Magmalipayon sa Inyong Kaminyoon
Magmalipayon sa Inyong Kaminyoon
“Pinaagi sa kaalam ang usa ka panimalay matukod, ug pinaagi sa katakos sa pag-ila kini lig-ong matukod.”—PROV. 24:3.
1. Sa unsang paagi gipasundayag sa Diyos ang kaalam mahitungod sa unang tawo?
NAHIBALO ang atong maalamon nga langitnong Amahan kon unsay maayo alang kanato. Pananglitan, nahibalo ang Diyos nga aron matuman ang iyang katuyoan, ‘dili maayo nga ang tawo padayong mag-inusara’ sa tanaman sa Eden. Usa ka dakong bahin sa maong katuyoan mao nga ang mga magtiayon makabatog mga anak ug ‘pun-on ang yuta.’—Gen. 1:28; 2:18.
2. Unsang kahikayan ang gihimo ni Jehova alang sa kaayohan sa katawhan?
2 “Buhatan ko siyag katabang,” miingon si Jehova, “ingon nga iyang katimbang.” Dayon gipahinanok sa Diyos ang unang lalaki, ug mikuha siyag usa ka gusok gikan sa iyang hingpit nga lawas. Kana iyang gihimo nga usa ka babaye. Sa gidala ni Jehova ang hingpit nga babaye nga si Eva kang Adan, ang lalaki miingon: “Kini sa kataposan bukog sa akong mga bukog ug unod sa akong unod. Kini siya pagatawgon nga Babaye, tungod kay gikan sa lalaki kini siya gikuha.” Si Eva maoy tinuod nga katimbang ni Adan. Ang matag usa makapasundayag sa linaing mga kinaiya ug hiyas, apan silang duha maoy hingpit ug gihimo sumala sa larawan sa Diyos. Sa ingon nga paagi gipahigayon ni Jehova ang unang kasal. Gidawat dayon ni Adan ug Eva ang kahikayan sa Diyos sa ilang kaminyoon diin sila mahimong magtinabangay.—Gen. 1:27; 2:21-23.
3. Unsay tinamdan sa daghan bahin sa gasa sa kaminyoon, ug unsang mga pangutana ang motungha?
3 Ikasubo, kaylap sa kalibotan karon ang rebelyosong tinamdan. Ang mga problemang gipatungha niini wala magagikan sa Diyos. Ang daghan motamay sa kaminyoon ingong gasa sa Diyos, nga mag-isip niini nga kinaraan, nga gigikanan sa kahigawad o panagbangi. Taliwala sa daghan nga nagminyo, ang diborsiyo maoy kasagaran. Ang mga anak mahimong wala pakitaig kinaiyanhong pagmahal ug gamiton pa aron makabentaha sila sa ilang mga away sa panagtiayon. Daghang ginikanan ang dili magpahiuyon, bisan alang lang unta sa kalinaw ug panaghiusa. (2 Tim. 3:3) Nan, sa unsang paagi mapatunhay ang kalipay sa kaminyoon niining makuyaw nga mga panahon? Unsay ikatabang sa pagkamapahiuyonon aron dili gayod magkabulag ang magtiayon? Unsay atong makat-onan gikan sa modernong-adlaw nga mga panig-ingnan niadtong nagmalipayon sa ilang kaminyoon?
Sunda Gayod ang Tambag ni Jehova
4. (a) Unsay gitambag ni Pablo bahin sa kaminyoon? (b) Sa unsang paagi gisunod sa masinugtanong mga Kristohanon ang tambag ni Pablo?
4 Gitambagan sa Kristohanong si apostol Pablo ang mga babayeng balo nga kon gusto nilang magminyo pag-usab, sila magminyo “lamang diha sa Ginoo.” (1 Cor. 7:39) Kini dili bag-o alang sa mga Kristohanon nga may Hudiyong kagikan. Ang Balaod sa Diyos ngadto sa Israel tin-awng nagsugo kanila nga ‘dili makigminyo’ kang bisan kinsa gikan sa silingan nga paganong mga nasod. Naghatag si Jehova ug dugang katin-awan nga nagpasiugda sa kapeligrohan kon lapason kining sugoa. ‘Kay italikod [sa dili-Israelinhon] ang imong anak sa pagsunod kanako, ug sila tinong moalagad ug laing mga diyos; ug ang kasuko ni Jehova mosilaob gayod batok kaninyo, ug siya maglaglag kanimo sa madali.’ (Deut. 7:3, 4) Unsang baroganan ang gidahom ni Jehova gikan sa iyang mga alagad karon diha sa pagpilig kapikas sa kaminyoon? Dayag nga mopili gayod ang usa ka alagad sa Diyos ug kapikas nga ‘anaa sa Ginoo,’ nga usa ka dedikado ug bawtismadong isigkamagtutuo. Maalamon gayod nga sundon ang tambag ni Jehova bahin niini.
5. Unsay hunahuna ni Jehova ug sa minyong mga Kristohanon bahin sa mga panaad sa kaminyoon?
5 Ang mga panaad sa kaminyoon maoy sagrado sa mga mata sa Diyos. Mahitungod sa unang kaminyoon, ang Anak mismo sa Diyos, si Jesus, miingon: “Kon unsay gihiusa pagyugo sa Diyos ayaw ipabulag ni bisan kinsang tawo.” (Mat. 19:6) Gipahinumdoman kita sa salmista sa pagkaseryoso sa mga panaad: “Itanyag ang pasalamat ingon nga imong halad ngadto sa Diyos, ug bayri ang imong mga panaad sa Labing Hataas.” (Sal. 50:14) Bisan tuod mahimong makasinatig tumang kalipay ang magtiayon, seryoso ug may duyog nga tulubagon ang mga panaad nga ilang gihimo sa adlaw sa ilang kasal.—Deut. 23:21.
6. Unsay atong makat-onan gikan sa panig-ingnan ni Jepte?
6 Tagda ang panig-ingnan ni Jepte, kinsa nag-alagad ingong maghuhukom sa Israel sa ika-12ng siglo W.K.P. Kini ang iyang gisaad kang Jehova: “Kon sa pagkatinuod imong itugyan sa akong kamot ang mga anak sa Ammon, mahitabo usab nga ang usa nga mogula sa mga pultahan sa akong balay kinsa mogula sa pagsugat kanako, inigpauli ko sa kalinaw gikan sa mga anak sa Ammon, maiya gayod usab kang Jehova, ug igahalad ko siya ingon nga halad-nga-sinunog.” Sa pagkakita ni Jepte nga ang iyang bugtong anak nga babaye mao ang misugat kaniya sa iyang pagpauli sa iyang balay sa Mizpa, naghunahuna ba siya sa paglapas sa iyang panaad? Wala. Siya miingon: “Ako nakabungat na sa akong baba kang Jehova, ug dili ko na mabakwi.” (Maghu. 11:30, 31, 35) Gituman ni Jepte ang iyang panaad kang Jehova, bisan pag nagkahulogan kadto nga dili siya makabaton ug mga liwat ug walay moatiman sa iyang panulondon sa Israel. Bisag ang panaad ni Jepte lahi sa mga panaad sa kaminyoon, apan ang iyang pagtuman niadto maoy maayong panig-ingnan alang sa Kristohanong mga bana ug asawa maylabot sa ilang mga panaad.
Unsay Makapalampos sa Kaminyoon?
7. Unsang mga pagpahiuyon ang kinahanglang himoon sa mga bag-ong minyo?
7 Daghang magtiayon mahimuot kaayong maghinumdom sa panahong trato pa sila. Mibati gayod silag kalipay sa dihang nailaila nila ang umaabot nga kapikas! Sa dihang kanunay silang nagkauban, mas nasuod sila sa usag usa. Apan kinahanglan silang magpahiuyon sa usag usa sa ilang pagkaminyo, nagkatrato man sila sulod sa usa ka yugto o kaha gibuya ra sila. Ang usa ka bana miangkon: “Ang among dakong problema sa sinugdan sa among kaminyoon mao nga kinahanglan na namong tagdon karon ang opinyon sa usag usa. Sa makadiyot nalisdan kami kon unsaon pagbutang sa hustong dapit ang among pagpakiglabot sa mga higala ug mga paryente.” Ang laing bana nga 30 ka tuig nang minyo nakaamgo sayo sa ilang kaminyoon nga kinahanglang maghunahuna siya kanilang duha aron magmatimbang ang iyang panghukom. Sa dili pa modawat ug imbitasyon o mohimog kasabotan, iya unang konsultahon ang iyang asawa ayha pa modesisyon, nga magtagad sa kaayohan nilang duha. Ang pagkamapahiuyonon mapuslanon gayod sa maong kahimtang.—Prov. 13:10.
8, 9. (a) Nganong hinungdanon ang maayong komunikasyon o pagpakigsulti? (b) Sa unsang mga bahin mapuslanon ang pagkamapailin-ilinon, ug ngano?
8 Magkaminyo usahay ang duha ka tawo nga lahig kultura. Ang prangkang pagsultihanay gikinahanglan gayod dinhi. Magkalahi ang paagi sa komunikasyon. Ang pagpaniid sa paagi sa imong kapikas sa pagpakigsulti sa iyang mga paryente makatabang aron mas makasabot ka kaniya. Usahay, ang paagi sa pagsulti ug dili ang gisulti maoy magbutyag kon unsay gihunahuna sa usa ka tawo. Ug lagmit daghan ang makat-onan gikan sa mga butang nga wala isulti. (Prov. 16:24; Col. 4:6) Ang katakos sa pag-ila hinungdanon gayod aron magmalipayon.—Basaha ang Proverbio 24:3.
9 Mahitungod sa pagpilig mga pasatiempo ug kalingawan, nasayran sa daghan nga ang pagkamapailin-ilinon hinungdanon. Sa wala pa kamo maminyo, ang imong kapikas lagmit nahilig na sa esports o laing kalingawan. Angay bang magpahiuyon karon? (1 Tim. 4:8) Ikapangutana usab kana kon bahin sa paggugol ug panahon uban sa mga paryente. Siyempre, ang magtiayon nagkinahanglag panahon aron magkauban sila sa espirituwal nga mga buluhaton ug sa uban pang mga kalihokan.—Mat. 6:33.
10. Sa unsang paagi ang pagkamapahiuyonon makatabang aron mahuptan ang maayong relasyon tali sa mga ginikanan ug sa minyo nang mga anak?
10 Sa dihang magminyo ang usa ka lalaki o babaye, sila mobiya sa ilang mga ginikanan. (Basaha ang Genesis 2:24.) Bisan pa niana, ang sugo sa Diyos nga tahoron ang mga ginikanan padayong mapadapat bisag minyo na sila. Busa ang magtiayon lagmit mogahin ug panahon sa pagpakig-uban sa ilang mga ginikanan ug mga ugangan. Matod sa usa ka bana nga 25 ka tuig nang minyo: “Lisod usahay ang pagbalanse sa lainlaing gusto ug panginahanglan sa imong asawa ug mga ginikanan, mga igsoon, ug mga ugangan. Ang Genesis 2:24 nakatabang kanako sa pagdesisyon kon unsay labing maayong buhaton sa maong kahimtang. Bisan pag angay kang mounong ug may kaakohan ka ngadto sa ubang mga membro sa pamilya, kining tekstoha nagpakita nga angay kong unahon ang akong asawa.” Busa, angayng ilhon sa mapahiuyonon gayong Kristohanong mga ginikanan nga ang ilang minyong mga anak maoy usa na ka pamilya karon diin ang bana ang may pangunang katungdanan sa pagdumala niana.
11, 12. Nganong ang pagtuon sa pamilya ug pag-ampo hinungdanon alang sa mga magtiayon?
11 Ang regular nga pagtuon sa pamilya hinungdanon gayod. Gipamatud-an kana sa kasinatian sa daghang Kristohanong mga pamilya. Mahimong lisod nga sugdan ug ipadayon ang maong pagtuon. Miingon ang usa ka ulo sa pamilya: “Kon makabalik pa unta kami ug makausab sa kahimtang, paneguroon namong mosunod gayod ug maayong eskedyul sa pagtuon sa pamilya sukad sa sinugdan sa among kaminyoon.” Siya midugang: “Talagsaong gasa nga makita ko ang akong asawa nga malipayong mopahayag kon madasig siya sa usa ka makaiikag nga kamatuoran sa Bibliya nga nakat-onan namo sa among pagtuon.”
12 Ang pag-ampo nga magkauban maoy lain pang tabang. (Roma 12:12) Kon nahiusa ang bana ug asawa diha sa pagsimba kang Jehova, ang ilang suod nga relasyon uban sa Diyos makapalig-on sa ilang panagtiayon. (Sant. 4:8) Mipatin-aw ang usa ka Kristohanong bana: “Ang pagpangayo dayon ug pasaylo tungod sa mga sayop ug ang paghisgot niana sa dihang magkauban kamo sa pag-ampo maoy usa ka paagi sa pagpakitag tiunay nga kasubo ug kini mahimong buhaton bisan sa usa ka gamayng butang nga nakapasilo.”—Efe. 6:18.
Magpahiuyon Sulod sa Kaminyoon
13. Unsay gitambag ni Pablo bahin sa pribadong mga buhat sa magtiayon?
13 Angayng likayan sa Kristohanong mga magtiayon ang salawayong mga buhat sa panagtiayon nga kasagaran na kaayo sa nabuang-sa-sekso nga kalibotan karon. Maylabot niini, si Pablo nagtambag: “Ihatag sa bana ngadto sa iyang asawa ang nahiangay kaniya; apan buhaton usab sa asawa ang sama ngadto sa iyang bana. Ang asawa dili mao ang magbuot sa iyang kaugalingong lawas, kondili ang iyang bana; sa susama, usab, ang bana dili mao ang magbuot sa iyang kaugalingong lawas, kondili ang iyang asawa.” Dayon gihatag ni Pablo kining tin-aw nga sugo: “Ayaw kamo paghinikaway sa usag usa labot niini, gawas kon nagkauyonay ang usag usa sulod sa usa ka tinudlong panahon.” Ngano man? “Aron makagahin kamo ug panahon sa pag-ampo ug managduolay pag-usab, aron si Satanas dili magsigeg tental kaninyo tungod sa inyong kawalay-pagpugong-sa-kaugalingon.” (1 Cor. 7:3-5) Sa paghisgot sa pag-ampo, gipakita ni Pablo kon unsay angayng unahon sa usa ka Kristohanon. Apan gipatin-aw usab niya nga ang matag minyong Kristohanon angayng magmasensitibo sa pisikal ug emosyonal nga mga panginahanglan sa iyang kapikas.
14. Sa unsang paagi mapadapat ang mga prinsipyo sa Kasulatan kon bahin sa pribadong mga buhat sa magtiayon?
14 Ang bana ug asawa angayng magmadayganon sa usag usa ug makaamgo nga ang kawalay-konsiderasyon diha sa pribadong mga buhat sa magtiayon mahimong moresulta sa mga problema. (Basaha ang Filipos 2:3, 4; itandi ang Mateo 7:12.) Kini nahitabo diha sa pipila ka magtiayon nga dili samag relihiyon. Bisan pag adunay mga panagbangi sa opinyon, ang kahimtang mas moarang-arang tungod sa maayong panggawi, kalulot, ug kooperasyon sa Kristohanong kapikas. (Basaha ang 1 Pedro 3:1, 2.) Ang gugma alang kang Jehova ug sa iyang kapikas, nga dinuyogan sa pagkamapahiuyonon, makatabang niining bahina sa kaminyoon.
15. Nganong ang pagtahod hinungdanon gayod alang sa malipayong kaminyoon?
15 Sa ubang mga bahin usab, ang maluloton nga bana magpakitag pagtahod sa iyang asawa. Pananglitan, tagdon niya ang iyang mga pagbati bisan sa ginagmayng mga butang. Miangkon ang usa ka bana nga 47 ka tuig nang minyo: “Ako gihapong ginatun-an kini.” Ang Kristohanong mga asawa gitambagan nga magbaton ug halawom nga pagtahod alang sa ilang mga bana. (Efe. 5:33) Dili pagpakitag pagtahod kon sawayon sa mga asawa ang ilang mga bana, nga ibutyag ang ilang kahuyangan atubangan sa ubang mga tawo. Ang Proverbio 14:1 nagpahinumdom kanato: “Ang babayeng tinuod nga maalamon nagtukod sa iyang balay, apan ang buangbuang naglumpag niana pinaagi sa iyang mga kamot.”
Ayaw Padaog sa Yawa
16. Sa unsang paagi ikapadapat sa mga magtiayon ang Efeso 4:26, 27 diha sa ilang kaminyoon?
16 “Pagkapungot, apan ayaw pagpakasala; ayaw pasalopi sa adlaw ang inyong kasuko, ni maghatag ug luna sa Yawa.” (Efe. 4:26, 27) Kon ipadapat, kining mga pulonga makatabang sa magtiayon sa pagsulbad o paglikay sa di-pagsinabtanay. “Di ko makahinumdom nga may panagbangi kami sa akong bana nga wala namo maestoryahi bisan pag gidangtan kadtog daghang oras aron mahusay,” nag-ingon ang usa ka sister. Sa sinugdanan sa ilang panagtiayon, siya ug ang iyang bana nagkasabot nga ila gayong husayon ang ilang mga kabingkilan sa dili pa mosalop ang adlaw. “Bisan kon unsay problema, gihukom namo nga magpasaylo ug kalimtan kana ug atubangon ang bag-ong adlaw.” Busa wala nila ‘hatagig luna ang Yawa.’
17. Bisan pag maorag dili ikasabot ang imong kapikas, unsay lagmit makatabang?
17 Apan komosta kon naminyo ka sa usa nga dili nimo ikasabot? Mahimong nasinati mo karon ang relasyon nga maorag walay gugma nga dili sama sa natagamtam sa uban. Bisan pa niana, ang paghinumdom sa panghunahuna sa Maglalalang bahin sa kaminyoon makatabang kanimo. Ubos sa inspirasyon, gitambagan ni Pablo ang mga Kristohanon: “Himoa nga dungganon ang kaminyoon taliwala sa tanan, ug ang higdaanan sa kaminyoon nga dili mahugawan, kay hukman sa Diyos ang mga makihilawason ug ang mga mananapaw.” (Heb. 13:4) Ug ayaw kalimti ang mga pulong: “Ang tulo ka bakukon nga pisi dili daling mabugto.” (Eccl. 4:12) Kon ang bana ug asawa interesado kaayo sa pagbalaan sa ngalan ni Jehova, sila nabugkos sa usag usa ug sa Diyos. Paningkamotan nilang molampos ang ilang kaminyoon, kay nasayod nga kini makapasidungog gayod kang Jehova, ang Tagmugna sa kaminyoon.—1 Ped. 3:11.
18. Unsay imong mapaneguro bahin sa kaminyoon?
18 Posible gayong ang mga Kristohanon magmalipayon sa ilang kaminyoon. Aron matuman kana, kinahanglan ang paningkamot ug pagpasundayag sa Kristohanong mga hiyas, nga usa niana mao ang pagkamapahiuyonon. Karong adlawa, diha sa mga kongregasyon sa mga Saksi ni Jehova sa tibuok kalibotan, adunay daghan kaayong mga magtiayon nga makapamatuod nga mahimo kana.
Unsay Imong Tubag?
• Nganong posible nga magmalipayon ang kaminyoon?
• Unsay makatabang aron molampos ang kaminyoon?
• Unsang mga hiyas ang angayng ugmaron sa mga magtiayon?
[Mga Pangutana sa Pagtuon]
[Hulagway sa panid 9]
Maalamon nga mag-estoryahay una ang mga magtiayon sa dili pa modawat ug imbitasyon o mohimog kasabotan
[Hulagway sa panid 10]
Paningkamoting mahusay ang mga di-pagsinabtanay niana mismong adlawa, nga dili ‘hatagag luna ang Yawa’