Mga Pangunang Punto Gikan sa Basahon ni Mateo
Ang Pulong ni Jehova Buhi
Mga Pangunang Punto Gikan sa Basahon ni Mateo
ANG unang tawo nga nagsulat sa makaiikag nga asoy sa kinabuhi ug ministeryo ni Jesus mao si Mateo—usa ka suod nga kauban ni Jesu-Kristo ug maniningil ug buhis kanhi. Ang Ebanghelyo ni Mateo unang gisulat diha sa Hebreohanong pinulongan ug sa ulahi gihubad sa Grego. Kini nahuman pagsulat sa mga 41 K.P. ug nagsilbing tulay tali sa Hebreohanong Kasulatan ug sa Kristohanon Gregong Kasulatan.
Lagmit gisulat ilabina alang sa mga Hudiyo, kining makapatandog ug mapuslanong Ebanghelyo naghubit kang Jesus ingong ang gisaad nga Mesiyas, ang Anak sa Diyos. Ang pagpatalinghog sa mensahe niini mopalig-on sa atong pagtuo sa matuod nga Diyos, sa iyang Anak, ug sa Iyang mga saad.—Heb. 4:12.
“ANG GINGHARIAN SA MGA LANGIT HADUOL NA”
Tungod kay ang gipasiugda ni Mateo mao man ang Gingharian ug ang mga pagtulon-an ni Jesus, wala niya ipresentar sa eksaktong pagkasunodsunod ang mga panghitabo diha sa iyang Ebanghelyo. Pananglitan, giuna niya pag-asoy ang Wali sa Bukid, bisan pag gipahayag kana ni Jesus mga usa ka tuig na ang milabay sukad sa pagsugod niya sa iyang ministeryo.
Panahon sa iyang ministeryo sa Galilea, si Jesus naghimog mga milagro, naghatag ug mga instruksiyon bahin sa pagsangyaw ngadto sa iyang 12 ka apostoles, nagsaway sa mga Pariseo, ug nag-asoy ug mga ilustrasyon bahin sa Gingharian. Dayon siya mipahawa sa Galilea ug miadto sa “mga utlanan sa Judea tabok sa Jordan.” (Mat. 19:1) Sa ilang pagpaingon didto, gisultihan niya ang iyang mga tinun-an: ‘Motungas kita paingon sa Jerusalem, ug ang Anak sa tawo pagahukman sa kamatayon, ug sa ikatulo ka adlaw siya pagabangonon.’—Mat. 20:18, 19.
Tubag sa mga pangutana bahin sa kasulatan:
3:16—Sa unsang paagi “ang mga langit nabuksan” sa dihang gibawtismohan si Jesus? Kini morag nagpaila nga nahinumdoman ni Jesus ang iyang paglungtad sa langit sa wala pa siya mahimong tawo.
5:21, 22—Mas seryoso ba ang pagpahungaw sa kasuko kay sa pagdumot? Si Jesus nagpasidaan nga ang usa ka tawo nga nagdumot sa iyang igsoon nakahimog seryosong sala. Apan, mas seryoso ang pagpahungaw sa kasuko pinaagi sa pagsultig mga pulong sa pagtamay, kay ang usa nga naghimo niana manubag sa Korte Suprema inay sa lokal nga hukmanan.
5:48—Posible ba gayod nga kita “magmahingpit, ingon nga ang [atong] langitnong Amahan hingpit”? Oo, apan sa relatibong diwa. Ang gihisgotan ni Jesus dinhi maoy kabahin sa gugma, ug iyang giingnan ang mga mamiminaw sa pagsundog sa Diyos ug magmahingpit, o magmabug-os sa ilang gugma. (Mat. 5:43-47) Sa unsang paagi? Pinaagi sa paghigugma usab sa ilang mga kaaway.
7:16—Unsang “mga bunga” ang magpaila sa matuod nga relihiyon? Kining mga bungaha dili lamang ang atong panggawi. Kini naglakip usab sa mga pagtulon-an nga atong gituohan ug gisunod.
10:34-38—Ang mensahe sa Kasulatan mao ba ang hinungdan sa pagkabahinbahin sa pamilya? Dili gayod. Hinunoa, ang baroganan sa dili-magtutuong mga membro sa pamilya mao ang hinungdan sa pagkabahinbahin. Tingali ilang isalikway o supakon ang Kristiyanidad mao nga magkabahinbahin ang pamilya.—Luc. 12:51-53.
11:2-6—Kon si Juan nahibalo na nga si Jesus mao ang Mesiyas tungod sa iyang pagkadungog sa tingog sa Diyos, nganong nangutana man siya kon si Jesus mao ba “ang Usa nga Moanhi”? Lagmit nakapangutana si Juan niini aron makompirmar kini gikan mismo ni Jesus. Apan gawas pa niana, gustong mahibaloan usab ni Juan kon aduna pa bay “lain” nga moabot uban ang gahom sa Gingharian ug magtuman sa tanang gilaoman sa mga Hudiyo. Gipaila sa tubag ni Jesus nga wala nay mosunod kaniya.
19:28—Unsay gihawasan sa “napulog-duha ka tribo sa Israel” nga pagahukman? Kini wala maghawas sa 12 ka tribo sa espirituwal nga Israel. (Gal. 6:16; Pin. 7:4-8) Ang mga apostoles nga gikaestorya ni Jesus mahimong bahin sa espirituwal nga Israel, dili mga maghuhukom sa mga membro niini. Si Jesus naghimog ‘usa ka pakigsaad uban kanila alang sa usa ka gingharian,’ ug sila mahimong ‘usa ka gingharian ug mga saserdote sa Diyos.’ (Luc. 22:28-30; Pin. 5:10) Ang espirituwal nga Israel mao ang “magahukom sa kalibotan.” (1 Cor. 6:2) Busa, ang “napulog-duha ka tribo sa Israel,” nga pagahukman niadtong anaa sa langitnong mga trono, dayag nga naghawas sa kalibotan sa katawhan nga dili bahin sa harianon, saserdotehanon nga matang, ingon sa gihulagwayan sa 12 ka tribo sa Adlaw sa Pagtabon sa Sala.—Lev., kap. 16.
Mga Leksiyon Alang Kanato:
4:1-10. Kini nga asoy nagtudlo kanato nga si Satanas maoy tinuod nga persona ug dili lamang usa ka daotang kinaiya. Iyang gigamit “ang tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi sa usa” aron sa pagtental kanato. Apan ang pagpadapat sa mga prinsipyo sa Kasulatan motabang kanato sa pagpabiling matinumanon sa Diyos.—1 Juan 2:16.
5:1–7:29. Kinahanglan magmahunahunaon ka sa pagbaton ug maayong relasyon uban sa Diyos. Magmakigdaiton. Isalikway ang imoral nga mga hunahuna. Tumana ang imong gisaad. Sa dihang mag-ampo, unaha ang mga butang may kalabotan sa katuyoan sa Diyos inay ang materyal nga mga tingusbawan. Magmadato ngadto sa Diyos. Pangitaa pag-una ang Gingharian ug ang pagkamatarong sa Diyos. Ayaw pagpanghukom. Buhata ang kabubut-on sa Diyos. Pagkamapuslanon nga mga pagtulon-an gikan sa Wali sa Bukid!
9:37, 38. Kita angayng molihok uyon sa atong pangamuyo sa Agalon nga “magpadalag mga mamumuo ngadto sa iyang pagpangani,” nga masibotong makigbahin sa buluhatong paghimog tinun-an.—Mat. 28:19, 20.
10:32, 33. Dili gayod kita mahadlok sa pagsulti bahin sa atong pagtuo.
13:51, 52. Kay ato mang nasabtan ang mga kamatuoran bahin sa Gingharian, kita adunay kaakohan sa pagtudlo sa uban ug pagpaambit niining bililhong mga kamatuoran ngadto kanila.
14:12, 13, 23. Hinungdanon ang paggahin ug panahon nga mag-inusara alang sa mapuslanong pagpamalandong.—Mar. 6:46; Luc. 6:12.
17:20. Kinahanglan nato ang pagtuo aron mabuntog ang samag-bukid nga mga suliran nga makababag sa atong espirituwal nga pag-uswag ug aron masagubang ang mga kalisdanan. Angay gayod natong palig-onon ang atong pagtuo kang Jehova ug sa iyang mga saad.—Mar. 11:23; Luc. 17:6.
18:1-4; 20:20-28. Ang tawhanong pagkadili-hingpit ug relihiyosong kagikan nga nagpasiugda sa posisyon maoy hinungdan kon nganong sobrang gihatagag pagtagad sa mga tinun-an ni Jesus ang pagkahalangdon. Angay natong ugmaron ang pagkamapainubsanon samtang bantayan nato ang makasasalang mga kiling ug huptan ang hustong panglantaw bahin sa atong mga pribilehiyo sa pag-alagad diha sa kongregasyon.
“ANG ANAK SA TAWO IGATUGYAN”
Si Jesus miadto sa Jerusalem sa Nisan 9, 33 K.P. nga “nagasakay sa usa ka asno.” (Mat. 21:5) Pagkasunod adlaw, siya miadto sa templo ug gihinloan kini. Sa Nisan 11, siya nanudlo sa templo, nagsaway sa mga eskriba ug mga Pariseo, ug pagkahuman iyang gihatag sa iyang mga tinun-an ‘ang ilhanan sa iyang presensiya ug ang kataposan sa sistema sa mga butang.’ (Mat. 24:3) Pagkasunod adlaw, iyang giingnan sila: “Nahibalo kamo nga duha na lamang ka adlaw gikan karon mao na ang paskuwa, ug ang Anak sa tawo igatugyan aron ilansang.”—Mat. 26:1, 2.
Nisan 14 kadto. Human masugdi ang Memoryal sa iyang nagsingabot nga kamatayon, si Jesus giluiban, gidakop, gihusay, ug gilansang. Sa ikatulong adlaw, siya gibanhaw. Sa wala pa siya mobalik sa langit, gisugo ni Jesus ang iyang mga sumusunod: “Busa panglakaw kamo ug paghimog mga tinun-an sa katawhan sa tanang kanasoran.”—Mat. 28:19.
Tubag sa mga Pangutana Bahin sa Kasulatan:
22:3, 4, 9—Kanus-a gipahibalo ang tulo ka imbitasyon sa kombira sa kasal? Ang unang imbitasyon sa pagpanigom sa pangasaw-onon nga matang gipahibalo sa dihang si Jesus ug ang iyang mga sumusunod nagsugod sa pagsangyaw sa 29 K.P., ug kini nagpadayon hangtod sa 33 K.P. Ang ikaduhang imbitasyon gipahibalo sukad sa pagbubo sa balaang espiritu sa Pentekostes 33 K.P. hangtod sa 36 K.P. Ang maong mga imbitasyon maoy para lang sa mga Hudiyo, mga Hudiyong kinabig, ug mga Samarianhon. Apan ang ikatulong imbitasyon gipahibalo ngadto sa mga tawo sa kadalanan gawas sa siyudad, nga mao, ngadto sa dili-tinuli nga mga Hentil, nga nagsugod sa 36 K.P. sa dihang nakabig ang Romanong opisyal sa kasundalohan nga si Cornelio ug kini nagpadayon hangtod sa atong modernong panahon.
23:15—Nganong ang usa ka kinabig sa mga Pariseo “doble pa kaangayan nga mahiagom sa Gehenna” kay sa mga Pariseo mismo? Ang pipila nga nahimong mga kinabig sa mga Pariseo lagmit grabeng mga makasasala kanhi. Apan sa dihang nakabig sila sa pagkapanatiko sa mga Pariseo, sila misamot pa ka daotan, tingali mas grabe pa kay sa ilang salawayong mga magtutudlo. Busa, sila mas angayan pang “mahiagom sa Gehenna” kay sa Hudiyong mga Pariseo.
27:3-5—Unsay gibasolan ni Judas? Walay timailhan nga ang pagbasol ni Judas maoy tinuod nga paghinulsol. Imbes mangayog pasaylo sa Diyos, iya hinuong gipahayag ang iyang kasaypanan ngadto sa pangulong mga saserdote ug mga ansiyano. Kay nakahimog “sala nga makamatay,” gibati gayod ni Judas nga siya grabeng sad-an ug wala nay paglaom. (1 Juan 5:16) Ang iyang pagbasol maoy tinukmod sa kawalay paglaom.
Mga Leksiyon Alang Kanato:
21:28-31. Ang hinungdanon alang kang Jehova mao ang pagbuhat nato sa iyang kabubut-on. Pananglitan, angay kitang magmasiboton sa buluhatong pagwali sa Gingharian ug paghimog tinun-an.—Mat. 24:14; 28:19, 20.
22:37-39. Ang duha ka kinadak-ang sugo tukma gayong nagsumaryo sa kon unsay gikinahanglan sa Diyos sa iyang mga magsisimba!
[Hulagway sa panid 31]
Masiboton ka bang nakigbahin sa pagpangani?
[Credit Line]
© 2003 BiblePlaces.com
[Hulagway sa panid 31]
Ang Gingharian mao ang gipasiugda ni Mateo