“Barog nga Malig-on ug Tan-awa ang Kaluwasan ni Jehova”
“Barog nga Malig-on ug Tan-awa ang Kaluwasan ni Jehova”
“Si Jehova dapig kanako; dili ako mahadlok. Unsay arang mabuhat sa yutan-ong tawo kanako?”—SALMO 118:6.
1. Unsang umaabot nga malaglagong mga panghitabo ang hapit nang masinati sa katawhan?
HAPIT nang masinati sa katawhan karon ang malaglagon gayong mga panghitabo nga wala pa sukad mahitabo. Gitagna kini ni Jesus alang sa atong adlaw sa dihang siya nagpasidaan sa iyang mga sumusunod: “Aduna unyay dakong kasakitan nga ang ingon niana wala pa mahitabo sukad sa sinugdan sa kalibotan hangtod karon, ug dili na gayod mahitabo pa. Sa pagkatinuod, gawas kon kanang mga adlawa pamub-on, walay unod nga maluwas; apan tungod sa mga pinili kanang mga adlawa pagapamub-on.”—Mateo 24:21, 22.
2. Nganong wala pa modangat ang dakong kasakitan?
2 Bisag dili makita sa mga mata sa tawo, kanang dakong kasakitan ginapugngan karon sa mga manulonda. Nasabtan ni apostol Juan ang hinungdan sa pagpugong niini diha sa usa ka pagpadayag nga gihatag ni Jesus kaniya. Kini ang gihubit sa tigulang nga apostoles: “Nakita ko ang upat ka manulonda nga nagbarog diha sa upat ka suok sa yuta, nga hugot nga nagkupot sa upat ka hangin sa yuta . . . Ug nakita ko ang laing manulonda nga mikayab gikan sa silangan sa adlaw, nga adunay timbre sa buhing Diyos; ug sa makusog nga tingog siya misinggit ngadto sa upat ka manulonda . . . ‘Ayaw daota ang yuta o ang dagat o ang mga kahoy, hangtod nga ang mga ulipon sa atong Diyos amo nang matimbrehan diha sa ilang mga agtang.’”—Pinadayag 7:1-3.
3. Unsa unya ang unang bahin sa dakong kasakitan?
3 Duol nang matapos ang pagtimbre sa dinihogang “mga ulipon sa atong Diyos.” Andam nang buhian sa upat ka manulonda kanang malaglagong mga hangin. Sa dihang buhian nila kana, unsa unyay mahitabo? Gitubag kana sa usa ka manulonda: “Sa ingon niini ka tulin nga pagtambog nga ang dakong siyudad sa Babilonya igatambog, ug siya dili na gayod igkita pa.” (Pinadayag 18:21) Aduna unyay kasadya sa mga langit inigkahitabo niini, sa dihang malaglag na ang tibuok-kalibotan nga imperyo sa bakak nga relihiyon!—Pinadayag 19:1, 2.
4. Unsang mga panghitabo ang anaa sa unahan?
4 Magkahiusa unya ang tanang nasod batok sa katawhan ni Jehova. Molampos ba ang mga nasod sa pagpuo nianang matinumanong mga Kristohanon? Maorag molampos sila. Apan tan-awa! Segurohon sa langitnong kasundalohan nga nagsunod kang Kristo Jesus nga malaglag kining tawhanong mga puwersa. (Pinadayag 19:19-21) Sa kataposan, ang Yawa ug ang iyang mga manulonda igatambog ngadto sa simbolikong kahiladman diin dili na sila makalihok. Dili na sila makalimbong sa mga tawo kay sila pagagaposon sulod sa usa ka libo ka tuig. Makapahupay gayod kana sa dakong panon nga nakalabang buhi!—Pinadayag 7:9, 10, 14; 20:1-3.
5. Unsang kalipay ang gipaabot sa mga magpabiling maunongon kang Jehova?
5 Duol na kitang makasinati niining kahibulongan ug makapahingangha kaayong mga panghitabo. Kanang tanan nalangkit sa pagbayaw sa katungod ni Jehova nga magmando, sa iyang pagkasoberano sa uniberso. Ug palandonga kini: Kon kita magpabiling maunongon kang Jehova ug mobarog nga malig-on dapig sa iyang pagkasoberano, makabaton kitag higayon sa pagpakigbahin sa pagbalaan sa ngalan ni Jehova ug pagtuman sa iyang katuyoan. Dili gayod ikabatbat nga kalipay kana!
6. Tungod sa nagsingabot nga mga panghitabo, unsay atong hisgotan?
6 Andam na ba kita alang nianang hinungdanong mga panghitabo? Nagtuo ba kita sa gahom ni Jehova sa pagluwas? Masaligon ba kita nga siya motabang kanato sa hustong panahon ug sa labing maayong paagi? Sa pagtubag nianang mga pangutanaha, atong hinumdoman ang gisulti ni apostol Pablo ngadto sa iyang mga isigka-Kristohanon sa Roma: “Ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.” (Roma 15:4) Nahilakip sa mga butang nga gisulat alang sa pagtudlo kanato nga makahatag kanatog paghupay ug paglaom mao ang bahin sa pagluwas ni Jehova sa mga Israelinhon gikan sa mabangisong pag-ulipon kanila sa mga Ehiptohanon. Ang pagsusi nianang makapaukyab nga mga panghitabo dihang gimaniobra ni Jehova ang kahimtang aron maluwas ang mga anak sa Israel makapadasig pag-ayo kanato samtang nagpaabot kita sa tuling nagsingabot nga dakong kasakitan.
Giluwas ni Jehova ang Iyang Katawhan
7. Niadtong 1513 W.K.P., unsang makuyaw nga kahimtang ang nasinati sa Ehipto?
7 Kadto maoy tuig 1513 W.K.P. Gipahamtang na ni Jehova ang siyam ka hampak batok sa mga Ehiptohanon. Human sa ikasiyam nga hampak, giabog ni Paraon si Moises pinaagi sa mga pulong: “Pahawa gikan kanako! Pagbantay sa imong kaugalingon! Ayaw sulayi nga makita pag-usab ang akong nawong, tungod kay sa adlaw nga imong makita ang akong nawong ikaw mamatay.” Niini si Moises miingon: “Sa ingon niana ikaw misulti. Dili ko na sulayan pa nga makita ang imong nawong.”—Exodo 10:28, 29.
8. Unsay gisugo sa mga Israelinhon aron maluwas sila, ug unsay resulta?
8 Unya gibutyag ni Jehova kang Moises nga may usa pa ka dako ug kataposang hampak batok kang Paraon ug sa tanang Ehiptohanon. Sa ika-14 sa Abib (Nisan) ang panganay sa tanang Ehiptohanong lalaki ug hayop mamatay. Apan ang Israelinhong mga panimalay makalingkawas pinaagi sa pagsunod pag-ayo sa mga sugo sa Diyos nga gihatag kang Moises. Kinahanglan silang magwisik ug diyutayng dugo sa laking nating karnero sa duha ka poste ug sa ibabaw nga bahin sa pultahan sa ilang mga balay ug magpabilin sa sulod. Unsay nahitabo niadtong gabhiona? Ipaasoy nato kana ni Moises: “Nahitabo nga sa pagkatungang gabii gihampak ni Jehova ang tanang panganay sa yuta sa Ehipto.” Milihok dayon si Paraon. Iyang gipatawag si Moises ug si Aaron ug giingnan sila: “Bangon kamo, pahawa gikan sa taliwala sa akong katawhan, . . . ug lakaw, alagara ninyo si Jehova, sumala sa inyong gipahayag.” Ug nanglakaw dayon ang mga Israelinhon, nga lagmit kapin sa tulo ka milyon kanila uban ang di-maihap nga “dakong nagkasagol nga panon sa katawhan” nga mga dili-Israelinhon.—Exodo 12:1-7, 29, 31, 37, 38.
9. Agi sa unsang ruta gitultolan sa Diyos ang Israel sa paggawas sa Ehipto, ug ngano?
9 Ang kinadul-ang ruta nga angayng subayon sa mga Israelinhon mao ang daplin sa Dagat Mediteranyo ug latas sa yuta sa mga Filistehanon. Apan kana maoy teritoryo sa mga kaaway. Busa, aron makalikay ang iyang katawhan sa pagpakiggubat, sila gitultolan ni Jehova agi sa kamingawan ubay sa Pulang Dagat. Bisan pag naglakaw nga samag nagmartsa ang milyonmilyong tawo, wala sila magkagubot. Ang talaan sa Bibliya nag-ingon: “Nahan-ay alang sa gubat nga ang mga anak sa Israel migawas sa yuta sa Ehipto.”—Exodo 13:17, 18.
“Tan-awa ang Kaluwasan ni Jehova”
10. Nganong gisugo sa Diyos ang Israel sa pagkampo atubangan sa Pihahirot?
10 Unya, nahitabo ang katingad-anang butang. Si Jehova miingon kang Moises: “Sultihi ang mga anak sa Israel, nga kinahanglan silang mamalik ug magkampo atubangan sa Pihahirot taliwala sa Migdol ug sa dagat nga malantaw sa Baal-zepon.” Sa dihang gisunod nila ang maong sugo, nadiskobrehan nila nga nataliwad-an na silag mga bukid ug sa luok sa Pulang Dagat. Maorag wala na silay kalutsan. Apan nahibalo si Jehova sa iyang gibuhat. Gisultihan niya si Moises: “Akong tugotan nga mogahi ang kasingkasing ni Paraon, ug siya tinong mogukod kanila ug ako makabaton ug himaya alang sa akong kaugalingon pinaagi kang Paraon ug sa tanan niyang kasundalohan; ug ang mga Ehiptohanon makaila gayod nga ako mao si Jehova.”—Exodo 14:1-4.
11. (a) Unsay gihimo ni Paraon, ug unsay gibati sa mga Israelinhon? (b) Unsay tubag ni Moises sa mga reklamo sa Israel?
11 Kay mibati si Paraon nga siya nasayop sa pagtugot sa mga Israelinhon sa paggawas sa Ehipto, iyang gigukod sila uban ang 600 ka piniling mga karo nga iggugubat. Sa nalantawan na sa mga Israelinhon ang kasundalohan sa Ehipto, sila nangalisang ug misinggit kang Moises: “Tungod ba kay walay mga lubnganan sa Ehipto nga ikaw nagdala kanamo dinhi aron mangamatay sa kamingawan?” Tungod kay may pagsalig si Moises nga luwason sila ni Jehova, siya mitubag: “Ayaw kamo kahadlok. Barog nga malig-on ug tan-awa ang kaluwasan ni Jehova, nga iyang himoon alang kaninyo karong adlawa. . . . Si Jehova makig-away alang kaninyo, ug maghilom kamo.”—Exodo 14:5-14.
12. Sa unsang paagi mitabang si Jehova sa iyang katawhan?
12 Ingong katumanan sa mga pulong ni Moises nga si Jehova mismo ang makig-away alang sa mga Israelinhon, ang labaw-tawhanong mga puwersa mao na karon ang misalga. Ang haligi nga panganod nga nag-una sa kampo sa Israel milagrosong gibalhin sa manulonda ni Jehova sa ilang luyo. Samtang kadto naghatag ug kangitngit alang sa mga Ehiptohanon, ang maong haligi mismo naghatag ug kahayag sa mga Israelinhon. (Exodo 13:21, 22; 14:19, 20) Sa pagsunod sa sugo sa Diyos, gituy-od ni Moises ang iyang bukton. Ang asoy nagkanayon: “Si Jehova nagpabalik sa dagat pinaagi sa usa ka makusog nga hangin nga timog sa tibuok gabii . . . Unya ang mga anak sa Israel milatas sa taliwala sa dagat sa mamalang yuta, samtang ang katubigan nahimong paril nila sa ilang tuo ug sa ilang wala.” Mipadayon paggukod ang mga Ehiptohanon, apan si Jehova diha sa kiliran sa iyang katawhan. Gigubot niya ang kampo sa mga Ehiptohanon, ug dayon iyang gisultihan si Moises: “Ituy-od ang imong kamot sa ibabaw sa dagat, aron mobalik ang mga tubig ibabaw sa mga Ehiptohanon, sa ilang mga karo nga iggugubat ug sa ilang mga sundalong mangangabayo.” Bug-os nalaglag ang kasundalohan ni Paraon nga walay bisan usa ang nahibiling buhi!—Exodo 14:21-28; Salmo 136:15.
Mga Leksiyon Gikan sa Kaluwasan sa Israel
13. Unsay sanong sa mga anak sa Israel sa dihang naluwas sila?
13 Unsa man ang epekto niadtong milagrosong pagluwas diha sa mga tawong naluwas? Aw, kalit miawit si Moises ug ang mga anak sa Israel aron dayegon si Jehova! Sila miawit: “Paawita ako kang Jehova, kay siya nahimong binayaw kaayo. . . . Si Jehova magmando ingong hari hangtod sa panahong walay tino, bisan hangtod sa kahangtoran.” (Exodo 15:1, 18) Oo, ang una nilang nahunahunaan mao ang pagbayaw sa Diyos. Sa maong paagi napasundayag ang pagkasoberano ni Jehova.
14. (a) Unsay atong makat-onan bahin kang Jehova gikan sa kasinatian sa Israel? (b) Unsa ang tinuig nga teksto alang sa 2008?
14 Unsang pagtulon-an, paghupay, ug paglaom ang atong mabatonan gikan niining kulbahinam nga mga panghitabo? Masabtan gayod nato nga si Jehova makadumala sa bisan unsang pagsulay nga mahiagoman sa iyang katawhan. Makontrolar niya ang bisan unsang kahimtang nga ilang maatubang. Ang Pulang Dagat wala makababag sa Israel sa dihang gipahuros ni Jehova ang makusog nga hanging timog. Ug iyang gipahinabo nga ang katubigan sa Pulang Dagat mahimong lubnganan alang sa kasundalohan ni Paraon. Samtang palandongon nato kini, makasulti usab kita sa mga pulong sa salmista: “Si Jehova dapig kanako; dili ako mahadlok. Unsay arang mabuhat sa yutan-ong tawo kanako?” (Salmo 118:6) Mahupayan usab kita sa mga pulong ni Pablo sa Roma 8:31: “Kon ang Diyos dapig kanato, kinsa ang batok kanato?” Kining inspiradong mga pulong makahatag gayod kanatog dakong pagsalig! Ang atong mga kahadlok ug pagduhaduha mahimong mahupay ug kita mahupong sa paglaom. Nan, tukma gayod ang atong tinuig nga teksto alang sa 2008: “Barog nga malig-on ug tan-awa ang kaluwasan ni Jehova”!—Exodo 14:13.
15. Unsa ka hinungdanon ang pagkamasinugtanon diha sa kaluwasan sa Israel gikan sa Ehipto, ug unsa ka hinungdanon usab kini karon?
15 Unsa pay atong makat-onan gikan sa paggawas sa Israel sa Ehipto? Kinahanglan kitang mosugot kang Jehova bisan kon unsay iyang isugo kanato. Masinugtanong gituman sa mga Israelinhon ang detalyadong mga pagpangandam alang sa Paskuwa. Masinugtanon silang nagpabilin sulod sa balay sa gabii sa Nisan 14. Sa dihang sa kataposan mibiya na sila sa Ehipto, sila migawas nga “nahan-ay alang sa gubat.” (Exodo 13:18) Karong adlawa, hinungdanon kaayong sundon nato ang giya nga gikan sa “matinumanon ug maalamong ulipon”! (Mateo 24:45) Kinahanglan kitang magpatalinghog pag-ayo sa pulong sa Diyos, nga nag-ingon: “‘Mao kini ang dalan. Lakaw kamo niini,’ kon kamo moadto sa tuo o kon kamo moadto sa wala.” (Isaias 30:21) Samtang nagkaduol kita sa pag-ulbo sa dakong kasakitan, posibleng makadawat kitag detalyadong mga instruksiyon. Aron makalabang kita nianang masamokong mga adlaw, kinahanglang mopadayon kita sa paglakaw nga nahiusa sa ubang maunongong mga alagad ni Jehova.
16. Unsay atong makat-onan gikan sa paagi sa pagmaniobra sa Diyos sa kahimtang aron maluwas ang mga Israelinhon?
16 Hinumdomi nga giusab ni Jehova ang ruta sa mga Israelinhon mao nga sila nabutang sa kahimtang nga maorag natanggong sila taliwala sa mga bukid sa usa ka kiliran ug sa Pulang Dagat sa pikas nga kiliran. Kadto maorag sayop nga lakang. Apan kontrolado ni Jehova ang tanang butang, ug milampos kadto sa iyang kadayegan ug sa kaluwasan sa iyang katawhan. Karong adlawa, mahimong dili kita makasabot sa paagi sa pagdumala sa pipila ka kahikayan, apan bug-os kitang nagsalig sa paggiya ni Jehova pinaagi sa iyang matinumanon ug maalamong ulipon ingong paagi sa komunikasyon. May mga higayon nga maorag nagmadaogon ang atong mga kaaway. Kay limitado ra man ang atong panglantaw, mahimong dili kita makasabot sa tanang butang nga nalangkit niana. Bisan pa niana, si Jehova may katakos sa pagmaniobra sa mga butang sa hustong gutlo, sama sa iyang gihimo niadto alang sa mga anak sa Israel.—Proverbio 3:5.
Magmasaligon Kang Jehova
17. Nganong bug-os kitang makasalig sa paggiya sa Diyos?
17 Mahanduraw mo ba ang pagkamasaligon sa mga Israelinhon sa dihang nahinumdom sila niadtong haliging panganod sa maadlaw ug sa haliging kalayo sa magabii? Ebidensiya kadto nga “ang manulonda sa matuod nga Diyos” naggiya sa ilang panaw. (Exodo 13:21, 22; 14:19) Karong adlawa, makasalig kita nga si Jehova nagauban sa iyang katawhan aron giyahan, panalipdan, ug luwason sila. Makasalig kita niini nga saad: “Dili niya [Jehova] pagabiyaan ang mga maunongon kaniya. Sila pagabantayan hangtod sa panahong walay tino.” (Salmo 37:28) Dili gayod nato kalimtan nga ang gamhanang mga manulonda mao ang nagatabang sa mga alagad sa Diyos karon. Tungod sa ilang tabang, kita ‘makabarog nga malig-on ug makatan-aw sa kaluwasan ni Jehova.’—Exodo 14:13.
18. Nganong kinahanglan natong “isul-ob ang kompletong armadura gikan sa Diyos”?
18 Unsay makapaarang kanatong tanan sa ‘pagbarog nga malig-on’ sa kamatuoran? Ang pagsul-ob sa espirituwal nga armadura nga gihubit ni Pablo diha sa iyang sulat ngadto sa mga taga-Efeso. Matikdi nga siya nagtambag kanato nga “isul-ob ang kompletong armadura gikan sa Diyos.” Nagsul-ob ba kita sa tanang bahin sa espirituwal nga armadura? Sa sunod nga tuig, maalamong susihon sa matag usa ang iyang kaugalingon aron maseguro nga ang tanang bahin sa maong armadura anaa sa hustong dapit ug maayong pagkabutang. Ang atong kaaway, si Satanas nga Yawa, nahibalo sa atong mga kahuyangan, ug naningkamot nga masakpan kitang wala magbantay o atakehon ang mahuyang natong bahin. Kita adunay “pakigdumog” batok sa daotang mga puwersa nga espirituhanon. Bisan pa niana, sa kusog ni Jehova, kita mahimong molampos sa paghupot sa atong integridad!—Efeso 6:11-18; Proverbio 27:11.
19. Kon molahutay kita, unsang pribilehiyo ang mahimo natong masinati?
19 Si Jesus miingon ngadto sa iyang mga sumusunod: “Pinaagi sa paglahutay sa inyong bahin mabatonan ninyo ang inyong mga kalag.” (Lucas 21:19) Hinaot maapil kita niadtong matinumanong makaantos sa mga kalisdanan nga ila tingaling sagubangon ug busa makapribilehiyo nga ‘makabarog nga malig-on ug makatan-aw sa kaluwasan ni Jehova’ tungod sa dili-takos nga kalulot sa Diyos.
Unsay Imong Tubag?
• Unsang kulbahinam nga mga panghitabo ang haduol na?
• Sa unsang paagi gipasundayag ni Jehova ang iyang gahom sa pagluwas niadtong 1513 W.K.P.?
• Unsay determinado nimong buhaton sa umaabot?
[Mga Pangutana sa Pagtuon]
[Blurb sa panid 20]
Ang tinuig nga teksto alang sa 2008 mao: “Barog nga malig-on ug tan-awa ang kaluwasan ni Jehova.”—Exodo 14:13.
[Hulagway sa panid 17]
“Ang tanang butang nga gisulat kanhi gisulat alang sa pagtudlo kanato”
[Hulagway sa panid 18]
Ang pagkagahian ni Paraon maoy hinungdan sa katalagman sa Ehipto
[Hulagway sa panid 19]
Naluwas ang Israel sa dihang gituman nila ang tanan nga gisugo ni Jehova kanila