Mga Pangunang Punto sa Sulat Ngadto sa mga Taga-Roma
Ang Pulong ni Jehova Buhi
Mga Pangunang Punto sa Sulat Ngadto sa mga Taga-Roma
PANAHON sa iyang ikatulong misyonaryong panaw sa mga tuig 56 K.P., si apostol Pablo miabot sa siyudad sa Corinto. Iyang nasayran nga managlahi ang opinyon sa Kristohanong mga Hudiyo ug Hentil didto sa Roma. Buot ni Pablo nga magkahiusa sila diha kang Kristo, busa iya silang gisulatan.
Sa maong sulat, gisaysay ni Pablo kon sa unsang paagi ang usa ipahayag nga matarong ug kon sa unsang paagi sila angayng magkinabuhi. Ang maong sulat magpauswag sa atong kahibalo sa Diyos ug sa iyang Pulong, magpasiugda sa dili-takos nga kalulot sa Diyos, ug magtuboy sa hinungdanong papel ni Kristo sa atong kaluwasan.—Heb. 4:12.
IPAHAYAG NGA MATARONG—SA UNSANG PAAGI?
“Ang tanan nakasala ug wala makaabot sa himaya sa Diyos,” misulat si Pablo. ‘Ingong walay bayad nga gasa nga sila gipahayag nga matarong pinaagi sa dili-takos nga kalulot sa Diyos tungod sa pagpagawas pinaagi sa lukat nga gibayad ni Kristo Jesus.’ Si Pablo usab miingon: “Ang tawo ipahayag nga matarong pinaagi sa pagtuo nga bulag sa mga buhat sa balaod.” (Roma 3:23, 24, 28) Pinaagi sa pagtuo sa “usa ka buhat sa pagkamatarong,” ang dinihogang mga Kristohanon ug ang mga membro sa “dakong panon” sa “ubang mga karnero” mahimong ‘ipahayag nga matarong’—ang mga dinihogan makabatog kinabuhi sa langit ingong kaubang manununod ni Kristo ug ang dakong panon ingong mga higala sa Diyos, nga may paglaom nga makalabang-buhi sa “dakong kasakitan.”—Roma 5:18; Pin. 7:9, 14; Juan 10:16; Sant. 2:21-24; Mat. 25:46.
“Magpakasala ba diay kita tungod kay kita dili ilalom sa balaod kondili ilalom sa dili-takos nga kalulot?” si Pablo nangutana. “Dili gayod unta kana mahitabo!” siya mitubag. “Kamo mga ulipon . . . , sa sala man nga mosangpot sa kamatayon o sa pagkamasinugtanon nga mosangpot sa pagkamatarong,” si Pablo misaysay. (Roma 6:15, 16) “Kon inyong gipatay ang mga binuhatan sa lawas pinaagi sa espiritu, kamo mabuhi,” siya miingon.—Roma 8:13.
Tubag sa mga Pangutana Bahin sa Kasulatan:
1:24-32—Ang imoral ba nga panggawi nga gihisgotan dinhi nagtumong sa mga Hudiyo o sa mga Hentil? Bisan pag mapadapat kini sa maong duha ka grupo, ang pangunang gitumong ni Pablo mao ang apostatang mga Israelinhon kaniadto. Sila nasayod sa matarong nga balaod sa Diyos, apan “sila wala mouyon nga ilhon ang Diyos sumala sa tukmang kahibalo.” Sila mga salawayon gayod.
3:24, 25—Sa unsang paagi ang “lukat nga gibayad ni Kristo Jesus” nagpasaylo sa “mga sala nga nahitabo sa nangagi” una pa sa iyang kamatayon? Ang unang Mesiyanikong tagna nga natala sa Genesis 3:15 natuman sa tuig 33 K.P. sa dihang gipatay si Jesus sa estaka sa pagsakit. (Gal. 3:13, 16) Sa dihang gisulti ni Jehova ang maong tagna, ang bili sa lukat nabayran na sumala sa iyang panglantaw, tungod kay wala gayoy makapugong sa Diyos sa pagpalampos sa iyang mga katuyoan. Busa pinasukad sa umaabot nga halad lukat ni Jesu-Kristo, pasayloon ni Jehova ang mga anak ni Adan nga nagpasundayag ug pagtuo niana nga saad. Ang lukat nagpaposible usab nga mabanhaw ang mga alagad sa Diyos nga nagkinabuhi sa wala pa si Jesus.—Buh. 24:15.
6:3-5—Unsay kahulogan sa pagbawtismo ngadto kang Kristo Jesus ug bawtismo sa iyang kamatayon? Sa dihang gidihogan ni Jehova ang mga sumusunod ni Kristo pinaagi sa balaang espiritu, sila nahiusa kang Jesus ug nahimong membro sa lawas ni Kristo nga mao ang kongregasyon, diin siya mismo mao ang Ulo. (1 Cor. 12:12, 13, 27; Col. 1:18) Mao kini ang kahulogan sa pagbawtismo ngadto kang Kristo Jesus. Ang dinihogang mga Kristohanon usab ‘gibawtismohan ngadto sa kamatayon ni Kristo’ sa pagkaagi nga sila nakasinatig mga pag-antos ug ilang gitalikdan ang paglaom nga mabuhing walay kataposan dinhi sa yuta. Ang ilang kamatayon maoy usa ka pagsakripisyo, sama sa kamatayon ni Jesus, apan dili makahimo sa paglukat. Ang ilang pagkanabawtismohan sa kamatayon ni Kristo makompleto sa dihang sila mamatay ug banhawon sa langitnong kinabuhi.
7:8-11—Sa unsang paagi ang ‘sala naaghat pinaagi sa sugo’? Ang Balaod nagtabang sa mga tawo aron bug-os nilang masabtan kon unsa ang sala ug nahimo silang mas mahunahunaon nga sila makasasala. Tungod niana, nakita nila ang daghang sayop nga ilang nahimo, ug daghan ang nakaamgo nga sila makasasala. Busa mahimong ikaingon nga ang sala naaghat pinaagi sa Balaod.
Mga Leksiyon Alang Kanato:
1:14, 15. Duna kitay daghang rason nga imantala ang maayong balita nga masiboton. Ang usa niini mao ang pagkahimo natong utangan sa dugo niadtong mga tawo nga gipalit sa dugo ni Jesus ug atong obligasyon nga tabangan sila nga makakat-on bahin sa Diyos.
1:18-20. Ang mga tawo nga dili diyosnon ug dili matarong “walay ikapangatarongan,” sanglit ang dili makitang mga hiyas sa Diyos nadayag diha sa iyang kalalangan.
2:28; 3:1, 2; 7:6, 7. Human makasulti si Pablo ug daw makapainsulto sa mga Hudiyo, iya silang gipaulian pinaagi sa pagsultig makapalukmay sa ilang kasingkasing. Kini maghatag kanatog sumbanan sa pagdumala sa mga butang nga mataktikanhon ug may katakos.
3:4. Kon ang pulong sa tawo supak sa kon unsay giingon sa Diyos diha sa iyang Pulong, atong “makaplagang matinud-anon ang Diyos” pinaagi sa pagsalig sa mensahe sa Bibliya ug molihok uyon sa iyang kabubut-on. Pinaagi sa atong pagkamasiboton diha sa pagsangyaw sa Gingharian ug paghimog tinun-an, atong matabangan ang uban aron ilang makaplagan nga ang Diyos matinud-anon.
4:9-12. Tungod sa pagtuo ni Abraham siya giisip sa Diyos nga matarong, bisan ug nahimo siyang tinuli sa dihang siya nag-edad na ug 99. (Gen. 12:4; 15:6; 16:3; 17:1, 9, 10) Niining paagiha gipakita sa Diyos kon unsay himoon aron ang usa mahimong matarong sa iyang panan-aw.
4:18. Ang paglaom maoy usa ka hinungdanong bahin sa pagtuo. Ang atong pagtuo maoy pinasukad sa atong paglaom.—Heb. 11:1.
5:18, 19. Pinaagi sa lohikal nga pagsaysay ni Pablo sa panagsama ni Jesus ug ni Adan, sa mubo iyang gisaysay kon sa unsang paagi ang usa ka tawo ‘naghatag sa iyang kalag nga usa ka lukat baylo sa daghan.’ (Mat. 20:28) Ang lohikal nga pagpangatarongan ug pagkahimong direkta sa punto maoy epektibo gayong mga paagi sa pagpanudlo nga angay natong sundogon.—1 Cor. 4:17.
7:23. Ang mga bahin sa atong lawas sama sa kamot, tiil, ug dila mahimong ‘magbihag kanato sa balaod sa sala,’ busa angay gayod kitang magmabinantayon sa paggamit niana.
8:26, 27. Sa dihang makasinati kitag mga situwasyon diin wala kita mahibalo kon unsay angayng iampo, “ang espiritu mangamuyo alang kanato.” Dayon, dunggon ni Jehova, ingong “Tigpatalinghog sa pag-ampo,” ang dalawatong mga pag-ampo, sumala sa nahisulat sa iyang Pulong.—Sal. 65:2.
8:38, 39. Ang mga kalamidad, daotang espirituhanong mga linalang, ug ang tawhanong panggamhanan dili makapugong kang Jehova sa paghigugma kanato; ni makapugong kanato sa paghigugma kaniya.
9:22-28; 11:1, 5, 17-26. Daghang tagna maylabot sa kapasig-ulian sa Israel ang natuman sa kongregasyon sa dinihogang mga Kristohanon, kansang mga membro “gitawag dili lamang gikan sa taliwala sa mga Hudiyo kondili gikan usab sa taliwala sa mga nasod.”
10:10, 13, 14. Uban ang gugma sa Diyos ug sa atong isigkatawo, ang lig-ong pagtuo kang Jehova ug sa iyang mga saad magdasig kanato sa pagpakigbahin nga masiboton diha sa ministeryo.
11:16-24, 33. Timbang gayod ang “kalulot ug ang pagkamapig-oton sa Diyos”! Oo, “ang Bato, hingpit ang iyang kalihokan, kay ang tanan niyang dalan hustisya.”—Deut. 32:4.
PAGKINABUHI INGONG GIPAHAYAG NGA MATARONG
“Busa ako nangaliyupo kaninyo pinaagi sa kaluoy sa Diyos, mga igsoon,” miingon si Pablo, “nga itugyan ang inyong mga lawas nga usa ka halad nga buhi, balaan, dalawaton sa Diyos.” (Roma 12:1) Gigamit dinhi ang pulong “busa,” aron ipakita nga ang mga Kristohanon gipahayag nga matarong tungod sa ilang pagtuo, ug ang sunod nga gisulti ni Pablo kinahanglang mag-apektar sa ilang tinamdan sa ilang kaugalingon, sa uban, ug sa kagamhanan.
“Ako magasulti sa tanan dinha sa inyong taliwala nga dili maghunahuna ug labaw bahin sa iyang kaugalingon kay sa angay nga hunahunaon,” misulat si Pablo. “Himoa nga walay pagkasalingkapaw ang inyong gugma,” siya nagtambag. (Roma 12:3, 9) “Magpasakop ang tanang kalag sa labaw nga mga awtoridad.” (Roma 13:1) Sa mga butang diin nalangkit ang tanlag, siya nagdasig sa mga Kristohanon nga ‘dili maghinukmanay sa usag usa.’—Roma 14:13.
Tubag sa mga Pangutana Bahin sa Kasulatan:
12:20—Sa unsang paagi kita “magapundok ug mga baga” ibabaw sa ulo sa atong kaaway? Sa panahon sa Bibliya, ang bato nga adunay metal ibutang sa hurno, ug butangag baga ang ilalom ug ibabaw niini. Ang baga nga gipundok sa ibabaw makapasamot sa kainit mao nga matunaw ang gahi nga metal ug mahimulag sa bato. Sa samang paagi, ang pagpakitag kaayo ngadto sa usa ka magsusupak, magtunaw sa katig-a sa iyang kasingkasing ug magpalutaw sa iyang maayong mga hiyas.
12:21—Sa unsang paagi atong ‘madaog ang daotan pinaagi sa maayo’? Mahimo nato kini pinaagi sa atong pagkamaisogon diha sa hinatag sa Diyos nga buluhaton, ang pagsangyaw sa maayong balita sa Gingharian hangtod nga moingon si Jehova nga kini natapos na.—Mar. 13:10.
13:1—Sa unsang paagi ang labaw nga mga awtoridad “napahimutang sa ilang relatibong mga posisyon pinaagi sa Diyos”? Ang tawhanong kagamhanan “napahimutang sa ilang relatibong mga posisyon pinaagi sa Diyos” sa pagkaagi nga sila gitugotan sa Diyos sa pagmando, ug sa pipila ka kahimtang ang ilang pagmando nakita nang daan sa Diyos. Kini nadayag diha sa mga tagna sa Bibliya bahin sa daghang magmamando.
Mga Leksiyon Alang Kanato:
12:17, 19. Ang pagpanimalos maoy pagbuhat sa buluhaton nga iya ni Jehova. Usa gayod ka pagpangahas ang ‘pagbalos ug daotan tungod sa daotan’!
14:14, 15. Dili gayod nato himoong hinungdan sa kagul-anan o kapandolan sa atong igsoon ang atong idalit kaniya nga pagkaon o ilimnon.
14:17. Ang pagbatog maayong relasyon uban sa Diyos wala lamang mag-agad sa kon unsay atong ginakaon o ginainom o sa gilikayan nga kaonon o imnon. Hinunoa, nalangkit niini ang pagkamatarong, kalinaw, ug kalipay.
15:7. Atong dapiton nga walay pagpihigpihig ang tanang sinserong nangita sa kamatuoran ngadto sa kongregasyon ug atong ipahayag ang mensahe sa Gingharian sa tanan.
[Mga hulagway sa panid 31]
Ang lukat ba mapadapat usab sa mga sala nga nahimo una pa sa kamatayon ni Jesus?