Ang Imo Bang Pagtan-aw sa Uban Sama Kang Jehova?
Ang Imo Bang Pagtan-aw sa Uban Sama Kang Jehova?
‘Angay nga walay pagkabahinbahin diha sa lawas . . . Ang mga sangkap niini angay nga makabaton ug samang pagtagad alang sa usag usa.’—1 COR. 12:25.
1. Unsay imong gibati sa dihang nahidangat ka sa espirituwal nga paraiso?
SA DIHANG mibulag kita sa daotang kalibotan ug nakig-uban sa katawhan ni Jehova, lagmit atong natagamtam ang mainitong gugma ug pagtagad sa ilang taliwala. Sukwahi gayod kana sa bagis, madumtanon, ug matigion nga katawhan nga kontrolado ni Satanas! Nahidangat na kita sa espirituwal nga paraiso, nga tugob sa kalinaw ug panaghiusa.—Isa. 48:17, 18; 60:18; 65:25.
2. (a) Unsay makaapektar sa atong pagtan-aw sa uban? (b) Unsay angay natong buhaton?
2 Hinuon, paglabay sa panahon, basin matuis ang atong pagtan-aw sa mga igsoon tungod sa atong pagkadili-hingpit. Tungod niana, imbes tan-awon nato ang diyosnong mga hiyas sa atong mga igsoon, atong mapadako hinuon ang ilang mga sayop. Sa yanong pagkasulti, makalimot kita sa pagtan-aw kanila sama kang Jehova. Kon mahitabo kini kanato, panahon nang tagdon kon unsay atong pagtan-aw sa uban ug ipahiuyon kini sa klarong pagtan-aw ni Jehova.—Ex. 33:13.
Kon Unsay Pagtan-aw ni Jehova sa Atong mga Igsoon
3. Sa unsa gitandi sa Bibliya ang Kristohanong kongregasyon?
3 Sumala sa natala sa 1 Corinto 12:2-26, gitandi ni apostol Pablo ang kongregasyon sa dinihogang mga Kristohanon ngadto sa usa ka lawas nga “daghag sangkap.” Ingon nga lahi sa usag usa ang mga bahin sa lawas, ang mga membro sa kongregasyon lahi gayod ug mga kinaiya ug abilidad. Bisan pa niana, gidawat ni Jehova ang nagkalainlaing mga membro sa kongregasyon. Ang matag membro iyang gihigugma ug gipabilhan. Busa, si Pablo nagtambag usab kanato nga ang mga membro sa kongregasyon ‘angayng makabaton ug samang pagtagad alang sa usag usa.’ Kini lisod tingali tungod kay ang personalidad sa uban lahi kay sa ato.
4. Nganong kinahanglan tingali natong ipasibo ang atong pagtan-aw sa mga igsoon?
4 Basin makiling pa gani kita sa pagtan-aw sa mga kahuyangan lamang sa atong mga igsoon. Kon kana ang atong ginahimo, kita samag nagpokus sa atong kamera nga may lente nga gamay rang luna ang makuha. Apan si Jehova samag nagtan-aw sa atong mga igsoon nga naggamit ug lapad-ug-anggulo nga lente mao nga makuha ang usa ka tawo ug ang iyang palibot. Lagmit motutok kita sa usa ka bahin nga dili nato gusto, samtang si Jehova motan-aw sa tibuok nga tawo, lakip ang tanan niyang maayong hiyas. Kon mas maningkamot kita sa pagsundog kang Jehova, mas makapalambo kita sa espiritu sa gugma ug panaghiusa diha sa kongregasyon.—Efe. 4:1-3; 5:1, 2.
5. Nganong dili angayng pagahukman ang uban?
5 Si Jesus nahibalo nga ang dili-hingpit nga mga tawo lagmit mahukmanon o hinawayon. Siya mitambag: “Hunong na sa pagpanghukom aron dili kamo pagahukman.” (Mat. 7:1) Matikding wala moingon si Jesus: “Ayaw paghukom”; siya miingon: “Hunong na sa pagpanghukom.” Nahibalo siya nga batasan na sa daghan sa iyang mga mamiminaw ang pagpanaway sa uban. Nakaugmad ba kita nianang batasana? Kon makiling kita sa pagpanaway sa uban, angay kitang magbag-o aron dili usab kita pagahukman. Sa pagkatinuod, kinsa ba kita nga mohukom sa usa ka tinudlo ni Jehova o moingon nga siya dili angay nga mahimong bahin sa kongregasyon? Tingali may mga kahuyangan ang usa ka igsoon, apan kon padayon siyang gidawat ni Jehova, angay ba nato siyang isalikway? (Juan 6:44) Nagtuo ba gayod kita nga si Jehova ang nagdumala sa iyang kongregasyon ug kon may kinahanglang usbon, siya molihok sa iyang gitakdang panahon?—Basaha ang Roma 14:1-4.
6. Unsay pagtan-aw ni Jehova sa iyang mga alagad?
6 Talagsaon gayod si Jehova kay iyang makita ang katakos sa tagsatagsa ka Kristohanon sa dihang mahingpit na sila sa bag-ong kalibotan. Siya nahibalo usab sa gidak-on sa ilang pag-uswag diha sa pagpadapat sa ilang nakat-onan sa Bibliya. Busa dili na siya motan-aw sa unodnong kahuyangan sa matag usa. Atong mabasa diha sa Salmo 103:12: “Ingon sa pagkalayo sa sidlakan gikan sa kasadpan, sa mao nga gilay-on iyang gipahilayo gikan kanato ang atong mga kalapasan.” Mapasalamaton gayod kita niana!—Sal. 130:3.
7. Unsay atong makat-onan gikan sa pagtan-aw ni Jehova kang David?
7 May ebidensiya sa Kasulatan nga si Jehova may talagsaong katakos nga motan-aw lamang sa maayong mga hiyas sa usa ka tawo. Gibatbat sa Diyos si David ingong “akong alagad nga si David, nga mituman sa akong mga sugo ug nga milakaw sunod kanako uban ang bug-os niyang kasingkasing pinaagi sa pagbuhat lamang kon unsay matarong sa akong mga mata.” (1 Hari 14:8) Siyempre, nahibalo kita nga si David nakahimog daotang mga buhat. Apan gitan-aw lamang ni Jehova ang iyang maayong mga hiyas kay siya nahibalo nga matul-id ang kasingkasing ni David.—1 Cron. 29:17.
Tan-awa ang Imong mga Igsoon Sama Kang Jehova
8, 9. (a) Sa unsang paagi mahisama kita kang Jehova? (b) Sa unsang paagi ikailustrar kini, ug unsay makat-onan nato gikan niini?
8 Makabasa si Jehova sa mga kasingkasing, samtang kita dili. Kini mismo usa ka maayong katarongan nga kita angayng dili magmahukmanon. Kita wala mahibalo sa mga motibo sa laing tawo. Paningkamotan gayod nato ang pagsundog kang Jehova pinaagi sa dili pagtan-aw lamang sa tawhanong mga kahuyangan, nga sa ngadtongadto mangahanaw. Dili ba usa gayod ka maayong tumong nga mahisama kita kang Jehova niining bahina? Ang paghimo niini moresulta gayod sa malinawong relasyon uban sa atong mga igsoon.—Efe. 4:23, 24.
9 Ingong ilustrasyon, hunahunaa ang usa ka gubaong balay—ang mga sandayong nagbitay, ang mga bentana nabuak, ug ang kisame nadaot kay nagtulo ang atop. Ang kadaghanang tawo motan-aw tingali nianang balaya ug moingon nga angay kanang gub-on kay ngil-ad tan-awon. Apan moabot tingali ang usa ka tawo nga may bug-os lahi nga panghunahuna. Dili niya tagdon ang gubaong dagway sa balay kay iyang nakita nga lig-on pa ang tigbalayon ug puwedeng ayohon. Iya kanang paliton ug ayohon aron nindot tan-awon. Pagkahuman niana, ang mga lumalabay moingon nga pagkanindot nianang balaya. Makasundog ba kita niining tawhana nga naningkamot sa pag-ayo sa maong balay? Imbes tan-awon lamang nato ang dayag nga mga kahuyangan sa atong mga igsoon, mahimo bang matikdan nato ang ilang maayong mga hiyas ug ang ilang katakos sa pag-uswag sa espirituwal? Kon ato kanang himoon, makahigugma kita sa atong mga igsoon tungod sa ilang espirituwal nga katahom sama kang Jehova.—Basaha ang Hebreohanon 6:10.
10. Sa unsang paagi ang tambag sa Filipos 2:3, 4 makatabang kanato?
10 May tambag si apostol Pablo nga makatabang sa atong pagpakiglabot sa tanang membro sa kongregasyon. Siya miawhag sa mga Kristohanon: “Dili [kamo] magabuhat ug bisan unsa tungod sa pagkamatigion o tungod sa pagpaimportante sa kaugalingon, kondili uban sa pagpaubos sa hunahuna nga magaisip nga ang uban labaw kay kaninyo, nga magatan-aw, dili lamang sa personal nga interes sa mga butang labot sa inyong kaugalingon, kondili sa personal nga interes usab sa uban.” (Filip. 2:3, 4) Ang pagkamapaubsanon makatabang kanato sa pagtan-aw sa uban sa hustong paagi. Ang pagpakitag personal nga interes sa uban ug pagmatikod sa ilang maayong mga hiyas makatabang usab kanato sa pagtan-aw kanila sama kang Jehova.
11. Unsang mga kausaban ang nakaapektar sa pipila ka kongregasyon?
11 Di pa dugay, ang daghan kaayong mga tawo nanglalin tungod sa dagkong mga kausaban sa tibuok kalibotan. Busa ang ubay-ubayng siyudad gipuy-an na karon ug mga tawo nga gikan sa nagkalainlaing nasod. Ang pipila nianang mga tawhana nahimong interesado sa kamatuoran sa Bibliya ug miduyog kanato sa pagsimba kang Jehova. Sila naggikan sa “tanang kanasoran ug mga tribo ug katawhan ug mga pinulongan.” (Pin. 7:9) Tungod niana, ang daghang kongregasyon karon gilangkoban ug mga tawo nga may lainlaing nasyonalidad.
12. Unsang panghunahuna sa usag usa ang kinahanglan natong huptan kanunay, ug nganong lisod kini usahay?
12 Kinahanglan tingali nga atong hatagan ug mas dakong pagtagad ang paghupot kanunay ug hustong panghunahuna sa usag usa diha sa kongregasyon. Kana magpahinumdom kanato sa tambag ni apostol Pedro nga ipasundayag ang “dili-salingkapaw nga inigsoong pagbati” ug “mainiton nga maghigugmaay sa usag usa gikan sa kasingkasing.” (1 Ped. 1:22) Sa usa ka kongregasyong gilangkoban ug mga tawo nga lainlaig nasyonalidad, lisod gayong ugmaron ang tiunayng gugma ug pagbati. Ang pipila nato ka isigkamagsisimba tingali lahi kaayog kultura, edukasyon, kahimtang sa panginabuhi, ug etnikong kagikan kay kanato. Malisdan ka ba sa pagsabot sa panghunahuna o mga reaksiyon sa pipila ka isigkamagsisimba nga lahig kultura? Basin kana usab ang ilang pagbati bahin kanimo. Bisan pa niana, kitang tanan gisugo: “Pagbaton ug gugma alang sa tibuok kapunongan sa mga igsoon.”—1 Ped. 2:17.
13. Unsang kausaban sa atong panghunahuna ang angay natong himoon?
13 Kinahanglan tingali natong usbon ang atong panghunahuna aron mapasangkad ang atong gugma alang sa tanang igsoon. (Basaha ang 2 Corinto 6:12, 13.) Di ba makamatikod kita nga mosulti kitag sama niini “Di man ko mapihigon, pero . . . ” ug dayon moestorya bahin sa negatibong mga kinaiya nga giisip nato nga batasan sa usa ka etnikong grupo? Kanang pagbatia magpadayag nga naghambin gihapon kitag pagkamapihigon nga kinahanglang wad-on nato. Makapangutana kita, ‘Naningkamot ba ko kanunay nga makasinati sa mga tawo nga lahig kultura?’ Ang maong pagsusi-sa-kaugalingon makatabang aron mas madawat ug mapabilhan nato ang atong mga igsoon nga lahig nasyonalidad.
14, 15. (a) Paghatag ug mga panig-ingnan niadtong nag-usab sa ilang panghunahuna bahin sa uban. (b) Sa unsang paagi makasundog kita kanila?
14 May maayong mga panig-ingnan diha sa Bibliya niadtong nag-usab sa ilang panghunahuna ug si apostol Pedro usa kanila. Ingong usa ka Hudiyo, si Pedro naglikay sa pagsulod sa balay sa usa ka Hentil. Pwerteng kurata tingali ni Pedro sa dihang siya gipaduaw sa balay sa dili-tinuli nga Hentil nga si Cornelio! Giusab ni Pedro ang iyang panghunahuna kay nasabtan niyang kabubut-on sa Diyos nga ang mga tawo sa tanang kanasoran mahimong bahin sa Kristohanong kongregasyon. (Buh. 10:9-35) Si Saulo usab, nga nahimong si apostol Pablo sa ulahi, naghimog kausaban aron dili na siya magmapihigon. Giangkon niyang nagdumot siya pag-ayo sa mga Kristohanon nga “sa hilabihan gayod [siya] nagpadayon sa paglutos sa kongregasyon sa Diyos ug naglaglag niini.” Bisan pa niana, sa dihang si Pablo gitul-id ni Ginoong Jesus, mihimo siyag dagkong kausaban ug midawat pag direksiyon gikan niadtong iyang gilutos kanhi.—Gal. 1:13-20.
15 Sa walay duhaduha makahimo kitag mga kausaban sa atong tinamdan sa tabang sa espiritu ni Jehova. Kon mamatikdan nato nga may pagkamapihigon pa kita, paningkamotan nato nga wagtangon kana ug “mosunod sa pagkausa sa espiritu sa nagahiusang bugkos sa pakigdait.” (Efe. 4:3-6) Ang Bibliya nag-awhag nga “isul-ob [nato] ang gugma, kay kini maoy usa ka hingpit nga bugkos sa panaghiusa.”—Col. 3:14.
Pagsundog Kang Jehova Diha sa Atong Ministeryo
16. Unsay kabubut-on sa Diyos bahin sa mga tawo?
16 “Walay pagpihigpihig sa Diyos,” misulat si apostol Pablo. (Roma 2:11) Katuyoan ni Jehova nga ang mga tawo gikan sa tanang kanasoran makaduyog sa pagsimba kaniya. (Basaha ang 1 Timoteo 2:3, 4.) Aron matuman kana, iyang gihikay nga ang “walay kataposang maayong balita” ipahayag ngadto “sa matag nasod ug tribo ug pinulongan ug katawhan.” (Pin. 14:6) Si Jesus miingon: “Ang uma mao ang kalibotan.” (Mat. 13:38) Unsay kahulogan niana alang kanimo ug sa imong pamilya?
17. Sa unsang paagi makatabang kita sa tanang matang sa mga tawo?
17 Dili tanan ang makaadto sa lagyong mga bahin sa yuta aron isangyaw ang mensahe sa Gingharian ngadto sa uban. Bisan pa niana, basin makahimo kita sa pagsangyaw sa maong mensahe ngadto sa mga tawong gikan sa laing mga nasod nga nagpuyo sa atong teritoryo. Gipahimuslan ba nato ang kahigayonan sa pagsangyaw ngadto sa tanang matang sa mga tawo, dili lang kadtong gisangyawan nato sa daghan nang katuigan? Magmadeterminado ug magmasiboton kita sa pagsangyaw sa uban nga wala pa makadawat ug bug-os nga pagpamatuod.—Roma 15:20, 21.
18. Sa unsang paagi gipakita ni Jesus ang iyang pagkamahunahunaon sa mga tawo?
18 Nasabtan pag-ayo ni Jesus nga ang tanang tawo kinahanglang tabangan. Dili usa ka dapit ray iyang gisangyawan. Ang Bibliya nagsaysay nga siya “migikan aron sa paglibot sa tanang siyudad ug mga balangay.” Ug unya, “sa pagkakita sa mga panon sa katawhan siya naluoy kanila” ug miingon nga kinahanglang tabangan sila.—Mat. 9:35-37.
19, 20. Unsa ang pipila ka paagi nga atong ikapasundayag ang pagkamahunahunaon ni Jehova ug ni Jesus sa tanang matang sa mga tawo?
19 Unsa ang pipila ka paagi nga imong ikapasundayag ang susamang tinamdan? Ang pipila naningkamot sa pagsangyaw sa mga seksiyon sa ilang teritoryo nga panagsa rang masangyawan. Tingali nalakip niini ang komersiyal nga mga dapit, parke, estasyon sa bus ug tren, o sa atubangan sa residensiyal nga mga tinukod nga dili pasudlan. Ang uban nagtuon ug bag-ong pinulongan aron masangyawan ang pipila ka tawo nga langyawg pinulongan nga nagpuyo sa ilang teritoryo o kadtong panagsa rang masangyawan. Ang pagkat-on sa pagtimbaya kanila ginamit ang ila mismong pinulongan magpakita nga ikaw interesado gayod sa ilang kaayohan. Kon dili kita makahimo sa pagkat-og laing pinulongan, makadasig ba kita sa mga nagtuon niana? Dili gayod nato bugnawon o dudahan ang mga motibo niadtong naningkamot sa pagsangyaw sa mga tawong gikan sa laing nasod. Ang tanang kinabuhi bililhon sa mga mata sa Diyos, ug buot natong kana usab ang atong panghunahuna.—Col. 3:10, 11.
20 Kon ato nang nabatonan ang panghunahuna sa Diyos, nagkahulogan usab kana nga atong sangyawan ang tanang tawo nga di magsapayan sa ilang kahimtang. Ang pipila tingali walay pinuy-anan, nagkagidlay, o dayag nga imoral ug kinabuhi. Kon may pipila ka tawo nga dili maayog tinagdan kanato, dili kita angayng maghunahunag negatibo bahin sa ilang nasyonalidad o kagikan sa katibuk-an. Ang pipila dili maayog tinagdan kang Pablo, apan wala kana makapugong kaniya sa pagsangyaw nianang matanga sa mga tawo. (Buh. 14:5-7, 19-22) Malaomon siya nga ang pipila basin mosanong nga mapasalamaton.
21. Sa unsang paagi makatabang kanimo ang paghupot sa panghunahuna ni Jehova sa uban?
21 Tin-aw na kaayo kanato nga ang paghupot sa tukmang panghunahuna—ang panghunahuna ni Jehova—gikinahanglan sa atong mga pagpakiglabot sa mga igsoon sa atong kongregasyon, sa mga igsoon nga lahig nasyonalidad, ug sa mga tawo diha sa atong teritoryo. Kon mas masundog nato ang panghunahuna ni Jehova, mas makaimpluwensiya kita sa uban alang sa pakigdait ug panaghiusa. Ug mas makatabang kita sa uban nga mahigugma kang Jehova, ang Diyos nga “walay pagpihigpihig” kondili nagpakitag mahigugmaong interes sa tanan, “kay silang tanan buhat man sa iyang mga kamot.”—Job 34:19.
Makatubag Ka Ba?
• Unsang panghunahuna bahin sa atong mga igsoon ang angay natong likayan?
• Sa unsang paagi makasundog kita kang Jehova bahin sa atong pagtan-aw sa atong mga igsoon?
• Unsang mga leksiyon ang imong nakat-onan bahin sa atong panghunahuna sa atong mga igsoon nga lahig nasyonalidad?
• Sa unsang paagi makasundog kita sa panghunahuna ni Jehova bahin sa mga tawo sa dihang kita anaa sa kanataran?
[Mga Pangutana sa Pagtuon]
[Hulagway sa panid 26]
Sa unsang paagi imong masinati ang mga tawo nga lahig kultura?
[Mga hulagway sa panid 28]
Sa unsang mga paagi imong ikasangyaw ang maayong balita ngadto sa mas daghang tawo?