Ang Pagsangyaw sa Balay-Balay—Nganong Hinungdanon Karon?

“Matag adlaw diha sa templo ug sa balay ug balay sila wala mohunong sa pagpanudlo ug sa pagpahayag sa maayong balita bahin kang Kristo, si Jesus.”—BUHAT 5:42.

1, 2. (a) Ang mga Saksi ni Jehova nailhan tungod sa unsang paagi sa pagsangyaw? (b) Unsay atong hisgotan niining artikuloha?

 SILA imong makita diha sa halos tanang nasod sa yuta. Duha ka desenteg pamesti nga mga tawo ang moduol sa tagbalay ug magpaambit ug usa ka mubo nga mensahe gikan sa Bibliya mahitungod sa Gingharian sa Diyos. Kon ang tagbalay interesado sa mensahe, ilang tanyagan siya ug basahon nga binase sa Bibliya ug usa ka libreng pagtuon sa Bibliya sa balay. Dayon moadto sila sa sunod nga balay. Kon nakigbahin ka niining buluhatona, lagmit imong namatikdan nga mailhan dayon ka sa mga tawo ingong Saksi ni Jehova bisag wala ka pa kasulti. Sa pagkatinuod, nailhan kita tungod sa atong pagpamalaybalay.

² Kita naggamit ug lainlaing paagi aron tumanon ang sugo ni Jesus sa pagsangyaw ug paghimog mga tinun-an. (Mat. 28:19, 20) Kita mosangyaw diha sa mga tiyanggihan, sa kadalanan, ug sa ubang publikong mga dapit. (Buh. 17:17) Kita mokontak sa mga tawo pinaagig telepono ug sulat. Kita mopaambit sa kamatuoran sa Bibliya niadtong atong mahimamat sa atong adlaw-adlawng mga kalihokan. Gani, kita may opisyal nga Web site nga nagtaganag binase-sa-Bibliya nga impormasyon diha sa kapig 300 ka pinulongan. a Kining mga paagiha sa pagsangyaw adunay maayong mga bunga. Bisan pa niana, diha sa kadaghanang dapit, ang atong pangunang paagi sa pagpaambit sa maayong balita mao ang pagsangyaw sa balay-balay. Unsay basehanan niining paagiha sa pagsangyaw? Nganong mao kini ang kasagarang gigamit sa katawhan sa Diyos sa modernong panahon? Nganong hinungdanon kini karon?

Paagi sa mga Apostoles

3. Unsang mga instruksiyon bahin sa pagsangyaw ang gihatag ni Jesus sa mga apostoles, ug base niini, sa unsang paagi sila mosangyaw?

³ Ang pagsangyaw sa balay-balay gibase sa Kasulatan. Sa dihang gisugo ni Jesus ang iyang mga apostoles sa pagsangyaw, siya miingon kanila: “Sa bisan unsang siyudad o balangay nga kamo mosulod, pangitaa kon kinsa didto ang takos.” Unsaon nila pagpangita ang mga tawong takos? Duawon nila ang mga tawo diha sa ilang mga balay, ingong pagsunod sa giingon ni Jesus: “Inigsulod ninyo sa balay, paghatag ug katahoran sa panimalay; ug kon takos ang balay, ipaabot niini ang kalinaw nga inyong gipanghinaot.” Moduaw lang ba sila sa kabalayan kon dunay modapit kanila? Matikdi ang padayong gisulti ni Jesus: “Kon adunay dili magpadayon kaninyo o magpatalinghog sa inyong mga pulong, sa paggula nianang balaya o nianang siyudara itaktak ang abog gikan sa inyong mga tiil.” (Mat. 10:11-14) Gipakita nianang maong instruksiyon nga samtang ang mga apostoles ‘molatas sa teritoryo gikan sa balangay ug balangay, nga nagpahayag sa maayong balita,’ sila moduaw sa kabalayan bisag walay nagdapit kanila.—Luc. 9:6.

4. Asa nato makita sa Bibliya nga tatawng gihisgotan ang pagsangyaw sa balay-balay?

⁴ Ang Bibliya tatawng naghisgot nga ang mga apostoles nagsangyaw sa balay-balay. Pananglitan, ang Buhat 5:42 nag-ingon: “Matag adlaw diha sa templo ug sa balay ug balay sila wala mohunong sa pagpanudlo ug sa pagpahayag sa maayong balita bahin kang Kristo, si Jesus.” Duolan sa 20 ka tuig sa ulahi, gipahinumdoman ni apostol Pablo ang mga ansiyano sa kongregasyon sa Efeso: “Ako wala magpugong sa pagsulti kaninyo sa bisan unsa man sa mga butang nga makaayo ni  sa pagtudlo kaninyo sa publiko ug sa balay ug balay.” Giduaw ba ni Pablo ang maong mga ansiyano sa wala pa sila mahimong mga magtutuo? Dayag nga iyang giduaw sila, kay lakip sa mga butang nga iyang gitudlo kanila mao ang “mahitungod sa paghinulsol ngadto sa Diyos ug sa pagtuo diha sa atong Ginoong Jesus.” (Buh. 20:20, 21) Sa pagkomento bahin sa Buhat 20:20, ang Word Pictures in the New Testament ni Robertson nag-ingon: “Makita nato nga kining masiboton kaayo nga magwawali nagsangyaw gayod sa balay-balay.”

Modernong-Adlaw nga Panon sa mga Dulon

5. Sa unsang paagi gihulagway diha sa tagna ni Joel ang buluhatong pagsangyaw?

⁵ Ang pagsangyaw nga gihimo sa unang siglo maoy pasiuna lamang sa mas dakong buluhaton sa atong adlaw. Ang buluhatong pagsangyaw sa dinihogang mga Kristohanon gipakasama ni manalagnang Joel sa malaglagong hampak sa mga insekto, nga naglakip sa mga dulon. (Joel 1:4) Ang mga dulon modasdas samag mga sundalo, mokatkat sa mga paril, mosulod sa kabalayan, ug mokaon sa bisan unsa nga ilang maagian. (Basaha ang Joel 2:2, 7-9.) Buhi kaayo kini nga paghulagway sa pagkamalahutayon sa katawhan sa Diyos ug sa ilang bug-os nga pagtuman sa buluhatong pagsangyaw niining modernong panahon. Ang pagsangyaw sa balay-balay mao ang pangunang paagi nga gigamit sa dinihogang mga Kristohanon ug sa “ubang mga karnero” sa pagtuman sa tagna ni Joel. (Juan 10:16) Nganong gisundog natong mga Saksi ni Jehova ang paagi sa mga apostoles sa pagsangyaw?

6. Niadtong 1922, sa unsang paagi gipasiugda ang pagsangyaw sa balay-balay, apan unsay gibuhat sa pipila?

⁶ Sukad sa 1919, gipasiugda ang responsibilidad sa matag Kristohanon nga makigbahin sa pagsangyaw. Pananglitan, ang usa ka artikulo sa Watch Tower nga nag-ulohang “Service Essential” (“Hinungdanon ang Pag-alagad”) diha sa Agosto 15, 1922 nga gula, nagpahinumdom sa dinihogang mga Kristohanon sa kahinungdanon sa “aktibong pagdala sa pinatik nga mensahe ngadto sa mga tawo ug sa pagpakigsulti kanila diha sa ilang kabalayan, nga maghatag ug pamatuod nga ang gingharian sa langit haduol na.” Ang detalyadong mga presentasyon gipatik diha sa Bulletin (karon Atong Ministeryo sa Gingharian). Apan sa sinugdan, diyutay lang ang misangyaw sa balay-balay.  Ang uban wala makigbahin sa maong buluhaton. Daghan silag pagtutol, ug ang panguna niini mao nga gibati sa pipila nga ubos kaayo ang pagpamalaybalay. Sa dihang kanunay nang gipasiugda ang buluhatong pagsangyaw, daghan kanila ang anam-anam nga mibiya sa organisasyon ni Jehova.

7. Unsang panginahanglan ang namatikdan sa katuigan sa 1950?

⁷ Sa misunod nga mga dekada, nagkadaghan ang miduyog sa buluhatong pagsangyaw. Apan, namatikdan nga gikinahanglan nila ang dugang pagbansay diha sa pagsangyaw sa balay-balay. Tagda pananglitan ang kahimtang sa Amerika. Sa sayong bahin sa katuigan sa 1950, 28 porsiyento sa mga Saksi didto igo lang managtag ug mga handbill o magtindog diha sa kadalanan nga magkupot ug mga magasin. Kapin sa 40 porsiyento ang dili regular sa buluhatong pagsangyaw ug may mga bulan nga dili gayod sila makasangyaw. Unsay gihimo aron matabangan ang tanang dedikadong mga Kristohanon nga makasangyaw sa balay-balay?

8, 9. Unsang programa sa pagbansay ang gisugdan niadtong 1953, ug unsay resulta niini?

⁸ Sa usa ka internasyonal nga kombensiyon nga gihimo sa New York City niadtong 1953, gihatagag linaing pagtagad ang pagsangyaw sa balay-balay. Diha sa pakigpulong ni Brader Nathan H. Knorr, iyang gihisgotan nga ang pangunang buluhaton sa tanang Kristohanong mga magtatan-aw mao ang pagtabang sa matag Saksi nga mahimong regular sa pagsangyaw sa balay-balay. “Ang tanan,” matod pa niya, “kinahanglang makigbahin sa pagsangyaw sa maayong balita sa balay-balay.” Aron makab-ot ang maong tumong, gisugdan ang tibuok-yuta nga programa sa pagbansay. Kadtong wala pa makasulay sa pagsangyaw sa balay-balay gibansay kon unsaon pagpakigsulti sa mga tawo diha sa ilang kabalayan, sa pagpangatarongan pinasukad sa Bibliya, ug sa pagtubag sa ilang mga pangutana.

⁹ Maayo kaayo ang resulta niining maong pagbansay. Sulod sa napulo ka tuig, ang gidaghanon sa mga magmamantala sa tibuok yuta miuswag ug 100 porsiyento, ang gidaghanon sa mga balikduaw 126 porsiyento, ug ang gidaghanon sa mga panagtuon sa Bibliya 150 porsiyento. Karong adlawa, duolan sa pito ka milyong magmamantala sa Gingharian ang nagsangyaw sa maayong balita sa tibuok yuta. Kining talagsaong pag-uswag nagpamatuod nga gipanalanginan ni Jehova ang mga paningkamot sa iyang katawhan diha sa pagsangyaw sa balay-balay.—Isa. 60:22.

Pagmarka sa mga Tawo Alang sa Kaluwasan

10, 11. (a) Unsang panan-awon ang nakita ni Ezequiel, sumala sa Ezequiel kapitulo 9? (b) Sa unsang paagi natuman ang maong panan-awon sa atong adlaw?

¹⁰ Gipakita sa panan-awon sa manalagnang si Ezequiel kon unsa ka kahinungdanon ang pagsangyaw sa balay-balay. Sa maong panan-awon, iyang nakita ang unom ka lalaki nga nagdalag mga hinagiban maingon man ang ikapitong lalaki nga nagbestig lino ug may tintiro sa sekretaryo diha sa iyang bat-ang. Ang ikapitong lalaki gisugo sa ‘paglakaw latas sa taliwala sa siyudad’ ug sa ‘pagbutang ug marka diha sa agtang sa mga tawo nga nagapanghupaw ug nagaagulo tungod sa tanang dulumtanang mga butang nga ginahimo sa taliwala niini.’ Human sa maong pagpangmarka, ang unom ka lalaki nga nagdalag mga hinagiban gisugo sa pagpatay niadtong walay marka.—Basaha ang Ezequiel 9:1-6.

¹¹ Atong nasabtan nga agig katumanan nianang tagnaa, ang lalaki nga “nagbesti ug lino” naghawas sa nanghibilin sa dinihogan-sa-espiritu nga mga Kristohanon. Pinaagi sa buluhatong pagsangyaw ug paghimog mga tinun-an, ang mga dinihogan nagbutang ug simbolikong marka niadtong nahimong bahin sa “ubang mga karnero” ni Jesus. (Juan 10:16) Unsa man ang marka? Kana mao ang pamatuod, nga daw makita diha sa ilang agtang, nga ang maong mga karnero maoy dedikado, bawtismadong mga tinun-an ni Jesu-Kristo ug nga ilang gisul-ob ang samag-Kristo nga personalidad. (Efe. 4:20-24) Kining mga tawong karnerohon mahiusa  sa dinihogang mga Kristohanon ug motabang kanila diha sa ilang hinungdanong buluhaton nga pagmarka sa uban pang mga tawo.—Pin. 22:17.

12. Sa unsang paagi ang panan-awon ni Ezequiel bahin sa pagmarka sa mga agtang nagpasiugda sa kahinungdanon sa atong padayon nga pagpangita sa mga tawong karnerohon?

¹² Gipasiugda sa panan-awon ni Ezequiel ang usa ka rason kon nganong dinalian kaayo ang atong padayon nga pagpangita sa mga tawo nga “nagapanghupaw ug nagaagulo.” Nameligro ang kinabuhi sa mga tawo. Sa dili madugay, gamiton ni Jehova ang iyang mga manulonda, nga gihulagwayan sa unom ka lalaki nga nagdalag mga hinagiban, sa paglaglag niadtong wala makabaton sa simbolikong marka. Mahitungod nianang umaabot nga paghukom, si apostol Pablo misulat nga si Ginoong Jesus, uban sa “iyang gamhanang mga manulonda . . . manimalos kanilang wala makaila sa Diyos ug kanilang wala magsunod sa maayong balita bahin sa atong Ginoong Jesus.” (2 Tes. 1:7, 8) Matikdi nga ang mga tawo pagahukman base sa ilang pagsanong sa maayong balita. Busa ang pagpahayag sa mensahe sa Diyos kinahanglang magpadayon hangtod sa kataposan. (Pin. 14:6, 7) Ang tanang dedikadong mga alagad ni Jehova maoy gisangonan niining bug-at nga responsibilidad.—Basaha ang Ezequiel 3:17-19.

13. (a) Si apostol Pablo mibati sa unsang responsibilidad, ug ngano? (b) Angay kang mobati ug unsang responsibilidad ngadto sa mga tawo sa inyong teritoryo?

¹³ Gibati ni apostol Pablo nga iyang responsibilidad ang pagpaambit sa maayong balita ngadto sa mga tawo. Siya misulat: “Ngadto sa mga Grego ug sa mga Barbaro, sa mga maalamon ug sa mga walay salabotan ako utangan: busa ako may kaikag nga ipahayag usab ang maayong balita kaninyo diha sa Roma.” (Roma 1:14, 15) Agig pagpasalamat sa kaluoy nga gipakita kaniya, gibati ni Pablo nga iyang obligasyon ang pagtabang sa uban nga makabatog kaayohan gikan sa dili-takos nga kalulot sa Diyos maingon nga siya nakabenepisyo gikan niana. (1 Tim. 1:12-16) Sama ra nga utangan siya sa matag tawo nga iyang mahibalag, usa ka utang nga mabayran lamang pinaagi sa pagpaambit sa maayong balita nianang tawhana. Gibati ba usab nimo nga utangan ka sa mga tawo sa inyong teritoryo?—Basaha ang Buhat 20:26, 27.

14. Unsa ang pangunang rason kon nganong kita mamalaybalay?

¹⁴ Bisan tuod hinungdanon ang pagluwas ug kinabuhi, adunay mas dako pang rason kon nganong kita mamalaybalay. Sa tagna nga natala sa Malaquias 1:11, si Jehova nag-ingon: “Sukad sa pagsubang sa adlaw bisan ngadto sa pagsalop niini ang akong ngalan mahimong dako taliwala sa kanasoran, ug . . . pagahimoon ang paghalad alang sa akong ngalan, ang usa ka hinlo nga gasa; tungod kay ang akong ngalan mahimong dako taliwala sa kanasoran.” Ingong katumanan niining tagnaa, ang dedikadong mga alagad ni Jehova nagbayaw sa iyang ngalan sa tibuok yuta samtang sila mapaubsanong nagtuman sa ilang ministeryo. (Sal. 109:30; Mat. 24:14) Ang pagtanyag ug “halad sa pagdayeg” kang Jehova mao ang pangunang rason kon nganong kita mamalaybalay.—Heb. 13:15.

Kulbahinam nga mga Panghitabo sa Unahan

15. (a) Unsa pay gipabuhat sa mga Israelinhon sa dihang sila mimartsa libot sa Jerico sa ikapito nga adlaw? (b) Unsay gipakita niini bahin sa buluhatong pagsangyaw?

¹⁵ Unsang mga kaugmaran ang anaa sa unahan maylabot sa buluhatong pagsangyaw? Ang paglikos sa Jerico nga nasulat sa basahon sa Josue, naghatag ug panig-ingnan. Hinumdomi nga sa wala pa laglaga sa Diyos ang Jerico, ang mga Israelinhon gisugo sa pagmartsa libot sa siyudad kas-a sa usa ka adlaw sulod sa unom ka adlaw. Apan sa ikapito nga adlaw, mas daghan pa ang gipabuhat kanila.  Giingnan ni Jehova si Josue: “Magmartsa kamo libot sa siyudad sa makapito ug ang mga saserdote maghuyop sa mga budyong. Ug mahitabo nga inigpatingog nila sa budyong nga sungay sa laking karnero, . . . ang tanang katawhan kinahanglang mosinggit ug usa ka dakong singgit sa pakiggubat; ug ang paril sa siyudad matumpag sa bug-os.” (Jos. 6:2-5) Posible nga mas daghan usab ang ipabuhat kanato maylabot sa buluhatong pagsangyaw. Mahitabo man kana o dili, makaseguro kita nga sa dihang laglagon na kining sistemaha sa mga butang, nasangyaw na sa tibuok kalibotan ang ngalan sa Diyos ug ang iyang Gingharian.

16, 17. (a) Unsay mapalampos sa dili pa matapos ang “dakong kasakitan”? (b) Unsay atong hisgotan sa sunod nga artikulo?

¹⁶ Mahimong moabot ang panahon sa dihang ang mensahe nga atong gimantala mahisamag “usa ka dakong singgit sa pagpakiggubat.” Sa basahon sa Pinadayag, ang bug-at nga mga mensahe sa paghukom gihulagway ingong “dagkong ulan nga yelo nga ang tinibug-ok niini may gibug-atong mga usa ka talanton.” b Ang Pinadayag 16:21 nag-ingon usab: “Ang hampak niini hilabihan kadako.” Wala pa kita masayod kon unsay papel sa pagpamalaybalay diha sa pagmantala nianang kulbahinam nga mga mensahe sa paghukom. Apan makaseguro kita nga sa dili pa matapos ang “dakong kasakitan,” ang ngalan ni Jehova masangyaw na sa tibuok yuta.—Pin. 7:14; Ezeq. 38:23.

¹⁷ Samtang nagpaabot kita sa kulbahinam nga mga panghitabo sa unahan, hinaot nga magpadayon kita sa pagmantala sa maayong balita sa Gingharian nga masiboton. Sa pagtuman nianang buluhatona, unsang mga babag ang atong maatubang diha sa atong pagpamalaybalay, ug sa unsang paagi mabuntog nato kini? Kining mga pangutanaha tubagon sa sunod nga artikulo.

[Mga footnote]

Unsay Imong Tubag?

• Unsay Kasulatanhong basehanan sa pagsangyaw sa balay-balay?

• Sa unsang paagi ang pagsangyaw sa balay-balay gipasiugda sa modernong panahon?

• Nganong ang dedikadong mga alagad ni Jehova adunay responsibilidad nga mosangyaw?

• Unsang kulbahinam nga mga panghitabo ang anaa sa unahan?

[Mga Pangutana sa Pagtuon]

[Mga hulagway sa panid 4]

Sama kang apostol Pablo, gibati ba usab nimo nga imong responsibilidad ang pagsangyaw sa uban?

[Hulagway sa panid 5]

Si Brader Knorr, niadtong 1953