Gamhanan Bisag May mga Kahuyangan

HAYAN nalisdan ka sa pagsumpo sa imong mga kahuyangan. Kini samag alimatok nga lisod tangtangon. Lagmit naghunahuna ka nga dili gayod nimo kini mabuntog, o basin gitandi nimo ang imong kaugalingon sa uban ug naghunahuna ka nga dili ka takos ug nga sila mas maayo kay kanimo. Sa laing bahin, lagmit nag-antos ka sa sakit nga nakapaluya kanimo, nga tungod niana nawad-an ka nag gana nga mabuhi. Bisan unsa pay hinungdan, lagmit nawad-an ka nag paglaom. Tingali mibati ka sama kang Job, kinsa mituaw sa Diyos: “Oh nga sa Sheol imo unta akong tagoan, nga imo unta akong ibutang sa tago hangtod nga ang imong kasuko motalikod, nga imo unta akong tagalan ug panahon ug hinumdoman ako!”—Job 14:13.

Sa unsang paagi mabuntog nimo ang maong pagbati? Bisan lisod tingali kining buhaton, kalimti una kono ang imong mga problema. Pananglitan, mahimo nimong hinuktokan ang mga pangutana ni Jehova sa iyang matinumanong alagad nga si Job: “Diin ka man sa pagtukod ko sa kalibotan? Sultihi ako, kon imong nahibaloan ang pagsabot. Kinsay nagbuot sa mga sukod niini, kon ugaling ikaw nahibalo, o kinsa bay naglatid sa pising igsusukod sa ibabaw niana?” (Job 38:4, 5) Kon atong palandongon ang kahulogan nianang mga pangutanaha, hayan matukmod kita sa pag-ila sa pagkalabaw sa kaalam ug gahom ni Jehova. Aduna siyay maayong rason kon nganong iyang gitugotan nga magpadayon ang mga kahimtang karon nga maoy hinungdan sa atong mga kasakit.

“Tunok sa Unod”

Ang laing matinumanong alagad sa Diyos mihangyo kang Jehova nga kuhaon ang iyang “tunok sa unod,” usa ka problema nga padayong naghasol kaniya. Katulo mihangyo si apostol Pablo sa Diyos nga makalingkawas unta siya sa maong pagsulay. Wala kita mahibalo kon unsa kadto, apan sama sa usa ka tunok, kadto  mahimong makawala sa kalipay ni Pablo sa pag-alagad kang Jehova. Sumala pa niya, daw kanunay siyang gisagpa. Agig tubag, si Jehova miingon kaniya: “Ang akong dili-takos nga kalulot igo na alang kanimo; kay ang akong gahom ginahingpit diha sa kaluyahon.” Wala kuhaa ni Jehova ang maong tunok sa unod. Kinahanglang antoson kana ni Pablo. Bisan pa niana, siya miingon: “Sa dihang ako maluya, ako gamhanan hinuon.” (2 Cor. 12:7-10) Unsay buot niyang ipasabot?

Ang problema ni Pablo nagpadayon. Bisan pa niana, wala kana makapugong kaniya sa pagpalampos sa iyang ministeryo. Si Pablo misalig kang Jehova ug kanunay siyang nangayog tabang kaniya. (Filip. 4:6, 7) Sa ulahing bahin sa iyang kinabuhi dinhi sa yuta, si Pablo nakaingon: “Gibugno ko na ang maayong bugno, natapos ko na ang pagdagan sa lumba, nasunod ko na ang pagtuo.”—2 Tim. 4:7.

Si Jehova naggamit ug dili-hingpit nga mga tawo sa pagpalampos sa iyang kabubut-on bisan pa sa ilang mga kahuyangan ug mga problema, ug siya ang takos pasidunggan niini. Siya makahatag kanilag giya ug kaalam sa pagsagubang sa ilang mga kalisdanan ug sa paghupot sa ilang kalipay diha sa pag-alagad kaniya. Oo, makahimo siya sa paggamit sa dili-hingpit nga mga tawo sa paghimog talagsaong mga butang bisan pa sa ilang mga kahuyangan.

Gisulti ni Pablo ang hinungdan kon nganong wala kuhaa sa Diyos ang iyang tunok sa unod: “Aron ako dili mobati nga hilabihang nabayaw.” (2 Cor. 12:7) Ang “tunok” ni Pablo nagpahinumdom kaniya sa iyang mga limitasyon ug kini nagtabang kaniya nga magmapaubsanon. Nahiuyon kana sa gitudlo ni Jesus: “Si bisan kinsa nga magabayaw sa iyang kaugalingon igapaubos, ug si bisan kinsa nga magapaubos sa iyang kaugalingon pagabayawon.” (Mat. 23:12) Pinaagi sa mga pagsulay maugmad sa mga alagad sa Diyos ang pagkamapaubsanon ug makaamgo sila nga kinahanglan silang mosalig kang Jehova aron makapabiling matinumanon. Busa sama ni Pablo, sila ‘makapanghambog diha kang Jehova.’—1 Cor. 1:31.

Mga Kahuyangan nga Wala Nimo Mamatikdi

Ang pipila tingali adunay mga kahuyangan nga wala nila mamatikdi o lisod nilang dawaton. Pananglitan, ang usa ka tawo tingali sobra ka masaligon sa kaugalingon. (1 Cor. 10:12) Kahuyangan usab sa dili hingpit nga mga tawo ang tinguha nga mainila.

Si Joab, nga nahimong heneral sa kasundalohan ni Haring David, maisog ug abilidaran. Apan si Joab nakahimog seryosong sala nga nagpaila nga siya sobra ka masaligon sa kaugalingon ug hakog sa gahom. Siya walay-kokaluoy nga nagpatay sa duha ka heneral sa kasundalohan. Una, iyang gipatay si Abner agig panimalos. Sa ulahi, sa pagtimbaya konohay sa iyang ig-agaw nga si Amasa, gigunitan niya ang bungot ni Amasa aron halokan siya, ug dayon giduslak niya siya sa espada nga diha sa iyang wala nga kamot. (2 Sam. 17:25; 20:8-10) Niadtong panahona, si Amasa na ang heneral sa kasundalohan puli ni Joab, ug gipahimuslan ni Joab ang maong higayon aron patyon ang iyang karibal kay lagmit naghunahuna siya nga mahibalik siya sa iyang posisyon. Masabtan nga wala niya buntoga ang iyang kahuyangan, lakip na ang iyang hakog nga ambisyon. Daotan ang iyang gibuhat ug wala siya magbasol niana. Sa hapit nang mamatay si Haring David, iyang gisugo ang iyang anak nga si Solomon sa pagseguro nga masilotan si Joab sa iyang pagkadaotan.—1 Hari 2:5, 6, 29-35.

Kinahanglan nga dili kita magpadaog sa atong daotang mga tinguha; kita makahimo sa pagbuntog niana. Una, kinahanglang susihon nato kon unsay atong kahuyangan ug dawaton kana. Dayon mohimo kitag aksiyon. Mahimo kitang moduol kang Jehova pinaagi sa pag-ampo nga mangayog tabang kaniya sa pagbuntog niana. Magkugi usab kita sa pagtuon sa iyang Pulong ug mangitag paagi nga atong madaog ang atong mga kahuyangan. (Heb. 4:12) Lagmit nagkinahanglan kanag mapinadayonong paningkamot ug dili gayod kita angayng maluya. Samtang dili pa kita hingpit, lagmit padayon kitang makigbugno sa atong mga kahuyangan. Si Pablo mismo nakasinati niana, ug siya misulat: “Ang buot nakong buhaton, wala nako buhata; apan ang akong gidumtan mao ang akong ginabuhat.” Apan nahibalo kita nga si Pablo wala magpadaog sa iyang mga kahuyangan, nga daw dili niya makontrolar ang iyang mga lihok. Hinunoa, siya nakigbugno sa iyang mga kahuyangan ug misalig sa tabang sa Diyos pinaagi kang Jesu-Kristo. (Roma 7:15-25) Diha sa usa pa ka sulat, si  Pablo miingon: “Ako nagmakmak sa akong lawas ug naghimo niini nga samag ulipon, aron, human ako makawali sa uban, ako dili sa unsa mang paagi mahimong dili-inuyonan.”—1 Cor. 9:27.

Kahuyangan usab sa mga tawo nga pakamatarongon ang kaugalingon. Ato kanang mabuntog pinaagi sa pagbaton sa panglantaw ni Jehova ug sa pagpadapat sa tambag ni Pablo alang sa mga Kristohanon: “Kasilagi ang daotan, hawiri ang maayo.” (Roma 12:9) Aron molampos sa pagpakigbisog sa atong mga kahuyangan, kita kinahanglang magmatinud-anon, magmalahutayon, ug may disiplina sa kaugalingon. Si David mihangyo kang Jehova: “Dalisaya ang akong mga rinyon ug ang akong kasingkasing.” (Sal. 26:2) Siya nahibalo nga ang Diyos makahimo gayod sa pagtino kon unsa ang atong mga kahuyangan ug motabang usab kanato sa dihang kita manginahanglag tabang. Kon kita mosanong sa paggiya ni Jehova pinaagi sa iyang Pulong ug balaang espiritu, kita mouswag ug sa ngadtongadto atong mabuntog ang atong mga kahuyangan.

Ang pipila tingali adunay problema nga dili nila masagubang nga silasila ra. Ang mga ansiyano sa kongregasyon makahimo sa pagtabang ug pagdasig kanila. (Isa. 32:1, 2) Apan maalamon nga dili magdahom nga mawala ang tanang problema. Adunay mga problema nga dili gayod masulbad samtang nagpuyo pa kita niining sistemaha sa mga butang. Bisan pa niana, daghan ang nakakat-on sa pagsagubang niana ug tungod niini sila nagmalipayon.

Si Jehova Motabang Gayod Kanato

Bisan unsa pay atong problema niining malisod nga mga panahon, kita makasalig nga si Jehova mogiya ug motabang gayod kanato. Ang Bibliya nag-awhag kanato: “Busa, ipaubos ang inyong kaugalingon ilalom sa gamhanang kamot sa Diyos, aron nga kamo iyang bayawon sa takdang panahon; samtang inyong itugyan kaniya ang tanan ninyong mga kabalaka, kay siya may kahingawa kaninyo.”—1 Ped. 5:6, 7.

Tagda ang kasinatian ni Kathy, kinsa dugay nang nag-alagad sa Bethel. Pagkahibalo niya nga ang iyang bana dunay sakit nga Alzheimer, siya naghunahuna nga basin dili niya maagwanta ang kahimtang sa iyang bana. Sa adlaw-adlaw, siya kinahanglang mangaliyupo kang Jehova alang sa kaalam ug kalig-on. Sa nagkagrabe na ang kahimtang sa iyang bana, ang mahigugmaong mga igsoong  lalaki naningkamot sa pagsusi kon unsaon pag-atiman ang masakiton, ug ang mga igsoong babaye usab nagpalig-on kaniya. Si Kathy gitabangan ni Jehova pinaagi niining mga igsoona, ug siya nakahimo sa pag-atiman sa iyang bana sulod sa 11 ka tuig hangtod nga kini namatay. Siya miingon: “Inubanag mga luha, ako kinasingkasing nga nagpasalamat kang Jehova tungod sa iyang tabang; kanay hinungdan kon nganong ako nakalahutay. Abi kog di nako mahimo ang akong mga obligasyon, apan natuman nako kana sulod sa taas nga panahon bisan pag luya na kaayo ko tungod sa sobrang kakapoy!”

Tabang Aron Mabuntog ang mga Kahuyangan

Kon mahugno ang pagbati sa usa, siya lagmit maghunahuna nga si Jehova dili maminaw sa iyang pangamuyo panahon sa kalisdanan. Nan, maayong palandongon ang mga pulong ni David sa dihang nagbasol siya sa seryosong sala nga iyang nahimo uban ni Batseba: “Usa ka kasingkasing nga gun-ob ug dugmok, Oh Diyos, dili mo pagatamayon.” (Sal. 51:17) Tungod kay mahinulsolon si David, siya nahibalo nga makaduol siya sa Diyos ug makalaom nga kaluy-an siya. Kini nga hiyas ni Jehova gibanaag ni Jesus. Si Mateo, nga usa sa magsusulat sa Ebanghelyo, nagpadapat sa mga pulong ni Isaias kang Jesus, nga nag-ingon: “Walay nabun-og nga tangbo nga iyang gupokon, ug walay nagbaga nga pabilong lino nga iyang palongon.” (Mat. 12:20; Isa. 42:3) Sa dinhi pa si Jesus sa yuta, siya nagpakitag kaluoy sa mga timawa ug sa mga dinaogdaog. Wala niya pabug-ati ang mga tawo nga nag-antos, nga nahisamag pabilo nga nagakaawop na. Hinunoa, siya mahigugmaong nagtabang kanila aron ilang bation nga sila gimahal sa Diyos. Mao kanay iyang gibuhat sa dinhi pa siya sa yuta. Dili ka ba motuo nga si Jesus maluluy-on gihapon ug nga siya nakasabot sa atong mga kahuyangan? Matikdi nga ang Hebreohanon 4:15 nag-ingon nga Siya “mobati sa atong mga kaluyahon [o, kahuyangan].”

Sa dihang misulat bahin sa iyang “tunok sa unod,” si Pablo nakaamgo nga ang gahom ni Kristo nahisamag “tolda” ibabaw kaniya. (2 Cor. 12:7-9) Iyang nasinati ang panalipod sa Diyos pinaagi ni Kristo, sama sa usa ka tawo nga mobating luwas sulod sa tolda sa dihang dili maayo ang panahon. Sama kang Pablo, dili kita angayng magpadaog sa atong mga kahuyangan ug mga problema. Aron magpabiling lig-on sa espirituwal, pahimuslan nato ang tanang tagana ni Jehova pinaagi sa iyang yutan-ong organisasyon. Buhaton nato ang tanan natong maarangan ug mosalig nga si Jehova maggiya gayod sa atong mga lakang. Sa dihang masinati nato ang tabang sa gahom sa Diyos sa pagbuntog sa atong mga kahuyangan, kita makaingon sama kang Pablo: “Sa dihang ako maluya, ako gamhanan hinuon.”—2 Cor. 12:10.

[Hulagway sa panid 3]

Si Pablo padayong nag-ampo alang sa giya ni Jehova aron molampos sa iyang ministeryo

[Hulagway sa panid 5]

Gitudlo ni Haring David si Joab ingong pangulo sa iyang kasundalohan

[Hulagway sa panid 5]

Si Joab nakakitag paagi sa pagpatay sa iyang karibal nga si Amasa

[Hulagway sa panid 6]

Ang mga ansiyano maghatag ug Kasulatanhong giya nga makatabang kanato sa pagsagubang sa atong mga problema