Mga Batan-on, Hinumdomi Karon ang Inyong Dakong Maglalalang

“Hinumdomi, karon, ang imong Dakong Maglalalang sa mga adlaw sa imong pagkabatan-on.”—ECCL. 12:1.

1. Sa unsang paagi gipahayag ni Jehova ang iyang pagsalig sa mga batan-ong nagsimba kaniya?

 GIISIP ni Jehova ang Kristohanong mga batan-on nga bililhon ug makapahayahay samag yamog. Sa pagkatinuod, iyang gitagna nga sa adlaw sa “puwersa militar” sa iyang Anak, ang mga batan-on “magatanyag sa ilang kaugalingon nga kinabubut-on” diha sa buluhaton ni Kristo. (Sal. 110:3) Kanang tagnaa matuman sa panahong ang kadaghanan walay interes sa Diyos, nga mahunahunaon lang sa kaugalingon ug sa salapi, ug dili-masinugtanon. Apan si Jehova nahibalo nga lahi ang mga batan-ong nagsimba kaniya. Dako gayod siyag pagsalig kaninyong mga batan-on!

2. Unsay kahulogan sa paghinumdom kang Jehova?

² Malipay gayod si Jehova nga makakita sa mga batan-ong naghinumdom kaniya ingon nga ilang Dakong Maglalalang. (Eccl. 12:1) Hinuon, ang paghinumdom kang Jehova wala lang magkahulogan nga hunahunaon siya. Kini nagkahulogan sa pagbuhat sa butang nga makapahimuot kaniya, nga magpagiya kita pinaagi sa iyang mga balaod ug mga prinsipyo diha sa atong adlaw-adlaw nga pagkinabuhi. Nagkahulogan usab kini sa pagsalig kang Jehova, kay nahibalo kita nga interesado gayod siya sa atong kaayohan. (Sal. 37:3; Isa. 48:17, 18) Mao ba kanay imong gibati bahin sa imong Dakong Maglalalang?

“Salig Kang Jehova sa Bug-os Mong Kasingkasing”

3, 4. Sa unsang paagi gipasundayag ni Jesus ang iyang pagsalig kang Jehova, ug nganong hinungdanon karon ang pagsalig kang Jehova?

³ Si Jesu-Kristo mao gayod ang labing maayong panig-ingnan sa usa nga misalig sa Diyos. Siya nagkinabuhi uyon sa mga pulong sa Proverbio 3:5, 6: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” Human gayod sa bawtismo ni Jesus, siya giduol ni Satanas ug gitental sa pagdawat ug kalibotanong gahom ug himaya. (Lucas 4:3-13) Wala malingla si Jesus. Nahibalo siya nga ang matuod nga “bahandi ug himaya ug kinabuhi” mao “ang sangpotanan sa pagpaubos ug pagkahadlok kang Jehova.”—Prov. 22:4.

⁴ Gigamhan sa kadalo ug kahakog ang katawhan karon. Nianang kahimtanga, kita maalamon kon sundon nato ang panig-ingnan ni Jesus. Hinumdomi usab nga determinado gayod si Satanas nga hayloon ang mga alagad ni Jehova sa pagbiya sa sigpit nga dalan paingon sa kinabuhi. Buot niyang makita nga ang tanan mosubay sa halapad nga dalan paingon sa kalaglagan. Ayaw gayod palingla kaniya! Magmadeterminado hinuon sa paghinumdom sa imong Dakong Maglalalang. Salig kaniya sa bug-os, ug mangupot pag-ayo sa “tinuod nga kinabuhi,” nga hapit na gayong moabot.—1 Tim. 6:19.

Mga Batan-on, Magmaalamon!

5. Unsay imong hunahuna bahin sa umaabot niining kalibotana?

⁵ Maalamon gayod ang mga batan-ong naghinumdom sa ilang Dakong Maglalalang. (Basaha ang Salmo 119:99, 100.) Kay ila mang gidawat ang punto-debista sa Diyos, nahibalo gayod sila nga hapit nang malaglag kining kalibotana. Bisan pa sa inyong kalinghod, inyo nang namatikdan nga ang kadaghanan karon mas mahadlokon ug mabalak-on bahin sa umaabot. Kon kamo nag-eskuyla pa, lagmit nakadungog mo bahin sa polusyon,  pag-init sa yuta, gipuril nga kalasangan, ug susamang mga suliran. Hilabihan ang kabalaka sa mga tawo bahin niini, apan mga Saksi ni Jehova lang ang nakasabot sa bug-os nga kini maoy bahin sa ilhanan nga hapit nang malaglag ang kalibotan ni Satanas.—Pin. 11:18.

6. Sa unsang paagi nalingla ang pipila ka batan-on?

⁶ Ikasubo nga ang pipila ka batan-ong mga alagad sa Diyos wala magmabinantayon ug ilang nahikalimtan nga kining kalibotana dili na magdugay. (2 Ped. 3:3, 4) Nahaylo ang uban sa paghimog grabeng mga sala tungod sa daotang mga kauban ug pornograpiya. (Prov. 13:20) Pagkamakapasubo nga dili kita mauyonan sa Diyos karon sa dihang duol na kita sa kataposan! Hinunoa, kuhaig leksiyon ang nahitabo sa mga Israelinhon sa 1473 W.K.P. sa nagkampo sila niadto sa Kapatagan sa Moab, dihang hapit na silang mosulod sa Yutang Saad. Unsay nahitabo didto?

Sila Napukan Duol sa Dag-anan

7, 8. (a) Unsa ang estratehiya nga gigamit ni Satanas sa Kapatagan sa Moab? (b) Unsang estratehiya ang iyang gigamit karon?

⁷ Niadtong panahona, buot ni Satanas nga pugngan ang mga Israelinhon sa pagsulod sa Yutang Saad. Human mapakyas si manalagnang Balaam sa pagtunglo kanila, migamit si Satanas ug mas malansisong paagi; iyang gipaningkamotan nga mahimo silang dili na takos sa panalangin ni Jehova. Ang makabibihag nga kababayen-an sa Moab maoy gigamit sa pagtental kanila, ug niadtong tungora milampos ang Yawa. Ang mga lalaki nakighilawas sa mga anak nga babaye sa Moab ug miyukbo sa Baal sa Peor! Bisag duol na kaayo sila sa Yutang Saad, mga 24,000 ka Israelinhon ang nangalaglag. Pagkaalaot!—Num. 25:1-3, 9.

⁸ Karon, duol na kaayo kita sa mas maayo pa nga yutang saad—ang bag-ong sistema sa mga butang. Sumala sa batasan ni Satanas, iyang gigamit na usab ang seksuwal nga imoralidad sa pagdaot sa katawhan sa Diyos. Salawayon na kaayo ang moralidad sa katawhan nga ang pakighilawas giisip nga normal ug ang homoseksuwalidad maoy kapilian nga estilo sa kinabuhi. Matod pa sa usa ka sister, “Diha ra sa balay ug sa Kingdom Hall nahibalo ang akong mga anak nga ang homoseksuwalidad ug pagpakigsekso sa dili kapikas maoy daotan sa mga mata sa Diyos.”

9. Unsay mahitabo panahon sa “pagbuswak sa pagkabatan-on,” ug sa unsang paagi masagubang kini sa mga batan-on?

⁹ Nahibalo ang mga batan-ong naghinumdom sa ilang Dakong Maglalalang nga ang seksuwal nga buhat maoy sagradong gasa nga nalangkit sa kinabuhi ug pagsanay. Busa, ilang giila nga ang pagpakigsekso himoon lang gayod sumala sa gilagda sa Diyos—tali lang sa bana ug asawa. (Heb. 13:4) Hinuon, panahon sa “pagbuswak sa pagkabatan-on,” mokusog ang seksuwal nga gana ug matuis ang panghukom sa usa mao nga lisod ang pagpabiling putli. (1 Cor. 7:36) Unsay imong mahimo kon ang dili-maayong mga hunahuna mosantop sa imong kaisipan? Pag-ampo sa  tim-os kang Jehova alang sa tabang aron masentro ang imong hunahuna sa maayong mga butang. Mamati kanunay si Jehova sa mga sinserong modangop kaniya. (Basaha ang Lucas 11:9-13.) Ang pagpakigsulti bahin sa mga butang nga makapalig-on sa pagtuo makatabang usab sa pagtul-id sa imong kaisipan.

Maalamong Pilia ang Imong mga Tumong!

10. Unsay way-pulos nga panghunahuna ang buot natong likayan, ug unsang mga pangutana ang atong isukna sa atong kaugalingon?

¹⁰ Daghang batan-on sa kalibotan ang mapatuyangon ug mahiligon sa mahilayong mga kalingawan tungod kay sila walay giya sa Diyos o seguradong paglaom sa umaabot. (Prov. 29:10) Sila nahisama sa mga Israelinhon sa adlaw ni Isaias nga wala na magpagiya sa Diyos ug nagkinabuhi alang lamang sa ‘kasadya ug pagmaya, . . . pagkaon sa unod ug pag-inom sa bino.’ (Isa. 22:13) Imbes masina kanila, nganong dili palandongon ang bililhong paglaom nga gibutang ni Jehova atubangan sa mga maunongon kaniya? Kon ikaw usa ka batan-ong alagad sa Diyos, maikagon ka bang nagpaabot sa bag-ong kalibotan? Naningkamot ka ba sa “pagkinabuhi uban ang maayong panghunahuna . . . samtang [ikaw] nagpaabot sa makalilipay nga paglaom” nga gibutang ni Jehova sa imong atubangan? (Tito 2:12, 13) Ang imong tubag makaapektar sa imong mga tumong ug mga prioridad sa kinabuhi.

11. Nganong magkugi gayod sa pagtuon ang batan-ong mga Kristohanon nga nag-eskuyla pa?

¹¹ Gusto sa kalibotan nga ang mga batan-on mangagpas gayod ug sekular nga mga tumong. Natural lang nga kamong mga nag-eskuyla pa magkugi gayod aron makabaton ug igong edukasyon. Angay nimong hinumdoman nga ang imong tumong dili lang ang pagkakitag maayong trabaho kondili nga magmapuslanon ka usab sa kongregasyon ug mahimong mabungahong magmamantala sa Gingharian. Aron makab-ot ang maong tumong, kinahanglang tin-aw kang manulti, maayong mamensar, ug makapangatarongan sa malinawon ug matinahorong paagi. Ang mga batan-ong nagtuon sa Bibliya ug naningkamot sa pagpadapat sa mga prinsipyo niini diha sa ilang kinabuhi nakabaton hinuon sa labing maayong edukasyon ug nagpahilunag maayong pundasyon alang sa malamposon ug walay-kataposang kaugmaon.—Basaha ang Salmo 1:1-3. a

12. Unsang panig-ingnan ang angayng sundogon sa Kristohanong mga pamilya?

¹² Sa Israel, ang pagtudlo sa mga ginikanan sa ilang mga anak maoy seryosong butang. Ang pagbansay kanila naglangkit halos sa tanang bahin sa ilang kinabuhi, ilabina sa mga butang maylabot sa pagsimba sa Diyos ug sa iyang mga balaod. (Deut. 6:6, 7) Busa, ang batan-ong mga Israelinhon nga namati sa ilang mga ginikanan ug sa ubang diyosnong mga tigulang nakabaton ug kahibalo, kaalam, hait nga salabotan, pagsabot, ug katakos sa panghunahuna—talagsaong mga hiyas nga maugmad tungod sa pagkat-on bahin sa Diyos ug sa iyang mga sugo. (Prov. 1:2-4; 2:1-5, 11-15) Ang pagtudlo angayng tagdon usab sa Kristohanong mga pamilya karon.

Pamati sa mga Nahigugma Kanimo

13. Unsang matang sa tambag ang nadawat sa pipila ka batan-on, ug nganong angay silang magmabinantayon?

¹³ Ang mga batan-on makadawat ug tambag gikan sa lainlaing tawo—lakip ang magtatambag sa eskuylahan nga motambag sa mga estudyante kon sa unsang paagi sila magmalamposon sa kalibotan. Pag-ampo nga giyahan ka sa Diyos sa dihang timbangtimbangon mo ang maong mga tambag sa tabang sa Bibliya ug sa mga basahong gitagana sa matinumanon ug maalamong ulipon. Imong nasayran gikan sa imong pagtuon sa Bibliya nga ang mga batan-on ug mga way-kasinatian ang pangunang puntirya ni Satanas. Pananglitan, didto  sa tanaman sa Eden, ang way-kasinatiang si Eva namati kang Satanas, usa ka estranyong wala gayoy kahingawa kaniya. Pagkalahi unta ang resulta kon si Eva namati pa kang Jehova, kinsa nakapamatuod na sa iyang gugma kaniya sa daghang paagi!—Gen. 3:1-6.

14. Nganong angay kitang mamati kang Jehova ug sa atong magtutuong mga ginikanan?

¹⁴ Gihigugma ka usab sa imong Dakong Maglalalang uban sa lunsay nga motibo. Gusto niyang ikaw magmalipayon karon ug hangtod sa kahangtoran! Busa, sama sa usa ka mapinanggaong ginikanan, siya magaingon kanimo ug sa tanang nagsimba kaniya: “Mao kini ang dalan. Lakaw kamo niini.” (Isa. 30:21) Kon ikaw may magtutuong mga ginikanan nga nahigugma gayod kang Jehova, may dugang kang panalangin. Matinahorong pamatia ang ilang tambag kon maghikay kag mga prioridad ug mga tumong. (Prov. 1:8, 9) Gani, buot gayod nilang makabaton kag kinabuhi, nga labi pang bililhon kay sa bahandi o kadungganan niining kalibotana.—Mat. 16:26.

15, 16. (a) Sa unsa makasalig kita kang Jehova? (b) Unsang hinungdanong leksiyon ang atong makat-onan gikan sa kasinatian ni Baruk?

¹⁵ Kadtong naghinumdom sa ilang Dakong Maglalalang nagpayano sa ilang kinabuhi, nga masaligon nga sila ‘dili gayod’ biyaan o “sa bisan unsang paagi” talikdan ni Jehova. (Basaha ang Hebreohanon 13:5.) Kay kining maayong tinamdan sukwahi man sa panghunahuna sa kalibotan, kinahanglang magbantay kita nga dili maimpluwensiyahan sa espiritu sa kalibotan. (Efe. 2:2) Bahin niini, tagda ang panig-ingnan sa sekretaryo ni Jeremias nga si Baruk, kinsa nagkinabuhi sa lisod nga kataposang mga adlaw sa Jerusalem hangtod nga nalaglag kini sa 607 W.K.P.

¹⁶ Tingali gitinguha ni Baruk nga mahamugaway sa materyal. Namatikdan kini ni Jehova ug malulotong gipasidan-an siya nga dili magpadayon sa pagtinguhag “dagkong mga butang” alang sa iyang kaugalingon. Si Baruk nagmapainubsanon ug nagmaalamon, kay siya namati kang Jehova ug naluwas sa dihang nalaglag ang Jerusalem. (Jer. 45:2-5) Sa laing bahin, ang mga katalirongan ni Baruk nga nakapanag-iyag “dagkong mga butang” sa materyal nga paagi, nga wala mag-una sa ilang pagsimba kang Jehova, sa wala madugay nawad-an sa tanan sa dihang gipukan sa mga Caldeanhon (mga Babilonyanhon) ang Jerusalem. Daghan usab ang namatay. (2 Cron. 36:15-18) Atong masabtan gikan sa kasinatian ni Baruk nga ang maayong relasyon uban sa Diyos labi pang hinungdanon kay sa bahandi ug kadungganan niining kalibotana.

Maayong mga Panig-ingnan nga Angayng Sundogon

17. Nganong si Jesus, Pablo, ug Timoteo maayong mga panig-ingnan alang sa mga alagad ni Jehova karon?

¹⁷ Ang Bibliya naghatag kanatog daghang maayong mga panig-ingnan nga makatabang kanato sa atong pagsubay sa dalan paingon sa kinabuhi. Pananglitan, si Jesus mao ang labing maalamong tawo nga nabuhi sukad, apan iyang gigamit ang iyang kusog sa pagpakaylap sa “maayong balita sa gingharian” nga makatabang sa katawhan hangtod sa kahangtoran. (Luc. 4:43) Aron makaalagad si apostol Pablo kang Jehova sa labing maayong paagi, iyang gibiyaan ang dakog-kita nga karera ug  gigamit ang iyang panahon ug kusog sa pagwali sa maayong balita. Si Timoteo, “usa ka tiunay nga anak diha sa pagtuo,” misundog sa maayong panig-ingnan ni Pablo. (1 Tim. 1:2) Gibasolan ba ni Jesus, Pablo, ug Timoteo ang ilang pagkinabuhi? Wala gayod! Ngani, si Pablo miingon nga ang ginatanyag sa kalibotan sama lag “mga basura” kon itandi sa kadungganan sa pag-alagad sa Diyos.—Filip. 3:8-11.

18. Unsang dagkong kausaban ang gihimo sa usa ka batan-ong brader, ug nganong wala siya magbasol?

¹⁸ Daghang Kristohanong mga batan-on karon ang nagsundog sa pagtuo ni Jesus, Pablo, ug Timoteo. Pananglitan, usa ka batan-ong brader nga kaniadto may trabaho nga dakog suweldo misulat: “Kay ako nagsunod man sa mga prinsipyo sa Bibliya diha sa trabahoan, nadawat ko ang mga promosyon sa wala madugay. Bisan pa sa dakong suweldo, gibati ko nga kadto maoy paggukod sa hangin. Sa dihang giduol ko ang mga magdudumala sa kompaniya ug gipahayag ang akong tinguha nga mosulod sa bug-os-panahong ministeryo, gitanyagan dayon ko nilag dugang suweldo sa paglaom nga ako magpabilin. Apan nakadesisyon na ko. Dili masabtan sa daghan kon nganong gibiyaan ko ang dakog-kita nga karera aron mosulod sa bug-os-panahong pag-alagad. Ang akong tubag mao nga gusto ko gayong tumanon ang akong pagpahinungod sa Diyos. Kay ang akong kinabuhi nasentro na karon sa pagsimba sa Diyos, ako may kalipay ug katagbawan nga dili ikahatag sa salapi o kadungganan.”

19. Unsang maalamong desisyon ang gidasig nga himoon sa mga batan-on?

¹⁹ Sa tibuok kalibotan, libolibong batan-on ang naghimog susamang maalamong mga desisyon. Busa, mga batan-on, sa dihang kamo mamalandong bahin sa inyong kaugmaon, ibutang ninyo kanunay sa hunahuna ang adlaw ni Jehova. (2 Ped. 3:11, 12) Ayaw kamog kasina niadtong nagpahimulos pag-ayo niining kalibotana. Hinunoa, pamati niadtong tinuod nga nahigugma kaninyo. Ang pagtigom ug “bahandi sa langit” mao ang labing maayong paagi sa paggamit sa inyong panahon ug kana lang ang makahatag ug malungtarong mga kaayohan. (Mat. 6:19, 20; basaha ang 1 Juan 2:15-17.) Oo, hinumdomi ninyo ang inyong Dakong Maglalalang ug si Jehova magapanalangin kaninyo.

[Footnote]

Makahinumdom Ka Ba?

• Sa unsang paagi ikapasundayag nato ang atong pagsalig sa Diyos?

• Unsa ang labing maayong edukasyon?

• Unsang mga leksiyon ang atong makat-onan gikan kang Baruk?

• Kinsay maayong mga panig-ingnan nga sundogon, ug ngano?

[Mga Pangutana sa Pagtuon]

[Mga hulagway sa panid 13]

Gitagana ni Jehova ang labing maayong edukasyon

[Hulagway sa panid 15]

Si Baruk namati kang Jehova ug naluwas sa pagkalaglag sa Jerusalem. Unsay imong makat-onan gikan sa maong panig-ingnan?