Ibutang Kanunay si Jehova sa Imong Atubangan
Ibutang Kanunay si Jehova sa Imong Atubangan
“Si Jehova gibutang ko sa kanunay sa akong atubangan.”—SAL. 16:8.
1. Sa unsang paagi makaapekto kanato ang mga asoy sa Bibliya?
ANG sinulat nga Pulong ni Jehova naundan ug makaiikag nga mga talaan sa mga pakiglabot sa Diyos uban sa mga tawo. Kini naghisgot ug daghang tawo nga may bahin sa pagpalampos sa katuyoan sa Diyos. Siyempre, ang ilang gisulti ug gibuhat dili lamang mga asoy nga gisulat diha sa Bibliya aron sa paglingaw kanato. Kondili, kini girekord aron mas masuod pa kita sa Diyos.—Sant. 4:8.
2, 3. Unsay kahulogan sa mga pulong sa Salmo 16:8?
2 Aduna kitay daghang makat-onan gikan sa mga kasinatian sa iladong mga tawo sa Bibliya, sama ni Abraham, Sara, Moises, Ruth, David, Ester, apostol Pablo, ug uban pa. Apan daghan usab kitag makat-onan gikan sa mga asoy bahin sa dili kaayo iladong mga tawo. Pinaagi sa pagpamalandong sa maong mga asoy, kita makalihok nga nahiuyon sa giingon sa salmista: “Si Jehova gibutang ko sa kanunay sa akong atubangan. Tungod kay ania siya sa akong tuong kamot, ako dili matarog.” (Sal. 16:8) Unsay kahulogan niining mga pulonga?
3 Ang usa ka sundalo kasagarang maggunit ug espada sa iyang tuong kamot, mao nga kana dili maprotektahan sa taming nga gikuptan sa iyang walang kamot. Apan siya maprotektahan kon ang iyang isigkasundalo mobarog duol sa iyang tuo. Kon atong ibutang kanunay si Jehova sa atong atubangan ug buhaton ang iyang kabubut-on, iya kitang panalipdan. Busa atong tan-awon kon sa unsang paagi ang pagsusi sa mga asoy sa Bibliya makapalig-on sa atong pagtuo aron atong ‘ikabutang kanunay si Jehova sa atong atubangan.’
Dunggon ni Jehova ang Atong mga Pag-ampo
4. Paghatag ug usa ka pananglitan gikan sa Kasulatan nga nagpakita nga dunggon sa Diyos ang mga pag-ampo.
4 Kon atong ibutang kanunay si Jehova sa atong atubangan, dunggon niya ang atong mga pag-ampo. (Sal. 65:2; 66:19) Aduna kitay pamatuod niini diha sa asoy bahin sa kinatigulangang alagad ni Abraham, lagmit si Eliezer. Gipaadto siya ni Abraham sa Mesopotamia aron sa pagpangitag mahinadlokon-sa-Diyos nga pangasaw-onon para kang Isaac. Nag-ampo si Eliezer nga giyahan unta siya sa Diyos, ug iyang nasabtan nga gidungog kini ni Jehova sa dihang gipainom ni Rebeca ang iyang mga kamelyo. Tungod kay mainampoon man si Eliezer, nakaplagan niya ang usa ka babaye nga nahimong minahal nga asawa ni Isaac. (Gen. 24:12-14, 67) Tinuod, espesyal ang asaynment ni Eliezer. Apan dili ba makaseguro man usab kita nga dunggon ni Jehova ang atong mga pag-ampo?
5. Nganong makaingon kita nga dunggon gayod ni Jehova bisan ang mubo, hilom nga pag-ampo?
5 Usahay, kinahanglan tingali kitang moampo dihadiha alang sa tabang sa Diyos. Usa niana ka higayon, namatikdan ni Haring Artajerjes sa Persia nga masulub-on ang nawong sa iyang magtitiing nga si Nehemias. “Unsay buot mong mahitabo?” nangutana ang hari. “Dihadiha [si Nehemias] miampo sa Diyos sa mga langit.” Lagmit mubo ra ang maong hilom nga pag-ampo ni Nehemias. Bisan pa niana, gitubag kadto sa Diyos kay gipaluyohan man siya sa hari sa pagtukod pag-usab sa mga paril sa Jerusalem. (Basaha ang Nehemias 2:1-8.) Oo, bisan ang mubo, hilom nga pag-ampo dunggon gayod ni Jehova.
6, 7. (a) Kon bahin sa pag-ampo, unsang panig-ingnan ang gihatag ni Epafras? (b) Nganong angay natong iampo ang uban?
6 Kita giawhag sa “pag-ampo alang sa usag usa,” bisag dili dayon nato makita ang dihadihang mga pamatuod nga gidungog sa Diyos ang maong mga pag-ampo. (Sant. 5:16) Si Epafras, nga “usa ka matinumanong ministro ni Kristo,” tim-os gayong nag-ampo alang sa iyang mga isigkamagtutuo. Didto sa Roma, si Pablo misulat: “Si Epafras, nga gikan sa inyong taliwala [taga-Colosas], usa ka ulipon ni Kristo Jesus, nangomosta kaninyo, nga kanunayng nanlimbasog alang kaninyo sa iyang mga pag-ampo, aron kamo sa kataposan makabarog nga bug-os ug may hugot nga pagtuo sa bug-os nga kabubut-on sa Diyos. Ako sa pagkatinuod nagpamatuod bahin kaniya nga siya naningkamot pag-ayo alang kaninyo ug alang kanilang atua sa Laodicea ug sa Hierapolis.”—Col. 1:7; 4:12, 13.
7 Ang Colosas, Laodicea, ug Hierapolis maoy mga siyudad sa Asia Minor. Ang mga Kristohanon sa Hierapolis nagpuyo taliwala sa mga magsisimba sa diyosa nga si Cybele, materyalistikanhon ang mga tawo nga naglibot sa mga Kristohanon sa Laodicea, ug ang mga taga-Colosas nameligrong maimpluwensiyahan sa tawhanong pilosopiya. (Col. 2:8) Kanay hinungdan kon nganong si Epafras, nga taga-Colosas, ‘nanlimbasog sa iyang mga pag-ampo’ alang sa mga magtutuo nianang siyudara! Wala isaysay sa Bibliya kon sa unsang paagi gidungog ang mga pag-ampo Epafras, apan padayon gayod siyang nag-ampo alang sa iyang mga isigkamagtutuo, ug mao man usab kita. Bisan tuod dili kita “hilabtanon sa mga butang sa uban,” tingali may nahibaloan kitang usa ka membro sa pamilya o usa ka higala nga may grabeng pagsulay sa pagtuo. (1 Ped. 4:15) Haom gayod nga ilakip nato siya sa atong personal nga mga pag-ampo! Si Pablo natabangan sa mga pangamuyo sa uban, ug ang atong mga pag-ampo dako usab ug ikatabang.—2 Cor. 1:10, 11.
8. (a) Giunsa nato pagkahibalo nga gipabilhan sa mga ansiyano sa Efeso ang kahinungdanon sa pag-ampo? (b) Unsay angay natong tinamdan maylabot sa pag-ampo ngadto sa Diyos?
8 Giisip ba kita sa uban ingong mainampoong mga tawo? Human mahibalag ni Pablo ang mga ansiyano sa Efeso, “siya miluhod uban kanilang tanan ug nag-ampo.” Dayon “silang tanan nanghilak pag-ayo, ug ilang gigakos si Pablo sa liog ug gihalokan siya nga mabination, tungod kay sila ilabinang nasakitan sa pulong nga iyang gisulti nga sila dili na makakita pag-usab sa iyang nawong.” (Buh. 20:36-38) Wala kita mahibalo sa mga ngalan niadtong mga ansiyanoha, apan dayag nga ilang gipabilhan ang kahinungdanon sa pag-ampo. Ato gayong pabilhan ang pribilehiyo nga makaampo sa Diyos, nga “magbayaw sa maunongong mga kamot” uban ang pagtuo nga dunggon kita sa atong langitnong Amahan.—1 Tim. 2:8.
Sugta sa Bug-os ang Diyos
9, 10. (a) Unsay gihatag nga panig-ingnan sa mga anak ni Zelopehad? (b) Sa unsang paagi ang pagkamasinugtanon sa mga anak ni Zelopehad makaimpluwensiya sa panglantaw sa usa ka tagsaanong Kristohanon bahin sa kaminyoon?
9 Ang pagbutang kanunay kang Jehova sa atong atubangan motabang kanato sa pagsugot kaniya, ug kita panalanginan tungod niini. (Deut. 28:13; 1 Sam. 15:22) Kini nagpasabot nga kita kinahanglang magmasinugtanon. Tagda ang tinamdan sa lima ka magsoong babaye, ang mga anak ni Zelopehad, kinsa nagkinabuhi sa panahon ni Moises. Taliwala sa mga Israelinhon, mga lalaki ang kasagarang makadawat ug panulondon gikan sa ilang mga amahan. Si Zelopehad namatay nga walay mga anak nga lalaki, ug gibaod ni Jehova nga kining lima ka babaye maoy makadawat sa tibuok nga panulondon, apan sa usa ka kondisyon. Kinahanglang minyoan nila ang mga anak nga lalaki ni Manases aron ang panulondon magpabilin ra sa ilang tribo.—Num. 27:1-8; 36:6-8.
10 Masaligon ang mga anak ni Zelopehad nga panalanginan ra sila kon magmasinugtanon sila sa Diyos. “Ingon sa gisugo ni Jehova kang Moises, mao ang gibuhat sa mga anak nga babaye ni Zelopehad,” matod sa Bibliya. “Busa si Mala, si Tirza ug si Hogla ug si Milca ug si Noa, ang mga anak nga babaye ni Zelopehad, nahimong mga asawa sa mga anak nga lalaki sa mga igsoong lalaki sa ilang amahan. Sila nahimong mga asawa sa pipila sa mga banay sa mga anak ni Manases nga anak nga lalaki ni Jose, aron nga ang ilang panulondon magpabilin sa tribo sa banay sa ilang amahan.” (Num. 36:10-12) Gituman sa maong masinugtanong mga babaye ang gisugo ni Jehova. (Jos. 17:3, 4) Uban ang susamang pagtuo, sugton sa hamtong-sa-espirituwal nga tagsaanong mga Kristohanon ang Diyos pinaagi sa pagminyo “lamang diha sa Ginoo.”—1 Cor. 7:39.
11, 12. Sa unsang paagi gipakita ni Caleb nga siya may pagsalig sa Diyos?
11 Kinahanglang sugton nato sa bug-os si Jehova, sama sa gihimo sa Israelinhong si Caleb. (Deut. 1:36) Human makagawas ang mga Israelinhon gikan sa Ehipto sa ika-16 nga siglo W.K.P., gisugo ni Moises ang 12 ka tawo sa pag-espiya sa Canaan, apan duha lamang kanila, si Caleb ug Josue, ang miawhag sa mga tawo nga mosalig sa bug-os sa Diyos ug mosulod sa yuta. (Num. 14:6-9) Mga 40 ka tuig sa ulahi, buhi gihapon si Josue ug Caleb ug bug-os nga nagsugot kang Jehova, ug gigamit sa Diyos si Josue sa pagpanguna sa mga Israelinhon ngadto sa Yutang Saad. Apan, ang napulo ka dili-matinuohong mga espiya nangamatay samtang naglatagaw ang mga Israelinhon sa kamingawan sulod sa 40 ka tuig.—Num. 14:31-34.
12 Ingong usa nga nakalabang-buhi sa paglatagaw sa mga Israelinhon sa kamingawan, si Caleb makabarog atubangan kang Josue ug makaingon: “Ako bug-os nga nagsunod kang Jehova nga akong Diyos.” (Basaha ang Josue 14:6-9.) Gipangayo sa 85-anyos nga si Caleb ang bukirong rehiyon nga gisaad sa Diyos kaniya, bisan tuod gipuy-an na kini sa mga kaaway nga may dagkong kinutaang mga siyudad.—Jos. 14:10-15.
13. Bisan pa sa mga pagsulay nga atong atubangon, kita panalanginan kon buhaton nato ang unsa?
13 Sama sa matinumanon ug masinugtanong si Caleb, kita paluyohan sa Diyos kon atong ‘sundon sa bug-os si Jehova.’ Kon kita makaatubang ug dagkong mga suliran, kita panalanginan kon atong ‘sundon sa bug-os si Jehova.’ Apan ang pagbuhat niana sa tibuok natong kinabuhi, sama kang Caleb, mahimong lisod. Bisan tuod gisunod ni Haring Solomon si Jehova sa sinugdanan, siya nadaldal sa iyang mga asawa sa pag-alagad sa bakak nga mga diyos sa natigulang na siya, ug “wala siya mosunod kang Jehova sa bug-os sama kang David nga iyang amahan.” (1 Hari 11:4-6) Bisan pa sa mga pagsulay nga atong atubangon, hinaot bug-os natong sugton ang Diyos ug ibutang nato siya kanunay sa atong atubangan.
Salig Kanunay Kang Jehova
14, 15. Sumala sa kasinatian ni Noemi, unsay imong nakat-onan bahin sa panginahanglan nga mosalig sa Diyos?
14 Kinahanglan kitang mosalig sa Diyos ilabina kon kita nagmagul-anon tungod sa kawalay-paglaom. Tagda ang tigulang na nga si Noemi, kinsa namatyag bana ug duha ka anak nga lalaki. Sa iyang pagpauli sa Juda gikan sa Moab, siya mituaw: “Ayaw ako tawga ug Noemi [nga nagkahulogang “Akong Kahimuot”]. Tawga ako ug Mara [nga nagkahulogang “Mapait”], kay ang Labing Gamhanan naghimong mapait kaayo alang kanako. Tugob ako sa akong paggikan, ug walay dala sa dihang gipapauli ako ni Jehova. Nganong tawgon ninyo ako ug Noemi, nga si Jehova man ang nagpaubos kanako ug ang Labing Gamhanan ang nagpahinabo ug katalagman kanako?”—Ruth 1:20, 21.
15 Bisan pag nagmagul-anon si Noemi, kon atong susihon pag-ayo ang basahon ni Ruth, atong makita nga siya kanunayng misalig kang Jehova. Dako gayod ang kausaban sa iyang kahimtang! Ang balong umagad ni Noemi nga si Ruth naminyo kang Boaz ug nanganak ug usa ka lalaki. Si Noemi ang nahimong yaya sa bata, ug ang asoy nag-ingon: “Ginganlan kini sa silingang mga babaye, nga nag-ingon: ‘Natawo alang kang Noemi ang usa ka lalaki.’ Ug ilang gitawag ang iyang ngalan nga Obed. Siya ang amahan ni Jese, ang amahan ni David.” (Ruth 4:14-17) Inigkabanhaw ni Noemi, iyang mahibaloan nga si Ruth, nga pagabanhawon usab, nahimong katigulangan ni Jesus, ang Mesiyas. (Mat. 1:5, 6, 16) Sama kang Noemi, wala kita masayod sa mahimong dangatan sa dili-maayong mga kahimtang sa pagkakaron. Busa, mosalig kita kanunay sa Diyos, ingon sa giawhag kanato sa Proverbio 3:5, 6: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.”
Salig sa Balaang Espiritu
16. Sa unsang paagi gigiyahan sa balaang espiritu sa Diyos ang pipila ka lalaki sa karaang Israel?
16 Kon atong ibutang kanunay si Jehova sa atong atubangan, siya magagiya kanato pinaagi sa iyang balaang espiritu. (Gal. 5:16-18) Ang espiritu sa Diyos naglihok diha sa 70 ka lalaki nga gipili sa pagtabang kang Moises sa “pagpas-an sa luwan sa katawhan” sa Israel. Si Eldad ug Medad lang ang ginganlan, apan gigiyahan silang tanan sa balaang espiritu sa pagtuman sa ilang mga buluhaton. (Num. 11:13-29) Dayag nga sila may katakos, may kahadlok sa Diyos, kasaligan, ug maminatud-on sama sa mga lalaki nga unang gipili. (Ex. 18:21) Gipasundayag usab sa mga ansiyano karon kining mga hiyasa.
17. Unsay papel sa balaang espiritu ni Jehova sa pagtukod sa tabernakulo?
17 Dako kaayog papel ang balaang espiritu ni Jehova sa pagtukod sa tabernakulo didto sa kamingawan. Gitudlo ni Jehova si Bezalel ingong pangulong artesano ug magtutukod sa tabernakulo, nga nagsaad kaniya nga ‘pun-on siya sa espiritu sa Diyos sa kaalam ug sa pagsabot ug sa kahibalo ug sa tanang matang sa kahanas sa pagbuhat.’ (Ex. 31:3-5) Ang mga lalaki nga “maalamon sa kasingkasing” nagtrabaho uban kang Bezalel ug sa iyang katabang nga si Oholiab sa pagtuman nianang talagsaong asaynment. Dugang pa, ang espiritu ni Jehova nagpalihok sa mga tawo nga andam ug kasingkasing sa paghatag ug dagayang mga amot. (Ex. 31:6; 35:5, 30-34) Gipalihok sa mao ra gihapong espiritu ang mga alagad sa Diyos karon sa pagbuhat kutob sa ilang maarangan sa pag-una sa Gingharian. (Mat. 6:33) Tingali aduna kitay mga katakos, apan kinahanglan kitang moampo alang sa balaang espiritu ug magpagiya niini aron molampos ang buluhaton nga gipiyal ni Jehova sa iyang katawhan karon.—Luc. 11:13.
Simbaha Kanunay si Jehova sa mga Panon
18, 19. (a) Unsang matanga sa tinamdan ang ipatungha sa balaang espiritu sa Diyos diha kanato? (b) Unsay imong nakat-onan gikan sa mga panig-ingnan ni Simeon ug Ana?
18 Ang balaang espiritu motabang kanato sa pagpatunghag masimbahong tinamdan aron atong ikabutang kanunay si Jehova sa atong atubangan. Giingnan sa Diyos ang iyang karaang katawhan: “Simbaha si Jehova sa mga Panon ingong balaan.” (Isa. 8:13, Byington) Ang duha ka masimbahong mga tigulang sa unang-siglong Jerusalem mao si Simeon ug Ana. (Basaha ang Lucas 2:25-38.) Si Simeon nagtuo sa mga tagna bahin sa Mesiyas ug “nagahulat sa kahupayan sa Israel.” Ang Diyos naghatag kang Simeon ug balaang espiritu ug nagpasalig kaniya nga iyang makit-an ang Mesiyas sa dili pa siya mamatay. Ug kana gayod ang nahitabo. Usa ka adlaw niana sa tuig 2 W.K.P., gidala si Jesus sa iyang mga ginikanan nga si Maria ug Jose ngadto sa templo. Kay gidasig sa balaang espiritu, si Simeon militok ug matagnaong mga pulong bahin sa Mesiyas ug nagtagna sa kagul-anan ni Maria, nga iyang nasinatian sa dihang gilansang si Jesus sa estaka sa pagsakit. Apan hunahunaa lang ang dakong kalipay nga gibati ni Simeon sa dihang gikugos niya “ang Kristo ni Jehova”! Usa gayod ka maayong panig-ingnan sa pagkamasimbahon ang gihatag ni Simeon alang sa mga alagad sa Diyos karon!
19 Si Ana, nga usa ka masimbahong babayeng balo nga nagpangedarog 84 anyos, “wala gayod mopalta sa templo.” Siya naghatag ug sagradong pag-alagad kang Jehova adlaw ug gabii “uban ang mga pagpuasa ug mga pangamuyo.” Si Ana presente usab sa dihang gidala sa templo ang bata nga si Jesus. Pagkamapasalamaton niya nga nakakita sa umaabot nga Mesiyas! Gani, siya “nagpasalamat sa Diyos ug nagsulti bahin sa bata ngadto kanilang tanan nga nagahulat sa kaluwasan sa Jerusalem.” Gibati ni Ana nga kinahanglang ipaambit niya sa uban kining maayong balita! Sama kang Simeon ug Ana, ang tigulang nang mga Kristohanon karon malipayon gayod kay bisan pa sa ilang pangedaron, sila makaalagad gihapon kang Jehova ingong iyang mga Saksi.
20. Bisan unsa pay atong pangedaron, unsay kinahanglan natong buhaton, ug ngano?
20 Bisan unsa pay atong pangedaron, kinahanglan natong ibutang kanunay si Jehova sa atong atubangan. Pinaagi niana iyang panalanginan ang atong mga paningkamot sa pagsangyaw sa uban bahin sa iyang pagkahari ug sa iyang kahibulongang mga buhat. (Sal. 71:17, 18; 145:10-13) Apan kinahanglang magpasundayag kita ug diyosnong mga hiyas aron atong mapasidunggan si Jehova. Unsay atong makat-onan bahin sa maong mga hiyas kon susihon pa natog dugang ang mga asoy sa Bibliya?
Unsay Imong Tubag?
• Giunsa nato pagkahibalo nga dunggon ni Jehova ang mga pag-ampo?
• Nganong angay natong sugton sa bug-os ang Diyos?
• Bisan pag nagmasulub-on kita, nganong angay kitang mosalig kanunay kang Jehova?
• Sa unsang paagi tabangan sa balaang espiritu sa Diyos ang iyang katawhan?
[Mga Pangutana sa Pagtuon]
[Hulagway sa panid 4]
Gidungog ni Jehova ang pag-ampo ni Nehemias
[Hulagway sa panid 5]
Ang paghinumdom sa mga panalangin nga nadawat ni Noemi motabang kanato sa pagsalig kang Jehova