Nahilain Apan Wala Makalimti

GITAMBAGAN ni apostol Pablo ang iyang mga isigka-Kristohanon: “Buhaton nato ang maayo ngadto sa tanan, apan ilabina kanila nga atong kabanay sa pagtuo.” (Gal. 6:10) Karong adlawa, kita nagsunod gihapon nianang inspiradong tambag ug nangitag mga paagi sa pagbuhat ug maayo ngadto sa atong mga isigkamagtutuo. Lakip niadtong nanginahanglan ug mahigugmaong pagtagad sa Kristohanong kongregasyon mao ang atong minahal nga mga igsoon nga nagpuyo diha sa mga puy-anan sa mga tigulang o nursing home.

Tinuod, diha sa pipila ka nasod, naandan na sa mga pamilya ang pag-atiman sa ilang tigulang nga mga ginikanan diha sa ilang balay. Apan sa ubang mga nasod, daghang tigulang ang kasagarang nagpuyo diha sa usa ka nursing home diin didto sila atimanon. Komosta ang tigulang nga mga Kristohanon nga nagpuyo diha sa mga nursing home? Unsang mga kalisdanan ang ilang ginasagubang? Makalahutay kaha sila kon dili sila atimanon sa mga membro sa ilang pamilya? Sa unsang paagi makatabang kanila ang Kristohanong kongregasyon? Ug sa unsang mga paagi kita makabenepisyo kon regular nato silang duawon?

Kalisdanan nga Gisagubang Diha sa mga Nursing Home

Kon adto na mopuyo sa usa ka nursing home ang tigulang nga mga Kristohanon, mahimong ang maong puy-anan nahisakop sa teritoryo sa laing kongregasyon ug tingali wala sila mailhi sa mga Saksi nga nagpuyo nianang dapita. Tungod niana, mahimong dili sila kanunayng maduaw sa mga Saksi nianang lugara. Dugang pa, diha sa nursing home, lagmit  ikauban nila ang mga tawo nga lainlaig tinuohan. Mao nga ang atong tigulang nga mga isigka-Saksi mahimong malisdan sa pagpuyo nianang kahimtanga.

Pananglitan, diha sa pipila ka dapit, ang mga nursing home magpahigayon ug relihiyosong mga serbisyo nga himoon diha sa maong puy-anan. Matod pa sa usa ka tig-atiman: “Ang pipila ka tigulang nga mga Saksi nga dili na klarong makasulti gisakay sa mga wheelchair ngadto sa mga serbisyo sa simbahan nga wala gani konsultaha kon buot ba sila o dili.” Gawas pa, ang mga kawani sa mga nursing home sagad mogamit sa mga adlawng natawhan, Pasko, o mga pista opisyal aron mausab ang naandang mga kalihokan sa mga tigulang. Ang uban pang mga Saksi diha sa mga nursing home gidalitan ug mga pagkaon nga supak sa ilang tanlag. (Buh. 15:29) Kon regular kitang moduaw sa atong tigulang nga mga igsoon, kita makatabang kanila sa pagsagubang sa maong mga kalisdanan.

Pagpaluyo Gikan sa Kongregasyon

Alisto ang unang mga Kristohanon bahin sa ilang responsabilidad ngadto sa mga tigulang nga walay pamilyang nagsuportar. (1 Tim. 5:9) Karong adlawa, alisto usab ang mga magtatan-aw sa pagpaneguro nga naatiman ang mga tigulang nga nagpuyo sa mga nursing home diha sa ilang dapit. a Si Robert, nga usa ka ansiyano, miingon: “Mapuslanon gayod kon personal nga moduaw ang Kristohanong mga ansiyano sa mga tigulang aron sa pagsusi sa ilang mga kahimtang ug sa pag-ampo uban kanila. Dakog ikatabang  ang kongregasyon sa pag-atiman sa ilang mga panginahanglan.” Kon mogahin kitag panahon sa pagduaw sa mga tigulang, atong gipakita nga kita nakasabot kon unsa ka hinungdanon sa mga mata ni Jehova ang pag-atiman niadtong nanginahanglan.—Sant. 1:27.

Kon gikinahanglan, ang mga ansiyano andam sa paghimog mga kahikayan sa pagtabang sa ilang mga igsoon nga anaa sa mga nursing home sa ilang dapit. Namatikdan ni Robert ang usa nga posibleng gikinahanglan: “Kinahanglan natong dasigon ang mga tigulang sa pagtambong sa mga tigom kon makahimo sila niana.” Apan, alang niadtong dili na gayod makatambong sa Kingdom Hall, ang mga ansiyano makahimo ug laing mga kahikayan. Si Jacqueline, nga nagpangedarog mga 85 ug nag-antos sa osteoarthritis, naminaw sa mga tigom pinaagig telepono. Matod niya: “Nagmapuslanon gayod kanako ang pagpaminaw sa mga tigom samtang aktuwal kining gipahigayon. Maminaw gayod ako sa mga tigom bisag unsa pay mahitabo!”

Kon ang usa ka tigulang nga Kristohanon dili makapaminaw sa mga tigom pinaagig telepono, mahimong hikayon sa mga ansiyano nga marekord ang mga tigom. Mahimong pahimuslan sa igsoon nga mohatod sa mga rekording ngadto sa igsoon sa nursing home ang maong kahigayonan sa pagpakighinabi kaniya aron magdinasigay sila. “Ang pagpaambit ug balita bahin sa lokal nga kongregasyon uban sa tigulang nga mga igsoon mopabati kanilang bahin gihapon sa atong espirituwal nga pamilya,” matod sa usa ka magtatan-aw.

Ipadayon ang Pagpakigkomunikar Kanila

Siyempre, daghang tigulang ang maguol ug mobating pinasagdan sa dihang mibalhin silag puyo ngadto sa usa ka nursing home. Tungod niana, ang pipila morag dili na gustong makig-estorya ug mga tawo. Apan kon atong duawon dayon ang atong tigulang nang mga igsoon human sila mobalhin ug puyo ug ipahayag ang atong mapinadayonong pagpaluyo kanila, dako gayod kitag ikatabang kanila nga mapasig-uli ang kalinaw sa ilang galamhan ug magmalipayon na usab.—Prov. 17:22.

Kon ang tigulang nga mga igsoon medyo giango-ango na o dili na kaayo makadungog o may uban pang mga problema mao nga dili na sila makakomunikar sa uban, mahimong may moingon nga wala nay pulos ang pagduaw kanila. Apan ang atong mga paningkamot sa pagduaw kanila, bisag unsa pa kalisod silang ikaestorya, magpasundayag nga kita nagpadayon sa ‘pagpanguna sa pagpakitag pasidungog’ sa atong mga isigkamagsisimba. (Roma 12:10) Kon maorag limtanon na ang usa ka tigulang nga igsoon, mahimo nato siyang dasigon sa paghinumdom sa iyang mga kasinatian—bisan gikan sa iyang pagkabata—o pasultihon nato siya kon sa unsang paagi nakat-onan niya ang kamatuoran sa Bibliya. Unsay atong himoon kon maglisod siya sa pagsulti sa gusto niyang isulti? Paminaw nga mapailobon, ug kon nahiangay, paglitok ug duha o tulo ka pulong nga tingali maoy gusto niyang litokon, o sublia kadiyot ang iyang gihunahuna ug dasiga siya sa pagpadayon. Kon naglisod gyod siya o nagkayuring na lang ang iyang sinultihan ug naglisod na ta sa pagsabot sa iyang gisulti, paningkamotan na lang natong masabtan ang iyang giingon pinaagi sa pagpaminaw pag-ayo sa tono sa iyang tingog.

Kon dili na gayod posible ang binaba nga pagpakig-estorya, makagamit kitag laing mga paagi. Si Laurence, nga usa ka payunir, regular nga nagaduaw kang Madeleine, usa ka 80-anyos nga Kristohanong sister nga dili na makasulti. Gisaysay ni Laurence kon sa unsang paagi makigkomunikar siya: “Akong kuptan ang kamot ni Madeleine kon mag-ampo kami. Samtang nag-ampo, kumoton niyag gamay ang akong kamot ug ikipat-kipat niya ang iyang mga mata agig pagpasalamat sa maong bililhong mga yugto.” Ang pagkupot sa kamot sa atong tigulang nang mga higala o ang mabinationg paghalog kanila makapalipay gayod kanila.

Hinungdanon ang Imong Pagduaw

Ang regular nimong pagduaw sa mga tigulang lagmit makaamot sa maayong pag-atiman kanila. Si Danièle, nga tigduawan sa iyang mga isigka-Saksi diha sa mga nursing home sulod na sa mga 20 ka tuig, miingon: “Kon mamatikdan sa mga kawani sa usa ka nursing home nga kanunayng giduaw ang usa ka tawo, siya mas atimanon ug maayo.” Si Robert, nga gihisgotan sa ibabaw, miingon: “Lagmit gayong paminawan sa mga nars ang tawo nga regular nga nagaduaw sa usa ka pasyente. Mahimong dili sila mopakitag samang pagtahod ngadto sa panalagsa rang moduaw.” Sanglit ang mga nars kanunay mang makaatubang ug reklamador nga mga pamilya sa pasyente, pabilhan gayod nila ang mga pahayag sa pagpasalamat gikan sa mga miduaw. Dugang pa, kon atong maugmad ang usa ka maayong relasyon uban  sa mga nars, lagmit sila mas makiling sa pagtahod sa mga sukdanan ug tinuohan sa tigulang nga pasyenteng Saksi nga ilang giatiman.

Makaugmad usab kitag maayong relasyon uban sa mga kawani pinaagi sa pagtanyag nga motabang sa dili lisod nga mga buluhaton. Diha sa pipila ka dapit, dili kaayo maatiman ang mga tigulang tungod sa kakulang ug takos nga mga kawani. Si Rébecca, nga usa ka nars, miingon: “Puliki gayod ang mga panahon sa pagpangaon. Busa mahimong maayo kining mga kahigayonan sa pagduaw sa usa ka higala ug pagpakaon kaniya.” Dili gayod kita magpanuko sa pagpangutana sa mga kawani kon sa unsang paagi kita makatabang.

Sa dihang mohimo kitag regular nga mga pagduaw sa mao ra gihapon nga nursing home, mamatikdan nato kon unsay gikinahanglan sa atong tigulang nga igsoon ug makatagana kita niana. Pananglitan, mahimo natong dekorasyonan ang iyang lawak pinaagi sa pagbutang ug mga hulagway sa iyang mga minahal o mga drowing sa mga bata. Kon atong hunahunaon ang kaayohan sa pasyente, mahimong dad-an nato siyag daster o pipila ka gamit sa panglawas sama sa sabon, shampoo, losyon, tooth brush, tooth paste, ug uban pa. Kon may tanaman ang maong nursing home, mahimo natong igawas ang atong higala aron makahanggab ug lab-as nga hangin. Si Laurence, nga gikutlo ganina, miingon: “Maghinamhinam gayod si Madeleine sa akong pagduaw kada semana. Sa dihang mag-uban kog mga bata, mopahiyom dayon siya ug mohayag ang iyang mga mata!” Ang paghimo niining mga butanga may dakong epekto niadtong mga nagpuyo sa nursing home.—Prov. 3:27.

Mga Kaayohang Mapahimuslan sa Nagduaw ug sa Giduaw

Ang regular nga pagduaw sa usa ka tigulang mahimong magsulay sa “pagkatiunay sa [atong] gugma.” (2 Cor. 8:8) Sa unsang paagi? Makapaguol tingali kanato nga makita ang usa ka higala nga magkaluya. Miangkon si Laurence: “Sa sinugdan, ang nagkaluya nga panglawas ni Madeleine nakaapektar gayod kanako nga mohilak ako inigkahuman nakog duaw. Apan akong nakat-onan nga ang tim-os nga pag-ampo makatabang kanato sa pagbuntog sa atong mga kahadlok ug mahimong mas makapadasig.” Sulod sa daghang katuigan, si Robert tigduawan sa usa ka Kristohanong brader nga ginganlag Larry kinsa nag-antos sa Parkinson’s disease. Matod pa ni Robert: “Naapektohan pag-ayo si Larry sa iyang sakit mao nga dili na ko makasabot sa iyang isulti. Apan sa dihang dungan kaming mag-ampo, mabatyagan ko gihapon ang iyang pagtuo.”

Kon duawon nato ang tigulang nga mga isigkamagtutuo, kita makatabang kanila ug makabenepisyo usab. Ang ilang determinasyon sa pagpabiling suod kang Jehova samtang nagpuyo taliwala sa mga tawo nga lainlaig tinuohan nagtudlo kanato sa pagbatog pagtuo ug pagpakitag kaisog. Ang ilang kamaikagon sa pagdawat ug espirituwal nga pagkaon bisan pa sa ilang mga suliran sa pandungog ug panan-aw nagpasiugda nga “ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mat. 4:4) Sa dihang malipay sila sa yanong mga butang, sama sa pahiyom sa usa ka bata o sa pagpakigsalo sa pagpangaon, ang mga tigulang magpahinumdom kanato nga magmakontento kon unsay atong nabatonan. Ang ilang tinguha nga makabaton ug maayong relasyon uban sa Diyos makatabang kanato sa pag-una sa mas hinungdanong mga butang.

Sa pagkatinuod, ang tibuok kongregasyon makabenepisyo gikan sa atong pagpaluyo sa mga tigulang. Sa unsang paagi? Sanglit kadtong mga maluyahon nagsalig man gayod sa inigsoong pagmahal, sila naghatag ug kahigayonan sa kongregasyon sa pagpasundayag ug dugang pagkamabination. Busa, kitang tanan angayng mag-isip sa pag-atiman sa mga tigulang, bisan sa taastaas nga panahon, ingong bahin sa atong pag-alagad sa usag usa. (1 Ped. 4:10, 11) Kon manguna ang mga ansiyano niining maong kalihokan, sila nagtabang sa ubang mga membro sa kongregasyon sa pagkasabot nga kining bahina sa atong Kristohanong kalihokan dili gayod angayng pasagdan. (Ezeq. 34:15, 16) Pinaagi sa atong kinabubut-on ug mahigugmaong pagpaluyo, atong gipasaligan ang atong tigulang nga mga isigka-Kristohanon nga sila wala makalimti!

[Footnote]

[Blurb sa panid 28]

“Kon mamatikdan sa mga kawani sa usa ka nursing home nga kanunayng giduaw ang usa ka tawo, siya mas atimanon ug maayo”

[Hulagway sa panid 26]

Ang atong kinasingkasing nga mga pag-ampo mahimong makatabang sa usa ka tigulang nga isigka-Saksi nga mapasig-uli ang kalinaw sa iyang galamhan

[Hulagway sa panid 26]

Ang atong malumong pagpahayag sa pagmahal mopalig-on sa atong tigulang nga mga isigkamagtutuo