Giisip nga Takos Makadawat sa Gingharian

“Kini maoy pamatuod sa matarong nga paghukom sa Diyos, nga motultol sa pag-isip kaninyo nga takos sa gingharian sa Diyos.”—2 TES. 1:5.

1, 2. Unsay katuyoan sa Diyos may kalabotan sa paghukom, ug kinsay maghukom?

 SI APOSTOL Pablo didto sa Atenas sa mga tuig 50 K.P. Kay napikal sa kaylap nga idolatriya didto, siya natukmod sa paghatag ug maayo-kaayong pagpamatuod. Gitapos niya ang iyang pakigpulong pinaagig usa ka pahayag nga nakadani sa pagtagad sa iyang paganong mga mamiminaw. Siya miingon: “Karon [ang Diyos] nagsugo sa katawhan nga silang tanan sa bisan diin angayng managhinulsol. Tungod kay siya nakatakda na ug adlaw aron iyang pagahukman ang gipuy-ang yuta subay sa pagkamatarong pinaagi sa usa ka tawo nga iyang gitudlo, ug siya naghatag ug garantiya ngadto sa tanang tawo sa pagkaagi nga siya nagbanhaw kaniya gikan sa mga patay.”—Buh. 17:30, 31.

² Makapahinuklog gayod ang pagpamalandong sa kamatuoran nga ang Diyos nagtakda ug usa ka umaabot nga adlaw sa paghukom alang sa katawhan! Ang maong paghukom pagahimoon sa usa nga wala nganli ni Pablo sa iyang pakigpulong, apan nahibalo kita nga siya mao ang binanhaw nga si Jesu-Kristo. Ang paghukom ni Jesus magkahulogan ug kinabuhi o kamatayon.

3. Nganong mihimog pakigsaad si Jehova uban kang Abraham, ug kinsay adunay hinungdanong papel sa katumanan niini?

³ Ang gidugayon sa maong Adlaw sa Paghukom maoy 1,000 ka tuig. Si Jesus ang magdumala niana sa ngalan ni Jehova ingong Hari sa Gingharian sa Diyos, apan dili siya mag-inusara. Si Jehova nagpili ug mga tawo nga magmando ug maghukom uban ni Jesus sulod nianang yugtoa. (Itandi ang Luc. 22:29, 30.) Mga 4,000 ka tuig kanhi, gipahiluna na ni Jehova ang pundasyon sa maong Adlaw sa Paghukom sa dihang mihimo siyag pakigsaad uban sa iyang matinumanong alagad nga si Abraham. (Basaha ang Genesis 22:17, 18.) Ang maong pakigsaad dayag nga gisugdan niadtong 1943 W.K.P. Siyempre, wala pa makasabot sa bug-os si Abraham kon unsay kahulogan sa maong pakigsaad alang sa katawhan. Apan, nahibalo na kita karon nga pinaagi sa maong pakigsaad, ang binhi ni Abraham adunay hinungdanong papel sa katumanan sa katuyoan sa Diyos sa paghukom sa katawhan.

4, 5. (a) Kinsa ang pangunang bahin sa binhi ni Abraham, ug unsay iyang giingon bahin sa Gingharian? (b) Kanus-a gibuksan ang paglaom nga mahimong bahin sa Gingharian sa Diyos?

⁴ Ang pangunang bahin sa binhi ni Abraham mao si Jesus, kinsa sa 29 K.P. gidihogan sa balaang espiritu ug nahimong ang gisaad nga Mesiyas, o Kristo. (Gal. 3:16) Iyang gigugol  ang misunod nga tulo ug tunga ka tuig sa pagsangyaw sa maayong balita sa Gingharian ngadto sa mga Hudiyo. Human dakpa si Juan Bawtista, gipaila ni Jesus nga ang uban mahimong membro sa maong Gingharian sa dihang siya miingon: “Sukad sa mga adlaw ni Juan nga Bawtista hangtod karon ang gingharian sa mga langit mao ang tumong nga ginapakigbisogan sa mga tawo, ug ginasakmit kini niadtong nagapakigbisog.”—Mat. 11:12.

⁵ Makaiikag, sa wala pa hisgoti ni Jesus kadtong “nagapakigbisog” sa Gingharian sa mga langit, siya miingon: “Sa pagkatinuod ako magaingon kaninyo, Taliwala niadtong natawo gikan sa mga babaye wala pay gibangon nga labaw kay kang Juan nga Bawtista; apan ang usa nga ubos sa gingharian sa mga langit labaw pa kay kaniya.” (Mat. 11:11) Nganong nakaingon man si Jesus niana? Tungod kay ang kahigayonan nga mahimong bahin sa Gingharian sa Diyos gibuksan lamang ngadto sa mga matinumanon sa Pentekostes 33 K.P., sa dihang gibubo ang balaang espiritu. Sa maong panahon, patay na si Juan Bawtista.—Buh. 2:1-4.

Gipahayag nga Matarong ang Binhi ni Abraham

6, 7. (a) Sa unsang paagi ang binhi ni Abraham mahimong “sama sa mga bituon sa kalangitan”? (b) Unsang panalangin ang nadawat ni Abraham, ug unsang susamang panalangin ang madawat sa iyang binhi?

⁶ Giingnan si Abraham nga modaghan ang iyang binhi ug mahimong “sama sa mga bituon sa kalangitan” ug sama sa mga lugas sa balas nga anaa sa baybayon. (Gen. 13:16; 22:17) Buot ingnon, sa panahon ni Abraham wala gayoy tawo nga makahibalo sa bug-os nga gidaghanon sa maong binhi. Apan, ang eksaktong gidaghanon sa iyang espirituwal nga binhi gibutyag ra ngadtongadto. Gawas kang Jesus, kini mokabat ug 144,000.—Pin. 7:4; 14:1.

⁷ Mahitungod sa pagtuo ni Abraham, ang Pulong sa Diyos nag-ingon: “[Si Abraham] nagbutang ug pagtuo kang Jehova; ug iyang giisip kini kaniya ingong pagkamatarong.” (Gen. 15:5, 6) Tinuod, walay tawong matarong sa bug-os nga diwa. (Sant. 3:2) Bisan pa niana, tungod sa talagsaong pagtuo ni Abraham, si Jehova nag-isip kaniya nga matarong ug nagtawag pa gani kaniya nga iyang higala. (Isa. 41:8) Kadtong naglangkob sa espirituwal nga binhi ni Abraham uban kang Jesus gipahayag usab nga matarong, ug tungod niini sila makadawat ug mas daghan pang mga panalangin kay sa nadawat ni Abraham.

8. Unsang mga panalangin ang gibuksan ngadto sa mga membro sa binhi ni Abraham?

⁸ Ang dinihogang mga Kristohanon gipahayag nga matarong tungod kay sila nagpasundayag ug pagtuo sa halad lukat ni Jesus. (Roma 3:24, 28) Sa mga mata ni Jehova, nahigawas na sila gikan sa sala ug mahimo na silang dihogan ug balaang espiritu aron mahimong espirituwal nga mga anak sa Diyos ug mga igsoon ni Jesu-Kristo. (Juan 1:12, 13) Sila nahimong bahin sa bag-ong pakigsaad ug nahimong usa ka bag-ong nasod, ang “Israel sa Diyos.” (Gal. 6:16; Luc. 22:20) Pagkatalagsaong pribilehiyo kana! Tungod niining tanang gibuhat sa Diyos alang kanila, ang dinihogang mga Kristohanon wala maglaom nga mabuhi sa yuta sa walay kataposan. Ilang gisakripisyo ang maong kalaoman tungod sa dili-matukib nga kalipay nga mahiuban kang Jesus sulod sa Adlaw sa Paghukom nga magmando uban kaniya didto sa langit.—Basaha ang Roma 8:17.

9, 10. (a) Kanus-a ang mga Kristohanon unang gidihogan sa balaang espiritu, ug unsay anaa sa ilang unahan? (b) Unsang tabang ang nadawat sa dinihogang mga Kristohanon?

 ⁹ Sa Pentekostes 33 K.P., usa ka grupo sa matinumanong mga tawo ang gihatagag kahigayonan nga mahilakip niadtong magmando uban kang Jesus panahon sa Adlaw sa Paghukom. Mga 120 ka tinun-an ni Jesus ang nabawtismohan sa balaang espiritu ug busa sila nahimong ang unang dinihogan nga mga Kristohanon. Hinunoa, kadto maoy sinugdanan pa lamang alang kanila. Sukad niadto padayon, kinahanglang ipasundayag nila ang ilang pagkamaunongon kang Jehova bisan pa sa tanang pagsulay nga ipahamtang ni Satanas kanila. Sila kinahanglang magmatinumanon hangtod sa kamatayon aron ilang madawat ang ganti nga langitnong kinabuhi.—Pin. 2:10.

¹⁰ Tungod niini, gihatagan sila ni Jehova ug giya ug pagdasig nga ilang gikinahanglan pinaagi sa iyang Pulong ug sa Kristohanong kongregasyon. Pananglitan, si apostol Pablo misulat ngadto sa dinihogang mga Kristohanon sa Tesalonica: “Ingon sa usa ka amahan ngadto sa iyang mga anak, kami nagpadayon sa pagtambag sa matag usa kaninyo, ug sa paghupay ug sa pagpamatuod nganha kaninyo, aron kamo magpadayon sa paglakaw nga takos sa Diyos kinsa maoy nagtawag kaninyo ngadto sa iyang gingharian ug himaya.”—1 Tes. 2:11, 12.

11. Unsang sinulat nga rekord ang gihatag ni Jehova alang sa mga membro sa “Israel sa Diyos”?

¹¹ Sa mga katuigan human pilia ang unang mga membro sa kongregasyon sa dinihogang mga Kristohanon, nakita ni Jehova nga nahiangay ang pagbaton ug permanenteng rekord sa yutan-ong ministeryo ni Jesus ug sa Iyang mga pakiglabot ug mga tambag ngadto sa unang-siglong dinihogang mga Kristohanon. Busa gidugang ni Jehova ang inspiradong Kristohanon Gregong Kasulatan sa nabatonan nang Hebreohanong Kasulatan. Ang Hebreohanong Kasulatan pangunang gisulat alang sa unodnong nasod sa Israel dihang sila aduna pay linaing relasyon uban sa Diyos. Ang Kristohanon Gregong Kasulatan pangunang gisulat alang sa “Israel sa Diyos,” ang dinihogang mga igsoon ni Kristo ug espirituwal nga mga anak sa Diyos. Siyempre, wala kana magpasabot nga ang mga dili-Israelinhon dili makabenepisyo sa pagtuon sa Hebreohanong Kasulatan. Sa samang paagi, ang mga Kristohanon nga dili dinihogan sa balaang espiritu makabenepisyo gayod sa pagtuon sa Kristohanon Gregong Kasulatan pinaagi sa pagpadapat sa mga tambag niini.—Basaha ang 2 Timoteo 3:15-17.

12. Unsay gipahinumdom ni Pablo sa dinihogang mga Kristohanon?

¹² Ang unang-siglong mga Kristohanon gipahayag nga matarong ug gidihogan sa balaang espiritu aron madawat nila ang ilang langitnong panulondon. Ang ilang pagkadinihogan wala maghimo kanilang mga hari ibabaw sa ilang mga isigkadinihogang mga Kristohanon. Dayag nga nataligam-an kana sa pipila ka Kristohanon niadto ug misugod sila sa pagpaimportante sa ilang kaugalingon taliwala sa ilang mga igsoon sa kongregasyon. Tungod niana, si Pablo nakapangutana: “Buhong na kamo, dili ba? Dato na kamo, dili ba? Nagsugod na kamo pagmando ingong mga hari nga wala kami, dili ba? Ug ako nanghinaot gayod nga kamo unta nagsugod na sa pagmando ingong mga hari, aron kami usab magmando ingong mga hari uban kaninyo.” (1 Cor. 4:8) Busa, gipahinumdoman ni Pablo ang mga dinihogan sa iyang adlaw: “Dili nga kami mao ang mga agalon sa inyong pagtuo, kondili kami mga isigkamagbubuhat alang sa inyong kalipay.”—2 Cor. 1:24.

Pagkompleto sa Gitagnang Gidaghanon

13. Unsay kaugmaran sa pagpili sa mga dinihogan human sa 33 K.P.?

¹³ Ang katibuk-an sa 144,000 ka dinihogang mga Kristohanon wala pilia sa unang siglo lamang. Ang pagpili kanila nagpadayon sa tibuok panahon sa mga apostoles, apan paglabay sa kasiglohan lagmit mihinay ang pagpamili kanila. Hinunoa, kini nagpadayon hangtod sa atong modernong panahon. (Mat. 28:20) Dayon, sa nagsugod si Jesus sa pagmando sa 1914, kusog nga miuswag ang mga butang.

14, 15. Unsay nahitabo sa atong panahon may kalabotan sa pagtawag sa mga dinihogan?

¹⁴ Una, gihinloan ni Jesus ang kalangitan sa tanang timaan sa pagsupak sa pagmando sa  Diyos. (Basaha ang Pinadayag 12:10, 12.) Dayon iyang gitigom ang nahibilin sa umaabot nga mga membro sa iyang Gingharian aron makompleto ang gidaghanong 144,000. Sa mga 1935, hapit nang mahuman ang maong pagpanigom ug daghan niadtong misanong sa buluhatong pagsangyaw wala magtinguhang mahiadto sa langit. Wala sila panghimatud-i sa espiritu nga sila mga anak sa Diyos. (Itandi ang Roma 8:16.) Hinunoa, ilang gipaila ang ilang kaugalingon nga sakop sa “ubang mga karnero,” nga naglaom nga mabuhi sa walay kataposan sa paraisong yuta. (Juan 10:16) Busa, human sa 1935 ang sentro sa buluhatong pagsangyaw mao na ang pagpanigom sa “dakong panon,” kadtong nakita ni apostol Juan sa panan-awon nga makalabang-buhi sa “dakong kasakitan.”—Pin. 7:9, 10, 14.

¹⁵ Apan latas sa mga katuigan sukad sa 1930, aduna pay pipila ka indibiduwal nga gitawag alang sa langitnong paglaom. Ngano? Sa pipila ka kahimtang, kini tungod kay ilang gipulihan ang pipila ka indibiduwal nga unang natawag apan wala magmatinumanon. (Itandi ang Pinadayag 3:16.) Naghisgot pa gani si Pablo ug pipila niya ka kaila nga mibiya sa kamatuoran. (Filip. 3:17-19) Kinsa kahay pilion ni Jehova nga maoy mopuli? Siyempre, siya nay modesisyon niana. Hinuon, morag makataronganon nga ang iyang pilion dili mga bag-ohan kondili kadtong nakapamatuod na sa ilang pagkamaunongon sa taastaas nga panahon, sama sa mga tinun-an nga gisultihan ni Jesus dihang iyang gisugdan ang kasaulogan sa Memoryal. a—Luc. 22:28.

16. Kon bahin sa mga dinihogan, mapasalamaton kita sa unsa, ug makasalig kita sa unsa?

¹⁶ Hinunoa, mopatim-aw nga dili tanan niadtong gitawag alang sa langitnong paglaom sukad sa 1930 maoy mga kapuli lamang niadtong wala magmatinumanon. Gipaneguro gayod ni Jehova nga adunay makauban nato nga dinihogang mga Kristohanon latas sa kataposang mga adlaw niining sistemaha sa mga butang hangtod sa kalaglagan sa “Dakong Babilonya.” b (Pin. 17:5) Ug makasalig kita nga ang bug-os nga gidaghanon sa 144,000 ka membro makompleto na sa gitakdang panahon ni Jehova ug sa kataposan silang tanan magmando na sa Gingharian sa Diyos. Makasalig usab kita sa matagnaong Pulong nga ang nagakadaghan nga dakong panon magpadayong matinumanon ingong grupo. Sa dili madugay sila ‘molabang sa dakong kasakitan’ nga ipahamtang sa kalibotan ni Satanas ug malipayong mosulod sa bag-ong kalibotan sa Diyos.

Ang Langitnong Kagamhanan sa Diyos Hapit Nang Makompleto!

17. Sumala sa 1 Tesalonica 4:15-17 ug Pinadayag 6:9-11, unsay nahitabo sa dinihogang mga Kristohanon nga namatayng matinumanon?

¹⁷ Sukad sa 33 K.P., libolibo ka dinihogang mga Kristohanon ang nagpasundayag ug lig-ong pagtuo ug nagmatinumanon hangtod sa kamatayon.  Sila giisip nang takos makadawat sa Gingharian ug, dayag nga sugod sa unang mga adlaw sa presensiya ni Kristo, ila nang nadawat ang ilang langitnong ganti.—Basaha ang 1 Tesalonica 4:15-17; Pinadayag 6:9-11.

18. (a) Ang mga dinihogan nga ania pa sa yuta makasalig sa unsa? (b) Giunsa paglantaw sa ubang mga karnero ang ilang mga igsoon nga dinihogang mga Kristohanon?

¹⁸ Ang mga dinihogan nga ania pa sa yuta masaligon gayod nga kon sila magmatinumanon, ilang madawat usab ang ilang langitnong ganti. Samtang pamalandongon sa milyonmilyong ubang mga karnero ang pagtuo sa ilang dinihogang mga igsoon, sila mouyon sa giingon ni apostol Pablo, kinsa miingon bahin sa dinihogang mga igsoon sa Tesalonica: “Kami nagpasigarbo kaninyo taliwala sa mga kongregasyon sa Diyos tungod sa inyong paglahutay ug pagtuo diha sa tanan ninyong mga paglutos ug sa mga kasakitan nga inyong giantos. Kini maoy pamatuod sa matarong nga paghukom sa Diyos, nga motultol sa pag-isip kaninyo nga takos sa gingharian sa Diyos, nga alang niini kamo sa pagkatinuod nagaantos.” (2 Tes. 1:3-5) Inigkamatay sa kataposang membro sa mga dinihogan dinhi sa yuta, bisag kanus-a kana mahitabo, makompleto na ang langitnong kagamhanan sa Diyos. Pagkadakong kasadya unya kana didto sa langit ug dinhi sa yuta!

[Mga footnote]

Makapatin-aw Ka Ba?

• Unsay gibutyag sa Diyos kang Abraham may kalabotan sa Adlaw sa Paghukom?

• Nganong si Abraham gipahayag nga matarong?

• Unsay maangkon niadtong sakop sa binhi ni Abraham nga gipahayag nga matarong?

• Unsang pagsalig ang nabatonan sa tanang Kristohanon?

[Mga Pangutana sa Pagtuon]

[Hulagway sa panid 20]

Gidasig ni Jesus ang iyang mga sumusunod sa pagpangab-ot sa Gingharian

[Hulagway sa panid 21]

Gisugdan ni Jehova pagpili ang ikaduhang bahin sa binhi ni Abraham sa Pentekostes 33 K.P.

[Mga Hulagway sa panid 23]

Mapasalamaton ang ubang mga karnero nga kauban nila ang dinihogang mga Kristohanon panahon sa kataposang mga adlaw