Ika-124 nga Graduwasyon sa Gilead

Ang mga Misyonaryo Gipakasama sa mga Dulon

SA MATAG unom ka bulan, ang Watchtower Bible School of Gilead maghikay ug programa sa graduwasyon diin ang pamilyang Bethel sa Tinipong Bansa dapiton sa pagtambong. Sa Marso 8, 2008, ang mga bisita gikan sa kapig 30 ka nasod miduyog sa pamilyang Bethel alang sa graduwasyon sa ika-124 nga klase sa Tunghaan sa Gilead. Ang 6,411 nga nanambong nagmaya uban sa mga estudyante niining espesyal nga adlaw.

Ang tsirman, si Stephen Lett nga membro sa Nagamandong Lawas, nagbukas sa programa pinaagi sa pakigpulong nga nag-ulohang “Duyog sa Mahulagwayong mga Dulon ni Jehova.” Ang Pinadayag 9:1-4 nagtandi sa gamayng pundok sa dinihogang mga Kristohanon, nga nahimong aktibo pag-usab sa pag-alagad kang Jehova niadtong 1919, ngadto sa duot sa mga dulon nga mihugpa. Ingong membro sa “ubang mga karnero,” ang mga estudyante gipahinumdoman nga sila miduyog niining mahulagwayong duot sa mga dulon.​—Juan 10:16.

Si Lon Schilling, nga membro sa Komite sa Sanga sa Tinipong Bansa, mihatag sa sunod nga pakigpulong nga “Mahimong Katimbang sa Imong Kapikas.” Kini gipasukad sa panig-ingnan sa Kristohanong magtiayon sa unang siglo nga si Aquila ug Priscila (o, Prisca). (Roma 16:3, 4) Kini nga klase sa Gilead gilangkoban ug 28 ka magtiayon. Sila gipahinumdoman nga kinahanglang padayon nilang lig-onon ang ilang kaminyoon aron molampos sila sa ilang misyonaryong buluhaton. Sa dihang ang Bibliya maghisgot bahin kang Aquila, hisgotan usab niini ang iyang asawa nga si Priscila. Busa, si apostol Pablo ug ang kongregasyon nag-isip kanila ingong magtiayon. Sa samang paagi, ang misyonaryo nga mga magtiayon karong adlawa kinahanglang magtambayayongay sa mga buluhaton, magdungan sa pagsimba, ug magtinabangay sa pag-atubang sa mga problema sa langyaw nga teritoryo, sa ingon mahimong katimbang sa ilang kapikas.​—Gen. 2:18.

Ang sunod nga pakigpulong, nga nag-ulohang “Balosi ang Pagkamaayo ni Jehova Pinaagi sa Pagbuhat ug Maayo,” gipahayag ni Guy Pierce nga membro sa Nagamandong Lawas. Gipatin-aw ni Brader Pierce nga ang pagkahimong maayo wala lang magpasabot sa paglikay sa pagbuhat ug daotan. Ang usa ka maayong tawo mohimog maayong mga butang alang sa kaayohan sa uban. Si Jehova nga Diyos maayo sa kinalabwang sukod. (Zac. 9:16, 17) Ang gugma ug pagkamaayo sa Diyos motukmod kanato sa paghimog maayong mga butang sa uban. Sa hinapos nga bahin sa pakigpulong ni Brader Pierce, iyang gidayeg ang mga estudyante pinaagi sa pag-ingon: “Maayo ang inyong ginabuhat. Masaligon kami nga padayon ninyong balosan ang pagkamaayo sa Diyos pinaagi sa pagbuhat ug maayo sa bisan unsa mang asaynment nga ihatag ni Jehova nga Diyos kaninyo sa umaabot.”

Human niana, si Michael Burnett, nga usa ka misyonaryo kaniadto ug bag-o pang giasayn ingong instruktor sa Gilead, nagpresentar sa pakigpulong nga nag-ulohang “Ibugkos Kini sa Agtang Taliwala sa Inyong mga Mata.” Ang mga Israelinhon angayng maghinumdom sa milagrosong pagluwas kanila ni Jehova gikan sa Ehipto nga samag nagbugkos niana taliwala sa ilang mga mata. (Ex. 13:16) Giawhag ang mga estudyante sa paghinumdom sa daghang instruksiyon  nga ilang nadawat sa Tunghaan sa Gilead nga sama rag nagbugkos niini sa ilang agtang taliwala sa ilang mga mata. Gipasiugda ni Brader Burnett nga ang mga graduwado kinahanglang magmapainubsanon ug magmakasaranganon. Kinahanglan usab nilang ipadapat ang mga prinsipyo sa Bibliya sa dihang magsulbad ug bisan unsang di-pagsinabtanay sa kaubang mga misyonaryo ug sa uban.​—Mat. 5:23, 24.

Si Mark Noumair, nga usa ka dugay nang instruktor sa Gilead, nagpahayag sa pakigpulong nga “Unsang Awit ang Pagaawiton Bahin Kaninyo?” Sa karaang panahon, naandan na ang pag-awit sa dihang magsaulog sa mga kadaogan sa gubat. Usa sa maong mga awit nagyagyag sa mga tribo ni Ruben, Dan, ug Aser tungod sa ilang pagkadili-andam nga mosakripisyo, samtang ang tribo ni Zabulon gidayeg tungod sa pagkaandam niini sa paghimog sakripisyo. (Maghu. 5:16-18) Sama sa mga liriko sa usa ka awit, ang mga buhat sa matag Kristohanon sa ngadtongadto  mahibaloan ra sa uban. Kon ang usa madasigon sa buluhaton sa Diyos ug maunongon sa teokratikanhong kahikayan, siya makapahimuot kang Jehova ug magsilbing maayong panig-ingnan sa iyang mga igsoon. Samtang ang uban diha sa kongregasyon maminaw sa mahulagwayong awit nga gisulat pinaagi sa atong mga buhat, sila matukmod sa pagsundog sa atong maayong panig-ingnan.

Ingong bahin sa ilang pagtungha sa Gilead, ang ika-124 nga klase migugol sa katibuk-an ug mga 3,000 ka oras diha sa pagsangyaw. Ubos sa tema nga “Pagsunod sa Pagtultol sa Balaang Espiritu,” ang mga estudyante miasoy kang Sam Roberson sa Departamento sa Teokratikanhong mga Tunghaan ug ubay-ubayng makapadasig nga kasinatian sa kanataran ug nagpasundayag sa pipila niana. Human niini giinterbiyo ang mga graduwado sa Gilead nga karon nag-alagad sa lainlaing kayutaan. Kini gidumala ni Patrick LaFranca sa Komite sa Sanga sa Tinipong Bansa. Gipabilhan sa mga estudyante ang praktikal nga tambag nga ilang nadungog sa maong mga igsoon.

Si Anthony Morris nga membro sa Nagamandong Lawas maoy naghatag sa kataposang pakigpulong nga nag-ulohang “Hinumdomi, ang mga Butang nga Makita Lumalabay Lamang.” Ang Kasulatan nag-awhag kanato sa pagsentro sa atong pagtagad sa umaabot nga mga panalangin gikan kang Jehova inay sa temporaryong mga kasakitan nga mahimo natong maagoman. (2 Cor. 4:16-18) Ang grabeng kakabos, inhustisya, pagdaogdaog, sakit, ug kamatayon mao gayod ang nagakahitabo karon, ug mahimong makasinati niana ang mga misyonaryo. Apan ang paghinumdom nga kining mga butanga lumalabay lamang motabang kanato nga magpabiling balanse sa espirituwal ug magmalaomon.

Gitapos ang programa nga diha sa entablado ang tanang graduwado samtang namati sa kataposang pamulong ni Brader Lett. Gidasig niya sila nga dili moangka ug siya miingon: “Walay makabungkag sa atong integridad kon si Jehova dapig kanato.” Iyang giawhag ang bag-ong mga misyonaryo nga mahimong sama sa mga dulon, determinadong mopadayon sa pag-alagad kang Jehova ug magpabiling masiboton, maunongon, ug masinugtanon hangtod sa kahangtoran.

[Kahon sa panid 30]

ESTADISTIKA SA KLASE

Gidaghanon sa mga nasod nga gihawasan: 7

Gidaghanon sa mga nasod nga gipadalhan: 16

Gidaghanon sa mga estudyante: 56

Aberids nga edad: 33.8

Aberids nga katuigan sa kamatuoran: 18.2

Aberids nga katuigan sa bug-os-panahong pag-alagad: 13.8

[Hulagway sa panid 31]

Ika-124 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Hulagway sa panid 32]

Ang Tunghaan sa Gilead nahimutang sa Watchtower Educational Center