Kon Giunsa Pag-organisar ang Nagamandong Lawas

ANG Nagamandong Lawas sa mga Saksi ni Jehova gilangkoban sa mga lalaki nga dedikado ug dinihogang mga alagad sa Diyos. Sila naglihok ingong mga hawas sa matinumanon ug maalamong ulipon nga matang, nga may responsabilidad sa pagtagana sa espirituwal nga pagkaon, pagtultol ug pagdasig sa pagsangyaw sa Gingharian sa tibuok yuta.—Mat. 24:14, 45-47.

Ang ilang mga miting ginahimo kada semana, kasagaran sa adlawng Miyerkoles, mao nga sila nagkahiusa sa pagbuhat. (Sal. 133:1) Ang mga membro sa Nagamandong Lawas nag-alagad usab sa nagkalainlaing komite. Aron maatiman ang intereses sa Gingharian, ang matag komite adunay gidumalang buluhaton sama sa daklit nga gipakita sa ubos.

◼ KOMITE SA MGA KOORDINETOR: Kini gilangkoban sa koordinetor sa matag komite sa Nagamandong Lawas, ug sa usa ka sekretaryo nga membro usab sa Nagamandong Lawas. Gitino niini nga ang tanang komite nagalihok nga hapsay ug episyente. Giatiman usab niini ang dagkong mga emerhensiya, paglutos, katalagman, ug ubang mga kahimtang nga nakaapektar sa mga Saksi ni Jehova sa tibuok yuta nga nanginahanglag dinaliang pagtagad.

◼ KOMITE SA KAWANIHAN: Silay gisaligan sa pagdumala sa mga kahikayan alang sa personal ug espirituwal nga kaayohan ug sa pagtabang sa mga membro sa pamilyang Bethel sa tibuok yuta. Silay nagdumala sa pagpili ug pagdapit sa bag-ong mga membro ug sa pagtubag sa mga pangutana bahin sa ilang pag-alagad sa Bethel.

◼ KOMITE SA PAGPATIK: Kini ang nagsuperbisar sa pag-imprenta, pagpatik, ug pagpadala sa mga literatura sa Bibliya sa tibuok kalibotan. Gidumala niini ang mga imprentahan ug mga propiedad nga gipanag-iya ug gipadagan sa nagkalainlaing korporasyon nga gigamit sa mga Saksi ni Jehova. Giseguro niini nga magamit ug maayo ang salapi nga giamot alang sa tibuok kalibotang buluhaton sa Gingharian.

◼ KOMITE SA PAG-ALAGAD: Silay nagdumala sa pagsangyaw ug sa mga butang nga may kalabotan sa mga kongregasyon, payunir, ansiyano, ug nagapanawng mga magtatan-aw. Ilang giatiman ang pag-andam sa Atong Ministeryo sa Gingharian ug ang pagdapit sa mga estudyante sa Tunghaang Gilead ug sa Tunghaan sa Ministeryal nga Pagbansay o MTS. Human sa pagtungha, ilang ihatag sa mga estudyante ang mga asaynment.

◼ KOMITE SA PAGTUDLO: Gitagana niini ang mga materyal nga itudlo diha sa mga asembliya, kombensiyon, ug mga tigom sa kongregasyon. Gihikay niini ang espirituwal nga mga programa alang sa mga membro sa pamilyang Bethel, ug gidumala ang nagkalainlaing tunghaan sama sa Tunghaang Gilead, Tunghaan sa Payunir nga Pag-alagad o PSS, ug ang pag-andam sa girekord nga audio ug video nga mga programa.

◼ KOMITE SA PAGSULAT: Responsabilidad niini ang pagtino nga ang espirituwal nga pagkaon mapatik ug maapod-apod ngadto sa mga igsoon ug sa publiko. Ilang tubagon ang mga pangutana bahin sa Bibliya ug aprobahan ang mga eskrip sa drama ug mga laraw sa pakigpulong. Gidumala usab niini ang paghubad nga ginahimo sa tibuok yuta.

Gipakasama ni apostol Pablo ang kongregasyon sa mga dinihogan ngadto sa lawas sa tawo. Iyang gipasiugda ang hinungdanong papel sa tanang membro ug ang ilang pagsaligay, paghigugmaay, ug pagtinabangay sa pagbuhat sa buluhaton nga hinatag sa Diyos. (Roma 12:4, 5; 1 Cor. 12:12-31) Ang Ulo, si Jesu-Kristo, maoy nagtagana sa mga panginahanglan aron ang mga membro sa lawas magtinabangay ug mohimsog sa espirituwal. (Efe. 4:15, 16; Col. 2:19) Niining paagiha, ang Nagamandong Lawas giorganisar aron sa pagpanguna sumala sa pagtultol ni Jehova kanila pinaagi sa balaang espiritu.