Lakaw Diha sa mga Dalan ni Jehova
Lakaw Diha sa mga Dalan ni Jehova
“Malipayon ang matag usa nga nahadlok kang Jehova, nga nagalakaw sa iyang mga dalan.”—SAL. 128:1.
1, 2. Nganong makaseguro kita nga mahimo gayod kitang magmalipayon?
KITANG tanan gustong magmalipayon. Apan ang pagkagustong magmalipayon wala magpasabot nga kita malipayon na.
2 Hinunoa, mahimo gayod kitang magmalipayon. “Malipayon ang matag usa nga nahadlok kang Jehova, nga nagalakaw sa iyang mga dalan,” nag-ingon ang Salmo 128:1. Kita magmalipayon kon atong simbahon ang Diyos ug molakaw diha sa iyang mga dalan pinaagi sa pagbuhat sa iyang kabubut-on. Unsay mahimong epekto niini diha sa panggawi ug mga hiyas nga atong gipakita?
Pamatud-i nga Ikaw Kasaligan
3. Sa unsang paagi ang pagkakasaligan nalangkit sa atong pagpahinungod sa Diyos?
3 Kadtong may kahadlok kang Jehova maoy kasaligan, ingon nga si Jehova kasaligan. Gituman ni Jehova ang tanan niyang gisaad sa karaang Israel. (1 Hari 8:56) Ang atong pagpahinungod sa Diyos mao ang labing hinungdanong saad nga atong nahimo sukad, ug ang regular nga pag-ampo motabang kanato sa pagtuman niana. Kita makaampo sama sa salmistang si David: “Ikaw, Oh Diyos, namati sa akong mga panaad. . . . Magaawit ako ug mga pagdayeg sa imong ngalan hangtod sa kahangtoran, aron makabayad ako sa akong mga panaad adlaw-adlaw.” (Sal. 61:5, 8; Eccl. 5:4-6) Aron mahimong mga higala sa Diyos, kita kinahanglang kasaligan.—Sal. 15:1, 4.
4. Giunsa pagtamod ni Jepte ug sa iyang anak babaye ang iyang panaad kang Jehova?
4 Sa panahon sa mga Maghuhukom sa Israel, si Jepte nanaad nga kon ihatag ni Jehova kaniya ang kadaogan batok sa mga Ammonhanon, iyang ihatag ang unang motagbo kaniya sa iyang pagbalik gikan sa panggubatan ingong “halad-nga-sinunog.” Ang unang mitagbo kang Jepte mao ang iyang bugtong anak nga babaye. Tungod sa ilang pagtuo kang Jehova, gituman ni Jepte ug sa iyang wala-maminyo nga anak babaye ang iyang panaad. Bisan tuod gipabilhan pag-ayo sa Israel ang pagminyo ug pagbatog mga anak, ang anak ni Jepte andam sa pagpabiling tagsaanon ug sa pagpahimulos sa pribilehiyo sa pag-alagad kang Jehova diha sa iyang sangtuwaryo.—Maghu. 11:28-40.
5. Sa unsang paagi gipamatud-an ni Ana nga siya kasaligan?
5 Ang diyosnong babaye nga si Ana maoy kasaligan. Siya nagpuyo uban sa iyang Levihanong bana nga si Elkana, ug sa usa pa ka asawa ni Elkana nga si Penina, diha sa bukirong rehiyon sa Epraim. Si Penina daghag anak ug iyang biaybiayon ang walay anak nga si Ana ilabina sa dihang mangadto ang tibuok pamilya sa tabernakulo. Diha sa usa sa maong mga okasyon, nanaad si Ana nga kon manganak siyag lalaki, iya kining ihatag kang Jehova. Sa wala madugay siya namabdos ug nanganak ug lalaki nga iyang ginganlag Samuel. Human malutas si Samuel, gitanyag siya ni Ana sa Diyos didto sa Shilo, nga nagpahulam kang Samuel ngadto kang Jehova “sa tanang adlaw sa iyang kinabuhi.” (1 Sam. 1:11) Busa, iyang gituman ang iyang panaad bisag wala siya mahibalo kon makabaton pa ba siyag mga anak sa ulahi.—1 Sam. 2:20, 21.
6. Sa unsang paagi gipakita ni Tiquico nga siya kasaligan?
6 Ang Kristohanong si Tiquico sa unang siglo maoy usa usab ka kasaligang tawo ug “matinumanong ministro.” (Col. 4:7) Siya mipanaw uban kang apostol Pablo gikan sa Gresya ngadto sa Macedonia, sa Asia Minor, ug lagmit hangtod pa sa Jerusalem. (Buh. 20:2-4) Tingali siya “ang igsoong lalaki” nga nagtabang kang Tito sa pagpanghatag sa gasa alang sa nanginahanglang mga isigkamagtutuo sa Judea. (2 Cor. 8:18, 19; 12:18) Sa unang pagkabilanggo ni Pablo sa Roma, si Tiquico maoy iyang gisugo sa paghatod sa mga sulat ngadto sa mga isigkamagtutuo sa Efeso ug Colosas. (Efe. 6:21, 22; Col. 4:8, 9) Sa ikaduha niyang pagkabilanggo sa Roma, gipaadto ni Pablo si Tiquico sa Efeso. (2 Tim. 4:12) Kon kita kasaligan, kita usab makapahimulos ug mga panalangin diha sa pag-alagad kang Jehova.
7, 8. Nganong makaingon kita nga si David ug Jonatan maoy matuod nga managhigala?
7 Gidahom sa Diyos nga kita mahimong kasaligan nga mga higala. (Prov. 17:17) Ang anak ni Haring Saul nga si Jonatan nahimong higala ni David. Sa dihang nahibaloan ni Jonatan nga napatay ni David si Goliat, “ang kalag ni Jonatan nalanggikit sa kalag ni David, ug si Jonatan nahigugma kaniya ingon sa iyang kaugalingong kalag.” (1 Sam. 18:1, 3) Gipasidan-an pa gani ni Jonatan si David nga gusto siyang patyon ni Saul. Human mokalagiw si David, nakigkita si Jonatan kaniya ug mihimog pakigsaad uban kaniya. Diriyot pa ganing mapatay ni Saul si Jonatan tungod kay nakigsulti siya kang David, apan nagtagbo pa gihapon si David ug Jonatan ug gipalig-on ang ilang panaghigala. (1 Sam. 20:24-41) Sa kataposan nilang panagkita, gipalig-on ni Jonatan si David “labot sa Diyos.”—1 Sam. 23:16-18.
8 Si Jonatan namatay sa pagpakiggubat sa mga Filistehanon. (1 Sam. 31:6) Sa usa ka awit sa pagbangotan, si David mituaw: “Naguol ako pag-ayo alang kanimo, igsoon ko nga Jonatan, nakapahimuot ka gayod kaayo kanako. Labaw pang katingalahan ang imong gugma kanako kay sa gugma sa mga babaye.” (2 Sam. 1:26) Kining gugmaha maoy iya sa mga managhigala ug kini walay romantikong kahulogan. Si David ug Jonatan maoy matuod nga managhigala.
‘Magmapainubsanon Kanunay sa Hunahuna’
9. Sa unsang paagi gipakita sa Maghuhukom kapitulo 9 ang kahinungdanon sa pagkamapainubsanon?
9 Aron mahimong mga higala sa Diyos, kita kinahanglang “magmapainubsanon sa hunahuna.” (1 Ped. 3:8; Sal. 138:6) Ang kahinungdanon sa pagkamapainubsanon gipakita diha sa Maghuhukom kapitulo 9. Ang anak ni Gideon nga si Jotam nag-ingon: “Usa ka panahon kanhi, ang mga kahoy nagdihog ug usa ka hari nga mangulo kanila.” Gihisgotan ang kahoyng olibo, igos, ug paras. Kini naghawas sa takos nga mga tawo kinsa wala maninguha sa pagmando ibabaw sa ilang mga isigka-Israelinhon. Apan ang sampinit, nga maayo rang isugnod, naghawas sa pagkahari sa magarbohong si Abimelek, usa ka mamumuno nga gustong mokontrolar sa uban. Bisan tuod siya “nagpakaprinsipe sa Israel sa tulo ka tuig,” siya naahat ug kamatay. (Maghu. 9:8-15, 22, 50-54) Mas maayo gayong “magmapainubsanon sa hunahuna”!
10. Unsay imong nakat-onan sa pagkapakyas ni Herodes sa ‘paghatag sa himaya ngadto sa Diyos’?
10 Sa unang siglo K.P., may panagbangi tali sa magarbohong Haring Herodes Agripa sa Judea ug sa mga molupyo sa Tiro ug Sidon, kinsa gustong makigdait kaniya. Usa niana ka higayon dihang si Herodes mipakigpulong, sila misinggit: “Tingog sa usa ka diyos, ug dili sa tawo!” Gidawat ni Herodes ang maong maulog-ulogong pagdayeg, mao nga gihampak siya sa manulonda ni Jehova ug namatay sa makalilisang nga paagi “tungod kay wala niya ihatag ang himaya ngadto sa Diyos.” (Buh. 12:20-23) Komosta kon kita usa ka maayong mamumulong o magtutudlo sa mga kamatuoran sa Bibliya? Nan angay natong pasidunggan ang Diyos kay siya ang naghatag kanato sa maong mga katakos.—1 Cor. 4:6, 7; Sant. 4:6.
Magmaisogon ug Magmalig-on
11, 12. Sa unsang paagi gipakita sa kasinatian ni Enoc nga si Jehova maghatag ug kaisog ug kalig-on sa iyang mga alagad?
11 Kon kita mapainubsanong molakaw diha sa mga dalan ni Jehova, siya mohatag kanato ug kaisog ug kalig-on. (Deut. 31:6-8, 23) Si Enoc, ang ikapitong tawo sa kaliwatan gikan ni Adan, maisogong naglakaw uban sa Diyos pinaagi sa pagsubay sa matul-id nga dalan taliwala sa iyang daotang mga katalirongan. (Gen. 5:21-24) Gipalig-on ni Jehova si Enoc sa pagmantala sa mga paghukom sa Diyos ngadto kanila tungod sa ilang dili-diyosnong mga sinultihan ug binuhatan. (Basaha ang Judas 14, 15.) Aduna ka bay kaisog sa pagmantala sa mga paghukom sa Diyos?
12 Gilaglag ni Jehova ang dili-diyosnong mga tawo panahon sa Lunop sa adlaw ni Noe. Hinunoa, ang tagna ni Enoc makapadasig kanato, tungod kay sa dili madugay laglagon na sa mga manulonda sa Diyos ang dili-diyosnong mga tawo sa atong adlaw. (Pin. 16:14-16; 19:11-16) Agig tubag sa atong mga pag-ampo, hatagan kita ni Jehova ug kaisog sa pagmantala sa iyang mensahe, maylabot man kini sa iyang mga paghukom o mga panalangin ubos sa pagmando sa Gingharian.
13. Nganong makapaneguro kita nga ang Diyos makahatag sa gikinahanglan natong kaisog ug kalig-on sa pagsagubang sa makapaguol nga mga suliran?
13 Gikinahanglan nato ang kaisog ug kalig-on gikan sa Diyos sa pagsagubang sa makapaguol nga mga suliran. Dihang nangasawa si Esau ug duha ka Hitihanon, “sila maoy tinubdan sa kapaitan sa espiritu ni Isaac ug ni Rebeca” nga iyang mga ginikanan. Mituaw si Rebeca: “Gikasilagan ko kining akong kinabuhi tungod sa mga anak nga babaye ni Het. Kon [ang among anak nga] si Jacob magkuha ug asawa gikan sa mga anak nga babaye ni Het nga sama niini nila gikan sa mga anak nga babaye sa yuta, unsa pay kapuslanan sa akong kinabuhi?” (Gen. 26:34, 35; 27:46) Milihok dayon si Isaac ug iyang gipalakaw si Jacob aron mangitag pangasaw-onon taliwala sa mga magsisimba ni Jehova. Bisan tuod dili na mausab ni Isaac ug Rebeca ang gihimo ni Esau, ang Diyos naghatag kanilag kaalam, kaisog, ug kalig-on aron makapabilin silang matinumanon Kaniya. Kon moampo usab kita kang Jehova, iya kitang tabangan.—Sal. 118:5.
14. Sa unsang paagi gipasundayag sa dalagitang Israelinhon ang kaisog?
14 Pipila ka siglo sa ulahi, usa ka dalagitang Israelinhon nga gibihag sa mga bandido ang nahimong sulugoon sa panimalay sa usa ka Siryanhong opisyal sa kasundalohan nga si Naaman, nga usa ka sanlahon. Kay nahibalo bahin sa mga milagro sa Diyos pinaagi ni manalagnang Eliseo, maisogong gisultihan sa dalagita ang asawa ni Naaman: ‘Kon moadto lang unta sa Israel ang akong agalon, ayohon gayod sa manalagna ni Jehova ang iyang sanla.’ Miadto si Naaman sa Israel, ug siya naayo sa milagrosong paagi. (2 Hari 5:1-3) Pagkamaayong panig-ingnan ang gihatag sa maong dalagita alang sa mga batan-on nga mosalig kang Jehova alang sa kaisog sa pagsangyaw sa ilang mga magtutudlo, eskolmet, ug sa uban!
15. Unsa ang maisogong gibuhat sa tagdumala sa panimalay ni Ahab nga si Obadias?
15 Ang kaisog nga ihatag sa Diyos motabang kanato sa pag-antos sa paglutos. Tagda ang tagdumala sa panimalay ni Haring Ahab nga si Obadias, usa ka katalirongan ni manalagnang Elias. Sa dihang gimando ni Raynang Jezebel nga patyon ang mga manalagna sa Diyos, gitagoan ni Obadias ang 100 kanila nga “tagkalim-an didto sa usa ka langob.” (1 Hari 18:13; 19:18) Maisogon ba usab nimong tabangan ang gilutos nga mga isigka-Kristohanon, sama sa gihimo ni Obadias sa mga manalagna ni Jehova?
16, 17. Unsay reaksiyon ni Aristarko ug Gayo sa paglutos?
16 Kon kita pagalutoson, makasalig kita sa tabang ni Jehova. (Roma 8:35-39) Didto sa usa ka teatro sa Efeso, ang mga kauban ni Pablo nga si Aristarko ug Gayo nakaatubang ug dakong panon sa magubtanong katawhan. Ang platero nga si Demetrio maoy nagsulsol sa maong kagubot. Siya ug ang iyang mga isigkaplatero naghimog mga imahen sa diyosa nga si Artemis, ug nameligrong mabangkarota ang ilang dakog-kita nga negosyo kay gibiyaan na sa daghang tawo sa siyudad ang pagsimbag idolo tungod sa pagsangyaw ni Pablo. Ilang giguyod si Aristarko ug Gayo ngadto sa teatro ug nagsigeg singgit: “Bantogan si Artemis sa mga taga-Efeso!” Lagmit nagtuo si Aristarko ug Gayo nga mangamatay na sila, apan gipahilom sa kalihim sa siyudad ang mga tawo.—Buh. 19:23-41.
17 Kon nakasinati kag sama niini, mangandoy ka bag sayonsayon nga paagi sa pagkinabuhi? Walay timailhan nga nawad-ag kaisog si Aristarko ug Gayo. Kay taga-Tesalonica man si Aristarko, nahibalo siya nga mahimong motungha ang paglutos tungod sa pagmantala sa maayong balita. Sayosayo pa niana, may kagubot nga nahitabo sa dihang nagsangyaw si Pablo didto. (Buh. 17:5; 20:4) Tungod kay si Aristarko ug Gayo naglakaw man diha sa mga dalan ni Jehova, sila may kalig-on ug kaisog sa pag-antos sa paglutos.
Magmahunahunaon sa Kaayohan sa Uban
18. Sa unsang paagi si Prisca ug Aquila nagmahunahunaon sa kaayohan sa uban?
18 Gilutos man kita karon o wala, angay kitang magmahunahunaon sa kaayohan sa atong mga isigka-Kristohanon. Si Prisca ug Aquila nagmahunahunaon sa kaayohan sa uban. (Basaha ang Filipos 2:4.) Ang maong sulondang magtiayon lagmit nagtaganag kaestaran ni Pablo didto sa Efeso, diin nahitabo ang kagubot nga gisulsolan ni Demetrio nga gihisgotan sa ibabaw. Kadtong situwasyona lagmit maoy nagdasig kang Aquila ug Prisca sa ‘pagpameligro sa ilang mga liog’ alang kang Pablo. (Roma 16:3, 4; 2 Cor. 1:8) Karong panahona, ang kahingawa alang sa atong mga igsoon nga ginalutos magpahimo kanatong ‘magmabinantayon ingon sa mga halas.’ (Mat. 10:16-18) Magmabinantayon kita sa pagtuman sa atong buluhaton ug dili magluib kanila pinaagi sa pagbutyag sa ilang mga ngalan o uban pang mga impormasyon ngadto sa mga maglulutos.
19. Unsang maayong mga buhat ang gihimo ni Dorcas alang sa uban?
19 Adunay daghang paagi nga kita makapasundayag ug pagkamahunahunaon sa kaayohan sa uban. Ang ubang mga Kristohanon lagmit may mga panginahanglan, ug kita mahimong makatagana niana. (Efe. 4:28; Sant. 2:14-17) Sa unang-siglong kongregasyon sa Jope, adunay usa ka mahinatagong babaye nga ginganlag Dorcas. (Basaha ang Buhat 9:36-42.) Si Dorcas “daghag maayong mga buhat ug mga gasa sa kaluoy” nga tingali naglakip sa paghimog mga besti alang sa kabos nga mga babayeng balo. Sa iyang pagkamatay sa 36 K.P., daghang babayeng balo ang nagbangotan. Gigamit sa Diyos si apostol Pedro sa pagbanhaw kang Dorcas, ug lagmit gayod nga gigugol niya ang nahibiling bahin sa iyang kinabuhi sa yuta sa malipayong pagsangyaw sa maayong balita ug sa paghimog maayong mga butang alang sa uban. Malipayon gayod kita nga adunay ingon nianang matanga sa dili-mahakogon nga Kristohanong mga babaye sa atong taliwala karon!
20, 21. (a) Sa unsang paagi ang pagdasig nalangkit sa atong pagkamahunahunaon sa kaayohan sa uban? (b) Unsay imong mahimo aron madasig ang uban?
20 Kita magmahunahunaon sa kaayohan sa uban pinaagi sa pagdasig kanila. (Roma 1:11, 12) Ang kauban ni Pablo nga si Silas maoy usa ka tuboran sa pagdasig. Human masulbad ang isyu bahin sa pagpatuli niadtong 49 K.P., ang nagamandong lawas sa Jerusalem nagpadalag mga hawas sa paghatod sa sulat ngadto sa mga Kristohanon sa ubang lugar. Si Silas, Judas, Bernabe, ug Pablo nagdala niini ngadto sa Antioquia. Didto si Silas ug Judas “nagdasig sa mga igsoon pinaagi sa daghang pakigpulong ug nagpalig-on kanila.”—Buh. 15:32.
21 Sa ulahi, si Pablo ug Silas nabilanggo sa Filipos apan gibuhian pagkahuman sa usa ka linog. Nalipay gayod sila sa paghatag ug pamatuod ug sa pagkakita sa guwardiya ug sa iyang panimalay nga nahimong mga magtutuo! Sa wala pa sila mobiya sa maong siyudad, gidasig ni Silas ug Pablo ang mga igsoon. (Buh. 16:12, 40) Sama kang Pablo ug Silas, dasiga ang uban pinaagi sa imong mga komento, pakigpulong, ug masibotong pagsangyaw. Ug kon aduna kay “pulong sa pagdasig,” “isulti [gayod] kini.”—Buh. 13:15.
Padayon sa Paglakaw Diha sa mga Dalan ni Jehova
22, 23. Sa unsang paagi kita makabenepisyo gayod gikan sa mga asoy sa Bibliya?
22 Mapasalamaton gayod kita sa tinuod-kinabuhing mga asoy nga narekord diha sa Pulong ni Jehova, ang “Diyos sa tanang pagdasig”! (2 Cor. 1:3, Byington) Aron ato kining mapahimuslan, kinahanglang ipadapat nato ang mga pagtulon-an sa Bibliya sa atong kinabuhi ug magpagiya kita sa balaang espiritu sa Diyos.—Gal. 5:22-25.
23 Ang pagpamalandong sa mga asoy sa Bibliya motabang kanato sa pagpasundayag sa diyosnong mga hiyas. Kini mopalig-on sa atong relasyon kang Jehova, kinsa naghatag kanatog “kaalam ug kahibalo ug pagmaya.” (Eccl. 2:26) Ingong resulta, kita makapalipay sa mahigugmaong kasingkasing sa Diyos. (Prov. 27:11) Hinaot magmadeterminado kita sa pagbuhat niana pinaagi sa pagpadayon sa paglakaw diha sa mga dalan ni Jehova.
Unsay Imong Tubag?
• Sa unsang paagi imong mapamatud-an nga ikaw kasaligan?
• Nganong angay kitang “magmapainubsanon sa hunahuna”?
• Sa unsang paagi ang mga asoy sa Bibliya motabang kanato nga magmaisogon?
• Sa unsang mga paagi kita magmahunahunaon sa kaayohan sa uban?
[Mga Pangutana sa Pagtuon]
[Hulagway sa panid 8]
Ang kasaligan nga si Jepte ug ang iyang anak babaye nagtuman sa iyang panaad, bisan pag malisod ang pagbuhat niana
[Hulagway sa panid 10]
Mga batan-on, unsay inyong nakat-onan gikan sa dalagitang Israelinhon?
[Hulagway sa panid 11]
Sa unsang paagi gitagan-an ni Dorcas ang mga panginahanglan sa iyang mga isigka-Kristohanon?