Alagara si Jehova Samtang Batan-on Pa

“Magpadayon ka sa mga butang nga imong nakat-onan ug nakakombinsir kanimo sa pagtuo.”—2 TIM. 3:14.

1. Unsay panglantaw ni Jehova sa pag-alagad sa iyang batan-ong mga Saksi?

 BILILHON kaayo kang Jehova ang sagradong pag-alagad sa mga batan-on nga siya nagpasulat ug tagna mahitungod kanila. “Ang imong katawhan magatanyag sa ilang kaugalingon nga kinabubut-on sa adlaw sa imong puwersa militar,” miawit ang salmista. “Sa kahalangdon sa pagkabalaan, gikan sa tagoangkan sa kaadlawon, ikaw adunay pundok sa mga batan-on nga sama gayod sa mga yamog.” (Sal. 110:3) Oo, bililhon gayod kang Jehova ang mga batan-on nga kinabubut-ong nag-alagad kaniya.

2. Unsang mga impluwensiya ang giatubang sa mga batan-on karon maylabot sa ilang kaugmaon?

² Kamong mga batan-on sa Kristohanong kongregasyon, nakapahinungod na ba kamo sa inyong kaugalingon kang Jehova? Daghan tingali ang nalisdan sa pagdesisyon nga moalagad sa matuod nga Diyos. Ang mga kadagkoan sa negosyo, magtutudlo, ug usahay ang mga membro sa pamilya ug mga higala nag-awhag sa mga batan-on sa pagpangagpas sa materyal nga mga tumong. Sa dihang ang mga batan-on mangagpas sa espirituwal nga mga tumong, sagad nga tamayon sila sa kalibotan. Apan ang tinuod mao nga ang pag-alagad sa matuod nga Diyos mao ang labing maayong paagi sa pagkinabuhi. (Sal. 27:4) Maylabot niini, tagda ninyo ang tulo ka pangutana: Nganong angay ka mang moalagad sa Diyos? Sa unsang paagi molampos ka ingong dedikadong alagad sa Diyos bisan unsa pay isulti ug buhaton sa uban? Unsang talagsaong mga pribilehiyo sa sagradong pag-alagad ang mahimong bukas alang kanimo?

Angay Kang Moalagad Kang Jehova

3. Unsay angayng epekto kanato sa kalalangan ni Jehova?

³ Nganong angay ka mang moalagad sa matuod ug buhi nga Diyos? Ang Pinadayag 4:11 naghisgot sa pangunang rason: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” Si Jehova mao ang kahibulongang Maglalalang sa tanang butang. Matahom kaayo ang iyang pagkalalang sa yuta. Ang kakahoyan, kabulakan, kahayopan, kadagatan, kabukiran, ug ang mga busay—kanang tanan gibuhat ni Jehova. ‘Ang yuta napuno sa mga binuhat [sa Diyos],’ nag-ingon ang Salmo 104:24. Dako kaayo ang atong pasalamat kang Jehova tungod kay siya mahigugmaong naghatag kanatog lawas ug hunahuna nga nagpaposible nga kita mabuhi dinhi sa yuta ug malipay sa maayong mga butang diha niana. Dili ba nga ang kinasingkasing nga pagpabili sa kahibulongang kalalangan magtukmod kanato sa pag-alagad sa Diyos?

4, 5. Unsang mga buhat sa Diyos ang nakapasuod ni Josue kang Jehova?

⁴ Ang laing rason kon nganong angay kang moalagad kang Jehova makita diha sa gipamulong sa Israelinhong lider nga si Josue. Sa hinapos nga yugto sa iyang kinabuhi, giingnan ni Josue ang katawhan sa Diyos: “Kamo nahibalo pag-ayo sa bug-os ninyong kasingkasing ug sa bug-os ninyong kalag nga walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman alang kaninyo.” Nganong nakaingon man niini si Josue?—Jos. 23:14.

⁵ Samtang nagtubo pa si Josue sa Ehipto, lagmit nasayod na siya bahin sa saad ni Jehova nga ang mga Israelinhon hatagan ug kaugalingong yuta. (Gen. 12:7; 50:24, 25; Ex. 3:8) Unya nakita ni Josue nga gisugdan ni Jehova pagtuman ang maong saad pinaagi sa pagpadangat sa Napulo ka Hampak nganha sa Ehipto ug sa pagpugos sa  tig-ag-kasingkasing nga si Paraon sa pagpalakaw sa mga anak ni Israel. Apil si Josue niadtong naluwas sa Pulang Dagat, ug unya iyang nakita nga ang maong dagat mitabon kang Paraon ug sa iyang kasundalohan. Sulod sa ilang dugay nga panaw latas sa “dako ug makalilisang nga kamingawan” sa Desyerto sa Sinai, nakita ni Josue kon giunsa pagtagana ni Jehova ang tanang panginahanglan sa mga Israelinhon. Walay bisan usa kanila ang namatay sa kauhaw o sa kagutom. (Deut. 8:3-5, 14-16; Jos. 24:5-7) Sa dihang miabot na ang panahon nga sakopon sa mga Israelinhon ang gamhanang mga nasod sa Canaan ug panag-iyahon ang Yutang Saad, nakita ni Josue nga gitabangan sila sa Diyos nga ilang gisimba.—Jos. 10:14, 42.

6. Unsay motabang kanimo nga maugmad ang tinguha nga moalagad sa Diyos?

⁶ Nahibalo si Josue nga gituman ni Jehova ang Iyang mga saad. Busa, si Josue miingon: “Kon bahin kanako ug sa akong panimalay, kami mag-alagad kang Jehova.” (Jos. 24:15) Komosta sa imong bahin? Sa dihang maghunahuna ka sa mga saad nga gituman na sa matuod nga Diyos ug sa mga saad nga pagatumanon pa niya, dili ka ba usab matukmod sa pag-alagad kaniya sama kang Josue?

7. Nganong ang pagpabawtismo sa tubig usa ka hinungdanong tikang nga buhaton?

⁷ Ang pagpalandong sa mga butang nga gilalang ni Jehova ug sa iyang kahibulongan ug kasaligan gayod nga mga saad angayng magtukmod kanimo dili lamang sa pagpahinungod kang Jehova kondili sa pagpabawtismo usab ingong simbolo sa imong pahinungod. Ang pagpabawtismo maoy hinungdanong tikang nga angayng buhaton niadtong gustong moalagad sa Diyos. Gibuhat kini sa atong Ehemplo nga si Jesus. Sa wala pa niya sugdi ang iyang buluhaton ingong Mesiyas, miadto siya kang Juan Bawtista aron magpabawtismo. Nganong gibuhat man kana ni Jesus? Siya miingon: “Ako nanaog gikan sa langit aron buhaton, dili ang akong kabubut-on, kondili ang kabubut-on niya nga nagpadala kanako.” (Juan 6:38) Aron ipakita nga gitanyag ni Jesus ang iyang kaugalingon sa pagtuman sa kabubut-on sa iyang Amahan, siya nagpabawtismo.—Mat. 3:13-17.

8. Nganong nakadesisyon man si Timoteo sa pagsimba sa Diyos, ug unsay angay nimong buhaton?

⁸ Tagda usab si Timoteo, usa ka batan-ong Kristohanon nga sa ngadtongadto gihatagan ni Jehova ug daghang buluhaton ug mga pribilehiyo. Nganong nakadesisyon man si Timoteo sa pagsimba sa matuod nga Diyos? Ang Bibliya nagtug-an kanato nga ‘siya nakakat-on sa mga butang ug nakombinsir sa pagtuo.’ (2 Tim. 3:14) Kon ikaw nagtuon sa Pulong sa Diyos ug kombinsido nga tinuod ang gitudlo niini, ang imong kahimtang susama nianang kang Timoteo. Angay ka nang mohimog desisyon. Nganong dili makigsulti sa imong mga ginikanan bahin niana? Sila ug ang mga ansiyano sa kongregasyon makatabang kanimo nga masabtan ang Kasulatanhong mga kinahanglanon alang sa bawtismo.—Basaha ang Buhat 8:12.

9. Unsay posibleng epekto sa imong pagpabawtismo nganha sa uban?

⁹ Ang pagpabawtismo maoy maayo kaayong sinugdanan sa pag-alagad sa matuod nga Diyos. Sa paghimo niini, sama ra nga ikaw miapil sa usa ka layog-distansiya nga lumba sa dagan diin ang ganti mao ang kinabuhing walay kataposan ug ang kalipay nga imong matagamtam karon gumikan sa pagbuhat sa kabubut-on sa Diyos. (Heb. 12:2, 3) Ang imong desisyon makahatag usab ug kalipay sa mga membro sa inyong pamilya nga miapil na sa lumba, sa imong mga higala diha sa Kristohanong kongregasyon, ug labaw sa tanan, kang Jehova. (Basaha ang Proverbio 23:15.) Tinuod nga ang uban dili tingali makasabot kon nganong mipili ka sa pagsimba  kang Jehova, ug hayan kuwestiyonon nila ang imong desisyon. Basin mosupak pa gani sila kanimo. Apan mabuntog ra nimo kining maong mga pagsulay.

Sa Dihang ang Uban Mangutana o Mosupak Kanimo

10, 11. (a) Unsang mga pangutana ang hayan isukna sa mga tawo bahin sa imong desisyon nga moalagad sa Diyos? (b) Unsay imong makat-onan sa paagi ni Jesus sa pagtubag sa mga pangutana bahin sa matuod nga pagsimba?

¹⁰ Ang imong mga eskolmet, silingan, ug mga paryente, basin maglibog kon nganong nakadesisyon ka sa pag-alagad kang Jehova. Tingali mangutana sila kanimo kon nganong nag-Saksi ka ug kon unsay imong gituohan. Unsaon nimo sila pagtubag? Siyempre, kinahanglang susihon nimo kon unsay tinuod nimong gibati aron ikapatin-aw nimo kanila kon nganong mao kanay imong gipili. Ug sa pagtubag sa mga pangutana bahin sa imong pagtuo, ang panig-ingnan ni Jesus mao ang labing maayong sundogon.

¹¹ Sa dihang gisukitsukit si Jesus sa Hudiyong mga lider sa relihiyon bahin sa pagkabanhaw, iyang gikutlo ang usa ka teksto nga wala nila mahunahunai. (Ex. 3:6; Mat. 22:23, 31-33) Sa dihang ang usa ka eskriba nangutana kaniya kon unsa ang kinadak-ang sugo, si Jesus mikutlo ug haom nga mga teksto sa Bibliya. Mapasalamaton ang maong tawo sa tubag ni Jesus. (Lev. 19:18; Deut. 6:5; Mar. 12:28-34) Tungod sa paggamit ni Jesus sa Kasulatan ug sa iyang paagi sa pagpakigsulti, nahitabo ang ‘panagkabahin labot kaniya taliwala sa panon sa katawhan,’ ug ang iyang mga magsusupak wala makaako sa pagdakop kaniya. (Juan 7:32-46) Sa dihang tubagon nimo ang mga pangutana bahin sa imong pagtuo, gamita ang Bibliya ug sulti “uban ang kalumo sa buot ug halawom nga pagtahod.” (1 Ped. 3:15) Kon wala ka mahibalo sa tubag, magmatinud-anon ka ug sultii ang imong kaestorya nga manukiduki ka pa bahin niana. Dayon, susiha kana diha sa Watch Tower Publications Index o sa Watchtower Library sa CD-ROM. Pinaagi sa maayong pagpangandam, ikaw ‘mahibalo kon unsaon pagtubag.’—Col. 4:6.

12. Nganong dili ka angayng maluya tungod sa paglutos?

¹² Gawas nga pangutan-on ka bahin sa imong baroganan ug pagtuo, hayan makaatubang ka usab ug mga pagsupak. Natural lamang kana kay ang kaaway sa Diyos nga si Satanas nga Yawa maoy nagmando sa kalibotan. (Basaha ang 1 Juan 5:19.) Busa, dili ka makadahom nga dayegon o uyonan ka sa tanan. Ang ubang mga tawo basin ‘mopasipala kanimo,’ ug tingali padayon nila kanang buhaton. (1 Ped. 4:4) Apan hinumdomi nga dili kay ikaw ray nakasinati niana. Si Jesu-Kristo gilutos usab. Mao man usab si apostol Pedro, kinsa misulat: “Mga hinigugma, ayaw kamo kahibulong sa [pag-antos] taliwala kaninyo, nga nagakahitabo kaninyo ingon nga pagsulay, nga daw usa ka katingad-ang butang ang midangat kaninyo. Sa kasukwahi, magpadayon sa pagmaya sanglit kamo mga mag-aambit sa mga pag-antos ni Kristo.”—1 Ped. 4:12, 13.

13. Nganong mahimo kang magmalipayon sa dihang ginalutos?

¹³ Kon ikaw lutoson o supakon tungod kay ikaw usa ka Kristohanon, angay kang malipay. Ngano man? Tungod kay kon giuyonan ka sa kalibotan, nagpaila kana nga ikaw nagkinabuhi sumala sa mga sukdanan ni Satanas—dili sa Diyos. Si Jesus nagpasidaan: “Alaot, sa dihang ang tanang tawo mosulti ug maayo bahin kaninyo, kay ang mga butang nga ingon niini ang gibuhat sa ilang mga katigulangan ngadto sa mini nga mga  manalagna.” (Luc. 6:26) Kon lutoson ka, nagpaila kana nga si Satanas ug ang iyang kalibotan nasuko kanimo tungod kay ikaw nag-alagad kang Jehova. (Basaha ang Mateo 5:11, 12.) Ug kon ikaw “gipakaulawan tungod sa ngalan ni Kristo,” angay kang malipay.—1 Ped. 4:14.

14. Unsay maayong mga resulta kon ang usa ka tawo magmatinumanon kang Jehova bisan pa sa paglutos?

¹⁴ Unsay resulta kon ikaw magmatinumanon kang Jehova bisan pa sa paglutos? Adunay labing menos upat ka maayong mga resulta. Ikaw nagpamatuod bahin sa Diyos ug sa iyang Anak. Ang imong pagkamatinumanon magdasig sa imong Kristohanong mga igsoon. Ang ubang naniid kanimo nga wala pa makaila kang Jehova hayan matukmod sa pagpangita kaniya. (Basaha ang Filipos 1:12-14.) Ug sa dihang masinati nimo nga si Jehova nagahatag kanimog kusog sa paglahutay sa mga kalisdanan, molalom ang imong gugma kaniya.

Ang “Usa ka Dakong Pultahan” Nabuksan Kanimo

15. Unsang “dakong pultahan” ang nabuksan kang apostol Pablo?

¹⁵ Mahitungod sa iyang ministeryo sa Efeso, si apostol Pablo misulat: “Nabuksan kanako ang usa ka dakong pultahan nga nagatultol ngadto sa kalihokan.” (1 Cor. 16:8, 9) Pultahan kadto sa mas dakong kahigayonan sa pagsangyaw sa maayong balita ug paghimog mga tinun-an sa maong siyudad. Pinaagi sa pagsulod niana, daghan ang natabangan ni Pablo sa pagkuhag kahibalo bahin kang Jehova ug sa pagsimba Kaniya.

16. Sa unsang paagi ang dinihogang nanghibilin misulod sa “usa ka binuksan nga pultahan” niadtong 1919?

¹⁶ Niadtong 1919 ang hinimayang si Jesu-Kristo nagbutang ug “usa ka binuksan nga pultahan” atubangan sa dinihogang nanghibilin. (Pin. 3:8) Sila misulod niana ug misugod sa pagsangyaw sa maayong balita, nga nagtudlo sa kamatuoran sa Bibliya uban ang labaw nga kasibot kay sa una. Unsa may resulta sa ilang pagsangyaw? Ang maayong balita nakaabot na karon sa kinatumyan sa yuta, ug duolan sa pito ka milyong tawo ang may paglaom nga mabuhi sa walay kataposan sa bag-ong kalibotan sa Diyos.

17. Sa unsang paagi makasulod kamo sa “dakong pultahan nga nagatultol ngadto sa kalihokan”?

¹⁷ “Ang usa ka dakong pultahan nga nagatultol ngadto sa kalihokan” bukas pa gihapon sa tanang alagad ni Jehova. Kadtong mosulod niana mobatig kalipay ug katagbawan samtang sila mogugol ug dugang panahon sa pagsangyaw sa maayong balita. Kamong batan-ong mga alagad ni Jehova, gipabilhan ba ninyo pag-ayo ang walay ikatandi nga pribilehiyo sa pagtabang sa uban nga ‘makabaton ug pagtuo sa maayong balita’? (Mar. 1:14, 15) Nahunahuna ba ninyo ang pag-alagad ingong regular o oksilyare payunir? Ang pagpanukod ug Kingdom Hall, pag-alagad sa Bethel, ug pagkahimong misyonaryo maoy lain usab nga mga kahigayonan nga mahimong bukas sa daghan kaninyo. Sanglit hapit nang malaglag ang daotang kalibotan ni Satanas, dinalian gayod nga makigbahin niini nga mga pribilehiyo sa pag-alagad. Buhaton ba ninyo kini samtang may panahon pa?

“Tilawi ug Tan-awa Ninyo nga si Jehova Maayo”

18, 19. (a) Unsay nakatabang kang David sa pagbaton ug hugot nga tinguha nga alagaron si Jehova? (b) Unsay nagpakita nga wala gayod magbasol si David sa iyang pag-alagad sa Diyos?

¹⁸ Ang salmista gigiyahan sa espiritu sa Diyos sa pagsulat niini nga pagdapit: “Tilawi ug tan-awa ninyo nga si Jehova maayo.” (Sal. 34:8) Sa dihang si Haring David sa karaang Israel usa pa ka batan-ong magbalantay sa karnero, siya giluwas ni Jehova gikan sa mabangis nga mga mananap. Gitabangan siya sa Diyos sa iyang pagpakig-away kang Goliat ug giluwas siya gikan sa daghan pang kalamidad. (1 Sam. 17:32-51; Sal. 18, superskripsiyon) Tungod  sa dakong mahigugmaong kalulot sa Diyos, si David natukmod sa pagsulat: “Daghang butang ang imong nabuhat, Oh Jehova nga Diyos ko, bisan ang imong katingalahang mga buhat ug ang imong mga hunahuna nganhi kanamo; walay mausa nga ikatandi kanimo.”—Sal. 40:5.

¹⁹ Gihigugma pag-ayo ni David si Jehova ug buot niyang dayegon Siya sa bug-os nga kasingkasing ug hunahuna. (Basaha ang Salmo 40:8-10.) Pagpanglabay sa katuigan, wala gayod magbasol si David nga iyang gigugol ang iyang kinabuhi sa pagsimba sa matuod nga Diyos. Gipakabahandi niya ang pag-alagad sa Diyos—usa ka tuboran sa kalipay nga walay sama. Sa dihang tigulang na si David, siya miingon: “Ikaw mao ang akong paglaom, Oh Soberanong Ginoong Jehova, ang akong pagsalig sukad sa akong pagkabatan-on. Ug bisan hangtod sa pagkatigulang ug pagkaubanon, Oh Diyos, ayaw ako pagbiyai.” (Sal. 71:5, 18) Mas milig-on ang pagsalig ni David kang Jehova ug mas nasuod siya Kaniya, bisan pag nagkaluya na ang iyang lawas.

20. Nganong ang pag-alagad sa Diyos mao ang labing maayong paagi sa pagkinabuhi?

²⁰ Ang kinabuhi ni Josue, David, ug Timoteo naghatag ug dugang pamatuod nga ang pag-alagad kang Jehova mao ang labing maayong paagi sa pagkinabuhi. Ang lumalabay nga materyal nga mga bentaha gumikan sa pagpangagpas ug sekular nga karera wala ra sa kumingking sa dumalayong mga kaayohan nga imong madawat gumikan sa ‘pag-alagad kang Jehova sa bug-os nimong kasingkasing ug kalag.’ (Jos. 22:5) Kon wala ka pa magpahinungod sa imong kaugalingon kang Jehova pinaagi sa pag-ampo, suknaa ang imong kaugalingon, ‘Unsa may nakapugong kanako sa pagkahimong Saksi ni Jehova?’ Kon ikaw bawtismado na nga magsisimba ni Jehova, gusto ka bang magmalipayon pa ang imong kinabuhi? Nan, pangab-ot ug dugang pribilehiyo sa pag-alagad, ug padayon sa pag-uswag sa espirituwal. Ipakita sa sunod nga artikulo kon sa unsang paagi mouswag ka sa espirituwal pinaagi sa pagsundog sa panig-ingnan ni apostol Pablo.

Unsay Imong Tubag?

• Paghatag ug duha ka rason kon nganong angay kitang moalagad sa Diyos.

• Unsay nakatabang kang Timoteo sa pagdesisyon sa pag-alagad sa Diyos?

• Nganong angay kang mobarog nga malig-on sa dihang mag-atubang ug paglutos?

• Unsang mga kahigayonan sa pag-alagad ang mahimong bukas kanimo?

[Mga Pangutana sa Pagtuon]

[Hulagway sa panid 18]

Ang pag-alagad kang Jehova mao ang labing maayong paagi sa pagkinabuhi

[Hulagway sa panid 19]

Matubag ba nimo ang mga pangutana bahin sa imong pagtuo?