Walay Hinagiban nga Buhaton Batok Kanimo ang Magmalamposon
Walay Hinagiban nga Buhaton Batok Kanimo ang Magmalamposon
“Bisan unsa nga hinagiban nga buhaton batok kanimo dili magmalamposon.”—ISAIAS 54:17.
1, 2. Sa unsang paagi ang mga kasinatian sa mga Saksi ni Jehova sa Albania nagpadayag sa pagkakasaligan sa Isaias 54:17?
DAGHANG katuigan kanhi, dihay usa ka di-mahadlokong pundok sa mga Kristohanon sa usa ka gamay nga bukirong nasod sa habagatan-silangang Uropa. Gipaningkamotan gayod sa ateyistikong gobyernong Komunista ang pagbungkag kanila. Apan, bisan ang pagpaantos, mga kampo sa pinugos nga pagtrabaho, ug pagpangdaot sa media wala makapuo kanila. Kinsa ba sila? Mga Saksi ni Jehova sa Albania. Bisan pag lisod kaayo ang pagtigom ug pagsangyaw, ang ilang pagkamalahutayon latas sa daghang katuigan nakabayaw ug nakapasidungog sa Kristiyanidad ug nakadayeg sa ngalan ni Jehova. Sa miaging tuig panahon sa pagpahinungod sa ilang bag-ong pasilidad sa sangang buhatan, ang usa ka karaang matinumanong Saksi miingon: “Bisag giunsa pagpaningkamot ni Satanas, siya kanunayng pildi ug si Jehova kanunayng daog!”
2 Kining tanan maoy buhing pamatuod sa pagkakasaligan sa saad sa Diyos ngadto sa iyang katawhan ingon nga nahisulat sa Isaias 54:17: “Bisan unsa nga hinagiban nga buhaton batok kanimo dili magmalamposon, ug ang matag dila nga mosulti batok kanimo sa paghukom imong pagahukman.” Gipamatud-an sa kasaysayan nga walay mahimo ang kalibotan ni Satanas sa pagpahunong sa dedikadong mga alagad ni Jehova nga Diyos sa pagsimba kaniya.
Pakyas nga mga Paningkamot ni Satanas
3, 4. (a) Unsay nalakip sa mga hinagiban ni Satanas? (b) Sa unsang paagi ang mga hinagiban sa Yawa wala magmalamposon?
3 Ang mga hinagiban nga gigamit batok sa matuod nga mga magsisimba naglakip sa mga pagdili sa buluhaton, pagpamintas sa magubtanong panon, mga bilanggoan, ug ang ‘pagmugnag kasamok pinaagig mando.’ (Salmo 94:20) Sa pagkatinuod, diha sa pipila ka nasod, samtang ginatun-an sa mga Saksi ni Jehova kining artikuloha, kining matuod nga mga Kristohanon ‘ginasulayan’ sa ilang integridad ngadto sa Diyos.—Pinadayag 2:10.
4 Pananglitan, ang usa ka sangang buhatan sa mga Saksi ni Jehova mitaho nga sa usa ra ka tuig, may 32 ka kaso sa pisikal nga pag-atake sa mga alagad sa Diyos samtang nagsangyaw sila. Dugang pa, may 59 ka kaso diin ang mga Saksing nagsangyaw sa publiko—batag tigulang, lalakig babaye—gipriso sa mga polis. Ang pipila gitamlaan, giletratohan, ug gipriso samag mga kriminal. Gibaharan ang uban nga bun-ogon. Sa laing nasod, aduna karoy 1,100 ka dokumentadong mga kaso sa pagdakop, pagmulta, o pagbun-og sa mga Saksi ni Jehova. Kapig 200 niining mga kasoha nahitabo sa adlaw nga sila nagtigom aron handomon ang kamatayon ni Jesus! Bisan pa niana, tungod sa espiritu ni Jehova ang iyang katawhan nakalahutay bisan pa sa grabeng mga kakulian, diha niining mga nasora ug sa uban pa. (Zacarias 4:6) Ang labihang kapungot sa kaaway dili makapatak-om sa mga ngabil niadtong nanagdayeg kang Jehova. Oo, makasalig kita nga walay hinagiban ang makapakyas sa katuyoan sa Diyos.
Pagahukman ang Bakakong mga Dila
5. Unsa ang bakakong mga dila nga misulti batok sa mga alagad ni Jehova sa unang siglo?
5 Gitagna ni Isaias nga pagahukman sa katawhan sa Diyos ang dila nga mosulti batok kanila. Sa unang siglo, ang mga Kristohanon mao kanunay ang tumong sa pagpangdaot, nga giakusahan silang mga mamumuhat ug daotan. Usa ka pananglitan sa maong mga akusasyon mao ang mga pulong nga makita sa Buhat 16:20, 21: “Kining mga tawhana nagtugaw pag-ayo sa atong siyudad, . . . ug sila nagmantala ug mga kostumbre nga dili subay sa balaod nga sagopon o buhaton nato, sanglit kita mga Romano.” Sa laing higayon, gipaningkamotan paghulhog sa relihiyosong mga magsusupak ang mga magmamando sa siyudad aron molihok batok sa mga sumusunod ni Kristo, nga nagpatuo: “Kining mga tawhana nga nagpagubot sa gipuy-ang yuta ania usab dinhi, [ug sila] milihok nga supak sa mga mando ni Cesar.” (Buhat 17:6, 7) Ginganlan si apostol Pablo ug ‘tawo nga peligroso’ ug pangulo sa usa ka sekta nga nagsugnib ug mga pag-alsa “sa tibuok gipuy-ang yuta.”—Buhat 24:2-5.
6, 7. Unsay usa ka paagi nga pagahukman sa matuod nga mga Kristohanon ang madaotong mga pulong batok kanila?
6 Busa, dili kita matingala nga ang matuod nga mga Kristohanon karon makasinatig grabeng mga pagpangdaot ug pagbutangbutang. Sa unsang paagi ginahukman nato kanang madaotong mga pulong?—Isaias 54:17.
7 Ang maong mga akusasyon ug pagpangdaot kasagarang ikapanghimakak pinaagi sa maayong panggawi sa mga Saksi ni Jehova. (1 Pedro 2:12) Sa dihang pamatud-an sa mga Kristohanon nga sila masinugtanon sa balaod ug mga tawong maayog moral nga nahingawa gayod sa kaayohan sa ilang mga isigkatawo, ang mga akusasyon nga gipahamtang kanila madayag nga bakak. Ang atong maayong panggawi mao ang ebidensiya sa atong pagkamatarong. Samtang mamatikdan sa mga maniniid ang atong maayong mga binuhatan, kasagarang madasig sila sa paghimaya sa atong langitnong Amahan ug pag-ila sa labing maayong paagi sa pagkinabuhi sa iyang mga alagad.—Isaias 60:14; Mateo 5:14-16.
8. (a) Unsa ang kinahanglan natong himoon usahay sa pagdepensa sa atong Kasulatanhong baroganan? (b) Ingong pagsundog kang Jesus, sa unsang paagi pagahukman nato ang masupakong mga dila?
8 Dugang pa sa atong diyosnong panggawi, usahay kinahanglang maisogon natong depensahan ang atong Kasulatanhong baroganan. Ang usa ka paagi mao ang pagpangayog panalipod sa mga gobyerno ug mga korte. (Ester 8:3; Buhat 22:25-29; 25:10-12) Sa dinhi si Jesus sa yuta, may higayon nga dayag siyang nakiglantugi sa mga nagsaway kaniya, nga gipanghimakak ang ilang mga akusasyon. (Mateo 12:34-37; 15:1-11) Ingong pagsundog kang Jesus, mapasalamaton kita sa kahigayonan nga makapatin-aw sa uban bahin sa atong mga gituohan. (1 Pedro 3:15) Dili gayod nato tugotan nga tungod sa pagbiaybiay diha sa eskuylahan, trabahoan, o sa dili-matinuohong mga paryente, kita mohunong sa pagpahayag sa kamatuoran sa Pulong sa Diyos.—2 Pedro 3:3, 4.
Ang Jerusalem—“Usa ka Mabug-at nga Bato”
9. Unsa nga Jerusalem ang gisimbolohan sa “mabug-at nga bato” nga gihisgotan sa Zacarias 12:3, ug kinsay naghawas niini sa yuta?
9 Ang tagna ni Zacarias nagpatin-aw sa hinungdan kon nganong ang mga nasod nagsupak sa matuod nga mga Kristohanon. Matikdi ang giingon sa Zacarias 12:3: “Mahitabo nianang adlawa nga himoon ko ang Jerusalem nga usa ka mabug-at nga bato alang sa tanang katawhan.” Unsa nga Jerusalem ang gitumong niining tagnaa? Ang tagna ni Zacarias bahin sa Jerusalem mapadapat sa “langitnong Jerusalem,” ang langitnong Gingharian nga alang niana gitawag ang dinihogang mga Kristohanon. (Hebreohanon 12:22) Ania pa sa yuta ang diyutay nga nahibilin sa maong mga manununod sa Mesiyanikong Gingharian. Duyog sa “ubang mga karnero,” giawhag nila ang katawhan nga magpasakop sa Gingharian sa Diyos samtang may panahon pa. (Juan 10:16; Pinadayag 11:15) Unsa ang reaksiyon sa mga nasod sa maong pag-awhag? Ug unsang matanga sa pagpaluyo ang gihatag ni Jehova sa matuod nga mga magsisimba karon? Atong mahibaloan kana samtang dugang natong susihon ang kahulogan sa Zacarias kapitulo 12. Sa pagbuhat niana, makasalig kita nga ‘walay hinagiban nga molampos’ batok sa mga dinihogan sa Diyos ug sa ilang mga kauban.
10. (a) Nganong ginalutos man ang katawhan sa Diyos? (b) Unsay nahitabo niadtong naningkamot sa pagkuha sa “mabug-at nga bato”?
10 Gipaila sa Zacarias 12:3 nga ang mga nasod makaagom ug “grabeng mga pangos.” Sa unsang paagi mahitabo kini? Gihukom sa Diyos nga ang maayong balita sa Gingharian kinahanglang ikawali. Giisip sa mga Saksi ni Jehova nga seryoso ang sugo sa pagwali. Apan ang pagmantala sa Gingharian ingong bugtong paglaom sa katawhan nahimong “mabug-at nga bato” alang sa mga nasod. Gipaningkamotan nilang makuha kana pinaagi sa pagbalda sa mga magwawali sa Gingharian. Sa paghimo niana, ang nanghilabot nga mga nasod nakaagom ug “grabeng mga pangos,” nga nagkasamadsamad. Bisan ang ilang dungog nadaot kay sila napakyas ug busa naulawan. Dili nila mapahilom ang matuod nga mga magsisimba, kinsa nagmahal sa pribilehiyo sa pagmantala sa “walay kataposang maayong balita” sa Mesiyanikong Gingharian sa Diyos sa dili pa malaglag kining sistema sa mga butang. (Pinadayag 14:6) Sa dihang nakakita sa kapintasan nga gihimo batok sa mga alagad ni Jehova, usa ka guwardiya sa bilanggoan sa usa ka nasod sa Aprika miingon: ‘Nag-usik ra mo sa inyong kusog sa paglutos niining mga tawhana. Dili gyod na sila mokompromiso. Modaghan ra hinuon na sila.’
11. Sa unsang paagi gituman sa Diyos ang iyang saad nga natala sa Zacarias 12:4?
11 Basaha ang Zacarias 12:4. Si Jehova nagsaad nga sa simbolikong paagi iyang butaan ug hampakon sa “kalibog” kadtong mobatok sa iyang maisogong mga mensahero sa Gingharian. Gituman niya ang iyang saad. Pananglitan, sa usa ka nasod diin gidili ang matuod nga pagsimba, wala makapugong ang mga magsusupak sa pagkadawat sa katawhan sa Diyos ug mga basahon sa Bibliya. Usa ka magmamantala miingon pa gani nga migamit ang mga Saksi ni Jehova ug mga balloon aron makasulod sa nasod ang mga basahon sa Bibliya! Ang saad sa Diyos sa iyang maunongong mga alagad natuman gayod: “Bukhon ko ang akong mga mata, ug butaan ko ang tagsatagsa ka kabayo sa mga katawhan.” Kay samag natarantar na tungod sa kapungot, ang mga kaaway sa Gingharian dili na mahibalo kon asa sila paingon. Apan kita kombinsido nga si Jehova magluwas sa iyang katawhan ingong usa ka pundok ug maghunahuna sa ilang kaayohan.—2 Hari 6:15-19.
12. (a) Sa unsang diwa gipasiga ni Jesus ang kalayo sa dinhi pa siya sa yuta? (b) Sa unsang paagi gipadilaab sa dinihogang nahibilin ang mga butang sa mahulagwayong paagi, ug unsay resulta?
12 Basaha ang Zacarias 12:5, 6. “Ang mga sultan sa Juda” nagtumong niadtong mga magtatan-aw sa katawhan sa Diyos. Sila pun-on ni Jehova ug nagdilaab nga kasibot alang sa intereses sa iyang Gingharian sa yuta. Usa ka higayon niana, giingnan ni Jesus ang iyang mga tinun-an: “Ako mianhi aron sa paghaling ug kalayo dinhi sa yuta?” (Lucas 12:49) Sa pagkatinuod, siya ang nagpasiga sa simbolikong kalayo. Ang mensahe sa Gingharian sa Diyos mao ang labing hinungdanong ulohan sa dihang masibotong nagwali si Jesus. Nakahaling kadtog mainitong panaglalis sa tibuok nasod sa mga Hudiyo. (Mateo 4:17, 25; 10:5-7, 17-20) Sa susamang paagi, “samag kulon sa kalayo sa taliwala sa mga kahoy ug sama sa nagkalayo nga sulo diha sa lumbay sa bag-ong pinutol nga uhay,” ang mga sumusunod ni Kristo sa atong adlaw simbolikong nagpadilaab sa mga butang sa mahulagwayong paagi. Ang librong The Finished Mystery a niadtong 1917 kusganong nagbutyag sa pagkasalingkapaw sa Kakristiyanohan. Kana nakapasuko pag-ayo sa klero. Sa dili pa dugay, tungod sa Kingdom News Num. 37 nga “Ang Kataposan sa Bakak nga Relihiyon Haduol Na!” daghan ang natukmod sa pagbarog dapig o batok sa Gingharian sa Diyos.
Naluwas “ang mga Tolda sa Juda”
13. Unsay gipasabot sa mga pulong “mga tolda sa Juda,” ug nganong pagaluwason ni Jehova kadtong maapektohan?
13 Basaha ang Zacarias 12:7, 8. Sa karaang Israel, ang mga tolda maoy kasagaran ug usahay gigamit kana sa mga magbalantay ug sa mga mag-uuma. Sila ang unang maapektohan ug kinahanglang panalipdan kon may kaawayng nasod nga mosulong sa siyudad sa Jerusalem. Ang mga pulong “mga tolda sa Juda” nagpasabot nga ang dinihogang nahibilin sa atong panahon anaa sa way-salipod nga dapit ug wala diha sa kinutaang mga siyudad. Nianang dapita sila maisogong nanalipod sa intereses sa Mesiyanikong Gingharian. Pagaluwason pag-una ni Jehova sa mga panon ang “mga tolda sa Juda” tungod kay sila ang puntirya sa pag-atake ni Satanas.
14. Sa unsang paagi panalipdan ni Jehova kadtong anaa sa “mga tolda sa Juda” ug iyang bantayan sila nga dili mapandol?
14 Sa pagkatinuod, gipamatud-an sa talaan sa kasaysayan nga si Jehova nagapanalipod niining dinihogang mga embahador sa Gingharian diha sa ilang “mga tolda” sa gawas nga kapatagan. b Iyang bantayan sila nga dili “mapandol” sa pagkaagi nga himoon niya silang kusgan ug maisogon sama kang David, ang manggugubat nga hari.
15. Nganong ‘gitinguha ni Jehova ang paglaglag sa tanang kanasoran,’ ug kanus-a niya kini himoon?
15 Basaha ang Zacarias 12:9. Nganong ‘gitinguha ni Jehova ang paglaglag sa tanang kanasoran’? Tungod kay sila wala molunga sa pagsupak sa Mesiyanikong Gingharian. Pagahukman sila tungod kay ilang gihasi ug gilutos ang katawhan sa Diyos. Sa dili madugay, himoon sa mga ahente ni Satanas sa yuta ang kataposang pag-atake sa matuod nga mga magsisimba sa Diyos, nga mosangpot sa kahimtang sa kalibotan nga gibatbat sa Bibliya nga Har–Magedon. (Pinadayag 16:13-16) Ingong reaksiyon sa maong pag-atake, panalipdan sa Supremong Maghuhukom ang iyang mga alagad ug balaanon ang iyang ngalan taliwala sa mga nasod.—Ezequiel 38:14-18, 22, 23.
16, 17. (a) Unsa “ang panulondon sa mga alagad ni Jehova”? (b) Ang atong pagkamainantoson sa mga pag-atake ni Satanas maoy pamatuod sa unsa?
16 Wala makabaton si Satanas ug hinagiban nga makapahuyang sa pagtuo o makapalong sa kasibot sa katawhan sa Diyos sa tibuok kalibotan. Ang atong espirituwal nga kalinaw, nga maoy resulta sa gahom ni Jehova sa pagluwas, mao “ang panulondon sa mga alagad ni Jehova.” (Isaias 54:17) Walay si bisan kinsa nga arang makasakmit sa maayong espirituwal nga kahimtang nga atong gipahimuslan. (Salmo 118:6) Mopadayon si Satanas sa paghulhog sa pagsupak ug sa pagpahinabog kasakitan. Ang atong maunongong pagkamainantoson bisan pa sa pagpakaulaw maoy pamatuod nga ang espiritu sa Diyos anaa kanato. (1 Pedro 4:14) Ang maayong balita bahin sa natukod na nga Gingharian ni Jehova ginamantala sa tibuok kalibotan. Samag mga butang nga makabungog, daghang simbolikong “mga bato sa lambuyog” ang gibuno batok sa katawhan sa Diyos. Bisan pa niana, tungod sa kusog ni Jehova ang iyang mga alagad makabuntog sa epekto sa maong mga bato. (Zacarias 9:15) Dili gayod mohunong ang dinihogang nahibilin ug ang ilang maunongong mga kauban!
17 Kita nagpaabot nga luwason sa bug-os gikan sa mga pag-atake sa Yawa. Mahupayan gayod kita pag-ayo tungod sa pasalig nga ‘bisan unsa nga hinagiban nga buhaton batok kanato dili magmalamposon, ug ang matag dila nga mosulti batok kanato sa paghukom atong pagahukman’!
[Mga footnote]
a Gipatik sa mga Saksi ni Jehova apan wala na imprentaha.
b Alang sa dugang detalye, tan-awa ang librong Mga Saksi ni Jehova—Mga Magmamantala sa Gingharian sa Diyos, panid 675-6, nga gipatik sa mga Saksi ni Jehova.
Unsay Imong Tubag?
• Unsay nagpakita nga ang mga hinagiban ni Satanas wala magmalamposon?
• Sa unsang paagi ang langitnong Jerusalem nahimong “usa ka mabug-at nga bato”?
• Sa unsang paagi giluwas ni Jehova ang “mga tolda sa Juda”?
• Samtang nagsingabot ang Armagedon, sa unsa nga kita makasalig?
[Mga Pangutana sa Pagtuon]
[Mga hulagway sa panid 21]
Ang katawhan ni Jehova sa Albania nagpabiling matinumanon bisan pa sa mga pag-atake ni Satanas
[Hulagway sa panid 23]
Gipanghimakak ni Jesus ang sayop nga mga akusasyon
[Hulagway sa panid 24]
Walay hinagiban nga gibuhat batok sa mga magmamantala sa maayong balita ang molampos