Giisip nga Takos Pagatultolan Ngadto sa mga Tuboran sa mga Tubig sa Kinabuhi

“Ang Kordero . . . magabantay kanila, ug magatultol kanila ngadto sa mga tuboran sa mga tubig sa kinabuhi.”—PIN. 7:17.

1. Giunsa pagpaila sa Pulong sa Diyos ang dinihogang mga Kristohanon, ug unsang buluhaton ang gihatag ni Jesus kanila?

 ANG Pulong sa Diyos nagpaila sa dinihogang mga Kristohanon nga nagdumala sa mga kabtangan ni Kristo sa yuta ingong “ang matinumanon ug maalamong ulipon.” Sa dihang gisusi ni Kristo ang maong “ulipon” niadtong 1918, iyang nakaplagan ang mga dinihogan sa yuta nga matinumanong nagtaganag espirituwal nga “pagkaon sa hustong panahon.” Busa human niadto, si Jesus, ang Agalon, nalipay sa pagtudlo kanila “ibabaw sa tanan niyang mga kabtangan.” (Basaha ang Mateo 24:45-47.) Niining paagiha, ang mga dinihogan nag-alagad sa ubang mga magsisimba ni Jehova dinhi sa yuta sa dili pa sila makadawat sa ilang langitnong panulondon.

2. Batbata ang mga kabtangan ni Jesus.

² Ang usa ka agalon adunay awtoridad ibabaw sa iyang mga kabtangan ug makagamit siya niini sumala sa iyang gusto. Ang mga kabtangan ni Jesu-Kristo, ang gitudlong Hari ni Jehova, naglakip sa  tanang intereses sa Gingharian dinhi sa yuta. Lakip niana ang “dakong panon” nga nakita ni apostol Juan sa panan-awon. Gibatbat ni Juan ang dakong panon niining paagiha: “Tan-awa! usa ka dakong panon, nga walay tawong makaihap, gikan sa tanang kanasoran ug mga tribo ug katawhan ug mga pinulongan, nga nagbarog atubangan sa trono ug atubangan sa Kordero, nga nagsul-ob ug maputing tag-as nga mga besti; ug nanagdalag mga palwa sa palma diha sa ilang mga kamot.”—Pin. 7:9.

3, 4. Sa unsang paagi bulahan kaayo ang mga sakop sa dakong panon?

³ Ang mga membro sa dakong panon nalakip niadtong gihisgotan ni Jesus ingong iyang “ubang mga karnero.” (Juan 10:16) Sila naglaom nga mabuhi sa walay kataposan sa paraisong yuta. Masaligon sila nga si Jesus “magatultol kanila ngadto sa mga tuboran sa mga tubig sa kinabuhi” ug nga “ang Diyos magapahid sa tanang luha gikan sa ilang mga mata.” Tungod sa maong paglaom, ilang “gilabhan ang ilang tag-as nga mga besti ug gipaputi kini sa dugo sa Kordero.” (Pin. 7:14, 17) Sila nagpasundayag ug pagtuo sa halad lukat ni Jesus, mao nga sa panglantaw sa Diyos sila nagsul-ob ug ‘puti nga mga besti.’ Sila gipahayag nga matarong ingong mga higala sa Diyos, sama kang Abraham.

⁴ Dugang pa, sanglit giisip man sa Diyos nga matarong ang nagkadaghan nga dakong panon sa ubang mga karnero, makalaom sila nga makalabang-buhi inigkalaglag niining sistema sa mga butang panahon sa dakong kasakitan. (Sant. 2:23-26) Sila makaduol kang Jehova, ug ingong grupo, sila may talagsaong kalaoman nga makalabang-buhi sa Armagedon. (Sant. 4:8; Pin. 7:15) Sila dili usa ka bulag nga grupo kondili sila andam nga moalagad ubos sa pagtultol sa langitnong Hari ug sa iyang dinihogang mga igsoon dinhi sa yuta.

5. Sa unsang paagi gipaluyohan sa dakong panon ang dinihogang mga igsoon ni Kristo?

⁵ Ang dinihogang mga Kristohanon nakaagom ug padayong makaagom ug grabeng pagsupak gikan sa kalibotan ni Satanas. Bisan pa niana, sila makasalig sa pagpaluyo sa ilang mga kauban nga sakop sa dakong panon. Samtang nagkaubos karon ang gidaghanon sa dinihogang mga Kristohanon, nadugangan usab ug ginatos ka libo ang gidaghanon sa dakong panon matag tuig. Dili madumala sa mga dinihogan ang tagsatagsa sa duolan sa 100,000 ka kongregasyon sa tibuok kalibotan. Busa, ang mga dinihogan  gipaluyohan sa ubang mga karnero pinaagig kuwalipikadong mga lalaki nga sakop sa dakong panon nga nag-alagad ingong mga ansiyano sa kongregasyon. Sila nagtabang sa pag-atiman sa milyonmilyong Kristohanon nga gipiyal karon ngadto sa “matinumanon ug maalamong ulipon.”

6. Sa unsang paagi gitagna ang pagpaluyo sa ubang mga karnero sa dinihogang mga Kristohanon?

⁶ Ang kinabubut-ong pagpaluyo sa ubang mga karnero ngadto sa dinihogang mga Kristohanon gitagna ni manalagnang Isaias. Siya misulat: “Mao kini ang giingon ni Jehova: ‘Ang dili-binayrang mga mamumuo sa Ehipto ug ang mga magpapatigayon sa Etiopia ug ang mga Sabeanhon, nga tag-as nga mga tawo, sila manganha gayod kanimo, ug sila mahimong imoha. Sa imong luyo manglakaw sila.’” (Isa. 45:14) Sa simbolikong paagi, ang mga Kristohanon nga may yutan-ong paglaom karon naglakaw luyo sa dinihogang ulipon nga matang ug sa Nagamandong Lawas niini, nga nagsunod sa ilang pagpanguna. Ingong “dili-binayrang mga mamumuo,” ang ubang mga karnero kinabubut-on ug kinasingkasing nga naggamit sa ilang kusog ug kahinguhaan sa pagpaluyo sa tibuok-kalibotang pagsangyaw nga gipabuhat ni Kristo sa iyang dinihogang mga sumusunod sa yuta.—Buh. 1:8; Pin. 12:17.

7. Alang sa unsa nga ginabansay na karon ang dakong panon?

⁷ Samtang ilang gipaluyohan ang ilang dinihogang mga igsoon, ang mga membro sa dakong panon ginabansay na karon nga mahimong pundasyon sa bag-ong tawhanong katilingban nga molungtad human sa Armagedon. Ang maong pundasyon kinahanglang lig-on, ug ang mga membro niini kinahanglang andam sa pagtuman sa isugo sa Agalon. Ang matag Kristohanon adunay kahigayonan sa pagpasundayag nga siya mahimong gamiton sa Hari, si Kristo Jesus. Pinaagi sa pagpasundayag ug pagtuo ug pagkamaunongon karon, gipakita niya nga siya andam sa pagbuhat sa isugo kaniya sa Hari didto sa bag-ong kalibotan.

Gipamatud-an sa Dakong Panon ang Ilang Pagtuo

8, 9. Sa unsang paagi gipamatud-an sa dakong panon ang ilang pagtuo?

⁸ Gipamatud-an sa ubang mga karnero nga kauban sa dinihogang mga Kristohanon ang ilang pagtuo sa lainlaing paagi. Una, ilang gipaluyohan ang mga dinihogan sa pagmantala sa maayong balita sa Gingharian sa Diyos. (Mat. 24:14; 28:19, 20) Ikaduha, sila kinabubut-ong nagpasakop sa pagtultol sa Nagamandong Lawas.—Heb. 13:17; basaha ang Zacarias 8:23.

⁹ Ikatulo, gipaluyohan sa mga membro sa dakong panon ang ilang dinihogang mga igsoon pinaagi sa pagkinabuhi uyon sa matarong nga mga prinsipyo ni Jehova. Naningkamot sila sa pag-ugmad sa “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.” (Gal. 5:22, 23) Karong panahona, imbes ipasundayag kining mga hiyasa, “ang mga buhat sa unod” na hinuon maoy popular. Bisan pa niana, ang mga membro sa dakong panon determinadong maglikay sa “pakighilawas, kahugawan, malaw-ayng panggawi, idolatriya, pagbuhat sa espiritismo, mga pagdumtanay, panag-away, pangabugho, mga pagsinta sa kasuko, mga pakigtigi, mga pagkabahinbahin, mga sekta, mga kasina, mga paghuboghubog, mga hudyaka, ug mga butang nga sama niini.”—Gal. 5:19-21.

10. Unsay determinadong buhaton sa mga membro sa dakong panon?

¹⁰ Sanglit kita dili hingpit, mahimong malisdan kita sa pagpasundayag sa Kristohanong mga hiyas, sa paglikay sa mga buhat sa unod, ug sa pagsukol sa pagpit-os sa kalibotan ni Satanas. Bisan pa niana, determinado kita nga dili magpadaog sa kahigawad tungod sa atong mga kahuyangan, temporaryong mga kapakyasan, o pisikal nga mga limitasyon nga makapahuyang sa atong pagtuo o makapabugnaw sa atong gugma kang Jehova. Nahibalo kita nga tumanon ni Jehova ang iyang gisaad, nga iyang luwason ang dakong panon latas sa dakong kasakitan.

11. Unsang mga taktika ang gigamit ni Satanas aron mahuyang ang pagtuo sa mga Kristohanon?

¹¹ Sa samang higayon, kita magbantay kanunay tungod kay nahibalo kita nga ang atong kaaway mao gayod ang Yawa, ug siya dili dayon mosurender. (Basaha ang 1 Pedro 5:8.) Iyang gigamit ang mga apostata ug ang uban pa sa pagkombinsir kanato nga sayop ang mga pagtulon-an nga atong gisunod. Apan kasagarang pakyas kanang taktikaha. Sa susama, bisan tuod ang paglutos usahay makapahinay  sa atong pagsangyaw, kasagaran kini nakapalig-on hinuon sa pagtuo niadtong ginalutos. Busa, naningkamot si Satanas sa paggamit ug mga pamaagi nga gituohan niyang makapaluya gayod sa atong pagtuo. Pahimuslan niya ang mga pagbati sa kahigawad. Gipasidan-an ang unang-siglong mga Kristohanon bahin niini nga kapeligrohan sa dihang sila giingnan: “Tagda pag-ayo ang usa [si Kristo] nga nakaantos sa mga pagsupak sa mga makasasala batok sa ilang kaayohan.” Ngano man? “Aron dili kamo kapoyon ug mangaluya ang inyong mga kalag.”—Heb. 12:3.

12. Sa unsang paagi ang tambag sa Bibliya makapalig-on sa mga nahigawad?

¹² Gibati ba nimong kaundangon na sa pag-alagad kang Jehova? Gibati ba nimo usahay nga ikaw napakyas? Kon mao, ayawg tugoti si Satanas sa pagpahimulos sa maong mga pagbati sa pagpugong kanimo sa pag-alagad kang Jehova. Ang pagtuon pag-ayo sa Bibliya, tim-os nga pag-ampo, ug regular nga pagtambong sa mga tigom ug pagpakig-uban sa mga isigka-Kristohanon mopalig-on kanimo aron ‘dili maluya ang imong kalag.’ Si Jehova nagsaad sa pagtabang sa tanang nag-alagad kaniya nga maulian sa ilang kusog, ug makasalig kita niana. (Basaha ang Isaias 40:30, 31.) Isentro ang imong pagtagad sa pag-alagad sa Gingharian. Likayi ang makahurot-ug-panahon nga mga kabaldahan, ug unaha ang pagtabang sa uban. Pinaagi niana ikaw madasig sa paglahutay bisan pa sa kahigawad.—Gal. 6:1, 2.

Naluwas Gikan sa Kasakitan Ngadto sa Bag-ong Kalibotan

13. Unsang buluhaton ang nagpaabot niadtong makalabang-buhi sa Armagedon?

¹³ Human sa Armagedon, ang daghang binanhaw nga mga dili matarong kinahanglang matudloan sa mga balaod ni Jehova. (Buh. 24:15) Kinahanglang makat-onan nila ang bahin sa halad lukat ni Jesus. Dugang pa, kinahanglang matudloan sila sa pagpasundayag ug pagtuo sa maong halad aron sila makabatog mga kaayohan. Kinahanglang ilang isalikway ang bakak nga relihiyosong mga pagtulon-an nga ilang gituohan kanhi ug talikdan ang daan nilang paagi sa pagkinabuhi. Sila kinahanglang makakat-on sa pagsul-ob sa bag-ong personalidad nga magpaila sa matuod nga mga Kristohanon. (Efe. 4:22-24; Col. 3:9, 10) Ang ubang mga karnero nga makalabang-buhi sa Armagedon adunay dakong buluhaton. Makapalipay gayod ang pagbuhat niana sa pag-alagad kang Jehova, nga walay mga pagpit-os ug mga kabaldahan gikan sa presenteng daotang kalibotan!

14, 15. Batbata ang pagbayloanay ug impormasyon nga mahitabo tali sa mga nakalabang-buhi sa dakong kasakitan ug sa binanhaw nga mga matarong.

¹⁴ Ang matinumanong mga alagad ni Jehova nga nangamatay sa wala pa ang ministeryo ni  Jesus sa yuta makakat-on usab ug daghang butang nianang panahona. Ila gayong mailhan ang gisaad nga Mesiyas, kinsa ilang gipaabot apan wala gayod makit-i. Sa buhi pa sila, ila nang gipasundayag nga andam silang magpatudlo ni Jehova. Handurawa kon unsa ka dako ang atong kalipay ug pribilehiyo sa pagtabang kanila—pananglitan, sa pagpatin-aw kang Daniel sa katumanan sa mga tagna nga iyang gisulat apan wala niya masabti!—Dan. 12:8, 9.

¹⁵ Bisan tuod daghag makat-onan gikan kanato ang mga binanhaw, daghan usab kitag makat-onan gikan kanila. Ilang ikasaysay kanato ang detalye sa mga panghitabo nga gilakbitan lamang paghisgot sa Bibliya. Hunahunaa kon unsa ka makaiikag ang pagkahibalo sa mga detalye bahin kang Jesus gikan mismo sa iyang ig-agaw nga si Juan Bawtista! Ang atong makat-onan gikan sa maong matinumanong mga saksi seguradong makapalalom pa gayod sa atong pagpabili sa Pulong sa Diyos. Ang nangamatay nga matinumanong mga alagad ni Jehova, lakip niadtong sakop sa dakong panon nga mamatay panahon sa kataposan, makadawat ug “mas maayong pagkabanhaw.” Sila nagsugod sa ilang pag-alagad kang Jehova diha sa kalibotan nga gimandoan ni Satanas. Malipay gayod sila nga makapadayon sa ilang pag-alagad ilalom sa mas maayong mga kahimtang sa bag-ong kalibotan!—Heb. 11:35; 1 Juan 5:19.

16. Sumala sa tagna, unsay mahitabo panahon sa Adlaw sa Paghukom?

¹⁶ Sa usa ka yugto panahon sa Adlaw sa Paghukom, buksan ang mga linukot nga basahon. Gawas pa sa Bibliya, ipasukad usab niini ang paghukom sa tanang buhi kon sila ba takos alang sa kinabuhing walay kataposan. (Basaha ang Pinadayag 20:12, 13.) Inigkatapos sa Adlaw sa Paghukom, ang matag indibiduwal aduna unyay daghang kahigayonan sa pagpasundayag sa iyang baroganan bahin sa isyu sa pagkasoberano sa uniberso. Magpasakop ba siya sa Gingharian sa Diyos ug magpagiya sa Kordero ngadto sa “mga tuboran sa mga tubig sa kinabuhi”? O mosukol ba siya ug dili magpasakop niini? (Pin. 7:17; Isa. 65:20) Nianang panahona, ang tanan dinhi sa yuta adunay kahigayonan sa paghimog personal nga desisyon nga wala maimpluwensiyahi sa napanunod nga sala o sa daotang katilingban. Wala nay makakuwestiyon sa matarong nga kataposang paghukom ni Jehova. Ang mga daotan lamang maoy pagalaglagon sa walay kataposan.—Pin. 20:14, 15.

17, 18. Unsay mahinamong gipaabot sa dinihogang mga Kristohanon ug sa ubang mga karnero panahon sa Adlaw sa Paghukom?

¹⁷ Ang dinihogang mga Kristohanon karon, kay giisip nang takos makadawat sa Gingharian, mahinamong nagpaabot sa pagmando panahon sa Adlaw sa Paghukom. Pagkadakong pribilehiyo kana alang kanila! Ang maong paglaom maoy nakadasig kanila sa pagsunod sa tambag nga gihatag ni Pedro sa ilang mga igsoon sa unang siglo: “Buhata ang kutob sa inyong maarangan aron maseguro ang inyong pagkatinawag ug pagkapinili; kay kon kamo magpadayon sa pagbuhat niining mga butanga kamo dili gayod mangapakyas. Sa pagkatinuod, sa ingon dagayang itagana kaninyo ang pagsulod ngadto sa walay kataposang gingharian sa atong Ginoo ug Manluluwas nga si Jesu-Kristo.”—2 Ped. 1:10, 11.

¹⁸ Malipayon usab ang ubang mga karnero tungod kay nabatonan sa ilang dinihogang mga igsoon ang maong paglaom. Sila determinadong mopaluyo kanila. Ingong mga higala sa Diyos karon, sila nadasig sa pagbuhat kutob sa ilang maarangan sa pag-alagad sa Diyos. Panahon sa Adlaw sa Paghukom, sila malipayon ug bug-os-kasingkasing nga magpaluyo sa mga kahikayan sa Diyos samtang pagatultolan sila ni Jesus ngadto sa mga tuboran sa mga tubig sa kinabuhi. Dayon sa kataposan, sila pagaisipong takos nga mahimong yutan-ong mga alagad ni Jehova hangtod sa kahangtoran!—Roma 8:20, 21; Pin. 21:1-7.

Nahinumdom Ka Ba?

• Unsay nalakip sa mga kabtangan ni Jesus?

• Sa unsang paagi gipaluyohan sa dakong panon ang ilang dinihogang mga igsoon?

• Unsang mga pribilehiyo ug kalaoman ang mapahimuslan sa dakong panon?

• Unsay imong ikasulti bahin sa Adlaw sa Paghukom?

[Mga Pangutana sa Pagtuon]

[Hulagway sa panid 25]

Gilabhan sa dakong panon ang ilang tag-as nga mga besti ug gipaputi kini pinaagi sa dugo sa Kordero

[Hulagway sa panid 27]

Unsay gusto nimong makat-onan gikan sa binanhaw nga mga matinumanon?