Sundoga ang Kinalabwang Misyonaryo
Sundoga ang Kinalabwang Misyonaryo
“Mahimong mga tigsundog kanako, ingon nga ako nagsundog kang Kristo.”—1 COR. 11:1.
1. Nganong angay natong sundogon si Jesu-Kristo?
GISUNDOG ni apostol Pablo ang kinalabwang Misyonaryo, si Jesu-Kristo. Giawhag usab ni Pablo ang iyang mga isigka-Kristohanon: “Mahimong mga tigsundog kanako, ingon nga ako nagsundog kang Kristo.” (1 Cor. 11:1) Human hatagi ni Jesus ang iyang mga apostoles ug usa ka panig-ingnan sa pagkamapainubsanon pinaagi sa paghugas sa ilang mga tiil, siya miingon kanila: “Ako nagtagana ug sumbanan alang kaninyo, nga, ingon sa akong gibuhat kaninyo, pagabuhaton usab ninyo.” (Juan 13:12-15) Ingong modernong mga Kristohanon, kita obligado sa pagsundog kang Jesu-Kristo diha sa atong sinultihan, binuhatan, ug sa mga hiyas nga atong ipakita.—1 Ped. 2:21.
2. Bisag wala ka itudlo sa Nagamandong Lawas ingong usa ka misyonaryo, unsang tinamdan ang imong maugmad?
2 Sa nag-unang artikulo, atong nahibaloan nga ang usa ka misyonaryo maoy usa ka pinadala ingong ebanghelisador—usa nga nagdalag maayong balita ngadto sa uban. Niining bahina, si Pablo nagsukna ug pipila ka makaiikag nga mga pangutana. (Basaha ang Roma 10:11-15.) Matikdi nga siya nangutana: “Unsaon . . . nila pagkadungog kon walay magwali?” Dayon iyang gikutlo ang mga pulong gikan sa tagna ni Isaias: “Pagkatahom sa mga tiil niadtong nagapahayag sa maayong balita sa maayong mga butang!” (Isa. 52:7) Bisag wala ka itudlo ug ipadala aron sa pag-alagad ingong misyonaryo sa laing nasod, ikaw makaugmad ug tinamdan nga magdasig kanimo sa pag-ebanghelyo, nga magsundog kang Jesus ingong usa ka masibotong magmamantala sa maayong balita. Sa miaging tuig, 6,957,852 ka magmamantala sa Gingharian ang ‘naghimo sa buluhaton sa mga tig-ebanghelyo’ diha sa 236 ka kayutaan.—2 Tim. 4:5.
“Gibiyaan Namo ang Tanang Butang ug Nagsunod Kanimo”
3, 4. Unsay gibiyaan ni Jesus sa langit, ug unsay kinahanglan natong himoon aron mahimong iyang mga sumusunod?
3 Sa pagtuman sa iyang buluhaton dinhi sa yuta, “gihaw-asan [ni Jesus] ang iyang kaugalingon ug gihuptan ang dagway sa usa ka ulipon,” nga gibiyaan ang iyang langitnong kinabuhi ug himaya. (Filip. 2:7) Bisag unsa pay atong himoon sa pagsundog kang Kristo, dili gayod kini ikatandi sa nahimo ni Jesus sa pag-anhi niya sa yuta. Apan kita makapabiling lig-on ingong iyang mga sumusunod, nga dili maanugon sa bisan unsa nga atong nabatonan sa kalibotan ni Satanas.—1 Juan 5:19.
4 Sa usa ka higayon, giingnan ni apostol Pedro si Jesus: “Tan-awa! Gibiyaan namo ang tanang butang ug nagsunod kanimo.” (Mat. 19:27) Gibiyaan dayon ni Pedro, Andres, Santiago, ug Juan ang ilang mga pukot sa dihang gidapit sila ni Jesus sa pagsunod kaniya. Mibiya sila sa pagpanagat ug nahimong mga ministro. Sumala sa asoy sa Ebanghelyo ni Lucas, si Pedro miingon: “Tan-awa! Gibiyaan na namo ang among mga butang ug misunod kanimo.” (Luc. 18:28) Kadaghanan kanato dili kinahanglang mobiya sa tanan ‘natong mga butang’ aron sa pagsunod kang Jesus. Hinunoa, kinahanglan natong ‘dumilian ang atong kaugalingon’ aron mahimo kitang mga sumusunod ni Kristo ug masibotong mga alagad ni Jehova. (Mat. 16:24) Kini miresultag dagayang mga panalangin. (Basaha ang Mateo 19:29.) Ang pagbaton ug masibotong tinamdan sa pag-ebanghelyo agig pagsundog kang Kristo makapalipay kanato, ilabina kon kita nakatabang, bisag gamay ra, sa usa ka tawo nga masuod sa Diyos ug sa iyang pinalanggang Anak.
5. Pag-asoy ug kasinatian nga nagpakita kon unsay mahimong buhaton sa usa ka lalin sa dihang iyang makat-onan ang kamatuoran sa Bibliya.
5 Si Valmir, usa ka Braziliano nga nagpuyo sa hilit nga lugar sa Suriname, maoy usa ka minero ug bulawan. Siya palahubog ug imoral. Kas-a sa dihang didto siya sa siyudad, nasugdan siyag pagtuon sa Bibliya sa mga Saksi ni Jehova. Adlaw-adlaw siyang nagtuon, naghimog mga kausaban, ug sa wala madugay siya nabawtismohan. Sa dihang naamgohan niya nga malisdan siya sa pagkinabuhi uyon sa mga pagtulon-an sa Bibliya tungod sa iyang trabaho, iyang gibaligya ang iyang dakog-kita nga negosyo ug mibalik sa Brazil aron matabangan ang iyang pamilya sa pagkaplag ug espirituwal nga mga bahandi. Sa pagkakat-on sa kamatuoran sa Bibliya, daghang lalin ang kinabubut-ong miundang sa ilang mga trabaho diha sa adunahang mga nasod ug mibalik sa ilang yutang natawhan aron matabangan nila ang ilang mga paryente ug ang uban nga makaila kang Jehova. Gipasundayag gayod sa maong mga magmamantala sa Gingharian ang tinuod nga kasibot sa pag-ebanghelyo.
6. Unsay atong mahimo kon dili kita makabalhin ngadto sa mga dapit diin mas dako ang panginahanglan sa mga magmamantala sa Gingharian?
6 Daghang Saksi ang nakaarang sa pagbalhin ngadto sa mga dapit diin mas dako ang panginahanglan sa mga magmamantala sa Gingharian. Ang uban namalhin pa gani sa ubang nasod. Tingali dili kita makaarang sa paghimo niini, apan kita makasundog kang Jesus pinaagi sa pagbuhat kanunay sa atong kinamaayohan diha sa ministeryo.
Si Jehova Nagtagana sa Gikinahanglang Pagbansay
7. Unsang mga tunghaana ang bukas alang niadtong gustong magpauswag sa ilang katakos ingong mga magmamantala sa Gingharian?
7 Maingon nga si Jesus gibansay sa iyang Amahan, kita makapahimulos usab sa edukasyon nga gitagana ni Jehova karon. Si Jesus mismo miingon: “Kini nahisulat diha sa mga Manalagna, ‘Ug silang tanan mahimong mga tinudloan ni Jehova.’” (Juan 6:45; Isa. 54:13) Karong adlawa, adunay mga tunghaan nga ilabinang gidisenyo sa pagbansay kanato ingong mga magmamantala sa Gingharian. Dayag nga kitang tanan nakabenepisyo sa Teokratikanhong Tunghaan sa Ministeryo diha sa atong mga kongregasyon. Ang mga payunir adunay pribilehiyo sa pagtambong sa Tunghaan sa Payunir nga Pag-alagad. Daghang dugay nang mga payunir ang nalipay sa pagtungha sa ikaduhang higayon. Ang mga ansiyano ug ministeryal nga mga alagad nakatambong sa Tunghaan sa Ministeryo sa Gingharian aron mapauswag ang ilang katakos sa pagpanudlo ug pag-alagad sa ilang mga isigkamagtutuo. Daghang tagsaanong mga ansiyano ug ministeryal nga mga alagad ang nakatambong sa Tunghaan sa Ministeryal nga Pagbansay, nga nagbansay kanila sa pagtabang sa uban diha sa ministeryo. Ug daghang igsoong lalaki ug babaye nga nahimong mga misyonaryo sa ubang mga nasod ang gibansay sa Watchtower Bible School of Gilead.
8. Sa unsang paagi gipabilhan pag-ayo sa pipila ka igsoon ang pagbansay nga gitagana ni Jehova?
8 Daghang mga Saksi ni Jehova ang naghimog mga kausaban aron makatambong niining mga tunghaana. Aron makatambong sa Tunghaan sa Ministeryal nga Pagbansay sa Canada, miundang si Yugu sa iyang trabaho kay wala man siya tugoti sa iyang amo nga mobakasyon. “Wala ko magmahay,” matod ni Yugu. “Gani, kon ila pa kong gitugotan sa pagbakasyon, lagmit magdahom sila nga magpabilin ko sa kompaniya isip utang kabubut-on. Apan karon libre na kong modawat sa bisan unsang asaynment nga ihatag ni Jehova kanako.” Aron makapahimulos sa pagbansay nga gitagana sa Diyos, daghan ang kinabubut-ong misakripisyo sa mga butang nga ilang gipabilhan kanhi.—Luc. 5:28.
9. Paghatag ug kasinatian nga nagpakita nga ang pagtulon-an sa Kasulatan ug ang tim-os nga pagpaningkamot mapuslanon gayod.
9 Ang pagtulon-an sa Kasulatan ug ang tim-os nga pagpaningkamot mapuslanon gayod. (2 Tim. 3:16, 17) Tagda ang nahitabo kang Saulo nga taga-Guatemala. Siya natawo nga may gamayng diperensiya sa pangisip, ug giingnan sa usa sa iyang mga maestra ang iyang inahan nga dili pugson si Saulo sa pagtuon ug basa kay kana makapahigawad lamang kaniya. Si Saulo miundang na lang sa pagtungha nga wala makakat-on sa pagbasa. Apan, usa ka Saksi ang nagtudlo kang Saulo sa pagbasa, ginamit ang brosyur nga Apply Yourself to Reading and Writing. Sa kadugayan, miuswag si Saulo ug nakahatag nag mga pakigpulong sa Teokratikanhong Tunghaan sa Ministeryo. Sa ulahi nahibalag sa inahan ni Saulo ang iyang maestra samtang namalaybalay. Sa iyang pagkadungog nga si Saulo makamao nang mobasa, giingnan siya sa maestra nga paadtoon si Saulo sa ilang balay pagkasunod semana. Dihang miadto si Saulo, gipangutana siya sa iyang maestra: “Unsay imong itudlo nako?” Gisugdag basa ni Saulo ang usa ka parapo sa librong Unsay Tinuod nga Gitudlo sa Bibliya? “Dili ko makatuo nga ikaw na karon ang nagtudlo kanako,” matod sa maestra. Nakahilak siya sa kalipay ug iyang gigakos si Saulo.
Pagpanudlo nga Makatandog sa Kasingkasing
10. Unsang basahona ang maayo kaayong gamiton sa pagtudlo sa kamatuoran sa Bibliya?
10 Si Jesus nanudlo pinasukad sa kon unsay gitudlo ni Jehova kaniya ug sa instruksiyon nga makaplagan diha sa sinulat nga Pulong sa Diyos. (Luc. 4:16-21; Juan 8:28) Gisundog nato si Jesus pinaagi sa pagpadapat sa iyang tambag ug sa pagpanudlo pinasukad sa Kasulatan. Mao nga nagkauyon ang atong sinultihan ug panghunahuna, ug kini nakapalambo sa atong panaghiusa. (1 Cor. 1:10) Mapasalamaton gayod kita nga ang “matinumanon ug maalamong ulipon” nagtaganag binase-sa-Bibliya nga mga basahon sa pagtabang kanato aron magkauyon ang atong pagpanudlo ug mapalampos ang atong buluhaton ingong mga ebanghelisador! (Mat. 24:45; 28:19, 20) Usa niining mga basahona mao ang librong Gitudlo sa Bibliya, nga mabatonan karon sa 179 ka pinulongan.
11. Sa unsang paagi gibuntog sa usa ka sister sa Etiopia ang pagsupak ginamit ang librong Gitudlo sa Bibliya?
11 Ang pagtuon sa Kasulatan ginamit ang librong Gitudlo sa Bibliya makausab bisan sa kasingkasing sa mga magsusupak. Usa ka higayon niana si Lula, usa ka payunir nga sister sa Etiopia, nagdumalag usa ka pagtuon sa Bibliya dihang masuk-anong misulod ang usa ka paryente sa ginatun-an ug miingon nga kinahanglan ihunong nila ang pagtuon. Si Lula kalmadong nangatarongan ginamit ang ilustrasyon bahin sa mini nga kuwarta diha sa kapitulo 15 sa librong Gitudlo sa Bibliya. Mikalma ang babaye ug gitugotan sila sa pagpadayon sa pagtuon. Gani, miduyog siya sa sunod nilang pagtuon ug mihangyo nga tun-an usab siya sa Bibliya, ug miingon pa ganing mobayad siya alang niini! Wala madugay siya nagtuon katulo sa usa ka semana ug kusog nga miuswag sa espirituwal.
12. Paghatag ug pananglitan nga nagpakita kon sa unsang paagi malamposong gitudlo sa mga batan-on ang mga kamatuoran sa Bibliya.
12 Ang mga batan-on makatabang sa uban pinaagi sa paggamit sa librong Gitudlo sa Bibliya. Dihang gibasa sa 11-anyos nga si Keanu nga taga-Hawaii kining libroha sa eskuylahan, gipangutana siya sa usa niya ka klasmet, “Nganong dili man mo mosaulog ug mga pangilin?” Gibasa ni Keanu ang apendise nga may ulohang “Angay ba Natong Saulogon ang mga Pangilin?” Dayon iyang gipakli ang kaundan sa libro ug gipangutana ang iyang klasmet kon unsang ulohana ang gusto niyang hisgotan. Nasugdan ang usa ka pagtuon sa Bibliya. Sa miaging tuig sa pag-alagad, ang mga Saksi ni Jehova nagdumalag 6,561,426 ka pagtuon sa Bibliya, diin kadaghan nila naggamit sa librong Gitudlo sa Bibliya. Gigamit ba nimo kining libroha sa mga pagtuon sa Bibliya?
13. Sa unsang paagi ang pagtuon sa Bibliya makaimpluwensiya gayod sa mga tawo?
13 Ang pagtuon sa Kasulatan ginamit ang librong Gitudlo sa Bibliya makaimpluwensiya gayod niadtong nagtinguha sa pagbuhat sa kabubut-on sa Diyos. Usa ka magtiayong espesyal payunir sa Norway nakasugod ug pagtuon sa Bibliya uban sa usa ka pamilya nga taga-Zambia. Ang magtiayong taga-Zambia adunay tulo ka anak babaye ug wala na silay planong manganak pag dugang. Busa sa dihang namabdos ang asawa, nakahunahuna sila sa pagpakuha sa bata. Pipila ka adlaw sa wala pa sila magpakonsulta sa doktor, ilang natun-an ang kapitulo nga nag-ulohang “Diyosnong Panghunahuna Bahin sa Kinabuhi.” Ang hulagway sa bata nga wala pa matawo nga makita sa maong kapitulo nakatandog gayod sa magtiayon mao nga nakahukom sila nga dili na ipakuha ang bata. Sila padayong miuswag pag-ayo sa espirituwal ug ilang ginganlan ang batang lalaki sa ngalan sa bana sa magtiayong Saksi nga nagtuon kanila.
14. Iilustrar kon sa unsang paagi ang pagkinabuhi uyon sa atong gitudlo magpatunghag maayong mga resulta.
14 Ang usa ka hinungdanong bahin sa pagpanudlo ni Jesus mao ang iyang pagkinabuhi uyon sa iyang gitudlo. Daghang tawo ang nakadayeg sa maayong panggawi sa mga Saksi ni Jehova, kinsa nagsundog kang Jesus niining bahina. Ang kotse sa usa ka negosyante nga taga-New Zealand gilungkab ug gikawat ang iyang bag. Gipablater niya kini sa polis, kinsa miingon: “Morag di na mabalik ang imong bag gawas kon makit-an tog Saksi ni Jehova.” Nakit-an sa usa ka babayeng Saksi nga tighatod ug mantalaan ang maong bag. Sa gipahibalo ang negosyante nga nakit-an ang iyang bag, miadto siya sa balay sa sister. Nalipay kaayo siya nga wala ra mawala ang hinungdanon kaayong mga papeles. Giingnan siya sa sister, “Angay lang nga iuli nako kini kay usa man ko sa mga Saksi ni Jehova.” Nahingangha ang negosyante, nga nahinumdom sa giingon kaniya sa polis niana rang buntaga. Dayag nga ang matuod nga mga Kristohanon nagkinabuhi sumala sa mga pagtulon-an sa Bibliya ug agig pagsundog kang Jesus.—Heb. 13:18.
Sundoga ang Tinamdan ni Jesus sa mga Tawo
15, 16. Sa unsang paagi atong madani ang mga tawo sa mensahe nga atong ginasangyaw?
15 Nadani ang mga tawo sa mensahe ni Jesus tungod sa iyang tinamdan kanila. Pananglitan, nadani ang mga timawa kaniya tungod sa iyang gugma ug pagkamapainubsanon. Siya mabination sa mga miduol kaniya ug naghupay kanila pinaagig malulotong mga pulong, ug nag-ayo sa daghang may balatian. (Basaha ang Marcos 2:1-5.) Dili kita makahimog mga milagro, apan kita makapakitag gugma, pagkamapainubsanon, ug pagkamabination—mga hiyas nga makadani sa mga tawo sa kamatuoran.
16 Nakatabang ang pagkamabination sa dihang ang usa ka espesyal payunir nga si Tariua miduaw sa balay sa usa ka tigulang nga lalaki nga si Beere, nga nagpuyo sa usa sa kinalay-ang mga isla sa Kiribati sa Habagatang Pasipiko. Bisan pag misenyas ang tigulang nga dili siya gustong mamati, nakamatikod si Tariua nga paralisado ang maong tigulang mao nga naluoy siya kaniya. “Nahibalo ka ba kon unsay gisaad sa Diyos alang sa mga tawong masakiton ug tigulang?” nangutana si Tariua. Dayon iyang gibasa ang teksto sa tagna ni Isaias. (Basaha ang Isaias 35:5, 6.) Kay naikag, ang tigulang miingon, “Daghang tuig na kong nagbasag Bibliya ug ginaduaw akog misyonaryo sa among relihiyon sa daghan nang katuigan, apan wa pa gyod ko makabasa niana sa Bibliya.” Nasugdan ang usa ka pagtuon sa Bibliya uban kang Beere, ug siya miuswag sa espirituwal. Tinuod, siya naparalisado pag-ayo, apan siya karon bawtismado na, nagapanguna sa pag-atiman sa nahilit nga grupo, ug nagsangyaw sa maayong balita sa tibuok isla.
Padayong Sundoga si Kristo
17, 18. (a) Sa unsang paagi ikaw mahimong usa ka malamposong ebanghelisador? (b) Unsay mapahimuslan niadtong magmasiboton sa ilang ministeryo?
17 Ingon sa sublisubling gipakita sa daghang makapadasig nga mga kasinatian sa pagsangyaw, kita mahimong malamposong mga ebanghelisador kon atong ugmaron ug ipasundayag ang mga hiyas nga gipakita ni Jesus. Busa, haom gayod nga atong sundogon si Kristo ingong masibotong mga ebanghelisador!
18 Sa dihang ang pipila nahimong mga tinun-an ni Jesus sa unang siglo, si Pedro nangutana: “Unsa man gayod unya ang among makuha niana?” Mitubag si Jesus: “Ang matag usa nga nagbiyag mga balay o mga igsoong lalaki o mga igsoong babaye o amahan o inahan o mga anak o mga yuta tungod sa akong ngalan magadawat ug pilo-pilo pa ug makapanunod sa kinabuhing walay kataposan.” (Mat. 19:27-29) Masinatian gayod nato kining mga pulonga kon kita magpadayon sa pagsundog sa kinalabwang Misyonaryo, si Jesu-Kristo.
Unsay Imong Tubag?
• Sa unsang paagi si Jehova nagbansay kanato aron mahimo kitang mga ebanghelisador?
• Nganong ang librong Gitudlo sa Bibliya mapuslanon kaayo diha sa atong ministeryo?
• Sa unsang paagi atong masundog si Jesus diha sa atong tinamdan sa mga tawo?
[Mga Pangutana sa Pagtuon]
[Hulagway sa panid 17]
Sa dihang gidapit ni Jesus si Pedro, Andres, Santiago, ug Juan sa pagsunod kaniya, sila misanong dihadiha
[Hulagway sa panid 19]
Ang librong “Gitudlo sa Bibliya” nakatabang nga magkauyon ang atong pagpanudlo