Ang Kaminyoon ug Pagkaginikanan Niining Panahon sa Kataposan

“Ang panahong nabilin mubo na.”—1 COR. 7:29.

1. (a) Unsang mga kausaban karon ang nalakip sa mga butang nga “lisod sagubangon”? (b) Nganong mabalaka kita sa nagakausab nga mga sukdanan sa pamilya?

 ANG Pulong sa Diyos nagtagna nga ang mga gubat, linog, gutom, ug kamatay maoy ilhanan sa “panahon sa kataposan.” (Dan. 8:17, 19; Luc. 21:10, 11) Nagpasidaan usab ang Bibliya nga ang dagkong mga kausaban sa katilingban mahitabo niining makuyaw nga yugto sa tawhanong kasaysayan. Ang gubot nga kahimtang sa pamilya maoy usa sa mga butang nga “lisod sagubangon” niining makuyaw nga “kataposang mga adlaw.” (2 Tim. 3:1-4) Nganong mabalaka man kita sa maong mga kausaban? Tungod kay kini kaylap ug puwersado kaayo, mahimong maimpluwensiyahan niini ang panghunahuna sa mga Kristohanon karon bahin sa kaminyoon ug pagkaginikanan. Sa unsang paagi?

2. Unsay panghunahuna sa kadaghanan sa kalibotan bahin sa kaminyoon ug diborsiyo?

² Karong mga adlawa, ang pagdiborsiyo nahimong  sayon ug kaylap, ug kusog kining nag-uswag diha sa daghang nasod. Apan angay natong hinumdoman nga lahi gayod ang panghunahuna ni Jehova nga Diyos bahin sa kaminyoon ug diborsiyo kay sa gidawat sa kadaghanan sa kalibotan. Busa, unsa ang panghunahuna ni Jehova?

3. Unsay panghunahuna ni Jehova ug ni Jesu-Kristo bahin sa kaminyoon?

³ Gidahom ni Jehova nga Diyos nga tumanon sa mga minyo ang ilang panaad sa kaminyoon. Sa gihiusa ni Jehova ang unang lalaki ug babaye diha sa kaminyoon, siya miingon nga “ang lalaki . . . kinahanglang moipon sa iyang asawa ug sila mahimong usa ka unod.” Sa ulahi, gisubli kana ni Jesu-Kristo ug siya dugang miingon: “Busa, kon unsay gihiusa pagyugo sa Diyos ayaw ipabulag ni bisan kinsang tawo.” Si Jesus miingon pa gyod: “Bisan kinsa nga makigdiborsiyo sa iyang asawa, gawas kon tungod sa pakighilawas, ug magminyog lain makapanapaw.” (Gen. 2:24; Mat. 19:3-6, 9) Busa, giisip ni Jehova ug ni Jesus ang kaminyoon ingong tibuok-kinabuhing bugkos nga mabugto lamang inigkamatay sa usa ka kapikas. (1 Cor. 7:39) Kay ang kaminyoon usa man ka sagradong kahikayan, angayng isipon ang diborsiyo nga seryosong butang. Sa pagkatinuod, ang Pulong sa Diyos nag-ingon nga gidumtan ni Jehova ang pagdiborsiyo nga dili Kasulatanhon. a—Basaha ang Malaquias 2:13-16; 3:6.

Responsableng Panghunahuna Bahin sa Kaminyoon

4. Nganong nagbasol ang pipila ka batan-ong mga Kristohanon nga sila nagminyog sayo?

⁴ Nalinga kaayo sa sekso ang dili-diyosnong katawhan sa kalibotan karon. Bisan asa, ang hilas nga mga hulagway maoy mosugat sa atong panan-aw kada adlaw. Nahibalo gayod kita sa mahimong epekto niini kanato, ilabina sa minahal natong mga batan-on sa kongregasyon. Unsay angayng reaksiyon sa batan-ong mga Kristohanon bahin niining daotang impluwensiya, nga makapukaw ug seksuwal nga tinguha bisag maningkamot sila sa pagpugong niini? Maningkamot ang pipila sa pagsagubang niini pinaagi sa pagminyog sayo. Naglaom sila nga makalikay sa seksuwal nga imoralidad pinaagi niana. Apan sa dili madugay, ang pipila magbasol sa ilang desisyon. Ngano? Pagkahanaw sa kahinam sa ilang pagkabag-ong minyo, sila makaamgo nga sukwahi ang ilang mga gusto kon bahin sa pagkinabuhi adlaw-adlaw. Masabtan nga may seryosong suliran kanang mga magtiayona.

5. Unsay makatabang sa mga magtiayon nga magmatinumanon sa ilang panaad sa kaminyoon? (Tan-awa usab ang nota sa ubos.)

⁵ Mahimong lisod kaayo ang pagpakigminyo sa usa ka tawo nga lahi kaayo sa imong gidahom, bisan pag siya isigka-Kristohanon. (1 Cor. 7:28) Apan, bisan unsa ka lisod ang kahimtang, nahibalo ang matuod nga mga Kristohanon nga ang dili-Kasulatanhong diborsiyo dili maoy tukmang sulbad sa mga sulirang nalangkit sa dili-malipayong kaminyoon. Busa, kadtong naningkamot gayod aron molungtad ang ilang kaminyoon kay gusto silang magmatinumanon sa ilang panaad sa kaminyoon takos sa pagtahod ug mahigugmaong tabang gikan sa Kristohanong kongregasyon. b

6. Kanus-a angayng magminyo ang batan-ong mga Kristohanon?

⁶ Ikaw ba batan-on ug dili minyo? Kanus-a ka angayng magminyo? Makalikay kag dakong kagul-anan kon magpaabot ka hangtod nga ikaw hamtong ug andam nang magminyo sa dili  pa mosugod sa pagpanarato sa isigka-Kristohanon. Hinuon, ang Kasulatan wala magbutyag ug angayang edad sa pagminyo. c Apan nagpakita ang Bibliya nga kinahanglang magpaabot kang molapas ka na sa panahong nag-uros-uros pag-ayo ang seksuwal nga pagbati. (1 Cor. 7:36) Ngano? Ang nag-uros-uros nga pagbati makatuis sa maayong panghukom mao nga makahimo kag dili-maalamong mga desisyon nga basin moresulta sa kaguol. Hinumdomi, ang maalamong tambag ni Jehova bahin sa kaminyoon diha sa Bibliya maoy alang sa imong kaayohan ug kalipay.—Basaha ang Isaias 48:17, 18.

Responsableng Panghunahuna Bahin sa Pagkaginikanan

7. Unsa ang kasinatian sa pipila ka batan-ong magtiayon, ug nganong makapahuyang kini sa kaminyoon?

⁷ Ang pipila ka magtiayon nga nagminyog sayo, sayo usab nga nahimong mga ginikanan. Wala pa gani sila magkailhanay pag-ayo sa dihang mitungha ang bata nga nagkinahanglag 24-oras nga pagtagad adlaw-adlaw. Kinaiyanhon lamang nga ang bata maoy unang tagdon sa usa ka inahan, ug tingali mangabugho ang batan-ong amahan. Dugang pa, ang pagkahukaw sa mga ginikanan tungod sa pag-atiman sa bag-ong nahimugso makapatunghag tensiyon ug makapahuyang sa ilang relasyon. Sa kalit nakaamgo sila nga nawad-an silag dakong kagawasan. Dili na sila makasuroy o makapamuhatbuhat sama kaniadto. Unsay ilang panghunahuna sa nausab nilang kahimtang?

8. Sa unsang paagi angayng pagaisipon ang pagkaginikanan, ug ngano?

⁸ Ingon nga ang pagminyo angayng isipong seryoso, ang pagkaginikanan maoy dungganon usab nga responsabilidad gikan sa Diyos. Bisan unsa tingaliy mga kausaban nga mahitabo sa kinabuhi sa Kristohanong magtiayon inigkatawo sa usa ka bata, angay nilang ipasibo ang ilang kinabuhi kutob sa ilang maarangan. Kay si Jehova man ang naghatag sa tawo ug katakos nga manganak, angayng isipon sa mga ginikanan ang ilang anak ingong “panulondon gikan ni Jehova.” (Sal. 127:3) Maningkamot gayod ang Kristohanong mga ginikanan sa pagtuman sa ilang mga responsabilidad ingong “mga ginikanan nga nahiusa sa Ginoo.”—Efe. 6:1.

9. (a) Unsay nalangkit sa pagpadako ug anak? (b) Unsay mahimo sa bana sa pagtabang sa iyang asawa aron dili mohuyang ang iyang espirituwalidad?

⁹ Daghang katuigan sa pagsakripisyo-sa-kaugalingon ang nalangkit sa pagpadako ug anak. Ang mga ginikanan kinahanglang mogugol ug dako kaayong panahon ug kusog. Angayng masabtan sa Kristohanong bana nga sa daghang katuigan human sa pagpanganak, ang iyang asawa lagmit mabalda panahon sa mga tigom ug mamenosan ang iyang panahon sa pagtuon sa Bibliya ug sa pagpamalandong niini. Makapahuyang kini sa iyang espirituwalidad. Buhaton sa responsableng bana kutob sa iyang maarangan ang pagtabang sa pag-atiman sa ilang anak. Pag-abot sa balay, siya makahisgot uban sa iyang asawa bahin sa mga punto  nga iya tingaling nasayloan panahon sa mga tigom. Makatabang usab siya sa pag-atiman sa bata aron makasangyaw ang iyang asawa.—Basaha ang Filipos 2:3, 4.

10, 11. (a) Sa unsang paagi matutuon ang mga bata diha sa “pagdumala-sa-kaisipan ni Jehova”? (b) Nganong daghang Kristohanong mga ginikanan ang takos gayong dayegon?

¹⁰ Ang responsableng mga ginikanan dili lang motaganag pagkaon, besti, kapuy-an, ug mag-atiman sa panglawas sa bata. Ilabina niining makuyaw nga panahon sa kataposan, angayng makakat-on ang mga bata sa moral nga mga prinsipyo nga angayng sundon sa ilang adlaw-adlaw nga pagkinabuhi. Kinahanglan silang matutuon “sa disiplina ug sa pagdumala-sa-kaisipan ni Jehova.” (Efe. 6:4) Kining maong “pagdumala-sa-kaisipan” naglakip sa pagsilsil sa hunahuna ni Jehova diha sa kaisipan sa bata sukad sa pagkamasuso hangtod sa makuyaw nga panahon sa pagkatin-edyer.—2 Tim. 3:14, 15.

¹¹ Sa dihang gisugo ni Jesus ang iyang mga sumusunod nga ‘maghimog mga tinun-an sa katawhan sa tanang kanasoran,’ iya gayong gipasabot nga kinahanglang tabangan sa mga ginikanan ang ilang mga anak nga mahimong mga tinun-an. (Mat. 28:19, 20) Kana lisod tungod sa mga impluwensiya niining kalibotana diha sa mga batan-on. Busa, takos gayong dayegon sa tanan sa kongregasyon ang mga ginikanan nga malamposong nagmatuto sa ilang mga anak sa pagkahimong dedikadong mga Kristohanon. Ilang nabuntog ang impluwensiya sa kalibotan pinaagi sa ilang pagtuo ug pagkamatinumanon ingong responsableng mga ginikanan.—1 Juan 5:4.

Wala Magminyo o Wala Manganak Tungod sa Usa ka Hamiling Katuyoan

12. Nganong ang pipila ka Kristohanon mopalabi nga dili una magminyo sa taastaas nga panahon?

¹² Sanglit “ang panahong nabilin mubo na” ug “ang talan-awon niining kalibotana nagakausab,” ang Pulong sa Diyos nag-awhag kanato sa pagpalandong sa mga bentaha sa pagkadili-minyo. (1 Cor. 7:29-31) Busa, palabihon sa pipila ka Kristohanon nga magpabiling dili-minyo sa taas nga panahon o kaha sa tibuok kinabuhi. Dalayegon kana kay wala nila pahimusli ang kagawasan sa pagkadili-minyo aron mangagpas ug mahakogong mga tingusbawan. Daghan ang nagpabiling dili-minyo aron makaalagad kang Jehova “nga walay pagkalinga.” (Basaha ang 1 Corinto 7:32-35.) Ang pipila ka dili-minyong mga Kristohanon nag-alagad ingong mga payunir o Bethelite. Daghan ang nagtinguha nga mas mapuslan sa organisasyon ni Jehova mao nga naningkamot sila nga mokuwalipikar alang sa Tunghaan sa Ministeryal nga Pagbansay. Gani, kadtong dugaydugay nga nag-alagad ingong bug-os-panahong mga ministro samtang dili pa minyo ug sa ulahi nagminyo sagad mobati nga ang bililhong mga leksiyong ilang nakat-onan sa maong panahon nagmapuslanon gihapon sa ilang kaminyoon.

13. Nganong gipalabi sa pipila ka Kristohanong magtiayon nga dili manganak?

¹³ Sa pipila ka bahin sa kalibotan, nagakahitabo ang laing kausaban sa pamilya—gipalabi sa daghang magtiayon nga dili manganak. Ang pipila nagpalabi niana tungod  sa kalisod sa panginabuhi; kana usay gipalabi sa uban kay gusto nilang mangagpas ug dakog-kita nga karera. Taliwala sa mga Kristohanon, adunay mga magtiayon usab nga dili gustong manganak. Apan sagad ilang gipalabi kana kay gusto nilang makaalagad kang Jehova nga walay kabilinggan. Wala kini magpasabot nga ang ilang kinabuhi ingong minyo dili normal. Kini normal gayod. Ugaling lang, andam nilang ihiklin ang pipila ka pribilehiyo sa kaminyoon aron mauna ang intereses sa Gingharian. (1 Cor. 7:3-5) Ang pipila sa maong mga magtiayon nag-alagad kang Jehova ingong mga magtatan-aw sa sirkito ug distrito o mga Bethelite. Ang uban nag-alagad ingong mga payunir o misyonaryo. Dili gayod kalimtan ni Jehova ang ilang buhat ug ang gugma nga ilang gipakita alang sa iyang ngalan.—Heb. 6:10.

‘Kasakitan sa Unod’

14, 15. Unsang “kasakitan sa ilang unod” ang mahimong masinati sa Kristohanong mga ginikanan?

¹⁴ Giingnan ni apostol Pablo ang minyong mga Kristohanon nga sila makasinatig “kasakitan sa ilang unod.” (1 Cor. 7:28) Maglakip tingali kinig mga problema sa panglawas sa magtiayon mismo, sa ilang mga anak, o sa ilang tigulang nang mga ginikanan. Mahimong maglakip usab kini sa mga suliran ug kagul-anan may kalabotan sa pagmatuto sa ilang mga anak. Ingon sa gihisgotan sa sinugdanan niining artikuloha, ang Bibliya nagtagna nga “sa kataposang mga adlaw” moabot “ang makuyaw nga mga panahong lisod sagubangon.” Apil sa mga butang nga lisod sagubangon mao ang mga anak nga “dili-masinugtanon sa mga ginikanan.”—2 Tim. 3:1-3.

¹⁵ Ang pagmatutog mga anak maoy seryoso ug lisod nga kaakohan alang sa Kristohanong mga ginikanan. Mahimo kitang maapektohan niining ‘makuyaw nga mga panahon’ karon. Busa, makigbisog gayod ang Kristohanong mga ginikanan batok sa daotan kaayong impluwensiya niining “sistema sa mga butang” diha sa ilang mga anak. (Efe. 2:2, 3) Ug dili sila kanunayng makadaog niini! Kon ang usa ka anak sa Kristohanong pamilya mohunong na sa pag-alagad kang Jehova, kini “kasakitan” gayod alang sa mga ginikanan nga naningkamot sa pagmatuto kaniya diha sa kamatuoran.—Prov. 17:25.

“Aduna Unyay Dakong Kasakitan”

16. Unsang “kasakitan” ang gitagna ni Jesus?

¹⁶ Hinunoa, adunay laing kasakitan nga labaw pa kaayo kay sa bisan unsang “kasakitan” nga masinati maylabot sa kaminyoon ug pagkaginikanan. Sa tagna ni Jesus bahin sa iyang presensiya ug sa kataposan sa sistema sa mga butang, siya miingon: “Aduna unyay dakong kasakitan nga ang ingon niana wala pa mahitabo sukad sa sinugdan sa kalibotan hangtod karon, ug dili na gayod mahitabo pa.” (Mat. 24:3, 21) Gibutyag ni Jesus sa ulahi nga may usa ka dakong panon nga makalabang-buhi niini nga “dakong kasakitan.” Apan ang sistema ni Satanas mohimog pangataposang grabeng pag-atake sa malinawong mga Saksi ni Jehova. Seguradong lisod gayod unya kana nga panahon alang kanatong tanan—bata man o tigulang.

17. (a) Nganong makapanan-aw kitang masaligon sa umaabot? (b) Unsay angayng mag-impluwensiya sa atong panghunahuna bahin sa kaminyoon ug pagkaginikanan?

¹⁷ Bisan pa niana, dili kita mahadlok sa hilabihan bahin sa umaabot. Ang mga ginikanan nga nagmatinumanon kang Jehova makalaom nga panalipdan sila uban sa ilang gagmay pang mga anak. (Basaha ang Isaias 26:20, 21; Sof. 2:2, 3; 1 Cor. 7:14) Apan sa pagkakaron, hinaot nga ang atong pagkaamgo nga kita nagkinabuhi niining makuyaw nga panahon sa kataposan mag-impluwensiya sa atong panghunahuna bahin sa kaminyoon ug pagkaginikanan. (2 Ped. 3:10-13) Sa ingon niana, ang atong kinabuhi—minyo man o dili, may anak man o wala—makapasidungog ug makadayeg kang Jehova ug sa Kristohanong kongregasyon.

[Mga footnote]

Agig Repaso

• Nganong dili angayng magdali pagminyo ang batan-ong mga Kristohanon?

• Unsay nalangkit sa pagmatuto ug anak?

• Nganong daghang Kristohanon nagpabiling dili-minyo o kon minyo man, walay anak?

• Unsang “kasakitan” ang mahimong masinati sa Kristohanong mga ginikanan?

[Mga Pangutana sa Pagtuon]

[Hulagway sa panid 17]

Nganong maalamon nga ang batan-ong mga Kristohanon dili magminyog sayo?

[Hulagway sa panid 18]

Dakog ikatabang ang bana aron ang iyang asawa mas makapakigbahin sa espirituwal nga kalihokan

[Hulagway sa panid 19]

Nganong ang pipila ka Kristohanong magtiayon mopalabi nga dili manganak?