Unsaon Nato Pagtagad ang Uban?

“Sumala sa buot ninyo nga pagabuhaton sa mga tawo nganha kaninyo, mao usab ang inyong pagabuhaton ngadto kanila.”—LUC. 6:31.

1, 2. (a) Unsa ang Wali sa Bukid? (b) Unsay atong hisgotan niining artikuloha ug sa sunod?

 SI Jesu-Kristo mao gayod ang Dakong Magtutudlo. Sa dihang ang iyang relihiyosong mga kaaway nagpadalag mga polis aron sa pagdakop kang Jesus, sila namalik nga wala siya madala ug nag-ingon: “Wala pa gayoy laing tawo nga nakasulti ug sama niini.” (Juan 7:32, 45, 46) Ang Wali sa Bukid maoy usa sa hanas nga mga pakigpulong ni Jesus. Kini nahitala sa kapitulo 5 hangtod 7 sa Ebanghelyo ni Mateo, ug giasoy ang susamang impormasyon sa Lucas 6:20-49. a

² Ang sagad gitawag ug Bulawanong Lagda lagmit mao ang labing iladong bahin sa maong wali. Kabahin kini sa atong tinagdan sa uban. “Sumala sa buot ninyo nga pagabuhaton sa mga tawo nganha kaninyo, mao usab ang inyong pagabuhaton ngadto kanila,” matod ni Jesus. (Luc. 6:31) Ug pagkamaayo ang iyang mga gibuhat alang sa mga tawo! Si Jesus nag-ayog mga masakiton ug nagbanhaw pag mga patay. Apan ang mga tawo mas napanalanginan sa dihang gidawat nila ang maayong balita nga iyang giwali. (Basaha ang Lucas 7:20-22.) Isip mga Saksi ni Jehova, malipay usab kitang mosangyaw sa maayong balita sa Gingharian. (Mat. 24:14; 28:19, 20) Kining artikuloha ug ang sunod maghisgot sa mga pulong ni Jesus bahin niining buluhatona ug sa ubang punto sa Wali sa Bukid maylabot sa kon unsay angay natong pagtagad sa uban.

Mahimong Malumog-Buot

3. Unsay kahulogan sa pagkamalumog-buot?

³ Si Jesus miingon: “Malipayon ang mga malumog-buot, sanglit sila magapanunod sa yuta.” (Mat. 5:5) Diha sa Kasulatan, ang pagkamalumog-buot dili pagkamahuyang. Kini mao ang paggawi ug pagsulti sa malumong paagi nga nahiuyon sa mga balaod sa Diyos. Kini nga tinamdan madayag diha sa atong pagpakiglabot sa atong isigkatawo. Pananglitan, kita ‘dili mobalos kang bisan kinsa ug daotan tungod sa daotan.’—Roma 12:17-19.

4. Nganong malipayon ang mga malumog-buot?

⁴ Malipayon ang mga malumog-buot kay “sila magapanunod sa yuta.” Si Jesus, kinsa “malumog-buot ug mapainubsanon sa kasingkasing,” mao ang “tinudlo nga manununod sa tanang butang” ug busa siya ang pangunang Manununod sa yuta. (Mat. 11:29; Heb. 1:2; Sal. 2:8) Gitagna nga ang Mesiyanikong “anak sa tawo” makabaton ug kaubang mga magmamando sa langitnong Gingharian. (Dan. 7:13, 14, 21, 22, 27) Ingong “kaubang mga manununod ni Kristo,” ang 144,000 ka malumog-buot nga mga dinihogan makapanunod usab sa yuta. (Roma 8:16, 17; Pin. 14:1) Ang ubang malumog-buot gantihan ug walay-kataposang kinabuhi dinhi sa yuta ubos sa Gingharian.—Sal. 37:11.

5. Unsay epekto kanato kon atong sundogon ang kalumo ni Kristo?

⁵ Kon bagis ang atong panglihok, ang uban lagmit dili gustong makig-uban kanato ug molikay pa tingali. Apan kon kita malumo sama kang Kristo, kita mahimong madanihon ug makapalig-ong mga membro sa kongregasyon. Ang kalumo maoy usa sa mga bunga nga ipatungha sa aktibong puwersa sa Diyos diha kanato kon kita ‘nagkinabuhi ug naglakaw pinaagi sa espiritu.’ (Basaha ang Galacia 5:22-25.) Buot gayod natong mahilakip sa mga tawo nga malumog-buot nga giniyahan sa balaang espiritu ni Jehova!

 Malipayon Gayod ang mga Maluluy-on!

6. Unsa ang talagsaong mga hiyas sa “mga maluluy-on”?

⁶ Sa Wali sa Bukid ni Jesus, siya miingon usab: “Malipayon ang mga maluluy-on, sanglit sila pakitaan ug kaluoy.” (Mat. 5:7) “Ang mga maluluy-on” maoy mabination ug magpakitag konsiderasyon ug kahingawa usab sa mga timawa. Milagrosong giayo ni Jesus ang mga masakiton kay siya “naluoy” o “giabot ug kaluoy.” (Mat. 14:14; 20:34) Busa kon kita may kahingawa ug konsiderasyon, mahimo gayod kitang maluluy-on.—Sant. 2:13.

7. Unsay gibuhat ni Jesus tungod sa iyang kaluoy?

⁷ Sa dihang gitagbo si Jesus ug daghang tawo samtang nagpaingon sa usa ka dapit aron siya makapahulay unta, “siya giabot ug kaluoy kanila, tungod kay sila nahisama sa mga karnero nga walay magbalantay.” Busa, “siya misugod sa pagtudlo kanila ug daghang butang.” (Mar. 6:34) Malipayon gayod kitang mosangyaw usab sa uban sa mensahe sa Gingharian ug sultihan sila bahin sa dakong kaluoy sa Diyos!

8. Nganong malipayon ang mga maluluy-on?

⁸ Malipayon ang mga maluluy-on kay sila “gipakitaan ug kaluoy.” Kon magmaluluy-on kita sa mga tawo, sila magmaluluy-on usab kanato. (Luc. 6:38) Dugang pa, si Jesus miingon: “Kon kamo magapasaylo sa mga tawo sa ilang kalapasan, pasayloon usab kamo sa inyong langitnong Amahan.” (Mat. 6:14) Kadtong mga maluluy-on lamang ang mapasaylo sa ilang mga sala ug mauyonan sa Diyos, nga makapalipay gayod kanila.

Kon Nganong Malipayon “ang mga Makigdaiton”

9. Unsay atong panggawi kon kita makigdaiton?

⁹ Gihisgotan ni Jesus ang laing hinungdan sa kalipay sa dihang siya miingon: “Malipayon ang mga makigdaiton, sanglit sila pagatawgon nga ‘mga anak sa Diyos.’” (Mat. 5:9) Kon kita makigdaiton, dili kita mokonsentir o moapil-apil sa bisan unsa nga ‘makapabulag niadtong suod sa usag usa’ sama sa pagbutangbutang. (Prov. 16:28) Pinaagi sa pulong ug buhat, makigdait kita sa mga tawo sa sulod ug gawas sa Kristohanong kongregasyon. (Heb. 12:14) Ilabinang buhaton nato kutob sa atong maarangan nga makaplagan kitang may pakigdait uban kang Jehova nga Diyos.—Basaha ang 1 Pedro 3:10-12.

10. Nganong malipayon “ang mga makigdaiton”?

¹⁰ Si Jesus miingon nga malipayon “ang mga makigdaiton sanglit sila pagatawgon nga ‘mga anak sa Diyos.’” Tungod sa pagpasundayag ug pagtuo diha kang Jesus ingong ang Mesiyas, ang dinihogang mga Kristohanon makadawat sa “katungod nga mahimong mga anak sa Diyos.” (Juan 1:12; 1 Ped. 2:24) Komosta ang makigdaitong “ubang mga karnero”? Si Jesus mahimong ilang “Amahang Walay Kataposan” sulod sa iyang Usa ka Libo ka Tuig nga Pagmando uban sa iyang langitnong mga isigkamanununod. (Juan 10:14, 16; Isa. 9:6; Pin. 20:6) Pagkatapos sa iyang Milenyong Pagmando, ang maong mga makigdaiton mahimong yutan-ong mga anak sa Diyos sa bug-os nga diwa.—1 Cor. 15:27, 28.

11. Unsaon nato pagtagad ang uban kon kita giniyahan sa “kaalam nga gikan sa itaas”?

¹¹ Aron makabaton kitag suod nga relasyon uban kang Jehova, “ang Diyos sa kalinaw,” kinahanglan natong sundogon ang iyang mga hiyas, apil ang pagkamakigdaiton. (Filip. 4:9) Kon magpagiya kita sa “kaalam nga gikan sa itaas,” magmakigdaiton kita sa uban. (Sant. 3:17) Oo, kita magmalipayon kon kita makigdaiton.

 “Ipadan-ag ang Imong Kahayag”

12. (a) Unsay gisulti ni Jesus bahin sa espirituwal nga kahayag? (b) Sa unsang paagi ikapadan-ag nato ang atong kahayag?

¹² Gitagad nato ang mga tawo sa labing maayong paagi sa dihang gitabangan nato sila nga makadawat sa espirituwal nga kahayag gikan sa Diyos. (Sal. 43:3) Gisultihan ni Jesus ang iyang mga tinun-an nga sila “ang kahayag sa kalibotan” ug giawhag sila sa pagpadan-ag sa ilang kahayag aron ang mga tawo makakita sa ilang “maayong mga buhat” ngadto sa uban. Ang resulta niini mao nga ang mga tinun-an makasangyaw sa maayong balita “atubangan sa mga tawo,” nga makahatag ug kaayohan kanila. (Basaha ang Mateo 5:14-16.) Karong adlawa, atong gipadan-ag ang atong kahayag pinaagi sa pagbuhat ug maayo ngadto sa atong mga silingan ug sa pagpakigbahin sa pagsangyaw sa maayong balita “sa tibuok kalibotan,” nga mao, “sa tanang kanasoran.” (Mat. 26:13; Mar. 13:10) Dako gayod natong kadungganan ang pagbuhat niini!

13. Tungod sa unsa nga kita mamatikdan?

¹³ “Ang usa ka siyudad dili matago kon mahimutang ibabaw sa bukid,” matod ni Jesus. Ang bisan unsang siyudad makita dayon kon mahimutang ibabaw sa bukid. Sa susama, kita mamatikdan tungod sa atong maayong mga buhat ingong mga magsasangyaw sa Gingharian ug ilabina ang atong pagkamakasaranganon ug kaputli.—Tito 2:1-14.

14. (a) Unsay dagway sa mga lampara sa unang siglo? (b) Unsay ipasabot nga dili nato tagoan ang espirituwal nga kahayag ilalom sa “bukag nga sukdanan”?

¹⁴ Naghisgot si Jesus bahin sa pagdagkot sa usa ka lampara ug pagpahimutang niini, dili ilalom sa bukag, kondili sa tangkawan aron madan-agan ang tanan nga anaa sa balay. Sa unang siglo, ang kasagarang lampara maoy usa ka sudlanan nga gama sa yutang-kulonon nga may pabilo ug sagad tubilag lana sa olibo aron mosiga. Kana kasagarang ibutang sa kahoy o metal nga tungtonganan aron ‘malamdagan ang tanan nga anaa sa balay.’ Ang mga tawo dili magdagkot ug lampara ug magpahimutang niini ilalom sa “bukag nga sukdanan.” Dili buot ni Jesus nga itago sa iyang mga tinun-an ang ilang kahayag ilalom sa simbolikong bukag nga sukdanan. Busa kinahanglan natong ipadan-ag ang atong kahayag, nga dili tagoan o ugomon lang ang Kasulatanhong kamatuoran tungod sa pagsupak o paglutos.

15. Unsay epekto sa atong “maayong mga buhat” diha sa pipila ka tawo?

¹⁵ Human sa paghisgot ni Jesus bahin sa nagdan-ag nga lampara nga iyang giingnan ang iyang mga tinun-an: “Sa susama palamdaga ang inyong kahayag atubangan sa mga tawo, aron ilang makita ang inyong maayong mga buhat ug maghimaya sa inyong Amahan nga anaa sa mga langit.” Tungod sa atong “maayong mga buhat,” ang pipila ‘naghimaya’ sa Diyos kay sila nahimong iyang mga alagad. Makapadasig gayod kini kanato nga magpadayon sa ‘pagsidlak ingong mga magbabanwag sa kalibotan’!—Filip. 2:15.

16. Kay kita mao “ang kahayag sa kalibotan,” unsay kinahanglan natong buhaton?

¹⁶ Kay kita mao “ang kahayag sa kalibotan,” angay kitang makigbahin sa pagsangyaw sa maayong balita sa Gingharian ug sa paghimog mga tinun-an. Apan aduna pay lain nga kinahanglan natong buhaton. “Magpadayon sa paglakaw ingon nga mga anak sa kahayag,” misulat si apostol Pablo, “kay ang mga bunga sa kahayag naglangkob sa tanang matang sa pagkamaayo ug pagkamatarong ug kamatuoran.”  (Efe. 5:8, 9) Kinahanglang sulondan ang atong panggawi. Angay gayod natong sundon ang tambag ni apostol Pedro: “Hupti ninyo ang maayong panggawi taliwala sa mga nasod, aron nga, sa butang nga ilang gisulti batok kaninyo ingong mga mamumuhat ug daotan, sila ingong resulta sa inyong maayong mga buhat nga niini sila mga saksing-nakakita maghimaya sa Diyos sa adlaw sa iyang pagsusi.” (1 Ped. 2:12) Apan unsay angayng buhaton kon motungha ang kabingkilan tali sa mga isigkamagtutuo?

“Pakigdait Una sa Imong Igsoon”

17-19. (a) Unsa ang “gasa” nga gihisgotan sa Mateo 5:23, 24? (b) Unsa ka hinungdanon ang pagpakigdait sa usa ka igsoon, ug giunsa kini pagpakita ni Jesus?

¹⁷ Sa Wali sa Bukid ni Jesus, siya nagpasidaan sa iyang mga tinun-an nga dili magpadayon sa pagkapungot ug pagkayugot batok sa usa ka igsoon. Hinunoa, angayng tinguhaon nila nga makigdait sa madali sa igsoon nga nasilo. (Basaha ang Mateo 5:21-25.) Matikdi pag-ayo ang tambag ni Jesus. Kon nagdala ka sa imong gasa ngadto sa halaran ug didto nahinumdom nga ang imong igsoon may butang nga batok kanimo, unsay angay nimong buhaton? Angay nimong biyaan ang imong gasa atubangan sa halaran samtang molakaw ka aron makigdait sa imong igsoon. Human niana, makabalik ka ug makahalad sa imong gasa.

¹⁸ Ang “gasa” sagad maoy usa ka halad nga itanyag tingali sa usa ka tawo sa templo ni Jehova. Hinungdanon gayod ang mga halad nga hayop, kay kana gisugo sa Diyos ingong bahin sa pagsimba sa Israel ubos sa Moisesnong Balaod. Apan kon nahinumdom ka nga ang imong igsoon may butang batok kanimo, ang paghusay niana mas hinungdanon pa kay sa paghalad sa imong gasa. “Biyai ang imong gasa didto sa atubangan sa halaran, ug lakaw,” matod ni Jesus. “Pakigdait una sa imong igsoon, ug dayon, sa makabalik ka na, ihalad ang imong gasa.” Angayng unahon ang pagpakig-uli sa usa ka igsoon nga nasilo kay sa paghalad ug usa ka gasa nga gisugo sa Balaod.

¹⁹ Si Jesus wala maghisgot sa tinong mga halad ug espesipikong mga kalapasan. Busa, ang bisan unsang halad angayng biyaan una kon ang usa ka tawo nahinumdom nga ang iyang igsoon may butang nga batok kaniya. Kon ang ihalad maoy buhing hayop, kana biyaan “atubangan sa halaran” sa halad-nga-sinunog diha sa sawang sa mga saserdote sa templo. Human mahusay ang kabingkilan, ang nakasala makabalik ug kana ikahalad na.

20. Nganong angay kitang makig-husay sa madali kon kita nasuko sa usa ka igsoon?

²⁰ Gikan sa punto-debista sa Diyos, ang atong relasyon uban sa atong mga igsoon maoy hinungdanong bahin sa matuod nga pagsimba. Ang mga halad nga hayop walay bili kang Jehova kon ang naghalad niana walay maayong pagtagad o grabehan sa ilang isigkatawo. (Miq. 6:6-8) Busa, nag-awhag si Jesus sa iyang mga tinun-an nga ‘makighusay  sa madali.’ (Mat. 5:25) Susama ang gisulat ni Pablo: “Pagkapungot, apan ayaw pagpakasala; ayaw pasalopi sa adlaw ang inyong kasuko, ni maghatag ug luna sa Yawa.” (Efe. 4:26, 27) Kon kita may katarongang masuko, angay kitang makighusay sa madali aron dili magpadayon ang kasuko ug dili kana pahimuslan sa Yawa.—Luc. 17:3, 4.

Tahora Kanunay ang Uban

21, 22. (a) Sa unsang paagi mapadapat nato ang tambag ni Jesus nga bag-o pa natong nahisgotan? (b) Unsay atong hisgotan sa sunod artikulo?

²¹ Ang atong pagrepaso sa pipila ka gipamulong ni Jesus sa iyang Wali sa Bukid angayng makatabang kanato sa pagpakitag kalulot ug pagtahod sa uban. Bisan pag kitang tanan dili hingpit, mapadapat nato ang tambag ni Jesus kay siya ug ang atong langitnong Amahan wala magdahom ug labaw pa kay sa atong mahimo. Pinaagi sa pag-ampo, tim-os nga pagpaningkamot, ug sa tabang ni Jehova nga Diyos, kita mahimong malumog-buot, maluluy-on, ug makigdaiton. Atong ikapadan-ag ang espirituwal nga kahayag nga molamdag sa kahimayaan ni Jehova. Dugang pa, kita makahimo sa pagpakigdait uban sa atong igsoon kon kana gikinahanglan.

²² Aron madawat ang atong pagsimba kang Jehova, kinahanglang maayo kitang motagad sa atong mga silingan. (Mar. 12:31) Sa sunod artikulo, atong hisgotan ang ubang bahin sa Wali sa Bukid nga makatabang gayod kanato sa padayong pagbuhat ug maayo ngadto sa uban. Apan, human mapamalandong ang nahisgotan nang mga punto gikan sa dili-hitupngang pakigpulong ni Jesus, kita makapangutana, ‘Maayo ba ang akong pagtagad sa uban?’

[Footnote]

Unsay Imong Tubag?

• Unsay ipasabot nga mahimong malumog-buot?

• Nganong malipayon “ang mga maluluy-on”?

• Sa unsang paagi atong ikapadan-ag ang atong kahayag?

• Nganong angay kitang ‘makigdait sa madali sa atong igsoon’?

[Mga Pangutana sa Pagtuon]

[Hulagway sa panid 4]

Ang pagsangyaw sa mensahe sa Gingharian usa ka hinungdanon kaayong paagi sa pagpadan-ag sa atong kahayag

[Hulagway sa panid 5]

Ang mga Kristohanon kinahanglang sulondan sa diyosnong panggawi

[Hulagway sa panid 6]

Buhata ang imong maarangan nga makigdait sa imong igsoon