Tagda ang Imong “Arte sa Pagpanudlo”
Tagda ang Imong “Arte sa Pagpanudlo”
“Iwali ang pulong, . . . pamadlong, pagsaway, panambag, uban sa tanang hataas-nga-pailob ug arte sa pagpanudlo.”—2 TIM. 4:2.
1. Unsay gisugo ni Jesus sa iyang mga tinun-an, ug unsang panig-ingnan ang iyang gihatag?
BISAN pag si Jesus naghimog katingalahang pagpang-ayo panahon sa iyang ministeryo sa yuta, siya mas nailhan ingong usa ka magtutudlo, dili ingong usa ka mananambal o tighimog milagro. (Mar. 12:19; 13:1) Ang pagmantala sa maayong balita sa Gingharian sa Diyos mao ang labing hinungdanon alang kang Jesus ug sa iyang mga sumusunod karong adlawa. Ang mga Kristohanon gisugo sa pagpadayon sa buluhatong paghimog tinun-an pinaagi sa pagtudlo sa mga tawo sa pagtuman sa tanang butang nga gisugo ni Jesus.—Mat. 28:19, 20.
2. Unsay kinahanglan natong buhaton aron matuman ang atong buluhaton nga paghimog tinun-an?
2 Aron matuman ang atong buluhaton nga paghimog tinun-an, kinahanglang maningkamot kita kanunay sa pagpauswag sa atong katakos sa pagpanudlo. Gipasiugda ni apostol Pablo ang kahinungdanon ning maong katakos sa dihang iyang gisulatan ang iyang kauban sa pagsangyaw nga si Timoteo. Siya miingon: “Tagda kanunay ang imong kaugalingon ug ang imong pagpanudlo. Magpabilin niining mga butanga, kay sa pagbuhat niini pagaluwason mo ang imong kaugalingon ug kadtong mamati kanimo.” (1 Tim. 4:16) Ang matang sa pagpanudlo nga gipasabot ni Pablo dili lamang ang yanong paghatag ug kahibalo. Ang hanas nga Kristohanong mga ministro magsilsil sa kamatuoran sa Bibliya nganha sa kasingkasing sa mga tawo ug magdasig kanila sa paghimog mga kausaban sa ilang kinabuhi. Kana maoy usa ka arte. Busa sa unsang paagi atong maugmad ang “arte sa pagpanudlo” sa dihang atong isangyaw ang maayong balita sa Gingharian sa Diyos?—2 Tim. 4:2.
Pag-ugmad sa “Arte sa Pagpanudlo”
3, 4. (a) Sa unsang paagi atong maugmad ang “arte sa pagpanudlo”? (b) Sa unsang paagi ang Teokratikanhong Tunghaan sa Ministeryo makatabang kanato nga mahimong epektibong mga magtutudlo?
3 Ang usa ka diksiyonaryo naghubit sa pulong “arte” ingong usa ka “kahanas nga mabatonan pinaagig pagtuon, pagpadapat, o pagpaniid.” Kinahanglan natong tagdon kining tulo ka butang aron kita mahimong epektibong mga magtutudlo sa maayong balita. Makabaton lamang kitag hustong pagsabot sa ulohan nga atong gitun-an pinaagi sa pagtuon niana uban ang pag-ampo. (Basaha ang Salmo 119:27, 34.) Ang pagpaniid sa hanas nga mga ministro samtang sila nanudlo motabang kanato sa pagkakat-on ug pagsundog sa ilang mga paagi. Ug ang pagpadapat kanunay sa atong nakat-onan motabang kanato sa pagpauswag sa atong mga katakos.—Luc. 6:40; 1 Tim. 4:13-15.
4 Si Jehova mao ang atong Dakong Instruktor. Pinaagi sa makitang bahin sa iyang organisasyon, siya naggiya sa iyang mga alagad sa yuta kon sa unsang paagi ilang matuman ang buluhatong pagsangyaw. (Isa. 30:20, 21) Alang niini nga katuyoan, ang matag kongregasyon adunay Teokratikanhong Tunghaan sa Ministeryo kada semana, nga gidisenyo sa pagtabang sa tanang nakigbahin niini nga mahimong epektibong mga magmamantala sa Gingharian sa Diyos. Ang pangunang teksbok niining tunghaana mao ang Bibliya. Gisultihan kita sa inspiradong Pulong ni Jehova kon unsay angay natong itudlo. Dugang pa, gipaila niini kon unsang mga pamaagi sa pagpanudlo ang epektibo ug nahiangay. Ang Teokratikanhong Tunghaan sa Ministeryo kanunayng nagpahinumdom kanato nga kita mahimong mas hanas nga mga magtutudlo kon atong ipasukad ang atong pagpanudlo sa Pulong sa Diyos, kon kita mogamit ug mga pangutana sa mataktikanhong paagi, manudlo sa yanong paagi, ug magpakitag tinuod nga interes sa uban. Atong susihon ang matag usa niining mga puntoha. Dayon atong hisgotan kon sa unsang paagi atong maabot ang kasingkasing sa ginatun-an.
Ipasukad ang Imong Pagpanudlo sa Pulong sa Diyos
5. Kinahanglang ipasukad nato sa unsa ang atong pagpanudlo, ug ngano?
5 Si Jesus, ang kinamaayohan sa tanang tawhanong magtutudlo, nagpasukad sa iyang pagpanudlo sa Kasulatan. (Mat. 21:13; Juan 6:45; 8:17) Siya nagsulti, dili sa iyang kaugalingong kabubut-on, kondili sa kabubut-on sa Usa nga nagpadala kaniya. (Juan 7:16-18) Kana ang panig-ingnan nga atong gisunod. Busa, ang atong isulti samtang nagsangyaw o nagdumalag mga pagtuon sa Bibliya kinahanglang ipasukad gayod sa Pulong sa Diyos. (2 Tim. 3:16, 17) Bisag unsa pa ka intelihente ang atong pangatarongan, dili gayod kini makatumbas sa pagkaepektibo ug pagkagamhanan sa inspiradong Kasulatan. Ang Bibliya adunay awtoridad. Bisag unsang puntoha nga gusto natong ipasabot sa ginatun-an, ang labing maayong paagi nga atong magamit mao ang pagpabasa kaniya kon unsay giingon sa Kasulatan bahin niini.—Basaha ang Hebreohanon 4:12.
6. Sa unsang paagi maseguro sa magtutudlo nga nasabtan gayod sa ginatun-an ang ilang gihisgotan?
6 Apan, wala kini magpasabot nga ang usa ka Kristohanong magtutudlo dili na mangandam alang sa pagtuon sa Bibliya. Hinunoa, angayng pamalandongon daan sa magtutudlo kon unsang mga tekstoha ang basahon niya o sa ginatun-an panahon sa pagtuon. Kasagaran, mas maayong basahon ang mga teksto nga gipasukaran sa atong mga pagtulon-an. Kinahanglang tabangan usab ang ginatun-an nga makasabot sa matag teksto nga iyang gibasa.—1 Cor. 14:8, 9.
Mataktikanhong Paggamit ug mga Pangutana
7. Nganong ang paggamit ug mga pangutana maoy usa ka epektibong paagi sa pagpanudlo?
7 Ang mataktikanhong paggamit ug mga pangutana makapukaw sa kaisipan ug makatabang sa magtutudlo sa pag-abot sa kasingkasing sa iyang ginatun-an. Busa imbes ikaw ang mosaysay sa mga teksto ngadto sa imong ginatun-an, ipasaysay kini kaniya. Usahay gikinahanglan ang dugang pangutana o sunodsunod nga mga pangutana aron matabangan ang imong ginatun-an nga makasabot gayod. Kon imong ilangkit ang ginatun-an niining matanga sa pagtuon, sa pagkatinuod ikaw wala lang magtabang kaniya sa pagsabot sa mga katarongan bahin sa usa ka pagtulon-an nga inyong gihisgotan kondili ikaw nagtabang usab kaniya nga mahimong kombinsido mismo bahin niini.—Mat. 17:24-26; Luc. 10:36, 37.
8. Sa unsang paagi atong mahibaloan kon unsa gayoy anaa sa hunahuna sa ginatun-an?
8 Ang paagi sa pagtuon nga gigamit sa atong mga publikasyon maoy pangutanag tubag. Walay duhaduha matubag ra dayon sa imong mga gitun-an sa Bibliya ang pinatik nga mga pangutana, ginamit ang impormasyon nga anaa sa mga parapo. Apan alang sa usa ka maalamong magtutudlo, dili pa igo ang hustong mga tubag. Pananglitan, mahimong hustong ikasaysay sa ginatun-an ang giingon sa Bibliya bahin sa pakighilawas. (1 Cor. 6:18) Apan ang mataktikanhon nga punto-debistang mga pangutana makabutyag kon unsa gayoy iyang hunahuna bahin sa iyang nakat-onan. Busa, mahimong mangutana ang magtutudlo: “Nganong gisaway sa Bibliya ang seksuwal nga mga relasyon nga gawas sa kaminyoon? Unsay imong ikaingon bahin niining balaora? Sa imong hunahuna, makaayo ba ang pagsunod sa moral nga mga sukdanan sa Diyos?” Ang tubag sa maong mga pangutana magbutyag kon unsa gayoy anaa sa iyang hunahuna.—Basaha ang Mateo 16:13-17.
Hupti Kining Yano
9. Unsay angay natong hinumdoman sa dihang magpresentar ug usa ka impormasyon sa Kasulatan?
9 Yano ra ang kadaghanan sa mga kamatuoran nga anaa sa Pulong sa Diyos. Apan basin naglibog ang atong mga ginatun-an sa Bibliya tungod sa mga doktrina sa bakak nga relihiyon. Ingong mga magtutudlo, kinahanglang itudlo nato ang Bibliya sa paagi nga daling masabtan. Ang epektibong mga magtutudlo magpresentar sa impormasyon sa yano, tin-aw, ug tukmang paagi. Kon sundon nato kini, dali rang masabtan ang kamatuoran. Ayawg iapil ang wala kinahanglanang mga detalye. Dili na angayng komentohan ang tanang bahin sa teksto nga atong basahon. Isentro lang ang pagtagad sa hinungdanong impormasyon nga makapatin-aw sa punto. Masabtan ra sa ginatun-an ang mas lawom nga mga kamatuoran sa Kasulatan samtang mouswag ang iyang kahibalo.—Heb. 5:13, 14.
10. Unsang mga butanga ang magtino kon unsa ka daghang materyal ang kobrehan panahon sa pagtuon sa Bibliya?
10 Unsa ka daghang materyal ang angayng kobrehan sa usa ka sesyon sa pagtuon? Sa pagtino niini, gikinahanglan ang pagsabot. Magkalahi ang katakos ug mga kahimtang sa ginatun-an ug magtutudlo, apan angay natong hinumdoman nga ang atong tumong ingong mga magtutudlo mao ang pagtabang sa atong ginatun-an nga makabatog lig-ong pagtuo. Busa hatagan nato siyag igong panahon sa pagbasa, pagsabot, ug pagdawat sa mga kamatuoran nga gitudlo sa Pulong sa Diyos. Dili kita magkobre ug mas daghang materyal kay sa iyang maapas. Sa samang higayon, dili nato langayon ang pagtuon. Kon masabtan na sa ginatun-an ang usa ka punto, mopadayon kita sa sunod.—Col. 2:6, 7.
11. Kon bahin sa pagpanudlo, unsay atong makat-onan gikan ni apostol Pablo?
11 Si apostol Pablo nagsangyaw sa maayong balita sa paagi nga daling masabtan. Bisan tuod siya taas ug edukasyon, wala siya mogamit ug lisod-sabton nga mga pulong. (Basaha ang 1 Corinto 2:1, 2.) Ang kayano sa kamatuoran sa Kasulatan mao ang makapadani ug makapatagbaw sa sinserong mga tawo. Kini masabtan ra sa usa ka tawo bisag dili siya taas ug edukasyon.—Mat. 11:25; Buh. 4:13; 1 Cor. 1:26, 27.
Tabangi ang mga Ginatun-an sa Pagpabili sa Ilang Nakat-onan
12, 13. Unsay makadasig sa ginatun-an sa pagpadapat sa iyang nakat-onan? Iilustrar.
12 Aron mahimong epektibong magtutudlo, kinahanglang maabot nato ang kasingkasing sa atong ginatun-an. Kinahanglang masabtan sa ginatun-an kon sa unsang paagi mapadapat kaniya ang impormasyon, makabenepisyo siya niini, ug mouswag ang iyang kinabuhi kon iyang sundon ang giya sa Kasulatan.—Isa. 48:17, 18.
13 Pananglitan, gihisgotan tingali nato ang Hebreohanon 10:24, 25, nga nagdasig sa mga Kristohanon sa pagtambong sa mga tigom uban sa mga isigkamagtutuo alang sa pagdinasigay ug mahigugmaong panag-ubanay. Kon ang ginatun-an wala pa makatambong sa mga tigom sa kongregasyon, mahimong ipatin-aw nato kaniya kon giunsa kini pagdumala ug kon unsay pagahisgotan didto. Mahimo natong isulti kaniya nga ang mga tigom sa kongregasyon maoy bahin sa atong pagsimba ug nga kini nakahatag kanato ug kaayohan. Dayon ato siyang dapiton sa pagtambong. Apan kinahanglan nga ang magtukmod kaniya sa pagsunod sa mga sugo sa Bibliya mao ang iyang tinguha sa pagsugot kang Jehova, dili ang pagpahimuot sa iyang magtutudlo.—Gal. 6:4, 5.
14, 15. (a) Unsay makat-onan sa usa ka ginatun-an sa Bibliya bahin kang Jehova? (b) Sa unsang paagi ang kahibalo bahin sa personalidad sa Diyos makabenepisyo sa usa ka ginatun-an sa Bibliya?
14 Ang pangunang kaayohan nga makuha sa mga ginatun-an sa ilang pagtuon sa Bibliya ug pagpadapat sa mga prinsipyo niini mao nga ilang mailhan ug higugmaon si Jehova ingong persona. (Isa. 42:8) Gawas nga siya usa ka mahigugmaong Amahan ug ang Maglalalang ug Tag-iya sa uniberso, iya pa gayong gipadayag ang iyang personalidad ug mga katakos ngadto sa mga nahigugma ug nag-alagad kaniya. (Basaha ang Exodo 34:6, 7.) Sa hapit nang makagawas ang nasod sa Israel gikan sa Ehipto ubos sa pagpanguna ni Moises, gipaila ni Jehova ang iyang kaugalingon pinaagi sa pag-ingon: “Ako mamao kon unsay mamao ako.” (Ex. 3:13-15) Kini nagpasabot nga si Jehova mahimong bisan unsa sumala sa gikinahanglan aron matuman ang iyang katuyoan maylabot sa iyang piniling katawhan. Mao nga nailhan sa mga Israelinhon si Jehova ingong Manluluwas, Manggugubat, Magtatagana, Tigtuman sa mga saad, ug Diyos nga nagtabang kanila sa uban pang mga paagi.—Ex. 15:2, 3; 16:2-5; Jos. 23:14.
15 Dili tingali masinatian sa atong mga ginatun-an ang milagrosong tabang ni Jehova sama sa nasinatian ni Moises. Bisan pa niana, samtang mouswag ang ilang pagtuo ug pagpabili sa ilang nakat-onan ug mosugod sa pagpadapat niana, sa walay duhaduha ilang masabtan nga kinahanglan silang mosalig kang Jehova alang sa kaisog, kaalam, ug giya. Samtang buhaton nila kana, ilang mailhan usab si Jehova ingong usa ka maalamon ug kasaligang Magtatambag, Tigpanalipod, ug Magtatagana sa tanan nilang panginahanglan.—Sal. 55:22; 63:7; Prov. 3:5, 6.
Ipakita ang Mahigugmaong Interes
16. Nganong ang kinaiyanhong katakos dili mao ang labing hinungdanong bahin sa atong pagkaepektibo ingong magtutudlo?
16 Kon gibati nimong dili pa hanas sa pagpanudlo, ayawg kahigawad. Si Jehova ug si Jesus ang nagdumala sa edukasyonal nga programa nga ginahimo karon sa tibuok kalibotan. (Buh. 1:7, 8; Pin. 14:6) Ilang paluyohan ang atong mga paningkamot aron ang atong mga pulong makapadani sa mga tawong mahigugmaon sa pagkamatarong. (Juan 6:44) Ang tinuod nga gugma sa magtutudlo alang sa iyang ginatun-an makahulip ra sa bisan unsang kakulang ug kinaiyanhong katakos. Gipakita ni apostol Pablo ang kahinungdanon sa paghigugma sa mga ginatun-an.—Basaha ang 1 Tesalonica 2:7, 8.
17. Sa unsang paagi atong ikapakita nga kita may tinuod nga interes sa matag ginatun-an sa Bibliya?
17 Sa samang paagi, kita makapakitag tinuod nga interes sa matag ginatun-an sa Bibliya pinaagi sa paggugol ug panahon sa pag-ila kaniya. Samtang atong hisgotan ang mga prinsipyo sa Kasulatan uban kaniya, lagmit mas mahibaloan pa nato ang iyang mga kahimtang. Mamatikdan tingali nato nga iya nang gipadapat ang pipila ka butang nga iyang nakat-onan gikan sa Bibliya. Apan basin kinahanglan pa niyang mohimog mga kausaban sa ubang bahin sa iyang kinabuhi. Pinaagi sa pagtabang sa kaniya kon sa unsang paagi iyang mapadapat ang mga impormasyon nga iyang natun-an, kita mahigugmaong nagtabang kaniya nga mahimong tinuod nga tinun-an ni Kristo.
18. Nganong hinungdanon ang paglakip sa atong ginatun-an samtang nag-ampo kita uban kaniya?
18 Labaw sa tanan, mahimo natong ilakip ang atong ginatun-an samtang nag-ampo kita uban kaniya. Kinahanglang tin-aw niyang masabtan nga ang atong tumong mao ang pagtabang kaniya nga mas makaila ug mas masuod pa sa iyang Maglalalang, ug makabenepisyo sa Iyang giya. (Basaha ang Salmo 25:4, 5.) Sa dihang mag-ampo kita nga tabangan unta ni Jehova ang iyang mga paningkamot sa pagpadapat sa iyang nakat-onan, masabtan sa ginatun-an ang kahinungdanon sa pagkahimong “magtutuman sa pulong.” (Sant. 1:22) Ug samtang maminaw siya sa atong sinserong mga pag-ampo, siya makakat-on usab kon unsaon pag-ampo. Makapalipay gayod ang pagtabang sa mga ginatun-an sa Bibliya nga makabaton ug personal nga relasyon uban kang Jehova!
19. Unsay hisgotan sa sunod nga artikulo?
19 Makapadasig gayod ang pagkahibalo nga kapin sa unom ka milyon ug tunga ka mga Saksi sa tibuok kalibotan ang naningkamot sa pag-ugmad sa “arte sa pagpanudlo,” uban ang tumong nga makatabang sa matinud-anog-kasingkasing nga mga tawo sa pagtuman sa tanang butang nga gisugo ni Jesus. Unsay mga resulta sa atong pagsangyaw? Tubagon kini sa sunod nga artikulo.
Nahinumdom Ka Ba?
• Nganong kinahanglang ugmaron sa mga Kristohanon ang “arte sa pagpanudlo”?
• Unsay makatabang kanato nga mahimong epektibong mga magtutudlo?
• Unsay makahulip sa atong kakulang ug kinaiyanhong katakos sa pagpanudlo?
[Mga Pangutana sa Pagtuon]
[Hulagway sa panid 9]
Nakigbahin ka ba sa Teokratikanhong Tunghaan sa Ministeryo?
[Hulagway sa panid 10]
Nganong hinungdanon nga imong dasigon ang ginatun-an sa pagbasa gikan sa Bibliya?
[Hulagway sa panid 12]
Ilakip ang imong ginatun-an samtang nag-ampo ka uban kaniya