Pagkat-on Gikan sa Kasaypanan sa mga Israelinhon

ANG mga Israelinhon nahibalo kon unsay gidahom ni Jehova kanila sa ilang pagsulod sa Yutang Saad. Pinaagi ni Moises, ang Diyos nagsugo: “Abogon ninyo ang tanang molupyo sa yuta gikan sa inyong atubangan ug dugmokon ang tanan nilang bato nga mga larawan, ug ang tanan nilang mga larawan sa inumol nga metal inyong dugmokon, ug ang tanan nilang sagradong hatag-as nga mga dapit inyong laglagon.”—Num. 33:52.

Ang mga Israelinhon kinahanglang dili mohimog pakigsaad uban sa mga molupyo sa yuta, ug dili usab sila makigminyo kanila. (Deut. 7:2, 3) Gani, gipasidan-an sila sa Diyos: “Pagbantay nga dili ka maghimog pakigsaad uban sa mga molupyo sa yuta nga imong pagaadtoan, kay basin kini mahimong usa ka lit-ag taliwala kanimo.” (Ex. 34:12) Apan ang mga Israelinhon misupak sa Diyos ug nalit-agan. Unsay hinungdan sa ilang pagkapukan? Unsang mga leksiyon ang atong makat-onan gikan sa ilang kasinatian?—1 Cor. 10:11.

Gikan sa Pagpakighigala Ngadto sa Idolatriya

Napanag-iya sa mga Israelinhon ang Yutang Saad human nila mapildi ang mga molupyo didto. Ugaling lang, ang mga anak sa Israel wala mosunod sa bug-os sa mga sugo sa Diyos. Wala nila papahawaa ang mga kaaway. (Maghu. 1:1–2:10) Hinunoa, samtang nagpuyo ang mga Israelinhon taliwala sa “pito ka nasod” nga nagpuyo sa yuta, ilang nahigala ang mga tawo didto tungod sa ilang kanunayng pagpakig-uban kanila. (Deut. 7:1) Sa unsang paagi kini nakaimpluwensiya sa mga Israelinhon? Ang Bibliya nag-ingon: “Sila nagkuha sa ilang mga anak nga babaye ingong mga asawa, ug ang ilang mga anak nga babaye ilang gihatag sa ilang mga anak nga lalaki, ug sila nag-alagad sa ilang mga diyos. Busa ang mga anak sa Israel nagbuhat sa daotan sa mga mata ni Jehova, ug sila nahikalimot kang Jehova nga ilang Diyos ug sila nag-alagad sa mga Baal ug sa sagradong mga poste.” (Maghu. 3:5-7) Human sa pipila ka panahon nga pagpakig-uban sa mga molupyo sa yuta, ang mga Israelinhon nakigminyo sa pipila kanila ug nagsimba sa ilang mga diyos. Sa dihang nahimo na ang  mga kasabotan sa kaminyoon, seguradong nalisdan na ang mga Israelinhon sa pagpapahawa sa mga pagano gikan sa yuta. Nadaot ang matuod nga pagsimba, ug ang mga Israelinhon mismo nag-alagad na sa bakak nga mga diyos.

Ang mga molupyo sa Yutang Saad, isip mga higala na sa mga Israelinhon, nahimong mas peligroso kanila kay sa dihang sila ila pang mga kaaway tungod kay basin sila magdaot sa ilang relasyon uban sa Diyos. Tagda ang laing paagi nga lagmit nakadaot sa ilang pagsimba.

Gikan sa Pagpanguma Ngadto sa Pagsimba Kang Baal

Sa pagsulod nila sa Yutang Saad, ang mga Israelinhon wala na maglatagaw ug daghan kanila ang nahimong mga mag-uuma. Ang ilang pagpanguma lagmit susama sa pamaagi nga gigamit sa mga Canaanhon. Dayag nga dili lamang pagpanguma ang gisagop sa mga Israelinhon. Ang pagpakig-uban kanila nakadani usab sa mga Israelinhon sa pagsagop sa ilang pagsimba nga nalangkit sa pagpanguma.

Ang mga Canaanhon nagsimba ug daghang mga Baal—mga diyos nga makapatabunok kono sa yuta aron modaghan ang abot. Gawas pa sa pagtikad ug pag-ani sa mga abot yuta, sa kadugayan ang mga Israelinhon miduyog na sa pagsimba sa mga diyos sa Canaan ingong tuboran sa kadagaya. Busa, daghang Israelinhon ang nagpakaaron-ingnong nagsimba kang Jehova, apan ang tinuod sila nagkigbahin gayod sa apostasya.

Usa ka Seryosong Pasidaan Alang Kanato Karon

Tingali ang mga Israelinhon walay tuyo nga malangkit sa pagsimba kang Baal ug sa grabeng imoralidad niini sa dihang una nilang nahimamat ang mga molupyo sa Yutang Saad. Apan mao gayod kanay miresulta sa ilang pagpakig-uban kanila. Dili ba mao usab kanay atong madahom kon kita makig-uban niadtong morag mahigalaong mga tawo apan dili sama natog pagtuo, wala magsunod sa atong mga sukdanan sa moralidad, ug lahi kanatog mga prinsipyo? Siyempre, dili kalikayan nga ikauban nato ang mga dili magtutuo diha sa atong trabahoan, eskuylahan, o tingali sa atong panimalay. Apan ang kasinatian sa mga Israelinhon maoy usa ka pasidaan kanato nga kon atong tinguhaon ang maong pagpakig-uban, kita mahitumpawak gayod sa kadaot. Ang Bibliya klarong nag-ingon: “Ang daotang pakig-uban makadaot sa mapuslanong pamatasan.”—1 Cor. 15:33.

Karong adlawa, kita nagaatubang ug daghang pagsulay nga susama sa nasinatian sa mga Israelinhon. Niining modernong katilingban, daghang butang ug mga indibiduwal ang giidolo sa mga tawo. Kini naglakip sa salapi, mga artista, magdudula, politikanhong mga organisasyon, mga lider sa relihiyon, ug bisan mga membro sa pamilya. Bisan hain niini posible nga mahimong pangunang butang sa atong kinabuhi. Kon makigsuod kita sa mga tawong wala mahigugma kang Jehova, madaot gayod ang atong espirituwalidad.

Ang gidili nga pagpakigsekso mao ang pangunang bahin sa pagsimba kang Baal nga nakadani ug nakalit-ag sa daghang Israelinhon. Nabiktima usab sa mao ra gihapong mga lit-ag ang pipila sa katawhan sa Diyos karon. Pananglitan, ang usa lang ka pagtulpok sa mouse sa kompiyuter diha sa kaugalingong panimalay mahimong igo na aron madaot ang hinlong tanlag sa usa ka maukit-ukitong tawo. Makapasubo gayod kon ang usa ka Kristohanon malit-agan sa pornograpiya diha sa Internet!

“Malipayon ang mga Nagasunod sa Iyang mga Pahinumdom”

Ang pagsugot o dili pagsugot kang Jehova bahin sa atong pagpili ug mga kauban maoy personal nga desisyon. (Deut. 30:19, 20) Busa kinahanglang pangutan-on nato ang atong kaugalingon: ‘Kinsay akong mga kauban kon ako maglingawlingaw? Unsay ilang panglantaw bahin sa mga sukdanan sa Diyos bahin sa moralidad? Sila ba nagsimba kang Jehova? Mahimo ba akong mas maayong Kristohanon kon makig-uban ako kanila?’

Ang salmista miawit: “Malipayon ang mga walay-ikasaway diha sa ilang dalan, ang mga nagasubay sa balaod ni Jehova. Malipayon ang mga nagasunod sa iyang mga pahinumdom; sila nagpadayon pagpangita kaniya sa bug-os nga kasingkasing.” (Sal. 119:1, 2) Sa pagkatinuod, “malipayon ang matag usa nga nahadlok kang Jehova, nga nagalakaw sa iyang mga dalan.” (Sal. 128:1) Kon bahin sa atong pagpilig mga kauban, hinaot makakat-on kita gikan sa kasaypanan sa mga Israelinhon ug magmasinugtanon sa bug-os kang Jehova.—Prov. 13:20.

[Hulagway sa panid 26]

Ang pagpakig-uban sa mga tawong wala mahigugma kang Jehova makadaldal kanato ngadto sa idolatriya