Dunggon ni Jehova ang Atong mga Pagtuaw Alang sa Tabang

“Ang mga mata ni Jehova gipunting sa mga matarong, ug ang iyang mga igdulungog gikiling sa ilang pagtuaw alang sa tabang.”—SAL. 34:15.

1, 2. (a) Unsay gibati sa daghan karon? (b) Nganong dili kita matingala niini?

 NAGUOL o nasakit ka ba? Kon mao, wala ka mag-inusara. Milyonmilyon ang nakigbisog sa mga kalisdanan sa kinabuhi kada adlaw niining daotang sistema sa mga butang. Apan morag dili na makaantos ang uban. Sila mibati gayod sama sa salmistang si David, kinsa misulat: “Naminhod ako ug nahugno sa hilabihan gayod; mitiyabaw ako tungod sa pag-agulo sa akong kasingkasing. Ang akong kasingkasing kusog nga nagbutokbutok, nawad-an ako sa akong kusog, ug ang kahayag sa akong mga mata nawala usab kanako.”—Sal. 38:8, 10.

² Ingong mga Kristohanon, dili kita matingala sa mga kasakitan sa kinabuhi. Kita nakasabot nga ang “mga kaul-ol sa kasakit” maoy bahin sa gitagna nga mga ilhanan sa presensiya ni Jesus. (Mar. 13:8; Mat. 24:3) Ang Gregong pulong nga gihubad ug “mga kaul-ol sa kasakit” nagtumong sa hilabihang kasakit nga masinati panahon sa pagpanganak. Tukma kaayo kana nga paghubit sa kagrabe sa giantos sa katawhan niining “makuyaw” nga mga panahong “lisod sagubangon”!—2 Tim. 3:1.

Si Jehova Nakasabot sa Atong mga Kasakit

3. Unsay nahibaloan gayod sa katawhan sa Diyos?

³ Nahibalo gayod ang katawhan ni Jehova nga maapektohan usab sila niini nga mga kasakitan, ug lagmit gayong mograbe pa kini. Gawas pa sa nasinati sa kadaghanang tawo, ingong mga alagad sa Diyos giatubang usab nato ang usa ka “kaaway, ang Yawa,” kinsa determinadong modaot sa atong pagtuo. (1 Ped. 5:8) Dali gayod natong bation ang sama sa gibati ni David: “Ang pagpakaulaw nakapahugno sa akong kasingkasing, ug ang samad dili maalim. Ug nagpadayon ako sa paglaom nga may moduyog sa akong kasubo, apan walay mausa; ug kon bahin sa mga maghuhupay, wala akoy nakaplagan.”—Sal. 69:20.

4. Unsay makahupay kanato kon kita nakasinatig mga kasakitan?

⁴ Gipasabot ba ni David nga wala na gayod siyay paglaom? Wala. Matikdi ang dugang niyang gisulti nianang salmoha: “Si Jehova nagapatalinghog sa mga kabos, ug dili gayod niya tamayon ang iyang mga binilanggo,” o “ang iyang katawhan nga nabilanggo.” (Sal. 69:33, nota sa Reference Bible.) Sa katibuk-ang diwa, mobati kita usahay nga morag nabilanggo tungod sa atong mga kasakitan o kalisdanan. Ang uban morag wala gayod makasabot sa atong situwasyon. Apan sama kang David, mahupayan kita kay nahibalo nga si Jehova bug-os nga nakasabot sa atong mga kasakitan.—Sal. 34:15.

5. Bahin sa unsa nga si Haring Solomon may pagsalig?

⁵ Gipasiugda ni Solomon nga anak ni David kining puntoha panahon sa pagpahinungod sa templo sa Jerusalem. (Basaha ang 2 Cronicas 6:29-31.) Nangaliyupo siya nga dunggon ni Jehova ang pag-ampo sa matag matarong-ug-kasingkasing nga tawo nga moampo Kaniya mahitungod sa “iyang hampak ug sa iyang kasakit.” Dunggon kaha sa Diyos ang mga pag-ampo niining nasakit nga mga tawo? Gipahayag ni Solomon ang iyang pagsalig nga dunggon gayod sa Diyos ang ilang mga pag-ampo ug siya motabang kanila. Ngano? Tungod kay siya nahibalo gayod kon unsay anaa sa “kasingkasing sa mga anak sa katawhan.”

6. Sa unsang paagi makasagubang kita sa kabalaka, ug ngano?

⁶ Makaampo usab kita kang Jehova bahin sa ‘atong hampak ug sa atong kasakit.’ Angay kitang mahupayan sa pagkahibalo nga siya nakasabot sa atong mga kasakit ug nahingawa kanato. Gipamatud-an kini ni apostol Pedro dihang siya miingon: “Itugyan kaniya ang tanan ninyong mga kabalaka, kay siya may kahingawa kaninyo.” (1 Ped. 5:7) Mabalaka  gayod si Jehova kon unsay mahitabo kanato. Gipasiugda ni Jesus ang mahigugmaong pagtagad ni Jehova, sa pag-ingon: “Dili ba ang duha ka goryon ikabaligya man sa usa ka sensilyo nga gamay ug bili? Bisan pa niana, walay usa kanila ang mahulog sa yuta nga dili mahibaloan sa inyong Amahan. Apan ang mismong mga buhok sa inyong ulo naihap ang tanan. Busa ayaw kamo kahadlok: kamo labaw pag bili kay sa daghang goryon.”—Mat. 10:29-31.

Salig sa Tabang ni Jehova

7. Makasalig kita sa unsang tabang?

⁷ Makaseguro kita nga si Jehova andam ug may katakos sa pagtabang kanato kon kita makaagom ug mga kasakitan. “Ang Diyos mao ang atong dalangpanan ug kusog, usa ka katabang nga daling hikaplagan panahon sa mga kasakitan.” (Sal. 34:15-18; 46:1) Sa unsang paagi motabang ang Diyos? Tagda ang giingon sa 1 Corinto 10:13: “Ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.” Mahimong maniobrahon ni Jehova ang mga butang aron mawagtang ang atong kasakitan, o mahimong hatagan niya kitag kusog aron makaantos niana. Bisan hain niana ang himoon ni Jehova, siya motabang gayod.

8. Sa unsang paagi makapahimulos kita sa tabang sa Diyos?

⁸ Sa unsang paagi makapahimulos kita sa maong tabang? Matikdi kon unsay gitambag kanato nga buhaton: “Itugyan kaniya ang tanan ninyong mga kabalaka.” Kini nagpasabot nga simboliko natong ihatag kang Jehova ang kaakohan nga atimanon ang tanan natong gikabalak-an. Maningkamot kitang dili na mabalaka ug mapailobong mosalig nga iyang itagana ang atong mga panginahanglan. (Mat. 6:25-32) Ang maong pagsalig nagkinahanglag pagkamapainubsanon, nga dili mosalig sa atong kaugalingong kusog o kaalam. Kon magpaubos kita “ilalom sa gamhanang kamot sa Diyos,” giila nato ang atong ubos nga kahimtang. (Basaha ang 1 Pedro 5:6.) Kini motabang usab kanato sa pagsagubang bisan kon unsay itugot sa Diyos. Mahimong mangandoy kitag dihadihang kahupayan, apan masaligon kita nga si Jehova sa tukma nahibalo kon kanus-a ug kon sa unsang paagi siya motabang kanato.—Sal. 54:7; Isa. 41:10.

9. Unsang matanga sa palas-anon ang kinahanglang itugyan ni David kang Jehova?

⁹ Hinumdomi ang mga pulong ni David nga natala sa Salmo 55:22: “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.” Sa dihang gisulat ni David kanang mga pulonga, siya mibatig dakong kaguol. (Sal. 55:4) Masabot nga kining salmoha gisulat sa dihang ang iyang anak nga si Absalom sekretong nagplano nga ilogon ang pagkahari gikan kaniya. Ang sinaligan kaayong magtatambag ni David nga si Ahitopel miduyog sa maong daotang plano; busa kinahanglang mokalagiw si David sa Jerusalem aron makaikyas sa kamatayon. (2 Sam. 15:12-14) Bisan ilalom nianang makaguol nga mga kahimtang, si David nagpadayon sa pagsalig sa Diyos, ug wala gayod siya mahigawad.

10. Unsay angay natong himoon sa dihang nagsagubang kitag mga kasakitan?

¹⁰ Sama kang David, hinungdanong moampo kita kang Jehova bahin sa bisan unsang mga kasakitan nga ato tingaling gisagubang. Tagdon nato ang giawhag ni apostol Pablo kanato niining bahina. (Basaha ang Filipos 4:6, 7.) Unsay moresulta gikan sa maong tim-os nga pag-ampo? “Ang kalinaw sa Diyos nga labaw sa tanang panghunahuna magbantay sa [atong] mga kasingkasing ug sa [atong] mga gahom sa pangisip pinaagi kang Kristo Jesus.”

11. Sa unsang paagi “ang kalinaw sa Diyos” manalipod sa atong mga kasingkasing ug sa atong gahom sa panghunahuna?

 ¹¹ Mausab ba ang imong kahimtang tungod sa pag-ampo? Posible. Hinuon, angay kitang mahibalo nga dili kanunayng dunggon ni Jehova ang atong mga pag-ampo sa paagi nga gusto nato. Apan ang pag-ampo makatabang nga mahuptan nato ang katimbang sa panghunahuna ug sa emosyon samtang nagsagubang kitag mga kasakitan. Kon kita nabug-atan sa mga kagul-anan, ang “kalinaw sa Diyos” makapakalma kanato. Samag usa ka batalyon sa mga sundalo nga giasayn sa pagpanalipod sa usa ka siyudad batok sa mga kaaway, “ang kalinaw sa Diyos” manalipod sa atong mga kasingkasing ug gahom sa panghunahuna. Kini makabuntog sa atong mga pagduhaduha, kahadlok ug negatibong mga hunahuna ug makapugong kanato nga mosanong sa dinalidali ug dili-maalamong paagi.—Sal. 145:18.

12. Iilustrar kon sa unsang paagi ang usa ka tawo makabaton ug kalinaw sa hunahuna.

¹² Sa unsang paagi makabaton kitag kalinaw sa hunahuna samtang nagsagubang ug mga kasakitan? Tagda kining usa ka ilustrasyon nga susama sa atong kahimtang. Ang manedyer sa usa ka empleyado tingali kusog mangasaba. Apan ang empleyado nakahigayon sa pagpahayag kon unsay iyang gibati ngadto sa tag-iya sa kompaniya, nga maluloton ug makataronganon. Ang tag-iya nagpasalig kaniya nga siya nakasabot sa kahimtang ug nagpahibalo nga ang maong manedyer hapit nang tangtangon sa iyang katungdanan. Unsa kahay bation sa empleyado? Kay nagtuo sa maong pasalig ug nahibalo kon unsay hapit nang mahitabo, determinado siyang mopadayon sa trabaho, bisag mosagubang pa siyag dugang nga mga kalisdanan. Sa susama, nahibalo kita nga si Jehova nakasabot sa atong kahimtang, ug siya nagpasalig kanato nga sa dili madugay “ang magmamando niining kalibotana palagpoton.” (Juan 12:31) Pagkamakapahupay kana!

13. Gawas sa pag-ampo, unsa pay kinahanglan natong himoon?

¹³ Nan, igo na ba nga iampo lang nato ang atong mga problema kang Jehova? Dili. Aduna pay gikinahanglan. Kinahanglan kitang molihok uyon sa atong mga pag-ampo. Sa dihang may mga tawo nga gisugo ni Haring Saul nga moadto sa balay ni David aron patyon siya, si David miampo: “Luwasa ako gikan sa akong mga kaaway, Oh Diyos ko; gikan niadtong motindog batok kanako panalipdan mo unta ako. Luwasa ako gikan sa mga mamumuhat sa butang nga makadaot, ug luwasa ako gikan sa mga tawong sad-an sa dugo.” (Sal. 59:1, 2) Gawas pa sa pag-ampo, namati si David sa tambag sa iyang asawa ug miikyas. (1 Sam. 19:11, 12) Sa samang paagi, kita makaampo alang sa praktikal nga kaalam nga makatabang kanato sa pagsagubang sa atong makapaguol nga mga kahimtang ug tingali sa paghupay kanato.—Sant. 1:5.

Kon sa Unsang Paagi Kita Makaantos

14. Unsay makatabang kanato sa pag-antos sa dihang nagsagubang kitag mga kasakitan?

¹⁴ Lagmit dili dayon mawala ang atong mga kasakitan. Kini mahimong magpabilin pa gani sa taastaas nga panahon. Kon kana ang kahimtang, unsay makatabang kanato sa pag-antos? Una, hinumdomi nga kon kita mopadayon sa pag-alagad nga matinumanon kang Jehova bisan pa sa mga kalisdanan, gipamatud-an nato nga kita nahigugma kaniya. (Buh. 14:22) Hinumdomi ang akusasyon ni Satanas maylabot kang Job: “Mahadlok ba sa Diyos si Job sa wala lamay kapuslanan? Dili ba ikaw nagbutang man ug alad libot niya ug libot sa iyang balay ug libot sa tanang butang nga anaa kaniya sa tibuok palibot? Ang buhat sa iyang mga kamot imong gipanalanginan, ug ang iyang kahayopan mikaylap sa ibabaw sa yuta. Apan, ingon nga kausaban, palihog bakyawa ang imong kamot, ug tandoga ang tanang butang nga anaa kaniya ug tan-awa kon dili ka ba niya tunglohon sa imong nawong mismo.” (Job 1:9-11) Pinaagi sa pagpabiling maunongon, gipamatud-an ni Job nga bakak gayod ang maong akusasyon. Pinaagi sa atong pag-antos  sa malisod nga mga kahimtang, kita may kahigayonan usab sa pagpamatuod nga si Satanas bakakon. Busa, ang atong pagkamainantoson makapalig-on sa atong paglaom ug pagsalig.—Sant. 1:4.

15. Unsang mga panig-ingnan ang makapalig-on kanato?

¹⁵ Ikaduha, hinumdomi nga “ang samang mga butang maylabot sa mga pag-antos nagakahitabo diha sa tibuok kapunongan sa inyong mga igsoon dinhi sa kalibotan.” (1 Ped. 5:9) Sa pagkatinuod, “walay tentasyon nga midangat kaninyo gawas nianang sagad sa mga tawo.” (1 Cor. 10:13) Busa makabaton kag kalig-on ug kaisog pinaagi sa pagpamalandong sa mga panig-ingnan sa uban imbes sa paghunahuna lang sa kaugalingon nimong mga kalisdanan. (1 Tes. 1:5-7; Heb. 12:1) Palandonga ang panig-ingnan niadtong imong nailhan nga nagmatinumanon bisan pag nag-antos ug mga kasakitan. Nanukiduki ka bag napatik nga mga sugilanon sa kinabuhi niadtong nakasinatig mga kalisdanan nga susama sa imong gisagubang? Makapalig-on gayod kana kanimo.

16. Sa unsang paagi magapalig-on ang Diyos kanato sa dihang nagsagubang kitag lainlaing mga pagsulay?

¹⁶ Ikatulo, hinumdomi nga si Jehova mao ‘ang Amahan sa malumong mga kaluoy ug ang Diyos sa tanang paghupay, kinsa nagahupay kanato sa tanan natong kasakitan, aron kita makahupay kanila nga anaa sa bisan unsang matang sa kasakitan pinaagi sa paghupay nga pinaagi niini kita ginahupay sa Diyos.’ (2 Cor. 1:3, 4) Ang Diyos maorag nagtindog tupad kanato aron sa pagdasig ug pagpalig-on kanato, dili lamang diha sa atong mga kasakitan sa pagkakaron kondili “sa tanan natong kasakitan.” Unya makaarang na kita sa paghupay sa uban nga “anaa sa bisan unsang matang sa kasakitan.” Nasinati gayod ni Pablo nga tinuod kining mga pulonga.—2 Cor. 4:8, 9; 11:23-27.

17. Sa unsang paagi ang Bibliya makatabang kanato sa pagsagubang sa mga kasakitan sa kinabuhi?

¹⁷ Ikaupat, atong nabatonan ang Pulong sa Diyos, ang Bibliya, nga “mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong, aron ang tawo sa Diyos mahimong takos gayod, bug-os nga masinangkapan alang sa tanang maayong buhat.” (2 Tim. 3:16, 17) Ang Pulong sa Diyos dili lamang maghimo kanatong “takos” ug “masinangkapan alang sa tanang maayong buhat.” Kini makapaarang usab kanato sa pagsagubang sa mga kalisdanan sa kinabuhi. Kini maghimo kanatong “takos gayod” ug “bug-os nga masinangkapan.” Sa orihinal nga pinulongan, ang pulong nga gihubad ug “bug-os nga masinangkapan” literal nga nagkahulogang “gipaangayan.” Kining pulonga lagmit gigamit sa karaang panahon maylabot sa usa ka sakayan nga gipaangayan sa tanang butang nga gikinahanglan sa paglawig o sa usa ka makina nga makahimo sa bisan unsay gidahom nga himoon niini. Pinaagi sa iyang Pulong, si Jehova susamang nagtagana kanato sa tanan natong gikinahanglan aron masagubang ang bisan unsa nga mahimong modangat kanato. Busa kita makaingon, “Kon itugot kini sa Diyos, maantos ko kini uban sa iyang tabang.”

 Kahupayan Gikan sa Tanan Natong Kasakitan

18. Asa nato isentro ang atong hunahuna aron matabangan kita sa pag-antos nga matinumanon?

¹⁸ Ikalima: Isentro kanunay ang hunahuna sa katingalahang kamatuoran nga hapit nang wad-on ni Jehova ang tanang kasakitan sa katawhan. (Sal. 34:19; 37:9-11; 2 Ped. 2:9) Sa kataposan, ang pagluwas sa Diyos kanato nagkahulogan nga luwason kita gikan sa mga kasakitan karon ug hatagan usab kitag kahigayonan nga makabatog kinabuhing walay kataposan, didto ba sa langit kauban ni Jesus o sa usa ka paraisong yuta.

19. Sa unsang paagi posible ang pag-antos nga matinumanon?

¹⁹ Kasamtangan, magpadayon kita sa pagsagubang sa makapaguol nga mga kahimtang niining daotang kalibotan. Gipangandoy gayod nato ang panahon nga kining tanan mawala na! (Sal. 55:6-8) Hinumdoman nato nga ang atong matinumanong pag-antos magpamatuod nga ang Yawa bakakon. Hinaot makabaton kitag kalig-on gikan sa atong mga pag-ampo ug sa atong mga igsoon sa pagtuo, nga maghinumdom kanunay nga sila nagsagubang ug susamang mga pagsulay. Magpadayon nga mahimong takos gayod ug bug-os nga masinangkapan pinaagi sa paggamit pag-ayo sa Pulong sa Diyos. Ayawg tugoti nga matarog ang imong pagsalig sa mahigugmaong pag-atiman sa “Diyos sa tanang paghupay.” Hinumdomi nga “ang mga mata ni Jehova gipunting sa mga matarong, ug ang iyang mga igdulungog gikiling sa ilang pagtuaw alang sa tabang.”—Sal. 34:15.

Makatubag Ka Ba?

• Unsay gibati ni David bahin sa mga kasakitan nga iyang gisagubang?

• Unsang pagsalig ang gipahayag ni Haring Solomon?

• Unsay makatabang kanato sa pagsagubang sa mga kasakitan nga gitugot ni Jehova?

[Mga Pangutana sa Pagtuon]

[Hulagway sa panid 13]

Masaligon si Solomon nga si Jehova motabang sa Iyang katawhan nga may kasakitan

[Hulagway sa panid 15]

Gitugyan ni David ang iyang palas-anon kang Jehova pinaagi sa pag-ampo ug dayon milihok uyon niana