Pagsangyaw sa Maayong Balita sa Kabukirang Andes

KAMING 18 ka buok didto sa salog nga yuta. Samtang nangurog sa katugnaw sulod sa katulganan namong mga bag, among nadungog ang hinagtok sa mibunok nga ulan sa atop nga sin. Tungod kay gubaon ang payag, nahibulong kami kon kami ba kaha ang unang mga tawo nga nakahigda didto.

Nganong moduaw man niining dapita ang 18 ka tawo? Kay gusto namong sundon ang sugo ni Jesus nga isangyaw ang maayong balita “hangtod sa kinalay-ang dapit sa yuta.” (Buh. 1:8; Mat. 24:14) Mibiyahe kami aron mosangyaw sa nahilit nga teritoryo sa kabukirang Andes sa Bolivia.

Ang Pag-adto Didto

Ang unang suliran maoy kon unsaon namo pag-adto didto. Among nasayran nga walay tinong eskedyul ang biyahe sa bus ngadto nianang lagyo kaayong mga dapit. Pag-abot sa bus nga among sakyan, among nasayran nga gamay diay kadto mao nga ang pipila kanamo wala makalingkod. Apan nakaabot ra gihapon kaming tanan sa among destinasyon.

Maoy among tumong ang pagduaw sa mga balangay sa kabukirang Andes sa Bolivia. Busa pagkanaog namo sa bus, ang among grupo, nga may dalang mga suplay, nagsunodsunod pagtungas sa titip nga mga agianan sa kabukiran.

Bisag morag gagmay ang mga balangay, katag kaayo ang mga balay mao nga  migugol kamig daghang oras aron maduaw ang matag balangay. Bisag layo na kaayo ang among nabaktas, morag aduna pa gihapoy laing balay sa unahan. Kadaghan kaming nasalaag tungod sa makalilibog ug naglikoliko nga mga agianan latas sa kaumahan.

“Nganong Karon pa man Mo Nanganhi?”

Nahingangha kaayo ang usa ka babaye sa kalayo sa among gibaktas nga iyang gipagamit ang iyang kosina ug sugnod aron makaluto kami sa among paniudto. Sa pagkasayod kon unsay gitudlo sa Bibliya bahin sa kahimtang sa mga patay, usa ka lalaki nangutana, “Nganong karon pa man mo nanganhi?” Siya interesado kaayo nga sa pagbiya namo sa iyang balangay, mikuyog siya kanamo aron mangutana ug dugang samtang nagbaktas. Ang laing lalaki wala pa gayod makadungog bahin sa mga Saksi ni Jehova ug interesado gayod sa atong mga basahon. Mapasalamaton kaayo siya sa among pagduaw ug iyang gihatag kanamo ang yawi sa usa ka payag nga mahimo namong katulgan niadtong gabhiona.

Sa usa ka gabiing mangitngit, wala tuyoa nga napatindog namo ang among mga tolda taliwala sa balayan sa itom nga mga hantik. Gisamokan sila ug gipamaak dayon kami. Wala na mi maglihok tungod sa sobrang kakapoy, ug maayo gani kay morag gipasagdan na lang mi sa mga hantik.

Sa sinugdan, mibati kamig panakit sa bukobuko ug kilid kay sa yuta ra kami nanghigda, apan sa tibuok gabii naanad ra niana ang among lawas. Ug nahikalimtan sa pagkabuntag ang bisan unsang mga pamaol ug panakit sa lawas samtang misud-ong kami sa wala-pa-matandog  nga mga walog nga may mga panganod nga inanayng mikayab sa mga kiliran niini ug sa nanganawkanaw nga matahom nga mga kabukiran nga giliminan ug niyebe. Nabuak lang ang kahilom tungod sa kinanaas sa sapa ug sa honi sa kalanggaman.

Human makakaligo sa sapa, kami maghisgot ug usa ka teksto sa Bibliya, mamahaw, ug dayon maghinayhinay ug tungas padulong sa ubang lagyong mga balangay. Gibaslan gayod ang among kahago. Nahibalag namo ang usa ka tigulang nga babaye nga mihilak sa pagkahibalo niya nga anaa diay sa Bibliya ang ngalan sa Diyos, nga Jehova. Nakahilak siya sa kalipay. Makasangpit na siya karon sa ngalan sa Diyos diha sa iyang mga pag-ampo!

Miingon ang usa ka tigulang nga lalaki nga nahinumdoman gayod siya sa Diyos, ug mikalit siyag kanta nga nag-ingon nga gipadala kami sa mga manulonda. Ang laing lalaki, nga grabeg sakit mao nga dili siya makagawas sa balay, miingon nga walay taga-balangay nga miduaw kaniya. Dako gayod ang iyang katingala nga kami gikan pa sa La Paz. Nakadayeg gayod ang lain pang lalaki sa mga Saksi ni Jehova tungod kay sila moduaw sa mga tawo diha sa ilang mga balay, samtang bagtingon lang sa ubang mga relihiyon ang ilang mga kampana aron pasimbahon sila.

Walay koryente ang kabalayan sa maong dapit busa ang mga tawo manghigda na inigtikyop sa kangitngit ug mamangon dungan sa pagsilang sa adlaw. Busa, mosugod na kamig sangyaw sa alas sayis pa sa buntag aron maabtan namo ang mga tawo sa ilang balay. Kay kon dili, ang kadaghanan magtrabaho na sa ilang mga uma. Pagkahapon, ang uban nga nagtrabaho na sa uma andam nga mohunong kadiyot aron mamati sa among mensahe gikan sa Pulong sa Diyos, ug niana makapahulay pod ang ilang mga torong baka sa pagdaro. Daghan sa mga tawo nga among maabtan sa balay magbuklad ug panit sa karnero nga among kalingkoran ug tawgon ang tibuok pamilya aron mamati kanamo. Ang pipila ka mag-uuma mihatag kanamog dagkong baluyot nga punog mais agig pasalamat sa mga basahon sa Bibliya nga among gibilin kanila.

“Wala Gayod Kamo Malimot Kanako”

Hinuon, ang mga tawo kinahanglang maduaw ug kadaghan aron mouswag ang ilang kahibalo bahin sa Bibliya. Daghan ang mihangyo nga mobalik kami aron matudloan pa silag dugang. Busa kadaghan kaming mibalik niining dapita sa Bolivia.

Sa ulahi namong biyahe, ang usa ka tigulang babaye nalipay nga mibalik kami, ug miingon: “Kamo morag ako nang mga anak. Wala gayod kamo malimot kanako.” Usa ka lalaki ang nagpasalamat kanamo tungod sa among buluhatong pagsangyaw ug iya kaming gidapit nga adto mosaka sa iyang balay sa sunod namong pagduaw. Tingali ang kinadak-ang balos sa among paghago mao ang pagkadungog nga ang usa ka babaye nga among giduaw kanhi mibalhin na sa siyudad ug nagsangyaw na karon sa maayong balita.

Sa kataposang adlaw sa among unang biyahe, nahutdan kamig gas alang sa gamayng kosinilya ug diyutay na lang usab ang among pagkaon. Nangahoy na lang mi aron maluto ang kataposang pagkaon, ug mibaktas aron makauli. Layo pa kaayo kami gikan sa lungsod diin mahimo kaming mosakay ug bus. Gabii na gayod kaming nakaabot didto.

Pagpauli

Lisod ang among biyahe pauli kay naaberya ang bus. Wala madugay, nakasakay ra kami sa likod sa usa ka trak nga kargadog tawo. Nakahigayon kami sa pagsangyaw ngadto sa kaubang mga pasahero nga natingala kon nag-unsa mi didto. Bisan tuod ang mga tawo kinaiyanhong maulawon, kasagaran sila matinahoron ug mahigalaon.

Human sa siyam ka oras nga biyahe diha sa likod sa trak, nakaabot ra kami sa balay nga nahumod ug nagkurog sa katugnaw. Apan nagmapuslanon ang among biyahe. Samtang nagbiyahe, nakahikay kamig pagtuon sa Bibliya uban sa usa ka babaye nga taga-siyudad.

Talagsaon gayong kahigayonan nga ang maayong balita ikasangyaw sa katawhan nianang lagyong mga dapit. Nasangyawan namo ang upat ka balangay ug ang daghan pang gagmayng mga sityo. Nakahinumdom gayod kami niining mga pulonga: “Pagkatahom ibabaw sa kabukiran sa mga tiil sa usa nga nagdalag maayong balita, ang usa nga nagmantalag pakigdait, ang usa nga nagdalag maayong balita sa butang nga mas maayo, ang usa nga nagmantalag kaluwasan.”—Isa. 52:7; Roma 10:15.

[Hulagway sa panid 17]

Andam na sa pagsangyaw sa maayong balita