Ikaw Wala Masayod Kon Diin Kini Magmalamposon!

“Sa buntag ipugas ang imong binhi ug hangtod sa gabii ayaw papahulaya ang imong kamot; kay ikaw wala masayod kon diin kini magmalamposon.”—ECCL. 11:6.

1. Nganong kahibulongan ang pagtubo sa binhi, ug nganong kini magtukmod kanato sa pagpaubos?

 ANG usa ka mag-uuma nagkinahanglag pailob. (San. 5:7) Human ikapugas ang binhi, siya kinahanglang maghulat hangtod nga kini moturok. Sa ngadtongadto, kon maayo ang kahimtang, kini mogitib gikan sa yuta. Dayon kini motubo, manguhay ug magpatunghag ani. Kahibulongan ang proseso sa pagtubo—usa gayod ka milagro! Gawas pa, matukmod gayod kita sa pagpaubos sa dihang atong hunahunaon kon kinsay Nagpahinabo niana. Lagmit kitay nagpugas o nagbisibis sa binhi, apan ang Diyos lamang ang makapatubo niana.—Itandi ang 1 Corinto 3:6.

2. Diha sa mga ilustrasyon nga gihisgotan sa nag-unang artikulo, unsang mga punto ang gitudlo ni Jesus maylabot sa pagkahimong tinun-an?

² Sama sa gihisgotan sa nag-unang artikulo, gipakasama ni Jesus ang buluhaton sa pagsangyaw sa Gingharian ngadto sa pagpugas ug binhi sa usa ka mag-uuma. Diha sa ilustrasyon bahin sa lainlaing matang sa yuta, gipasiugda ni Jesus nga bisag maayo ang binhi nga gipugas sa usa ka mag-uuma, ang pagtubo niini nagdepende sa kahimtang sa kasingkasing sa usa ka tawo. (Mar. 4:3-9) Diha sa ilustrasyon sa usa ka magpupugas nga natulog, gipasiugda ni Jesus nga dili gayod nato bug-os masabtan kon sa unsang paagi mahimong tinun-an ang usa ka tawo, tungod kay kini wala mag-agad sa paningkamot sa tawo kondili sa gahom sa Diyos. (Mar. 4:26-29) Hisgotan nato karon ang laing tulo sa mga ilustrasyon ni Jesus—ang lugas sa mustasa, ang lebadura, ug ang baling. a

Ang Ilustrasyon Bahin sa Lugas sa Mustasa

3, 4. Unsay gihulagwayan sa lugas sa mustasa may kalabotan sa mensahe sa Gingharian?

³ Ang ilustrasyon bahin sa lugas sa mustasa, nga narekord usab sa Marcos kapitulo 4, nagpasiugda sa duha ka butang: una, kahibulongan ang pagdaghan sa mga tawo nga mosanong sa mensahe sa Gingharian; ikaduha, panalipdan kadtong modawat sa mensahe. Si Jesus miingon: “Sa unsa ba nato ipakasama ang gingharian sa Diyos, o diha sa unsa nga sambingay ipahayag nato kini? Sama sa usa ka lugas sa mustasa, nga sa pagpugas niini diha sa yuta mao ang kinagamyan sa tanang liso sa ibabaw sa yuta—apan sa dihang gipugas na kini, kini motubo ug modako pa kay sa tanang ubang mga utanon ug mopatunghag dagkong mga sanga, mao nga ang mga langgam sa langit makakaplag ug batoganan ilalom sa landong niini.”—Mar. 4:30-32.

⁴ Giilustrar niini ang pag-uswag sa “gingharian sa Diyos” nga gipamatud-an sa pagkaylap sa mensahe sa Gingharian ug sa pag-uswag sa Kristohanong kongregasyon sukad sa Pentekostes 33 K.P. Ang lugas sa mustasa maoy gamayng liso nga naghulagway sa usa ka gamay  kaayong butang. (Itandi ang Lucas 17:6.) Apan sa dihang motubo na, ang usa ka matang sa mustasa moabot ug 3 ngadto sa 5 metros ang gihabogon nga may dagkong mga sanga, ug daw kahoy nang tan-awon.—Mat. 13:31, 32.

5. Unsa ka paspas ang pagtubo sa Kristohanong kongregasyon sa unang siglo?

⁵ Pipila ra ang membro sa Kristohanong kongregasyon sa pagsugod niini sa 33 K.P., sa dihang gidihogan sa balaang espiritu ang mga 120 ka tinun-an. Sulod lamang sa mubong panahon, ang pipila ka tinun-an miabot nag pila ka libo. (Basaha ang Buhat 2:41; 4:4; 5:28; 6:7; 12:24; 19:20.) Sulod lang sa mga 30 ka tuig, ang mga mang-aani midaghan pag-ayo mao nga nakaingon si Pablo sa kongregasyon sa Colosas nga ang maayong balita ‘nawali na sa tibuok kalalangan.’ (Col. 1:23) Kahibulongan gayod nga pagtubo!

6, 7. (a) Unsang pag-uswag ang nahitabo sukad sa 1914? (b) Unsang dugang pag-uswag ang mahitabo sa umaabot?

⁶ Sukad sa pagkatukod sa Gingharian sa Diyos sa langit sa 1914, wala damha nga modako pag-ayo ang mga sanga sa mustasa. Ang katawhan sa Diyos nakasaksi sa literal nga katumanan sa tagna nga gisulat ni Isaias: “Ang diyutay mahimong usa ka libo, ug ang gamay usa ka gamhanang nasod.” (Isa. 60:22) Ang gamayng grupo sa mga dinihogan nga nakigbahin sa buluhaton sa Gingharian sa sayong bahin sa ika-20ng siglo wala gayod magdahom nga pagka-2008, moabot nag halos pito ka milyon ang mga Saksi nga makigbahin niining buluhatona sa kapin sa 230 ka kayutaan. Sama sa pagtubo sa lugas sa mustasa sa ilustrasyon ni Jesus, ang maong pag-uswag makapahingangha gayod!

⁷ Apan mao ra ba kana ang katumanan sa ilustrasyon? Dili. Sa ngadtongadto, ang mga sakop sa Gingharian sa Diyos molukop sa tibuok yuta. Ang tanang magsusupak laglagon na unya. Kini matuman dili tungod sa pagpaningkamot sa tawo, kondili sa pagpangilabot sa Soberanong Diyos, si Jehova, sa kalihokan dinhi sa yuta. (Basaha ang Daniel 2:34, 35.) Ato unyang masaksihan ang bug-os nga katumanan sa laing tagna nga gisulat ni Isaias: “Ang yuta mapuno sa kahibalo kang Jehova ingon sa katubigan nga nagtabon sa dagat mismo.”—Isa. 11:9.

8. (a) Kinsay gihulagwayan sa mga langgam diha sa ilustrasyon ni Jesus? (b) Kita gipanalipdan na karon gikan sa unsa?

⁸ Si Jesus nag-ingon nga ang mga langgam sa langit makakaplag ug batoganan ilalom sa landong niining maong Gingharian. Kining mga langgama wala magtumong sa mga kaaway sa Gingharian nga mituka sa maayong mga binhi, sama sa mga langgam diha sa ilustrasyon bahin sa usa ka tawo nga nagpugas ug binhi sa lainlaing matang sa yuta. (Mar. 4:4) Hinunoa, ang mga langgam niining ilustrasyona naghulagway sa mga tawong matarong ug kasingkasing nga midangop sa Kristohanong kongregasyon alang sa proteksiyon. Karon pa lang, sila napanalipdan na batok sa mga kinaiya ug mga buhat niining daotang kalibotan nga makadaot sa ilang espirituwalidad. (Itandi ang Isaias 32:1, 2.) Gipakasama  usab ni Jehova ang Mesiyanikong Gingharian sa usa ka kahoy, ug siya mitagna: “Sa ibabaw sa bukid sa hataas nga dapit sa Israel akong ibalhin pagtanom kini, ug kini tinong mananga ug mamunga ug mahimong usa ka harianong sedro. Ug sa ilalom niini mopuyo ang tanang langgam sa nagkalainlaing matang sa pako; sa landong sa kadahonan niini sila mopuyo.”—Ezeq. 17:23.

Ang ilustrasyon Bahin sa Lebadura

9, 10. (a) Unsang punto ang gipasiugda ni Jesus sa ilustrasyon bahin sa lebadura? (b) Sa Bibliya, unsay sagad gihulagwayan sa lebadura, ug unsang pangutana bahin sa paghisgot ni Jesus ug lebadura ang atong tagdon?

⁹ Ang pagtubo dili kanunayng makita sa mata. Mao kana ang gipasiugda sa sunod nga ilustrasyon ni Jesus. Siya miingon: “Ang gingharian sa mga langit maoy sama sa lebadura, nga gikuha sa usa ka babaye ug gitagoan sa tulo ka dagkong takos sa harina, hangtod nga mitubo ang tibuok minasa.” (Mat. 13:33) Unsay gihulagwayan sa lebadura, ug sa unsang paagi nalangkit kini sa pag-uswag sa Gingharian?

¹⁰ Sa Bibliya, ang lebadura sagad nga naghulagway sa sala. Mao kanay gipasabot ni apostol Pablo sa dihang gigamit niya ang pulong lebadura sa paghisgot sa makadaot nga impluwensiya sa usa ka makasasala diha sa kongregasyon sa karaang Corinto. (1 Cor. 5:6-8) Busa sa dihang naghisgot si Jesus ug lebadura, ang gipasabot ba niya mao ang dili maayong pagtubo?

11. Sa unsang paagi gigamit ang lebadura sa karaang Israel?

¹¹ Sa dili pa nato tubagon kanang pangutanaha, ato unang tagdon ang tulo ka butang. Una, bisag wala itugot ni Jehova ang paggamit ug lebadura sa piyesta sa Paskuwa, iyang gidawat ang mga halad nga dunay lebadura sa ubang mga higayon. Ang lebadura gigamit sa mga halad-sa-panag-ambit—mga halad nga kinabubut-ong gitanyag ngadto kang Jehova agig pasalamat sa iyang dagayang mga panalangin. Ang maong halad maghatag ug kalipay niadtong moambit niana.—Lev. 7:11-15.

12. Unsay atong makat-onan sa paagi sa Bibliya sa paggamit ug ilustrasyon?

¹² Ikaduha, ang usa ka butang gamiton usahay diha sa Bibliya sa negatibong paagi, apan sa ubang higayon usab, sa positibong paagi. Pananglitan, sa 1 Pedro 5:8, si Satanas gipakasama sa usa ka leyon, nga nagpasabot nga siya peligroso ug mangtas. Apan sa Pinadayag 5:5, si Jesus gipakasama usab sa leyon—“ang Leyon nga gikan sa tribo ni Juda.” Sa kahimtang ni Jesus, gigamit ang leyon sa paghulagway sa kaisog ug hustisya.

13. Unsay atong makat-onan sa ilustrasyon ni Jesus bahin sa lebadura maylabot sa pagkahimong tinun-an sa usa?

¹³ Ikatulo, sa ilustrasyon ni Jesus, siya wala moingon nga nadaot ang tibuok minasa ug dili na magamit. Iya lamang gihisgotan ang kasagarang paagi sa paghimog tinapay. Ang lebadura gituyo pagdugang sa asawa, ug kini mipatunghag maayong resulta. Ang lebadura natago diha sa minasa. Busa, ang pagtubo wala makita sa asawa. Kini magpahinumdom kanato sa ilustrasyon bahin sa usa ka tawo nga nagpugas ug binhi ug natulog panahon sa kagabhion. Si Jesus nag-ingon nga ‘ang binhi mogitib ug motubo, kon giunsa, ang tawo wala mahibalo.’ (Mar. 4:27) Kana maoy simpleng ilustrasyon nga nagpakita nga dili gayod nato mahibaloan kon sa unsang paagi mahimong tinun-an ang usa! Sa  sinugdan dili nato kana makita, apan sa ngadtongadto kana madayag.

14. Unsay gihulagwayan sa pagtubo sa tibuok minasa?

¹⁴ Gawas nga dili makita, ang pagtubo mahitabo usab sa tibuok kalibotan. Mao kini ang laing butang nga gipasiugda sa ilustrasyon bahin sa lebadura. Tungod sa lebadura, mitubo ang tibuok minasa, nga maoy “tulo ka dagkong takos sa harina.” (Luc. 13:21) Sama sa lebadura, ang buluhaton sa pagsangyaw sa Gingharian, nga maoy nagpahinabo sa pagdaghan sa mga tinun-an, mikaylap na hangtod “sa kinalay-ang dapit sa yuta.” (Buh. 1:8; Mat. 24:14) Dako gayong pribilehiyo nga mahimong bahin niining kahibulongang pag-uswag sa buluhaton sa Gingharian!

Ang Baling

15, 16. (a) Hubita sa mubo ang ilustrasyon bahin sa baling. (b) Unsay gihulagwayan sa baling, ug unsay gitumong sa paglainlain sa maayo ug dili maayong mga isda?

¹⁵ Hinungdanon ang gidaghanon sa mga tawong nag-angkon nga mga tinun-an ni Jesu-Kristo, apan mas hinungdanon kon unsang matanga sila sa tinun-an. Mao kanay gipasabot ni Jesus sa dihang mihatag siyag ilustrasyon bahin sa baling. Siya nag-ingon: “Dugang pa ang gingharian sa mga langit maoy sama sa usa ka baling nga gilagak ngadto sa dagat ug nakatigom sa tanang matang sa isda.”—Mat. 13:47.

¹⁶ Ang baling, nga naghulagway sa buluhaton sa pagsangyaw sa Gingharian, nakasikop sa tanang matang sa isda. Si Jesus nagpadayon sa pag-ingon: “Sa dihang [ang baling] napuno na ilang gibitad kini ngadto sa baybayon ug, samtang nanglingkod, ilang gipili ang maayong mga isda ug gisulod sa mga sudlanan, apan ang mga dili maayo ilang gisalibay. Ingon niini ang mahitabo sa kataposan sa sistema sa mga butang: ang mga manulonda manggula ug magalain sa mga daotan gikan sa mga matarong ug magtambog kanila ngadto sa nagkalayong hudno. Didto unya ang ilang pagdanguyngoy ug ang pagkagot sa ilang mga ngipon.”—Mat. 13:48-50.

17. Ang paglainlain nga gihisgotan sa ilustrasyon sa baling nagtumong sa unsang yugto sa panahon?

¹⁷ Kini ba nga paglainlain nagtumong sa kataposang paghukom sa mga karnero ug mga kanding nga maoy giingon ni Jesus nga mahitabo inig-abot niya sa iyang himaya? (Mat. 25:31-33) Dili. Ang kataposang paghukom mahitabo sa pag-anhi ni Jesus panahon sa dakong kasakitan. Sa kasukwahi, ang paglainlain nga gihisgotan sa ilustrasyon bahin sa baling mahitabo panahon sa ‘kataposang mga adlaw sa sistema sa mga butang.’ b Kini nagakahitabo sa atong panahon karon—ang yugto sa panahon sa dili pa ang dakong kasakitan. Busa sa unsang paagi ang paglainlain nagakahitabo karon?

18, 19. (a) Sa unsang diwa nagakahitabo karon ang paglainlain nga buluhaton? (b) Unsay angayng himoon sa matinud-anog kasingkasing nga mga tawo? (Tan-awa usab ang potnot sa panid 21.)

¹⁸ Milyon-milyong mga tawo—ang simbolikong mga isda—mihugop sa kongregasyon ni Jehova  sa atong panahon. Ang pipila tigtambongan sa Memoryal ug sa mga tigom, ug ang uban nagtuon usab sa Bibliya. Apan ila bang gipamatud-an nga sila matuod gayod nga mga Kristohanon? Sila lagmit ‘gibitad usab ngadto sa baybayon,’ apan si Jesus nag-ingon nga kadto lamang “maayong mga isda” ang tigomon diha sa mga sudlanan, nga naghulagway sa Kristohanong kongregasyon. Ang dili maayong mga isda isalibay, ug sa ngadtongadto itambog diha sa simbolikong nagkalayo nga hudno—ang kataposang kalaglagan.

¹⁹ Kon bahin sa dili maayong mga isda, daghan kanila ang miundang sa pagtuon sa Bibliya uban sa mga Saksi ni Jehova. Ang pipila nga anak ug mga Saksi dili gayod gustong mosunod sa tunob ni Jesus. Dili sila gustong moalagad kang Jehova o mialagad lang sa pipila ka panahon ug dayon miundang na. c (Ezeq. 33:32, 33) Busa gikinahanglan gayod nga ang mga tawong matinud-anog kasingkasing molihok aron matigom sila diha sa samag-sudlanan nga mga kongregasyon ug magpabilin sa maong luwas nga dapit sa dili pa mobundak ang kataposang paghukom.

20, 21. (a) Unsay atong nakat-onan sa paghisgot sa mga ilustrasyon ni Jesus maylabot sa pagtubo? (b) Unsay determinado nimong buhaton?

²⁰ Busa, unsay atong nakat-onan sa paghisgot sa mga ilustrasyon ni Jesus bahin sa pagtubo? Una, sama sa pagtubo sa lugas sa mustasa, daghan kaayo ang misanong sa mensahe sa Gingharian. Wala gayoy makapugong sa pagkaylap sa buluhaton ni Jehova! (Isa. 54:17) Dugang pa, nakapahimulos sa espirituwal nga panalipod ang mga tawo nga nangitag “batoganan ilalom sa landong sa kahoy.” Ikaduha, ang Diyos maoy nagpahinabo sa pagtubo. Sama nga dili makita ang pagtubo sa minasa, ang pagdaghan sa mga tinun-an nagapadayon bisag dili dayon kana makita! Ikatulo, dili tanang nagtuon sa Bibliya o nag-alagad ang napamatud-ang maayong mga isda. Ang pipila nahisama sa dili maayong mga isda diha sa ilustrasyon ni Jesus.

²¹ Busa makapadasig gayod nga makita nga daghan kaayong tawo nga samag maayong mga isda ang gikabig ni Jehova! (Juan 6:44) Kini miresultag dakong pag-uswag sa daghang kanasoran. Si Jehova ang takos pasidunggan niini nga pagtubo. Tungod niini, ang matag usa kanato mapalihok gayod sa pagtuman sa sugo nga gisulat daghang siglo kanhi: “Sa buntag ipugas ang imong binhi . . . , kay ikaw wala masayod kon diin kini magmalamposon, dinhi man o didto, o kon silang duha sama nga mahimong maayo.”—Eccl. 11:6.

[Mga footnote]

Unsay Imong Tubag?

• Unsay gitudlo kanato sa ilustrasyon sa lugas sa mustasa bahin sa pagsanong sa mga tawo sa mensahe sa Gingharian ug sa espirituwal nga proteksiyon?

• Unsay gihulagwayan sa lebadura diha sa ilustrasyon ni Jesus, ug unsang kamatuoran bahin sa pagdaghan sa mga tinun-an ang iyang gipasiugda?

• Unsay gihulagwayan sa ilustrasyon sa baling?

• Sa unsang paagi atong matino nga apil kita niadtong ‘gitigom diha sa sudlanan’?

[Mga Pangutana sa Pagtuon]

[Mga hulagway sa panid 18]

Unsay gitudlo kanato sa ilustrasyon sa lugas sa mustasa bahin sa pag-uswag sa Gingharian?

[Hulagway sa panid 19]

Unsay atong makat-onan sa ilustrasyon bahin sa lebadura?

[Hulagway sa panid 21]

Unsay gihulagwayan sa paglainlain sa maayo ug dili maayong mga isda?