Magpasakop sa Awtoridad ni Jehova
Magpasakop sa Awtoridad ni Jehova
“Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.”—1 JUAN 5:3.
1, 2. (a) Nganong daghan karon ang dili ganahang magpasakop sa awtoridad? (b) Tinuod ba nga independente kadtong mga nangangkon nga dili mapinasakopon? Ipatin-aw.
KARONG adlawa, daghan ang dili ganahang magpasakop sa awtoridad sa laing tawo. Ang mga tawong dili mapinasakopon sagad moingon, “Walay magbuot nako kon unsay angay nakong buhaton.” Apan, independente ba gayod kining mga tawhana? Dili! Ang kadaghanan kanila nagpahiuyon sa mga sukdanan sa uban nga ‘nagpaumol sumala niining sistemaha sa mga butang.’ (Roma 12:2) Sila dili gayod independente kondili “mga ulipon sa pagkadunot,” sumala sa mga pulong ni apostol Pedro. (2 Ped. 2:19) Sila nagalakaw “uyon sa sistema sa mga butang niining kalibotana, uyon sa magmamando sa awtoridad sa hangin,” si Satanas nga Yawa.—Efe. 2:2.
2 Ang usa ka awtor magarbohong miingon: “Dili ako magpatambag sa akong mga ginikanan o sa pari o sa ministro o sa guru (magtutudlo sa Hinduismo) o sa Bibliya kon unsay angay himoon.” Tinuod, ang pipila lagmit nag-abuso sa ilang awtoridad ug tingali dili takos sa atong pagkamasinugtanon. Apan rason ba kini aron dili na kita modawat ug pagtultol gikan sa uban? Ang daklit nga pagbasa sa ulo sa mga balita diha sa mantalaan motaganag makapasubong tubag. Daotan ang gidangatan sa dihang ang kadaghanan wala magpagiya sa panahon nga sila nagkinahanglan gayod niana.
Ang Atong Panglantaw sa Awtoridad
3. Giunsa pagpakita sa unang-siglong mga Kristohanon nga wala sila magpasakop sa awtoridad sa tawo nga sukwahi sa kabubut-on sa Diyos?
3 Isip mga Kristohanon, lahi ang atong panglantaw nianang iya sa kalibotan. Wala kita nagatuman sa bisan unsang gipabuhat kanato kon wala nato kana hisabti. Sa laing bahin, may mga panahon nga dili kita magpasakop sa kabubut-on sa uban bisan pag anaa sila sa awtoridad. Kini ang gihimo sa unang-siglong mga Kristohanon. Pananglitan, sa dihang gimandoan ang mga apostoles nga moundang sa pagsangyaw, wala sila mahadlok sa hataas nga saserdote ug sa uban pang mga opisyal sa Sanhedrin. Wala nila isalikway ang hustong panggawi aron lang mopahiuyon sa awtoridad sa tawo.—Basaha ang Buhat 5:27-29.
4. Unsang mga pananglitan sa Hebreohanong Kasulatan ang nagpakita nga daghan sa katawhan sa Diyos ang wala mopasignunot sa kon unsay popular?
4 Sa wala pa si Jesus dinhi sa yuta, gipasundayag sa daghang alagad sa Diyos ang susamang determinasyon. Pananglitan, si Moises “midumili nga tawgong anak sa anak nga babaye ni Paraon, nga mipalabi nga daogdaogon uban sa katawhan sa Diyos,” bisan pag kana nakahaling “sa kasuko sa hari.” (Heb. 11:24, 25, 27) Si Jose wala magpatental sa asawa ni Potipar, bisan pag siya nahibalo nga ang maong babaye may awtoridad sa pagpanimalos ug paghimo kaniyag daotan. (Gen. 39:7-9) “Gihukom ni Daniel sa iyang kasingkasing nga dili niya hugawan ang iyang kaugalingon sa lamiang mga pagkaon sa hari,” bisan pag nalisdan sa pagdawat sa iyang baroganan ang pangunang opisyal sa palasyo sa Babilonya. (Dan. 1:8-14) Kini nga mga pananglitan nagpakita nga sukad pa kaniadto, ang katawhan sa Diyos determinadong mobuhat sa kon unsay husto bisag unsa pay ilang dangatan. Sila wala mopasignunot sa mga tawo aron lang mauyonan. Mao usab kana ang angay natong buhaton.
5. Sa unsang paagi ang atong tinamdan sa awtoridad lahi nianang iya sa kalibotan?
5 Ang atong maisogong baroganan wala magpasabot nga kita gahian; ni kita sama sa pipila ka tawo nga mirebelde aron ipakita ang ilang pagsupak sa kagamhanan. Hinunoa, mas gipalabi nato nga magpasakop sa awtoridad ni Jehova kay sa awtoridad ni bisan kinsang tawo. Sa dihang magkasumpaki ang balaod sa tawo ug ang balaod sa Diyos, dili kita malisdan sa pagpili kon kinsay atong tumanon. Sama sa mga apostoles sa unang siglo, sugton nato ang Diyos ingong magmamando inay ang mga tawo.
6. Nganong labing maayo ang pagsugot sa mga sugo ni Jehova?
6 Unsay nakatabang kanato sa pagpasakop sa awtoridad sa Diyos? Kita miuyon sa giingon sa Proverbio 3:5, 6: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” Masaligon kita nga ang tanang gipangayo sa Diyos kanato maoy alang sa atong kaayohan. (Basaha ang Deuteronomio 10:12, 13.) Sa pagkatinuod, gipaila ni Jehova ang iyang kaugalingon ngadto sa mga Israelinhon ingong “ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.” Dayon siya midugang: “Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba, ug ang imong pagkamatarong sama sa mga balod sa dagat.” (Isa. 48:17, 18) Kita misalig sa maong mga pulong. Kombinsido kita nga ang pagsunod sa mga sugo sa Diyos maoy alang gayod sa atong kaayohan.
7. Unsay angay natong buhaton kon wala nato hisabti sa bug-os ang usa ka sugo diha sa Pulong sa Diyos?
7 Kita magpasakop sa awtoridad ni Jehova ug mosugot kaniya bisan pag wala nato hisabti sa bug-os ang mga rason sa pipila ka kinahanglanon sa Diyos nga nasulat sa iyang Pulong. Dili kini basta pagtuo lamang nga walay pasikaranan; kini gipasukad sa pagsalig. Kapahayagan kini sa atong kinasingkasing nga pagsalig nga si Jehova nahibalo sa kon unsay maayo alang kanato. Ang atong pagkamasinugtanon maoy kapahayagan usab sa atong gugma, tungod kay si apostol Juan misulat: “Kini ang kahulogan sa paghigugma sa Diyos, nga atong bantayan ang iyang mga sugo.” (1 Juan 5:3) Apan aduna pay laing aspekto sa atong pagkamasinugtanon nga dili nato angayng kalimtan.
Pagbansay sa Atong mga Gahom sa Pagsabot
8. Sa unsang paagi ang ‘pagbansay sa atong mga gahom sa pagsabot’ nalangkit sa pagpasakop sa awtoridad ni Jehova?
8 Ang Bibliya nag-ingon nga angay natong ‘bansayon ang atong mga gahom sa pagsabot aron sa pag-ila sa maayo ug sa daotan.’ (Heb. 5:14) Busa, ang atong tumong maoy dili basta pagsugot lang sa balaod sa Diyos nga wala sa buot; hinunoa, gusto kitang makakat-on sa “pag-ila sa maayo ug sa daotan” sumala sa mga sukdanan ni Jehova. Buot natong makita ang kaalam sa mga dalan ni Jehova, aron kita makasulti usab sa giingon sa salmista: “Ang imong balaod ania sa akong kahiladman nga mga bahin.”—Sal. 40:8.
9. Sa unsang paagi atong mapasibo ang atong tanlag sa mga sukdanan ni Jehova, ug nganong kinahanglan nato kining buhaton?
9 Aron masabtan ang bili sa mga balaod sa Diyos, kinahanglan natong pamalandongon ang atong nabasa sa Bibliya. Pananglitan, sa dihang atong makat-onan ang bahin sa usa ka kinahanglanon ni Jehova, kita makasukna: ‘Nganong kining maong sugo o prinsipyo maalamon? Nganong ang pagsugot niini makahatag gayod kanakog kaayohan? Unsay daotang nahitabo sa mga wala mosunod sa tambag sa Diyos bahin niini?’ Busa kon atong gipasibo ang atong tanlag sa mga paagi ni Jehova, lagmit makahimo kitag mga desisyon nga nahiuyon sa iyang kabubut-on. Kita ‘padayong makasabot kon unsa ang kabubut-on ni Jehova’ ug dayon kita magmasinugtanon. (Efe. 5:17) Kini dili kanunayng sayon.
Si Satanas Naningkamot sa Pagpahuyang sa Awtoridad sa Diyos
10. Unsa ang usa ka bahin diin si Satanas naningkamot nga pahuyangon ang awtoridad sa Diyos?
10 Dugay nang naningkamot si Satanas nga pahuyangon ang awtoridad sa Diyos. Iyang gipasundayag sa daghang paagi ang iyang independenteng espiritu. Tagda pananglitan ang bahin sa kawalay pagtahod sa mga tawo sa kahikayan sa Diyos sa kaminyoon. Nagpuyopuyo ang pipila, ug ang uban nangitag paagi sa pagbungkag sa ilang kaminyoon. Sila lagmit mouyon sa giingon sa usa ka inilang aktres: “Imposible alang sa lalaki ug babaye nga magbaton ug usa lamang ka kapikas.” Siya midugang: “Wala koy nailhan nga maunongon o gustong magmaunongon sa iyang kapikas.” Ang usa ka sikat nga aktor, kinsa napakyas sa iyang mga pagpakigrelasyon, miingon usab: “Nagduhaduha ko kon kinaiyahan ba nato nga magmaunongon gayod sa atong kapikas sa tibuok natong kinabuhi.” Mas maayo kon atong pangutan-on ang atong kaugalingon, ‘Nagpasakop ba ako sa awtoridad ni Jehova bahin sa kaminyoon, o ang akong panghunahuna naapektohan ba sa panglantaw sa kalibotan nga ang kaminyoon temporaryo lamang?’
11, 12. (a) Nganong malisdan tingali ang mga batan-on sa pagpasakop sa awtoridad ni Jehova? (b) Pag-asoy ug usa ka kasinatian nga nagpakitang dili maalamon ang paglapas sa mga balaod ug prinsipyo ni Jehova.
11 Ikaw ba usa ka batan-on sulod sa organisasyon ni Jehova? Kon mao, lagmit ikaw ang ilabinang gipuntirya ni Satanas sa iyang mga paningkamot nga pahuyangon ang awtoridad ni Jehova. Ang “mga tinguha nga iya sa pagkabatan-on” ug ang pagpit-os sa imong mga isigkabatan-on lagmit motukmod kanimo sa paghinapos nga mabug-at ang mga balaod sa Diyos. (2 Tim. 2:22) Ayawg tugoti nga mahitabo kana. Paningkamoti nga imong makita ang kaalam sa mga sukdanan sa Diyos. Pananglitan, ang Bibliya nag-ingon kanimo nga ‘mokalagiw gikan sa pakighilawas.’ (1 Cor. 6:18) Sa makausa pa, pangutan-a ang imong kaugalingon: ‘Nganong maalamon kining sugoa? Sa unsang paagi makahatag kanakog kaayohan ang pagsugot niini?’ Tingali aduna kay nailhan nga wala mamati sa tambag sa Diyos ug nag-antos tungod sa mga sangpotanan niini. Malipayon ba gayod sila karon? Mas maayo ba ang ilang kinabuhi karon kay sa dihang suod pa silang nakig-uban sa organisasyon ni Jehova? Nabatonan ba gayod nila ang pipila ka sekreto sa kalipay nga wala mabatoni sa ubang mga alagad sa Diyos?—Basaha ang Isaias 65:14.
12 Tagda ang di pa dugayng gisulti ni Sharon nga usa ka Kristohanon: “Tungod sa akong paglapas sa balaod sa Diyos, ako natakboyan sa makamatayng sakit nga AIDS. Kanunay nakong gihandom ang daghang katuigan nga ako malipayong nag-alagad kang Jehova.” Siya nakaamgo nga dili gayod maalamon ang paglapas sa mga balaod ni Jehova ug nga angay unta niya kining gitahod pag-ayo. Ang mga balaod ni Jehova manalipod kanato. Pito ka semana lamang ang milabay human nga gisulat ni Sharon ang mga pulong sa ibabaw, siya namatay. Ingon sa gipakita sa pait nga kasinatian ni Sharon, walay kaayohan nga ikahatag si Satanas sa mga tawo nga nahimong bahin niining daotang sistema. Ingong “amahan sa bakak,” siya nagsigeg saad apan wala motuman, sama sa iyang gihimo kang Eva. (Juan 8:44) Sa pagkatinuod, makaayo gayod ang pagpasakop sa awtoridad ni Jehova.
Magbantay Batok sa Pagkaindependente
13. Unsa ang usa ka bahin diin kinahanglan kitang magbantay batok sa pagkaindependente?
13 Sa pagpasakop sa awtoridad ni Jehova, kita kinahanglang magbantay batok sa pagkaindependente. Ang pagkamagarbohon mopabati kanato nga kita wala manginahanglag giya ni bisan kinsa. Pananglitan, kita tingali dili mamati sa tambag sa mga nagapanguna sa katawhan sa Diyos. Gigamit sa Diyos ang matinumanon ug maalamong ulipon sa pagtaganag espirituwal nga pagkaon sa hustong panahon. (Mat. 24:45-47) Kinahanglang mapainubsanon natong ilhon nga kini ang paagi ni Jehova sa pag-atiman sa iyang katawhan karon. Sundoga ang matinumanong mga apostoles. Sa dihang ang pipila ka tinun-an nangapandol ug wala na mosunod kaniya, gisukna ni Jesus ang mga apostoles: “Buot ba usab ninyong mobiya?” Si Pedro mitubag: “Ginoo, kang kinsa man kami moadto? Ikaw mao ang may mga pulong mahitungod sa kinabuhing walay kataposan.”—Juan 6:66-68.
14, 15. Nganong angay kitang magmapaubsanon sa pagpadapat sa tambag sa Bibliya?
14 Ang pagpasakop sa awtoridad ni Jehova naglangkit sa atong pagsanong sa iyang tambag diha sa iyang Pulong. Pananglitan, ang matinumanon ug maalamong ulipon kanunayng nag-awhag nga “magtukaw kita ug maghupot ug maayong panghunahuna.” (1 Tes. 5:6) Haom gayod kini niining kataposang mga adlaw diin daghan ang ‘mahigugmaon sa ilang kaugalingon ug mahigugmaon sa salapi.’ (2 Tim. 3:1, 2) Mahimo ba kitang maapektohan ning maong kaylap nga mga tinamdan? Oo. Ang pagpangagpas sa sekular nga mga tumong makapaduka kanato sa espirituwal, o basin kita mahimong materyalistiko. (Luc. 12:16-21) Busa, maalamon gayod nga atong ipadapat ang tambag sa Bibliya ug likayan ang hinakog nga pagkinabuhi nga kaylap kaayo sa kalibotan ni Satanas!—1 Juan 2:16.
15 Ang espirituwal nga pagkaon gikan sa matinumanon ug maalamong ulipon gidalit diha sa mga kongregasyon pinaagi sa tinudlong mga ansiyano. Ang Bibliya nag-awhag kanato: “Magmasinugtanon kamo sa mga nagapanguna kaninyo ug magmapinasakopon, kay sila nagabantay sa inyong mga kalag ingon nga sila maoy maghatag ug husay; aron buhaton nila kini uban ang kalipay ug dili uban ang pagpanghupaw, kay kini makadaot kaninyo.” (Heb. 13:17) Nagpasabot ba kini nga ang mga ansiyano dili na masayop? Wala gayod! Ang Diyos mas labawng nakakita sa ilang mga kahuyangan. Apan, siya nagdahom nga kita magmapinasakopon. Ang atong pagpaluyo sa mga ansiyano, bisan pag sila dili-hingpit, nagpakita nga kita nagpasakop sa awtoridad ni Jehova.
Ang Bili sa Pagkamapaubsanon
16. Sa unsang paagi atong ikapakita ang pagtahod kang Jesus isip Ulo sa Kristohanong kongregasyon?
16 Angay natong hinumdoman kanunay nga si Jesus ang Ulo sa kongregasyon. (Col. 1:18) Usa kana ka rason kon nganong mapaubsanon kitang magpasakop sa pagtultol sa tinudlong mga ansiyano, nga maghatag kanilag “labaw sa kasagaran nga pagtahod.” (1 Tes. 5:12, 13) Siyempre, ikapakita sa mga ansiyano nga sila mapinasakopon usab pinaagi sa maampingong pagtudlo sa kongregasyon sa mensahe sa Diyos, dili sa ilang opinyon. ‘Dili nila sayloan ang mga butang nga nahisulat’ aron iduso ang ilang kaugalingong ideya.—1 Cor. 4:6.
17. Nganong peligroso ang ambisyosong tinamdan?
17 Angayng magbantay ang tanang membro sa kongregasyon batok sa pagpangita sa kaugalingong himaya. (Prov. 25:27) Dayag nga nalit-agan niana ang usa ka tinun-an nga nahimamat ni Juan. Siya misulat: “Si Diotrefes, nga gustong makabaton sa unang dapit taliwala kanila, wala modawat sa bisan unsa gikan kanamo nga may pagtahod. Busa, kon ako makaanha na, hinumdoman ko ra unya ang iyang mga buhat nga padayon niyang ginabuhat, nga nagayawit bahin kanamo pinaagi sa daotang mga pulong.” (3 Juan 9, 10) Kana makahatag kanatog pagtulon-an karon. Angay natong lukahon ang bisan unsang ambisyosong tinamdan nga atong mamatikdan sa atong kaugalingon. Ang Bibliya nag-ingon kanato: “Ang garbo nagauna sa pagkahagsa, ug ang mapahitas-ong espiritu nagauna sa pagkapukan.” Kinahanglang suklan sa mga nagpasakop sa awtoridad sa Diyos ang lit-ag sa pagkamapangahason, kay kon dili, mosangpot kana sa kaulawan.—Prov. 11:2; 16:18.
18. Unsay makatabang kanato sa pagpasakop sa awtoridad ni Jehova?
18 Oo, himoang tumong nga isalikway ang espiritu sa kalibotan sa pagkaindependente ug magpasakop sa awtoridad ni Jehova. Matag karon ug unya palandonga ug pabilhi ang imong dakong pribilehiyo sa pag-alagad kang Jehova. Ang imong pagkahimong sakop sa katawhan sa Diyos maoy pamatuod nga siya nagkabig kanimo pinaagi sa iyang balaang espiritu. (Juan 6:44) Pabilhi gayod ang imong relasyon uban sa Diyos. Himoa kutob sa imong maarangan aron ipakita nga ikaw nagsalikway sa espiritu sa pagkaindependente ug nga ikaw nagpasakop sa awtoridad ni Jehova.
Nahinumdom Ka Ba?
• Unsay nalangkit sa pagpasakop sa awtoridad ni Jehova?
• Sa unsang paagi ang pagbansay sa atong mga gahom sa pagsabot nalangkit sa pagpasakop sa awtoridad ni Jehova?
• Sa unsang mga bahin nga si Satanas naningkamot sa pagpahuyang sa awtoridad sa Diyos?
• Nganong hinungdanon ang pagkamapaubsanon sa pagpasakop sa awtoridad ni Jehova?
[Mga Pangutana sa Pagtuon]
[Hulagway sa panid 18]
“Kinahanglang among sugton ang Diyos ingong magmamando inay ang mga tawo”
[Hulagway sa panid 20]
Maalamon gayod kanunay ang pagsunod sa mga sukdanan sa Diyos