“Magmabination Uban ang Kalumo”

ANG atong mga isigkatawo mas nanginahanglan gayod ug mabinationg tabang karon kay sukad masukad samtang ilang naagoman ang kagutom, sakit, kakabos, krimen, kagubot sa katilingban, ug kinaiyanhong mga katalagman. Ang pagkamabination nagpasabot ug may-simpatiyang kaamgohan sa pag-antos o kasakitan sa laing tawo uban ang tinguha nga mahupayan kana. Sama sa makapalagsik nga kahayag sa adlaw, ang pagkamabination makahupay sa kaguol ug kasakit sa usa ka tawo, ug makadasig kaniya.

Makapakita kitag pagkamabination pinaagi sa atong linihokan ug sinultihan—nga andam sa pag-atiman ug pagtabang sa uban kon sila manginahanglan kanato. Magmabination kita dili lamang sa atong pamilya, mga higala, ug mga kaila. Mahimong ikapasundayag nato kini bisan ngadto sa mga dili nato kaila. Sa iyang Wali sa Bukid, si Jesu-Kristo nangutana: “Kon inyong higugmaon sila nga nahigugma kaninyo, unsa may inyong ganti?” Miingon usab siya: “Busa, ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.”—Mateo 5:46, 47; 7:12.

Mabasa nimo kining mga pulonga, nga nailhang Bulawanong Lagda, diha sa Balaang Kasulatan. Daghan ang mouyon nga kon bahin sa pagpakitag pagkamabination, Bibliya ang kinamaayohang giya. Sublisubling gipahayag sa Kasulatan ang atong obligasyon sa pagtabang niadtong dili makatabang sa ilang kaugalingon tungod sa bisan unsang hinungdan. Gipaila sa Bibliya ang Awtor niini ug atong Maglalalang, si Jehova nga Diyos, ingong kinalabwang panig-ingnan sa pagkamabination.

Pananglitan, atong mabasa: “[Ang Diyos] nanalipod sa katungod sa mga batang ilo ug mga babayeng balo. Siya nag-atiman sa mga langyaw ug nagpakaon ug nagbesti kanila.” (Deuteronomio 10:18, Contemporary English Version) Si Jehova nga Diyos gihubit ingong “nagapahamtang ug paghukom alang sa mga gitikasan, ang Usa nga nagahatag ug tinapay sa mga gigutom.” (Salmo 146:7) Kon bahin sa kabos nga langyawng mga pumoluyo, si Jehova mimando: “Ang langyaw nga pumoluyo . . . kinahanglang mahisama sa lumad taliwala kaninyo; ug higugmaon mo siya ingon sa imong kaugalingon.”—Levitico 19:34.

Apan ang pagpakitag pagkamabination dili kanunayng sayon. Si apostol Pablo misulat ngadto sa mga Kristohanon sa Colosas: “Hukasa ang daang pagkatawo uban ang mga buhat niini, ug isul-ob ang bag-ong pagkatawo, nga pinaagi sa tukmang kahibalo gibag-o sumala sa larawan sa Usa nga naglalang niini . . . Ingon nga mga pinili sa Diyos,  balaan ug hinigugma, isul-ob ninyo ang malumong mga pagmahal sa pagkamabination.”—Colosas 3:9, 10, 12.

Busa, nagkinahanglag paningkamot ang pag-ugmad sa pagkamabination. Kanang hiyasa maoy bahin sa “bag-ong pagkatawo” nga kinahanglang isul-ob sa mga Kristohanon. Si Pablo nagkinabuhi sa mabangis nga kalibotan sa karaang Roma. Iyang gidasig ang iyang mga isigkamagtutuo sa paghimog dagkong mga kausaban sa ilang pagkatawo aron sila mahimong mas mabination.

Ang Gahom sa Pagkamabination

Nagtuo ang uban nga huyang kadtong nagpakitag pagkamabination. Apan husto ba kana?

Dili gayod! Ang gahom nga nagpaluyo sa tinuod nga pagkamabination mao ang halawom nga gugma nga naggikan sa Diyos, ang kinalabwang panig-ingnan nianang hiyasa. “Ang Diyos gugma.” (1 Juan 4:16) Si Jehova hustong matawag nga “ang Amahan sa malumong mga kaluoy ug ang Diyos sa tanang paghupay.” (2 Corinto 1:3) Ang pamulong nga gihubad ug “malumong mga kaluoy” sa panguna nagkahulogan ug “pagkamabination alang sa kasakit sa uban.” Gani, si Jehova “maluloton ngadto sa mga dili-mapasalamaton ug sa daotan.”—Lucas 6:35.

Kita gisugo sa atong Maglalalang nga magpasundayag usab ug malulotong mga hiyas sama sa pagkamabination. Atong mabasa sa Miqueas 6:8: “Iyang gisulti kanimo, Oh yutan-ong tawo, ang maayo. Ug unsa ba ang gipangayo ni Jehova kanimo kondili ang pagbuhat sa hustisya ug ang paghigugma sa kalulot?” Sa Proverbio 19:22, atong mabasa: “Ang tilinguhaong butang diha sa yutan-ong tawo mao ang iyang mahigugmaong-kalulot.” Ang Anak sa Diyos nga si Jesu-Kristo, kinsa hingpit nga nagbanaag sa personalidad sa iyang Amahan, nag-awhag usab sa iyang mga sumusunod: “Magpadayon sa pagkamaluluy-on, maingon nga maluluy-on ang inyong Amahan.” (Lucas 6:36) Kini ang pagkahubad sa The Jerusalem Bible: “Magmabination maingon nga mabination ang inyong Amahan.”

Adunay maayong katarongan nga magmabination, kay kana maghatag kanato ug dagayang mga balos. Subsob natong makita nga tinuod ang nasulat sa Proverbio 11:17: “Ang tawo nga may mahigugmaong-kalulot nagabuhat ug maayo sa iyang kalag.” Kon magmabination kita sa usa nga nanginahanglan, isipon kini sa Diyos ingong pabor nga gihimo Kaniya. Siya mismo ang mobalos ug kalulot alang sa bisan unsang pagkamabination nga gipakita sa iyang mga magsisimba. Si Haring Solomon nagpahayag ubos sa inspirasyon: “Siya nga nagapakitag kaluoy sa timawa nagapahulam kang Jehova, ug Siya magabayad kaniya sa iyang  gibuhat.” (Proverbio 19:17) Ug si Pablo misulat: “Kamo nahibalo nga ang matag usa, bisan unsang kaayohan nga iyang buhaton, magadawat niinig balik gikan kang Jehova.”—Efeso 6:8.

Ang pagkamabination adunay gahom sa pagpatunhay sa kalinaw ug paghusay sa mga kasungian. Kini motabang sa pagsulbad sa mga di-pagsinabtanay nga mosangpot sa pagpasaylo. Lagmit mahitabo ang mga di-pagsinabtanay tungod kay dili nato kanunayng ikapahayag ang atong mga hunahuna o mga pagbati sa tukmang paagi, o mahimong masaypan pagsabot ang atong mga lihok. Niining situwasyona makatabang ang pagkamabination sa pagsulbad sa problema ug pagpatunhay sa pagdinaitay. Dali rang mapasaylo ang usa ka tawo nga nailhang mabination. Ang pagkamabination motabang kanato sa pagsunod sa tambag ni Pablo sa mga Kristohanon: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain.”—Colosas 3:13.

Pagkamabination—Simpatiya nga Gipakita sa Buhat

Dugang pa, ang pagkamabination adunay gahom sa paghupay sa kasakit. Sumala sa ato nang nahisgotan, kini mosimpatiya niadtong anaa sa kasakitan mao nga kita mobati usab sa pag-antos sa uban. Ang pagkamabination naglakip sa pagpakitag malumong pagtagad sa mga tawong anaa sa kasakitan ug paghimog mapuslanong mga buhat sa pagtabang kanila.

Ang mga Kristohanon nagsundog kang Jesus pinaagi sa pagkamabination. Siya aduna gayoy panahon sa pagtabang sa uban sa materyal ug sa espirituwal. Sa dihang nahibaloan niya nga may panginahanglan ang uban, siya mabinationg nangitag paagi aron makatabang.

Matikdi kon unsay reaksiyon ni Jesus sa dihang nakita niya ang gutom sa espirituwal nga panon sa mga tawo: “Sa pagkakita sa mga panon sa katawhan siya naluoy kanila, tungod kay sila pinanitan ug nagkatibuagsa sama sa mga karnero nga walay magbalantay.” (Mateo 9:36) Mahitungod sa pulong nga gihubad ug “naluoy,” ang usa ka eskolar sa Bibliya nag-ingon nga kini nagpasabot sa “usa ka pagbati nga makatandog pag-ayo sa kahiladman sa usa ka tawo.” Sa pagkatinuod, kining pulonga giisip nga usa sa labing puwersadong Grego nga pulong alang sa pagkamabination.

Sa samang paagi, ang mabinationg mga Kristohanon mosanong dayon sa materyal ug espirituwal nga mga panginahanglan sa uban. Si apostol Pedro misulat: “Kamong tanan magbaton ug samang panghunahuna, nga magpakitag pagbati alang sa isigkaingon, nga magbaton ug inigsoong pagbati, magmabination uban ang kalumo.” (1 Pedro 3:8) Pananglitan, dihang ang usa ka kabos nga Kristohanong pamilya kinahanglang mobalhin sa laing lugar tungod sa ilang mga suliran sa panglawas, ang ilang mga isigkamagtutuo didto libreng nagpapuyo kanila sulod sa unom ka bulan. Ang bana miingon: “Matag adlaw duawon mi nila aron masayran ang among kahimtang, ug ang ilang mga pagdasig mipabati kanamong komportable.”

Ang matuod nga mga Kristohanon matinagdanon usab sa mga panginahanglan sa dili nila kaila. Sila malipayong naggamit sa ilang panahon, kusog, ug kahinguhaan sa pagtabang sa mga tawo nga wala nila mailhi. Ang mga boluntaryo nga gihisgotan sa nag-unang artikulo nga nagtabang sa mga tawong dili nila kaila maoy mga Saksi ni Jehova.

Busa ang Kristohanong kongregasyon dagaya sa pagkamabination ug mahigugmaong kalulot. Kay natukmod sa gugma, ang mga membro sa kongregasyon nadasig sa pagpangitag mga paagi aron makaalagad. Tungod sa lainlaing personal nga mga problema, ang mga batang ilo sa ginikanan ug mga babayeng balo diha sa kongregasyon mahimong nanginahanglan sa imong pagtagad ug empatiya. Matabangan mo ba sila nga makasagubang sa kakabos, kakulang sa medikal nga pag-atiman, kawalay igong kapuy-an, o uban pang mga kalisdanan?

Tagda ang usa ka magtiayon didto sa Gresya. Ang bana naestrok. Siya ug ang iyang asawa gidala ngadto sa usa ka ospital nga layo kaayo sa ilang lugar. Ugaling lang, ang ilang gisaligan nga gamayng kinitaan mao lang ang mapupo nga mga kahil sa ilang prutasan. Kinsa kahay mamupo niana samtang atua sila sa ospital? Milihok ang kongregasyon. Ilang gipupo ug gibaligya ang mga kahil, mao nga nakasapi ang pobreng magtiayon ug tungod niana wala na sila mabalaka.

 Ang pagkamabination ikapakita sa daghang paagi. Pananglitan, ang mabinationg mga Kristohanon makaamgo nga usahay ang pangunang butang nga gikinahanglan niadtong may mga suliran mao ang malulotong mga duaw sa mga tawo nga maminaw kanila uban ang simpatiya, magpakitag empatiya, ug maghupay kanila pinaagi sa Kasulatan.—Roma 12:15.

Tagamtama ang Usa ka Mabinationg Kahimtang

Ang tibuok-kalibotang Kristohanong kongregasyon maoy usa ka dapit sa kalinaw ug kahupayan diin naglungtad ang pagkamabination ug pagkamaluloton. Naamgohan sa matuod nga mga Kristohanon nga ang pagkamabination makapalagsik, apan ang kabangis makapaluya. Busa, samtang naningkamot sila sa pagsundog sa ilang langitnong Amahan, sila naningkamot nga “magmabination uban ang kalumo” sa praktikal nga mga paagi.

Mainiton kang gidapit sa mga Saksi ni Jehova aron masinati ang mabination, mahigugmaon, ug mahingawaon nga kahimtang sa ilang taliwala. Nakaseguro sila nga ikaw mahinangop ug malipay nga matagamtam ang maong kahimtang.—Roma 15:7.

[Hulagway sa panid 5]

Giawhag ni Pablo ang mga Kristohanon sa Colosas nga ilang isul-ob ang malumong mga pagmahal sa pagkamabination

[Mga hulagway sa panid 7]

Sa dihang namatikdan ni Jesus nga may panginahanglan, mabination siyang nangitag paagi aron makatabang