Nagkalayong Impiyerno ba ang Gipasabot ni Jesus?

GIGAMIT sa ubang nagtuo sa doktrina sa nagkalayong impiyerno ang giingon ni Jesus sa Marcos 9:48 (o sa mga bersikulo 44 ug 46). Siya naghisgot ug mga ulod nga dili mamatay ug kalayo nga dili mapalong. Unsaon man nimo pagtubag kon dunay mangutana kanimo bahin niining mga pulonga?

Depende sa Bibliya nga gigamit sa maong tawo, tingali basahon niya ang bersikulo 44, 46, o 48 sanglit managsama ra man ang giingon niining mga bersikuloha diha sa ubang Bibliya. a Ang Bag-ong Kalibotang Hubad sa Balaang Kasulatan mabasa: “Kon ang imong mata makapapandol kanimo, isalibay kini; mas maayo pa alang kanimo nga mosulod nga usay-mata ngadto sa gingharian sa Diyos kay sa duhay-mata nga itambog ngadto sa Gehenna, diin ang ilang mga ulod dili mamatay ug ang kalayo dili mapalong.”—Marcos 9:47, 48.

Gituohan usab sa uban nga ang giingon ni Jesus nagsuportar sa pagtulon-an nga human sa kamatayon ang kalag sa mga tawong daotan sakiton sa walay kataposan. Pananglitan, ang komento sa Kinatsila nga librong Sagrada Biblia sa Unibersidad sa Navarre nag-ingon: “Ang atong Ginoo naggamit [niining mga pulonga] sa paghulagway sa pagsakit diha sa impiyerno. Sagad ‘ang ulod nga dili mamatay’ nagtumong sa walay kataposang pagbasol nga bation niadtong anaa sa impiyerno; ug ang ‘kalayo nga dili mapalong’ mao ang pisikal nga kasakit nga ilang maagoman.”

Hinunoa, itandi ang giingon ni Jesus sa kataposang bersikulo sa tagna ni Isaias. b Dayag gayod nga siya mikutlo sa Isaias kapitulo 66. Malagmit ang gitumong ni Isaias sa maong teksto mao ang paggula gikan “sa Jerusalem paingon sa kasikbit nga Walog sa Hinnom (Gehenna), nga gihalaran ug mga tawo kaniadto (Jer 7:31) ug sa ngadtongadto gihimong labayanan sa tanang hugaw sa siyudad.” (The Jerome Biblical Commentary) Ang paghulagway niini sa Isaias 66:24 tin-aw nga wala magpakita nga gisakit ang mga tawo; naghisgot kinig patayng lawas sa mga tawo. Ang gitumong dinhi nga dili mamatay mao ang mga ulod, dili ang buhing mga tawo o mga kalag nga dili mamatay. Nan, unsay buot ipasabot ni Jesus?

Matikdi ang komento sa basahon sa Katoliko nga El evangelio de Marcos. Análisis lingüístico y comentario exegético, Tomo II bahin sa Marcos 9:48: “[Ang] pamulong niini gikutlo gikan sa Isaias (66,24). Gipakita sa manalagna nga ang patayng lawas sa mga tawo mahanaw pinaagi sa pagkadugta ug pagkasunog . . . Ang paggamit sa mga pulong nga ulod ug kalayo sa samang teksto nagpalig-on sa ideya sa kalaglagan. . . . Kining duha ka elemento magpabilin (‘dili mapalong, dili mamatay’): wala gayoy paagi nga makaikyas gikan niini. Niini nga paghulagway, ang magpabilin mao lamang ang ulod ug kalayo, dili ang tawo, kay ang tanan kaonon man sa ulod ug sunogon sa kalayo. Busa, wala kini maghisgot ug walay kataposang pagsakit, kondili nagtumong kini sa bug-os nga kalaglagan diin wala nay pagkabanhaw o sa kataposang kamatayon. Busa ang [kalayo] nagsimbolo sa bug-os nga kalaglagan.”

Si bisan kinsa nga nag-isip sa matuod nga Diyos ingong mahigugmaon ug matarong makasabot gayod kon nganong makataronganon nga sabton ang giingon ni Jesus nianang paagiha. Si Jesus wala mag-ingon nga ang mga daotan sakiton sa walay kataposan. Hinuon, sila nameligro nga makaagom ug bug-os nga kalaglagan diin wala nay pagkabanhaw.

[Mga footnote]