Tinguhaa ang “Pagkabalaan Diha sa Kahadlok sa Diyos”

SA PAGPAILA kang Jehova nga Diyos ingon nga labing balaan, ang Bibliya nag-ingon: “Balaan, balaan, balaan si Jehova.” (Isa. 6:3; Pin. 4:8) Ang Hebreohanon ug Gregong mga pulong alang sa “pagkabalaan” nagpasabot ug kaputli o relihiyosong kahinlo, ang pagkahimong bulag sa kahugawan. Ang pagkabalaan sa Diyos nagtumong sa iyang bug-os nga kahingpitan sa moral.

Dili ba angayng dahomon sa balaang Diyos, si Jehova, nga ang iyang mga magsisimba mahimong balaan, nga sila magmahinlo sa pisikal, moral, ug espirituwal? Tin-awng gipakita sa Bibliya nga buot ni Jehova nga mahimong balaan ang iyang katawhan. Atong mabasa sa 1 Pedro 1:16: “Kinahanglan kamong magmabalaan, tungod kay ako balaan.” Masundog kaha sa dili hingpit nga mga tawo ang pagkabalaan ni Jehova? Oo, apan dili sa bug-os nga diwa. Kita maisip nga balaan atubangan sa Diyos kon kita nag-alagad kaniya nga hinlo sa espirituwal ug naghupot ug suod nga relasyon uban kaniya.

Nan, sa unsang paagi atong mahuptan ang kahinlo diha sa kalibotan nga hugaw ug moral? Unsang mga buhat ang angay natong likayan? Unsa nga mga sinultihan ug panggawi ang kinahanglan natong bag-ohon? Atong tan-awon kon unsay atong makat-onan bahin niini gikan sa mga kinahanglanon sa Diyos alang sa mga Hudiyo nga namalik sa ilang yutang natawhan gikan sa Babilonya niadtong 537 W.K.P.

‘Aduna Unyay Usa ka Dalan sa Pagkabalaan’

Gitagna ni Jehova nga ang iyang katawhan nga nadestiyero sa Babilonya makabalik sa ilang yutang natawhan. Ang maong tagna sa kapasig-ulian naundan niini nga pasalig: “Tinong aduna unyay usa ka dakong dalan didto, usa gayod ka agianan; ug kini tawgong Dalan sa Pagkabalaan.” (Isa. 35:8a) Gipakita niining mga pulonga nga gawas nga buksan ni Jehova ang dalan aron makapauli ang mga Hudiyo sa ilang dapit, siya nagpasalig usab kanila nga iya silang panalipdan sa ilang pagpamauli.

Alang sa iyang modernong-adlaw nga mga alagad sa yuta, si Jehova nagbukas sa “Dalan sa Pagkabalaan” pahilayo gikan sa Dakong Babilonya, ang tibuok-kalibotang imperyo sa bakak nga relihiyon. Niadtong 1919 iyang gipagawas ang dinihogang mga Kristohanon gikan sa espirituwal nga pagkaulipon sa bakak nga relihiyon, ug anam-anam nilang gihinloan ang ilang pagsimba gikan sa tanang bakak nga mga pagtulon-an. Isip mga magsisimba ni Jehova karong adlawa, kita nagatagamtam ug hinlo, malinawong espirituwal nga kahimtang diin kita makasimba kang Jehova ug may malinawong relasyon uban kaniya ug sa atong isigkatawo.

Ang mga membro sa “gamayng panon” sa dinihogang mga Kristohanon ug ang nagkadaghang “dakong panon” sa “ubang mga karnero” nagasubay sa dalan nga balaan ug sila nagdapit sa uban sa  pagduyog kanila. (Luc. 12:32; Pin. 7:9; Juan 10:16) Ang “Dalan sa Pagkabalaan” bukas alang sa tanan nga andam ‘motugyan sa ilang mga lawas nga usa ka halad nga buhi, balaan, dalawaton sa Diyos.’—Roma 12:1.

“Ang mga Mahugaw Dili Moagi Niana”

Sa 537 W.K.P., kinahanglang tumanon sa namauli nga mga Hudiyo ang usa ka hinungdanong kinahanglanon. Maylabot sa kon kinsa ang kuwalipikado sa paglakaw diha sa “Dalan sa Pagkabalaan,” ang Isaias 35:8b nag-ingon: “Ang mga mahugaw dili moagi niana. Ug kini maoy alang sa usa nga magalakaw diha sa dalan, ug walay mga buangbuang nga maglatagaw diha niana.” Sanglit ang katuyoan sa mga Hudiyo sa ilang pagbalik sa Jerusalem mao man ang pagpasig-uli sa putli nga pagsimba, wala gayoy dapit didto ang mga tawo nga may hakog nga mga motibo, kulag pagtahod sa sagradong mga butang, o mahugaw sa espirituwal. Kinahanglang huptan niadtong mga namalik ang hataas nga mga sukdanan ni Jehova sa moral. Silang naninguha sa pabor sa Diyos karong adlawa kinahanglang motuman sa samang kinahanglanon. Sila kinahanglang maninguha sa “pagkabalaan diha sa kahadlok sa Diyos.” (2 Cor. 7:1) Nan, unsang mga buhat ang angay natong likayan?

Si apostol Pablo misulat: “Dayag ang mga buhat sa unod, ug kini mao ang pakighilawas, kahugawan, malaw-ayng panggawi.” (Gal. 5:19) Ang pakighilawas naglakip sa tanang matang sa seksuwal nga mga buhat nga nalangkit ang paggamit sa mga kinatawo sa mga dili magtiayon. Ang malaw-ayng panggawi naglakip sa “seksuwal nga kahilayan; unodnong tinguha; walay-ulaw nga panggawi; bastos nga panggawi.” Tataw nga sukwahi gayod sa pagkabalaan ni Jehova ang pakighilawas ug malaw-ayng panggawi. Busa, ang mga tawong nagpadayon sa pagbuhat niining mga butanga dili takos nga mahimong bahin sa Kristohanong kongregasyon o sila palagpoton gikan niini. Ingon usab niana ang sangpotan sa mga nagabuhat ug grabeng kahugawan, nga naglakip “sa tanang matang sa kahugawan uban ang kadalo.”—Efe. 4:19.

Ang “kahugawan” maoy malangkobong termino nga naglakip sa daghang makasasalang mga buhat. Ang Gregong pulong alang niini nagkahulogan ug pagkadili-putli o bisan unsang matang sa kahugawan—sa panggawi, sinultihan, ug sa pagpakiglangkit sa relihiyosong mga buhat sa mga dili-magtutuo. Kini naglakip sa mga buhat sa kahugawan nga tingali dili ra igong basehanan sa hudisyal nga pagtagad. a Apan naninguha ba gayod sa dalan sa pagkabalaan ang mga tawong nagabatasan sa maong hugaw nga mga buhat?

Pananglitan usa ka Kristohanon ang misugod sa pagtan-awg pornograpiya nga tinago-tago. Samtang magkadako ang iyang mahugaw nga tinguha, anam-anam nga mohuyang ang iyang determinasyon nga magpabiling hinlo atubangan ni Jehova. Tingali wala pa siya moabot sa punto sa paghimog grabeng kahugawan, apan wala na siya magpadayon sa pagpamalandong lamang sa ‘bisan unsang butang maputli, dungganon, hamili, ug dalayegon.’ (Filip. 4:8) Ang pornograpiya mahugaw ug makadaot gayod sa atong relasyon ngadto sa Diyos. Dili nato angayng hisgotan sa atong taliwala ang bisan unsang matang sa kahugawan.—Efe. 5:3.

Tagda ang laing pananglitan. Ibutang ta nga ang usa ka Kristohanon nagabatasan sa paghimog masturbasyon—tinuyong pagpukaw sa seksuwal  nga gana—inubanan man kinig pornograpiya o wala. Bisan pag wala sa Bibliya ang terminong “masturbasyon,” dili ba makadaot gayod kini sa hunahuna ug emosyon? Kon batasanon sa usa kining maong kahugawan, dili ba madaot man gayod ang iyang relasyon kang Jehova ug siya mahimong hugaw sa panglantaw sa Diyos? Ipadapat gayod nato ang tambag ni apostol Pablo nga “hinloan nato ang atong kaugalingon sa tanang kahugawan sa unod ug espiritu” ug ‘patyon ang atong mga sangkap sa lawas nga anaa sa yuta maylabot sa pakighilawas, kahugawan, seksuwal nga gana, makadaot nga tinguha, ug hakog nga pangibog.’—2 Cor. 7:1; Col. 3:5.

Kining kalibotana nga gimandoan ni Satanas nagtugot ug nagpasiugda pa gani sa mahugawng panggawi. Tingali dili sayon ang pagsukol sa tentasyon sa paghimog mahugawng butang. Apan ang matuod nga mga Kristohanon dili gayod ‘molakaw sama sa paglakaw usab sa kanasoran diha sa pagkawalay-pulos sa ilang mga kaisipan.’ (Efe. 4:17) Kon atong likayan ang mahugawng panggawi, sa tinago-tago man o sa dayag, si Jehova magtugot kanato nga padayong molakaw diha sa “Dalan sa Pagkabalaan.”

“Wala Unyay Leyon Didto”

Aron padayong matagamtam ang pabor sa balaang Diyos, si Jehova, ang pipila kinahanglan tingaling mohimog dagkong kausaban sa ilang panggawi ug sinultihan. Bahin sa “Dalan sa Pagkabalaan,” ang Isaias 35:9 nag-ingon: “Wala unyay leyon didto, ug ang mga manunukob nga ihalas nga mananap dili moadto didto.” Sa mahulagwayong diwa, ang mga tawong bangis ug agresibog linihokan ug sinultihan gipakasama sa ihalas nga mga mananap. Wala gayod silay luna diha sa bag-ong kalibotan sa Diyos nga anaa ang pagkamatarong. (Isa. 11:6; 65:25) Busa hinungdanon gayod nga kadtong gustong makabaton sa pag-uyon sa Diyos mobiya sa maong samag-mananap nga mga personalidad ug maninguha sa pagkabalaan.

Kita giawhag sa Kasulatan: “Isalikway ninyo ang tanang mapangdaot nga kayugot ug kasuko ug kapungot ug sininggitay ug mapasipalahong sinultihan uban sa tanang pagkadaotan.” (Efe. 4:31) Sa Colosas 3:8, atong mabasa: “Isalikway gayod kining tanan gikan kaninyo, kapungot, kasuko, pagkadaotan, mapasipalahong sinultihan, ug malaw-ayng pulong gikan sa inyong baba.” Ang ekspresyong “mapasipalahong sinultihan” nga gigamit niining duha ka teksto nagtumong sa makadaot, matamayon, o mapasipalahon nga mga pulong.

Karong adlawa, kaylap kaayo ang makapasakit ug malaw-ay nga sinultihan, bisan sa sulod sa panimalay. Ang mga magtiayon mosultig masakit, mapintas, o matamayon nga mga pulong sa usag usa ug ngadto sa ilang mga anak. Kining mga pulonga dili angayng madunggan diha Kristohanong mga panimalay.—1 Cor. 5:11.

Ang Pagtinguha sa “Pagkabalaan Diha sa Kahadlok sa Diyos”—Usa ka Panalangin!

Pagkadakong pribilehiyo ang pag-alagad sa balaang Diyos, si Jehova! (Jos. 24:19) Bililhon kaayo ang espirituwal nga paraiso nga gihatag ni Jehova kanato. Ang paghupot sa atong panggawi nga hinlo sa panglantaw ni Jehova mao gayod ang labing maayong dalan sa kinabuhi.

Haduol na kaayong matuman ang gisaad sa Diyos nga mahimong Paraiso ang yuta. (Isa. 35:1, 2, 5-7) Ang mga nangandoy niini ug padayong nagkinabuhi sa diyosnong paagi makapuyo unya didto. (Isa. 65:17, 21) Busa, hinaot nga himoon nato ang atong maarangan aron padayong simbahon ang Diyos uban ang espirituwal nga kahinlo ug padayong huptan ang suod nga relasyon uban kaniya.

[Footnote]

[Hulagway sa panid 26]

Unsay gikinahanglan aron ang mga Hudiyo makalakaw diha sa “Dalan sa Pagkabalaan”?

[Hulagway sa panid 27]

Ang pornograpiya makadaot sa imong relasyon kang Jehova

[Hulagway sa panid 28]

“Isalikway ninyo ang tanang . . . sininggitay ug mapasipalahong sinultihan”