Ilang Gipalambo ang Ilang Kinabuhi—Makahimo Ka ba Usab Niana?

SI Marc, usa ka brader nga taga-Canada, nagtrabaho sa usa ka kompaniya nga tiggamag modernong mga robot nga gigamit sa mga ahensiya alang sa kawanangan. Siya nagtrabahog partaym ug nag-alagad ingong regular payunir. Dayon, gitanyagan si Marc sa usa ka superbisor ug mas taas nga posisyon—usa ka bug-os-panahong trabaho nga dakog suweldo. Unsay gihimo ni Marc?

Si Amy, usa ka sister nga taga-Pilipinas, nag-alagad ingong regular payunir samtang nag-eskuyla. Human makagraduwar, gitanyagan siyag usa ka bug-os-panahong trabaho nga makapupos sa iyang panahon apan dakog suweldo. Unsa kahay gipili ni Amy?

Managlahi ang desisyon ni Marc ug Amy, ug ang mga resulta sa ilang mga desisyon nag-ilustrar sa kamaalamon sa tambag nga gihatag ngadto sa mga Kristohanon sa karaang Corinto. Si apostol Pablo misulat: “Kadtong nagagamit sa kalibotan manig-ingon kanilang wala magagamit niini sa bug-os.”—1 Cor. 7:29-31.

Gamita ang Kalibotan Apan Dili sa Bug-os

Sa dili pa nato hisgotan kon unsay nahitabo kang Marc ug Amy, hisgotan una nato kadiyot ang kahulogan sa pulong “kalibotan” (o, koʹsmos sa Grego) nga gigamit ni Pablo diha sa iyang sulat ngadto sa mga taga-Corinto. Nianang tekstoha sa Bibliya, ang koʹsmos nagtumong sa sistema sa kalibotan nga atong gipuy-an—ang tawhanong katilingban sa katibuk-an—ug kini naglakip sa ordinaryong mga butang nga bahin sa adlaw-adlawng pagkinabuhi, sama sa balay, pagkaon, ug besti. a Aron mabatonan ang  maong mga kinahanglanon, kadaghanan kanato kinahanglang motrabaho. Sa pagkatinuod, wala kitay mahimo gawas sa paggamit sa kalibotan aron atong matuman ang atong Kasulatanhong obligasyon sa pagtagana sa atong kaugalingong panginahanglan ug sa atong mga pamilya. (1 Tim. 5:8) Apan sa samang panahon, kita nahibalo nga “ang kalibotan nagakahanaw.” (1 Juan 2:17) Busa, atong gamiton ang kalibotan segun sa gikinahanglan apan dili “sa bug-os.”—1 Cor. 7:31.

Kay nadasig sa maong tambag sa Bibliya nga dili gamiton sa bug-os ang kalibotan, gisusi sa daghang kaigsoonan ang ilang mga kahimtang, gikunhoran ang ilang panahon sa pagtrabaho, ug gipayano ang ilang pagkinabuhi. Human sa pagbuhat niana, ilang naamgohan nga ila gayong napalambo ang ilang kinabuhi tungod kay mas dakong panahon na ang ilang magugol alang sa ilang mga pamilya ug sa pag-alagad kang Jehova. Dugang pa, tungod sa ilang yanong pagkinabuhi mas misalig sila kang Jehova inay sa kalibotan. Makahimo ka ba usab niana—ang pagpayano sa imong pagkinabuhi aron mas daghang panahon ang imong magugol sa pag-alagad kang Jehova?—Mat. 6:19-24, 33.

“Kami Mas Nasuod Pa Gayod Kang Jehova”

Gituman ni Marc, nga gihisgotan sa sinugdanan, ang tambag sa Bibliya nga dili gamiton sa bug-os ang kalibotan. Iyang gibalibaran ang taas nga posisyon nga gitanyag kaniya. Pipila ka adlaw sa ulahi, gitanyagan na usab si Marc sa iyang superbisor ug mas dako pa gayong suweldo aron makombinsir siya sa pagdawat sa bag-ong trabaho. “Pagsulay gayod kadto,” matod ni Marc, “apan mibalibad gihapon ako.” Siya mipatin-aw kon ngano: “Gusto namo ni Paula, nga akong asawa, nga moalagad gayod kang Jehova kutob sa among maarangan. Busa, nakahukom kami sa pagpayano sa among pagkinabuhi. Miampo kami kang Jehova alang sa kaalam aron among makab-ot ang among tumong ug nagtakda kamig tinong petsa kon kanus-a kami mosugod sa paggahin ug mas dakong panahon sa pag-alagad kang Jehova.”

Matod ni Paula: “Nagtrabaho akog tulo ka adlaw sa usa ka semana ingong sekretarya sa usa ka ospital ug igo ra ang akong suweldo. Regular payunir usab ako. Apan, sama kang Marc, gusto kong moalagad kang Jehova bisan asa nga may dakong panginahanglan sa mga magmamantala sa Gingharian. Apan, sa dihang nananghid na akong moundang sa trabaho, giingnan ko sa akong superbisor nga kuwalipikado ako alang sa posisyon sa ehekutibong sekretarya nga bag-o rang nabakante. Kadto ang kinadak-ag suweldo sa sekretaryal nga trabaho diha sa ospital, apan desidido na akong moluwat. Sa dihang giingnan nako ang akong superbisor kon nganong wala ako moaplay sa maong posisyon, gidayeg niya ang akong pagtuo.”

Sa wala madugay, si Marc ug Paula nakadawat ug asaynment sa pag-alagad ingong mga espesyal payunir sa usa ka gamayng kongregasyon sa usa ka nahilit nga dapit sa Canada. Unsay miresulta sa ilang pagbalhin? Si Marc miingon: “Human biyai ang usa ka dakog-suweldo nga trabaho diin akong gigugol ang halos katunga sa akong kinabuhi, mibati akog kabalaka, apan gipanalanginan ni Jehova ang among ministeryo. Nalipay gayod kami nga nakatabang sa uban nga makaalagad sa Diyos. Ang bug-os-panahong pag-alagad nakapalambo usab sa among panagtiayon. Ang among kabildohay nasentro sa mas hinungdanon gayong mga butang, kanang may kalabotan sa among pag-alagad kang Jehova. Kami mas nasuod pa gayod kang Jehova.” (Buh. 20:35) Midugang si Paula: “Kon imong biyaan ang imong trabaho  ug ang kahamugaway sa imong naandang pagkinabuhi, kinahanglang mosalig ka gayod sa bug-os kang Jehova. Kanay among gihimo, ug gipanalanginan kami ni Jehova. Ang minahal nga mga kaigsoonan sa among bag-ong kongregasyon mipabati kanamong gihigugma ug gikinahanglan. Ako nang gigamit karon ang kusog nga ako kanhing gigamit alang sa akong trabaho sa pagtabang sa mga tawo nga makaila sa Diyos. Malipayon gayod ako sa pag-alagad ingong espesyal payunir.”

‘Dato Apan Dili Malipayon’

Lahi ang gipili ni Amy, nga gihisgotan ganina. Iyang gidawat ang dakog-suweldo nga bug-os-panahong trabaho nga gitanyag kaniya. Matod ni Amy: “Sa unang tuig, aktibo gihapon ako sa ministeryo apan akong namatikdan nga imbes pauswagon ang akong pag-alagad kang Jehova, ako na hinuong giuna ang akong trabaho. Nakadawat akog makapadaning mga tanyag ug akong gigamit ang akong kusog aron mas motaas pa ang akong posisyon. Samtang nagkadaghan ang akong mga responsabilidad sa akong trabaho, nagkagamay usab ang akong panahon alang sa ministeryo. Sa kadugayan, wala na ako mosangyaw.”

Sa paghinumdom sa maong panahon, si Amy miingon: “Ako nadato. Kanunay akong nagbiyahe ug nagpahimulos sa kabantog duyog sa akong propesyon. Apan dili ako malipayon. Bisag daghan akog kuwarta, daghan usab akog problema. Wala ko masayod kon unsay nakaapan. Sa kataposan akong naamgohan nga tungod sa akong pagpangagpas ug karera niining kalibotana, diriyot na akong ‘nahisalaag gikan sa pagtuo.’ Ingong sangpotanan, sama gayod sa giingon sa Pulong sa Diyos, ako nakaagom ug ‘daghang kasakitan.’”—1 Tim. 6:10.

Unsay gihimo ni Amy? Siya miingon: “Nagpatabang ako sa mga ansiyano aron mahibalik ang akong relasyon sa Diyos ug mitambong na usab sa mga tigom. Panahon sa pag-awit, mohilak ako. Nahinumdom ako kon unsa ako ka malipayon sulod sa lima ka tuig dihang ako nakigbahin sa pagsangyaw ingong payunir, bisan pag kabos ako sa materyal niadtong panahona. Akong naamgohan nga kinahanglang moundang na ako sa pag-usik-usik sa akong panahon sa pagpangitag kuwarta ug kinahanglang unahon na nako ang intereses sa Gingharian. Mitrabaho na lang akog ubos-ubos nga posisyon, nga nagkahulogang makunhorag katunga ang akong suweldo, ug misugod na usab ako sa pagsangyaw.” Si Amy miingon: “Nalipay ako sa pag-alagad ingong payunir sulod sa pipila ka tuig. Mibati na ako karon ug katagbawan nga wala gayod nako mapahimusli dihang akong gigugol ang kadaghanan sa akong panahon sa pagtrabaho alang sa kalibotan.”

Imo bang mausab ang imong mga kahimtang ug mapayano ang imong pagkinabuhi? Kon gamiton nimo ang imong panahon sa pagpauswag sa intereses sa Gingharian, imong mapalambo usab ang imong kinabuhi.—Prov. 10:22.

[Footnote]

[Blurb sa panid 19]

Imo bang mausab ang imong mga kahimtang ug mapayano ang imong pagkinabuhi?

[Kahon/Hulagway sa panid 19]

“Gimahal Ko na Kini!”

Si David, nga usa ka Kristohanong ansiyano sa Amerika, gustong moduyog sa iyang asawa ug mga anak sa bug-os-panahong pag-alagad. Nahikay niya nga makatrabahog partaym sa kompaniya nga iyang gitrabahoan, mao nga siya nakaregular payunir. Napalambo ba ang iyang kinabuhi tungod niana? Pipila ka bulan sa ulahi, misulat si David sa usa niya ka higala: “Wala nay mas makapatagbaw pa kay sa pag-alagad sa bug-os kang Jehova uban sa imong pamilya. Nagtuo gayod ako nga dugay kong makapasibo sa pagpayunir, apan karon pa lang, gimahal ko na kini! Nagmalipayon gayod ako.”

[Hulagway sa panid 18]

Si Marc ug Paula nga nagsangyaw