Ang mga Migraduwar sa Gilead Giawhag sa “Pagpangubkob”
Ika-123 nga Graduwasyon
Ang mga Migraduwar sa Gilead Giawhag sa “Pagpangubkob”
SA Sabado, Septiyembre 8, 2007, adunay 6,352 ka tawo nga gikan sa 41 ka nasod ang mitambong sa graduwasyon sa ika-123 nga klase sa Watchtower Bible School of Gilead. Sa alas 10:00 s.b., ang mga tumatambong giabiabi sa tsirman sa programa nga si Anthony Morris sa Nagamandong Lawas. Human sa pasiunang mga pulong, iyang gipailaila ang unang mamumulong nga si Gary Breaux, membro sa Komite sa Sanga sa Amerika.
Gipasaligan ni Brader Breaux ang mga estudyante nga bisag unsay ilang panagway, kadtong nagabuhat sa kabubut-on ni Jehova maoy matahom sa Iyang mga mata. (Jer. 13:11) Giawhag niya ang mga migraduwar nga huptan kanang matanga sa katahom. Sunod, gipasiugda ni Gerrit Lösch sa Nagamandong Lawas nga nahiangay ang pagdahom ug ganti kon kita moalagad kang Jehova. (Heb. 11:6) Apan kita angayng mapalihok sa dili-mahakogong gugma.
Sunod, ang magtatan-aw sa Theocratic Schools Department nga si William Samuelson nag-awhag sa mga migraduwar nga magmaunongon kanunay sa dungganong buluhaton sa pagpahayag sa nagamandong Hari ug sa pagpasundayag sa ilang dignidad pinaagi sa ilang maayong panggawi. a Si Sam Roberson, luyoluyong magtatan-aw sa Theocratic Schools Department, nagdasig usab sa mga migraduwar sa pagtan-aw kanunay sa maayong mga hiyas sa uban. Kay pinaagi niana sila mas makaarang sa “pagbaton ug gugma alang sa tibuok kapunongan sa mga igsoon.”—1 Ped. 2:17.
Human sa maong makapadasig nga mga pakigpulong, giinterbiyo sa instruktor sa Gilead nga si Mark Noumair ang pipila sa mga migraduwar sa pag-asoy sa ilang mga kasinatian sa kanataran panahon sa ilang pagtungha sa Gilead. Walay duhaduha nga nakita gayod sa mga mamiminaw ang ilang gugma alang sa ministeryo ug ang ilang tinguha sa pagtabang sa uban. Dayon giinterbiyo ni Kent Fischer sa Bethel Office sa Patterson ang mga membro sa Komite sa Sanga nga gikan sa tulo ka nasod nga adunay mga misyonaryo. Gipasaligan niining mga igsoona ang mga mamiminaw, nga naglakip sa mga ginikanan sa mga migraduwar, nga ang bag-ong mga misyonaryo giatiman pag-ayo diha sa ilang mga asaynment. Dayon giinterbiyo ni Izak Marais sa Translation Services Department ang pipila ka dugay nang mga misyonaryo, kansang mga kasinatian nakahatag ug pasiunang pagtagamtam sa mga kalipay nga ila unyang mapahimuslan.
Ang pangunang pakigpulong sa programa, nga gihatag ni Geoffrey Jackson sa Nagamandong Lawas, adunay tema nga “Human sa Tanan Ninyong Nadunggan—Unsay Inyong Buhaton?” Gihisgotan ni Brader Jackson, kinsa nag-alagad ingong misyonaryo sulod sa mga 25 ka tuig sa Habagatang Pasipiko, ang kataposang bahin sa Wali sa Bukid. Sa maong wali, si Jesus naghisgot ug duha ka tawo nga nagtukod ug mga balay, ang usa maalamon ug ang lain buangbuang. Nag-ingon ang mamumulong nga ang duha ka balay mahimong natukod sa samang dapit. Apan ang buangbuang nagtukod sa iyang balay diha sa balas, samtang ang maalamon nangubkob hangtod nakaplagan niya ang usa ka dakong bato nga maoy gihimo niyang pundasyon sa balay nga iyang gitukod. Sa dihang mihapak ang kusog nga bagyo, ang balay nga natukod diha sa bato wala maunsa apan ang usa nga natukod diha sa balas nahugno.—Mat. 7:24-27; Luc. 6:48.
Gipatin-aw ni Jesus nga ang buangbuang maoy sama niadtong nakadungog sa mga pagtulon-an ni Jesus apan wala magpadapat niini. Ang maalamon maoy sama niadtong nakadungog ug nagpadapat sa mga pulong ni Jesus. Busa giingnan ni Brader Jackson ang mga graduwado, “Kon inyong ipadapat diha sa inyong misyonaryong asaynment ang inyong nakat-onan sa pagtuon sa Bibliya, kamo mahisama sa maalamong tawo.” Agig panapos, iyang giawhag ang mga graduwado sa “pagpangubkob” diha sa ilang misyonaryong mga asaynment.
Sa kataposan, gidawat sa mga migraduwar ang ilang mga diploma ug mga asaynment, ug si Brader Morris naghatag ug panapos nga mga pagdasig. Iyang giawhag ang mga migraduwar sa pagsunod kanunay kang Jesus ug sa pagsalig kanunay kang Jehova alang sa kusog. Dayon natapos ang programa sa graduwasyon.
[Footnote]
a Ang Theocratic Schools Department nga ubos sa pagdumala sa Komite sa Pagpanudlo, maoy nagdumala sa Gilead, sa tunghaan alang sa mga membro sa Komite sa Sanga, ug sa tunghaan alang sa nagapanawng mga magtatan-aw.
[Kahon sa panid 31]
ESTADISTIKA SA KLASE
Gidaghanon sa mga nasod nga gihawasan: 10
Gidaghanon sa mga nasod nga gipadalhan: 24
Gidaghanon sa mga estudyante: 56
Aberids nga edad: 33.5
Aberids nga katuigan sa kamatuoran: 17.9
Aberids nga katuigan sa bug-os-panahong pag-alagad: 13.8
[Hulagway sa panid 32]
Ika-123 nga Migraduwar nga Klase sa Watchtower Bible School of Gilead
Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.
(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.