Misanong ang mga “Hustong Nakiling”

“[Ang] tanan nga hustong nakiling alang sa kinabuhing walay kataposan nahimong mga magtutuo.”—BUH. 13:48.

1, 2. Sa unsang paagi misanong ang unang mga Kristohanon tungod sa tagna ni Jesus nga ang maayong balita igawali sa tibuok gipuy-ang yuta?

 ANG basahong Buhat sa Bibliya naundan ug kulba-hinam nga mga asoy kon sa unsang paagi misanong ang unang mga Kristohanon tungod sa tagna ni Jesus nga ang maayong balita sa Gingharian igawali sa tibuok gipuy-ang yuta. (Mat. 24:14) Ang ilang kasibot sa pagsangyaw naghatag ug maayong panig-ingnan alang sa tanang mosunod kanila. Tungod sa masibotong pagsangyaw sa mga tinun-an ni Jesus sa Jerusalem, libolibo ka tawo, lakip ang “usa ka dakong panon sa mga saserdote,” ang nakig-uban sa unang-siglong kongregasyon.—Buh. 2:41; 4:4; 6:7.

² Ang unang-siglong mga misyonaryo nakatabang sa daghan nga mahimong mga Kristohanon. Pananglitan, si Felipe miadto sa Samaria diin ang panon sa katawhan nagpatalinghog sa iyang giwali. (Buh. 8:5-8) Si Pablo mipanaw ngadto sa daghang dapit nga may lainlaing kauban, nga nagwali sa Kristohanong mensahe didto sa Cipro, mga dapit sa Asia Minor, Macedonia, Gresya, ug Italya. Sa mga siyudad nga iyang gisangyawan, daghang Hudiyo ug Grego ang nahimong mga magtutuo. (Buh. 14:1; 16:5; 17:4) Si Tito nagsangyaw sa Creta. (Tito 1:5) Si Pedro puliki didto sa Babilonya, ug sa dihang iyang gisulat ang iyang unang sulat sa mga 62-64 K.P., ilado na kaayo ang pagsangyaw sa mga Kristohanon didto sa Ponto, Galacia, Capadocia, Asia, ug Bitinia. (1 Ped. 1:1; 5:13) Pagkakulba-hinam kadtong mga panahona! Masiboton kaayo ang unang-siglo nga Kristohanong mga magwawali nga ang ilang mga kaaway nakaingon nga ilang ‘gigubot ang gipuy-ang yuta.’—Buh. 17:6; 28:22.

3. Unsang mga pag-uswag ang nakab-ot karon sa mga magmamantala sa Gingharian sa ilang pagsangyaw, ug unsay imong gibati tungod niana?

³ Sa modernong panahon, ang Kristohanong kongregasyon nakasinati usab ug dakong pag-uswag. Wala ka ba madasig sa dihang imong nabasa ang tinuig nga taho sa mga Saksi ni Jehova ug nakita ang mga resulta nga nakab-ot sa tibuok kalibotan? Wala ka ba malipay sa pagkahibalo nga ang mga magmamantala sa Gingharian nagdumalag kapin sa unom ka milyong pagtuon sa Bibliya sulod sa 2007 nga tuig sa pag-alagad? Dugang pa, gipakita sa tumatambong sa Memoryal sa kamatayon ni Jesu-Kristo sa miaging tuig nga duolag napulo ka milyong tawo nga dili mga Saksi ni Jehova ang nagpakitag interes sa maayong balita pinaagi sa pagtambong niining hinungdanong kasaulogan. Kini nagpakita nga dako pa kaayo ang buluhaton.

4. Kinsay misanong sa mensahe sa Gingharian?

⁴ Sama sa unang siglo, “[ang] tanan nga hustong nakiling alang sa kinabuhing walay kataposan” karon misanong sa mensahe sa kamatuoran. (Buh. 13:48) Gipasulod ni  Jehova kining mga tawhana diha sa iyang organisasyon. (Basaha ang Haggeo 2:7.) Unsang tinamdan bahin sa Kristohanong ministeryo ang angay natong huptan aron kita bug-os makapakigbahin niining buluhaton nga pagpanigom?

Pagsangyaw nga Dili Mapihigon

5. Unsang matanga sa mga tawo ang dawaton ni Jehova?

⁵ Nasabtan sa unang-siglong mga Kristohanon nga “ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buh. 10:34, 35) Ang usa nga gustong makabaton ug maayong relasyon uban kang Jehova kinahanglang magpasundayag ug pagtuo sa halad lukat ni Jesus. (Juan 3:16, 36) Ug kabubut-on ni Jehova nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.”—1 Tim. 2:3, 4.

6. Batok sa unsa angayng magbantay ang mga magmamantala sa Gingharian, ug ngano?

⁶ Dili gayod angayng hukman daan sa mga magmamantala sa maayong balita ang mga tawo tungod sa ilang rasa, kahimtang sa kinabuhi, panagway, relihiyon, o uban pa. Hunahunaa kini: Dili ka ba mapasalamaton nga ang tawo nga unang nagsulti kanimo bahin sa mga kamatuoran sa Kasulatan dili mapihigon kanimo? Busa dili usab kita magpanuko sa pagsangyaw kang bisan kinsa nga basin magpatalinghog sa mensahe nga makaluwas kaniya.—Basaha ang Mateo 7:12.

7. Nganong dili nato angayng hukman ang mga tawo nga atong sangyawan?

⁷ Si Jesus mao ang Maghuhukom nga gitudlo ni Jehova; busa, wala kitay katungod sa paghukom kang bisan kinsa. Haom kana tungod kay, dili sama kang Jesus, kita makahukom sumala sa “makita lamang sa [atong] mga mata” o “sa butang nga nadungog lamang sa [atong] mga dalunggan,” samtang si Jesus makabasa sa hunahuna ug kasingkasing sa mga tawo.—Isa. 11:1-5; 2 Tim. 4:1.

8, 9. (a) Unsang matanga sa tawo si Saulo sa wala pa siya mahimong Kristohanon? (b) Unsay gitudlo kanato sa kasinatian ni apostol Pablo?

⁸ Ang nahimong mga alagad ni Jehova naggikan sa tanang matang sa mga tawo. Ang usa ka talagsaong pananglitan mao si Saulo sa Tarso, nga sa ulahi nailhang si apostol Pablo. Si Saulo, nga usa ka Pariseo, maoy mabangis nga magsusupak sa mga Kristohanon. Hugot ang iyang pagtuo nga ang mga Kristohanon dili matuod nga mga magsisimba ni Jehova, mao nga iyang gilutos sila. (Gal. 1:13) Sa tawhanong panglantaw, morag imposible gayod siyang mahimong Kristohanon. Apan, adunay usa ka maayong hiyas nga nakita si Jesus diha sa kasingkasing ni Saulo mao nga Iyang gipili siya sa pagtuman sa usa ka linaing buluhaton. Tungod niana, si Saulo nahimong usa sa labing aktibo ug masibotong mga membro sa unang-siglo nga Kristohanong kongregasyon.

⁹ Unsay gitudlo kanato sa kasinatian ni apostol Pablo? Diha sa atong teritoryo, tingali adunay grupo sa mga tawo nga morag masinupakon sa atong mensahe. Bisag daw imposible silang mahimong matuod nga mga Kristohanon, dili gayod kita mohunong sa pagpamatuod kanila. Usahay, bisan kadtong gituohan natong dili gayod maminaw sa atong mensahe mao na hinuon ang mosanong. Ang atong buluhaton mao ang pagsangyaw sa tanan nga ‘walay hunong.’—Basaha ang Buhat 5:42.

Mga Panalangin nga Mapahimuslan Niadtong Nagsangyaw nga ‘Walay Hunong’

10. Nganong dili kita magpanuko sa pagsangyaw sa mga tawong gikaintapan? Pag-asoy ug lokal nga kasinatian.

¹⁰ Mahimong masayop ang atong pangagpas tungod sa panagway. Pananglitan, si Ignacio a nagsugod sa pagtuon sa Bibliya uban sa mga Saksi ni Jehova samtang gibilanggo siya didto sa usa ka nasod sa Amerika del Sur. Gikaintapan siya tungod sa iyang kabangis. Tungod niana, si Ignacio ang hangyoon sa iyang mga isigkabinilanggo nga may gipamaligyang mga butang sa pagpaningil niadtong gahiang mobayad sa ilang utang. Apan, samtang miuswag si Ignacio sa iyang pagtuon sa Bibliya ug nagpadapat sa iyang nakat-onan, kining kanhi mapintas nga tawo nahimo nang lumo. Wala nay mihangyo kaniyang maningil ug utang, apan tagbaw na si Ignacio nga ang mga kamatuoran sa Bibliya ug ang espiritu sa Diyos nakapausab sa iyang personalidad. Mapasalamaton usab siya sa pagkadili-mapihigon sa mga magmamantala sa Gingharian nga naningkamot sa pagtudlo kaniya.

11. Nganong mobalikbalik man kita pagduaw sa mga tawo?

 ¹¹ Ang usa ka rason kon nganong mobalikbalik kita pagduaw sa mga tawo nga ato nang nasangyawan sa maayong balita maoy tungod kay ang ilang mga kahimtang ug tinamdan mahimong mausab. Sukad sa kataposan natong pagduaw, ang pipila mahimong grabeng nasakit, nawad-ag trabaho, o namatyag usa ka minahal. (Basaha ang Ecclesiastes 9:11.) Ang mga suliran sa kalibotan lagmit magtukmod sa mga tawo sa paghunahuna pag-ayo sa ilang ugma. Ang maong mga kahimtang basin makadasig sa usa ka tawo, nga kanhi dili madinawaton o masinupakon pa gani, sa pagsanong sa atong mensahe. Busa, dili gayod kita magpanuko sa pagpaambit sa maayong balita ngadto sa uban sa tanang nahiangayng higayon.

12. Sa unsang paagi angay natong lantawon ang mga tawo nga atong masangyawan, ug ngano?

¹² Ang mga tawo adunay kiling sa pagpihig ug paghukom sa ilang isigkatawo. Apan si Jehova nagtan-aw sa mga tawo ingong indibiduwal. Siya nagtan-aw sa maayong mga hiyas sa matag usa. (Basaha ang 1 Samuel 16:7.) Maningkamot kita sa pagbuhat usab niana diha sa atong ministeryo. Gipakita sa daghang kasinatian ang maayong mga resulta sa pagbaton ug positibong panglantaw sa tanan natong masangyawan.

13, 14. (a) Nganong negatibo ang reaksiyon sa usa ka payunir bahin sa babaye nga iyang nahimamat diha sa ministeryo? (b) Unsay atong makat-onan gikan niini nga kasinatian?

¹³ Samtang namalaybalay ang usa ka payunir nga ginganlag Sandra didto sa usa ka isla sa Caribbeano, nahimamat niya si Ruth kinsa nalangkit pag-ayo sa kasaulogan sa karnabal. Kaduha nang narayna si Ruth sa nasodnong karnabal. Nagpakita siyag talagsaong interes sa gisangyaw ni Sandra kaniya, mao nga ilang gihikay ang usa ka pagtuon sa Bibliya. Si Sandra nahinumdom: “Sa pagsulod nako sa iyang sala, akong nakita ang usa ka dakong hulagway ni Ruth nga nagsul-ob ug mahalong kostiyum sa karnabal ug ang iyang mga tropeyo. Abi nakog dili magpadayon ang iyang interes sa kamatuoran tungod kay siya inila ug nalangkit kaayo sa karnabal. Busa wala na nako siya duawa pag-usab.”

¹⁴ Paglabay sa pipila ka panahon, mitambong si Ruth sa Kingdom Hall, ug pagkahuman sa tigom, iyang gipangutana si Sandra, “Nganong wala na man ko nimo baliki?” Nangayog pasaylo si Sandra ug ilang gihikay nga ipadayon ang pagtuon. Kusog kaayo ang pag-uswag ni Ruth, gitangtang niya ang iyang mga hulagway sa karnabal, nakigbahin sa mga kalihokan sa kongregasyon, ug nagpahinungod sa iyang kinabuhi kang Jehova. Siyempre, naamgohan ni Sandra nga sayop ang iyang unang reaksiyon.

15, 16. (a) Unsay miresulta sa pagsangyaw sa usa ka magmamantala sa iyang paryente? (b) Nganong dili kita angayng magpanuko sa pagsangyaw sa atong paryente bisag dili maayo ang iyang reputasyon?

¹⁵ Daghan usab ang nakasinatig maayong mga resulta sa pagsangyaw ngadto sa dili-magtutuong mga membro sa pamilya, bisan pag morag dili gayod sila mosanong. Tagda pananglitan ang usa ka Kristohanon sa Amerika nga si Joyce. Ang iyang bayaw nga lalaki sulod-gawas sa bilanggoan sukad pa sa iyang pagkatin-edyer. Si Joyce miingon: “Ang mga tawo nag-ingon nga wala gayoy pulos ang kinabuhi sa akong bayaw kay siya nagiyan sa droga, kawatan, ug naghimog daghan pang daotang mga butang. Bisan  pa niana, kanunay nako siyang gisangyawan sa mga kamatuoran sa Bibliya sulod sa 37 ka tuig.” Ang mainantosong pagpaningkamot ni Joyce sa pagtabang sa iyang bayaw dagayang gigantihan sa dihang sa kataposan siya nagtuon sa Bibliya uban sa mga Saksi ni Jehova ug mihimog dagkong mga kausaban sa iyang kinabuhi. Di pa dugay, ang bayaw ni Joyce nabawtismohan sa usa ka distritong kombensiyon sa California, U.S.A., sa edad nga 50. Si Joyce miingon: “Nakahilak ako sa kalipay. Nalipay kaayo ako nga wala mosurender sa pagtabang kaniya!”

¹⁶ Magpanuko ka tingali sa pagpakigsulti sa mga kamatuoran sa Bibliya ngadto sa pipila nimo ka paryente tungod sa ilang dili-maayong reputasyon. Bisan pa niana, wala gayod magpanuko si Joyce sa pagsangyaw sa iyang bayaw. Aw, unsaon god nato pagkahibalo kon unsay anaa sa kasingkasing sa usa ka tawo? Kanang tawhana basig sinsero gayong nangita sa kamatuoran. Busa, ayaw pagpanuko sa pagtabang kaniya sa pagkakaplag niini.—Basaha ang Proverbio 3:27.

Usa ka Epektibong Tabang sa Pagtuon sa Bibliya

17, 18. (a) Unsay gipaila sa mga taho gikan sa tibuok kalibotan bahin sa pagkaepektibo sa librong Unsay Tinuod nga Gitudlo sa Bibliya? (b) Pag-asoy ug makapadasig nimong kasinatian sa paggamit niining libroha.

¹⁷ Gipakita sa mga taho gikan sa mga nasod sa tibuok kalibotan nga daghang matinud-anog-kasingkasing nga mga tawo ang misanong sa tabang sa pagtuon sa Bibliya nga Unsay Tinuod nga Gitudlo sa Bibliya? Si Penni, nga usa ka payunir sa Amerika, nakasugod ug daghang pagtuon ginamit kining libroha. Ang duha kanila maoy edaran na ug debotadong mga membro sa ilang mga relihiyon. Wala makaseguro si Penni kon unsa kahay ilang reaksiyon sa Kasulatanhong mga kamatuoran nga gipresentar sa librong Gitudlo sa Bibliya. Bisan pa niana, siya misulat, “Tungod sa tin-aw, makataronganon, ug direktang pagpresentar sa impormasyon, ila dayong gidawat ang kamatuoran nga ilang nakat-onan.”

¹⁸ Ang usa ka magmamantala sa Britanya, nga ginganlag Pat, nakasugod ug pagtuon sa Bibliya uban sa usa ka babayeng kagiw gikan sa usa ka nasod sa Asia. Ang maong babaye napugos sa pagbiya sa iyang nasod human kuhaa sa mga rebeldeng sundalo ang iyang bana ug mga anak nga lalaki, ug wala na niya igkita pa sila. Siya gihulgang patyon, gisunog ang iyang balay, ug gipulipulihag lugos. Tungod niining tanang mapait nga kasinatian, gibati niyang wala nay kapuslanan ang iyang kinabuhi, ug kadaghan siyang naghunahuna nga maghikog. Apan ang pagtuon sa Bibliya nakahatag kaniya ug paglaom. “Ang yanong mga katin-awan ug mga ilustrasyon sa librong Gitudlo sa Bibliya adunay dakong epekto kaniya,” misulat si Pat. Kusog ang pag-uswag sa maong babaye nga siya kuwalipikado nang mahimong di-bawtismadong magmamantala, ug gusto nang magpabawtismo  sa sunod nga asembliya. Makapalipay gayod ang pagtabang sa sinserong mga tawo nga masabtan ug mapabilhan ang paglaom nga anaa sa Kasulatan!

“Dili Kita Mohunong sa Pagbuhat ug Maayo”

19. Nganong dinalian kaayo ang buluhatong pagsangyaw?

¹⁹ Sa matag adlaw nga molabay, nahimong mas dinalian ang atong pagsangyaw ug paghimog mga tinun-an. Matag tuig, linibo ka tawo nga gustong makakat-on bahin sa Diyos ang misanong sa atong pagsangyaw. Apan, “ang dakong adlaw ni Jehova haduol na,” nga nagpasabot nga kadtong wala pay nahibaloan bahin sa Diyos ug sa iyang katuyoan padayong “nagsusapinday aron pagapatyon.”—Sof. 1:14; Prov. 24:11.

20. Unsay determinado natong buhaton?

²⁰ Makatabang pa gihapon kita nianang mga tawhana. Apan aron mahimo nato kana, hinungdanon nga atong sundogon ang unang-siglong mga Kristohanon nga “wala mohunong sa pagpanudlo ug sa pagpahayag sa maayong balita bahin kang Kristo, si Jesus.” (Buh. 5:42) Sunda ang ilang panig-ingnan pinaagi sa paglahutay bisan pa sa kalisdanan, sa pagtagad sa imong “arte sa pagpanudlo,” ug sa pagsangyaw sa tanan nga walay pagpihig! “Dili kita mohunong sa pagbuhat ug maayo,” kay kon kita molahutay, atong anihon ang dagayang mga panalangin gikan sa Diyos.—2 Tim. 4:2; basaha ang Galacia 6:9.

[Footnote]

Unsay Imong Tubag?

• Kinsa ang misanong sa maayong balita?

• Nganong dili nato hukman daan ang atong masangyawan?

• Unsang mga resulta ang nabatonan tungod sa paggamit sa librong Unsay Tinuod nga Gitudlo sa Bibliya?

[Mga Pangutana sa Pagtuon]

[Mga hulagway sa panid 13]

Libolibo ka matinud-anog-kasingkasing nga mga tawo ang misanong

[Mga hulagway sa panid 15]

Unsay atong makat-onan gikan sa mga kausaban nga gihimo ni apostol Pablo?

[Hulagway sa panid 16]

Dili hukman daan sa mga magmamantala sa maayong balita ang mga tawo