Nahinumdom Ka Ba?

Gipabilhan mo ba ang pagbasa sa bag-ong mga gula sa Bantayanang Torre? Buweno, sulayi kon makatubag ka ba sa mosunod nga mga pangutana:

• Nganong mapuslanon gihapon ang “Daang Tugon”?

Ang Awtor niini nga si Jehova dili usa ka mapintas nga diyos kondili usa ka mahigugmaong Diyos. Kanunayng gikutlo ni Jesus ug sa una niyang mga sumusunod ang Hebreohanong Kasulatan. Naundan kini ug mapuslanong mga tambag alang sa adlaw-adlawng pagkinabuhi ug nagtanyag kinig kahibulongang paglaom alang sa umaabot.—9/1, panid 4-7.

• Unsay nalampos tungod sa pagpalabay sa panahon sukad nakasala si Adan ug Eva?

Latas sa libolibong katuigan, si Satanas napamatud-ang bakakon, ug si Adan ug Eva ug ang minilyon nilang mga kaliwat nangamatay. Gipamatud-an sa panahon nga ang mga tawo dili gayod molampos nga bulag sa Diyos ug nga wala silay katungod ni katakos sa pagtultol sa ilang mga lakang.—9/15, panid 6-7.

• Nganong wala man sawaya si Jacob sa iyang pagpatuo nga siya si Esau?

Si Jacob may katungod sa pagdawat sa panalangin sa iyang amahan kay iya mang napalit ang katungod sa pagkapanganay gikan ni Esau. Sa naamgohan ni Isaac nga si Jacob diay ang iyang napanalanginan, wala niya kadto bakwia. Ug bisan pag makasalga unta ang Diyos, dayag nga gusto Niyang si Jacob ang mapanalanginan.—10/1, panid 31.

• Sa unsang paagi ang atong pagkaadunay tanlag nagpamatuod nga ang mga tawo wala molungtad pinaagig ebolusyon?

Diha sa tanang rasa ug kultura, ang mga tawo andam sa pagtabang sa uban, bisan pag kana nagpameligro sa ilang kinabuhi. Ang maong pagkadili-mahakogon dili gayod mahitabo kon ang mga tawo maoy mga mananap lamang nga naningkamot nga makalahutay bisag unsa pay mahitabo.—10/15, panid 20.

• Nganong makaingon kita nga ang Diyos mapainubsanon, ug sa unsang paagi iyang gipasundayag kining hiyasa?

Ingong Soberano ug Maglalalang, ang Diyos walay mga limitasyon sama nato. Hinunoa, nahiuyon sa 2 Samuel 22:36, ang Diyos mapaubsanon sa pagkaagi nga siya may pagtagad sa ubos nga mga tawo nga naningkamot sa pagpahimuot kaniya, ug siya naluoy kanila. Sa mahulagwayong pagkasulti, siya nanaog aron makiglabot nga maluloton sa mga tawo nga mahinadlokon kaniya.—11/1, panid 4-5.

• Sa unsang paagi ang karaang mga tipak nga yutang kulonon nagpamatuod sa talaan sa Bibliya?

Ang mga arkeologo nakakaplag ug mga tipak didto sa Samaria nga may mga ngalan sa pito ka kaliwatan nga natala sa Josue 17:1-6. Ang mga tipak sa Arad nagpamatuod bahin sa mga pamilya sa mga saserdote ug nalakip niini ang ngalan sa Diyos. Ang mga tipak sa Lakis nagpatin-aw sa kahimtang sa politika ug sa kagubot sa katawhan sa Juda sa wala pa moatake ang mga Babilonyanhon.—11/15, panid 12-14.

• Nganong makaingon kita nga si Lucas ang nagsulat sa Buhat?

Ang Ebanghelyo ni Lucas ug ang Buhat sa mga Apostoles gisulat alang kang Teofilo, nga nagpaila nga si Lucas ang naghikay niini. Ang paggamit sa mga pulong “kami,” “among,” ug “kanamo” nagpaila nga si Lucas nalangkit sa pipila ka panghitabo. (Buhat 16:8-15)—11/15, panid 18.

• Unsay angayng panglantaw sa mga Kristohanon bahin sa pagpangayam ug pagpangisda?

Sukad sa adlaw ni Noe, ang Diyos nagtugot sa mga tawo sa pagpatay ug pagkaon sa mga mananap. Hinunoa, ang balaod nga paagason ang dugo niini nagpasiugda nga ang kinabuhi sa mananap angayng pabilhan tungod kay kini naggikan sa Diyos. Ang mga Kristohanon dili angayng mopatay ug mananap alang sa lingawlingaw o sa kaukyab lamang o sa walay igong hinungdan. Hinungdanon gayong tumanon ang mga balaod sa gobyerno ug tagdon ang tanlag sa uban. (Roma 14:13)—12/1, panid 31.