang kalibotan maoy mogahom kanimo, busa tumana ang mga pulong ni apostol Juan: “Ayaw ninyo higugmaa ang kalibotan o ang mga butang nga anaa sa kalibotan.” Kana ang maalamong buhaton, kay “ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.”—1 Juan 2:15-17.
19. Unsang matang sa mga tumong ang giawhag alang sa Kristohanong mga batan-on?
19 Inyo bang ginatabangan ang inyong mga anak nga ‘magpabiling dili mahugawan sa kalibotan’? (Santiago 1:27) Buot ni Satanas nga ang inyong mga anak mabingwit samag isda. Ang nagkadaiyang mga klab ug mga organisasyon gituyo aron mahaylo ang mga batan-on nga mahimong bahin sa kalibotan ni Satanas. Apan nahisakop na ang mga alagad ni Jehova sa bugtong organisasyon nga magpabilin inigkalaglag niining daotang sistema sa mga butang. Busa angayng dasigon ang Kristohanong mga batan-on nga ‘magmapuliki diha sa buluhaton sa Ginoo.’ (1 Corinto 15:58) Kinahanglang tabangan sa Kristohanong mga ginikanan ang ilang mga anak sa pagbaton ug mga tumong nga makahatag kanilag malipayon ug matagbawong kinabuhi nga magpasidungog sa Diyos ug makatabang kanila nga maandam alang sa adlaw ni Jehova.
Tan-awa ang Liwas sa Dakong Adlaw ni Jehova
20. Nganong angay natong hunahunaon kanunay ang kinabuhing walay kataposan?
20 Makapaabot ka sa adlaw ni Jehova nga dili makuyawan kon kanunay kang nagahunahuna sa kinabuhing walay kataposan. (Judas 20, 21) Mahinamon kang nagpaabot sa kinabuhing dayon sa Paraiso, mao nga imong gilaoman nga mapasig-uli ang batan-ong kabaskog ug way-kinutbanang panahon aron sa pagpangagpas ug mapuslanong mga tumong ug dugang makakat-on bahin kang Jehova. Sa pagkatinuod, makapadayon ka sa pagkakat-on bahin sa Diyos sa walay kataposan tungod kay ang nahibaloan karon sa mga tawo maoy “kadaplinan lamang sa iyang mga dalan.” (Job 26:14) Pagkalalim nga mga palaaboton!
21, 22. Unsang pagbayloay ug impormasyon ang mahitabo tali kanimo ug sa mga binanhaw?
21 Sa Paraiso, ang mga binanhaw makahatag ug dugang detalye sa atong kahibalo bahin sa nangaging panahon. Atua unya didto si Enoc sa pagsaysay kon nganong siya nakabaton ug kaisog sa pagmantala sa mensahe ni Jehova batok sa mga tawong dili diyosnon. (Judas 14, 15) Seguradong iasoy ni Noe kon giunsa pagtukod ang arka. Makabutyag unya si Abraham ug Sara sa ilang gibati sa ilang pagbiya sa hamugaway nga kinabuhi sa Ur ug pagpuyo sa mga tolda. Hunahunaa si Ester nga nagsaysay kon giunsa niya paglaban sa iyang katawhan ug pagpakyas sa daotang laraw ni Haman batok kanila. (Ester 7:1-6) Handurawa si Jonas nga nag-asoy nga didto siya sa tiyan sa dakong isda sulod sa tulo ka adlaw o si Juan Bawtista nga nagbatbat kon unsay iyang gibati sa dihang iyang gibawtismohan si Jesus. (Lucas 3:21, 22; 7:28) Pagkadaghan pang makaiikag nga mga butang nga angayng masayran!
22 Sulod sa Usa ka Libo ka Tuig nga Pagmando ni Kristo, makahigayon ka sa pagtabang sa mga binanhaw aron ilang mabatonan “ang mismong kahibalo sa Diyos.” (Proverbio 2:1-6) Karon, makalipay kaayo nga adunay mga tawong nagkuhag kahibalo bahin kang Jehova nga Diyos ug nagpadapat niana! Apan pagkadako unya sa imong kalipay sa umaabot nga panahon sa dihang panalanginan ni Jehova ang imong mga paningkamot sa pagtudlo sa mga tawo sa kakaraanan ug sila mosanong nga mapasalamaton!
23. Unsay gitinguha natong buhaton?
23 Tungod sa pagkadili-hingpit dili gayod kita arang makatala o makabatbat sa mga kaayohan nga atong gipahimuslan karon ingong katawhan ni Jehova. (Salmo 40:5) Ilabinang mapasalamaton kita sa espirituwal nga mga tagana sa Diyos. (Isaias 48:17, 18) Bisag unsa pay atong kahimtang, bug-os-kasingkasing kitang mag-alagad samtang nagpaabot kita sa dakong adlaw ni Jehova.
Unsay Imong Tubag?
• Unsa ang “adlaw ni Jehova”?
• Sa unsang paagi maandam ka alang sa adlaw ni Jehova?
• Kay duol na kaayo ang dakong adlaw sa Diyos, unsang mga kausaban ang kinahanglan tingali natong pagahimoon?
• Unsay mahinamon nimong gipaabot kon matapos na ang adlaw ni Jehova?
[Mga Pangutana sa Pagtuon]
[Hulagway sa panid 12]
Si Jesus andam gayod sa mga pagsulay
[Hulagway sa panid 15]
Pagkadakong pribilehiyo ang pagtabang sa mga binanhaw aron sila mahibalo bahin kang Jehova!