Si Jehova Mahigugmaong Nag-atiman sa Iyang Tigulang Nang mga Alagad

“Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.”​—HEB. 6:10.

1, 2. (a) Unsay imong mahinumdoman inigkakita mog usa ka tawo nga ubanon? (b) Unsay pag-isip ni Jehova sa tigulang nang mga Kristohanon?

 INIGKAKITA mog mga tigulang sa kongregasyon nga ubanon na, may mahinumdoman ka bang usa ka asoy sa basahong Daniel sa Bibliya? Sa usa ka panan-awong gihatag ni Jehova nga Diyos kang Daniel, Iyang gihulagway ang iyang kaugalingon ingong ubanon. Si Daniel misulat: “Ako nagpadayon sa pagtan-aw hangtod nga dihay mga trono nga gibutang ug ang Karaan sa mga Adlaw milingkod. Ang iyang besti maputi sama sa niyebe, ug ang buhok sa iyang ulo sama sa mahinlong balhibo sa karnero.”​—Dan. 7:9.

² Ang natural o hinlo nga balhibo sa karnero kasagarang puti. Busa, ang puting buhok ug titulong “Karaan sa mga Adlaw” nagpaila sa kamatuoran nga ang Diyos kanunayng naglungtad ug siya adunay dakong kaalam, nga takos sa atong halawom kaayo nga pagtahod. Nan, unsay pag-isip ni Jehova sa matinumanong tigulang nga mga alagad? Ang Pulong sa Diyos nag-ingon nga “ang pagkaubanon maoy usa ka purongpurong sa katahom sa dihang makaplagan kini sa dalan sa pagkamatarong.” (Prov. 16:31) Tinuod, bisag giuban na o miputi na ang buhok sa usa ka matinumanong Kristohanon, ang maong hamtong nga panagway maoy matahom sa panan-aw sa Diyos. Sama ba niana ang imong pag-isip sa tigulang nang mga igsoon?

Nganong Bililhon Kaayo Sila?

3. Nganong ang tigulang nang mga isigkamagtutuo bililhon kaayo kanato?

³ Lakip sa minahal nga tigulang nang mga alagad sa Diyos mao ang mga membro sa Nagamandong Lawas sa mga Saksi ni Jehova, mga nagapanawng magtatan-aw kaniadto ug karon, kugihang mga payunir, ug edaran nga mga magmamantala sa Gingharian​—mga kaigsoonan nga matinumanong nag-alagad diha sa atong mga kongregasyon. Nakaila ka tingalig pipila kanila nga madasigong nagsangyaw sa maayong balita sa daghang katuigan ug kansang maayong panig-ingnan nakadasig sa mga batan-on ug nakaimpluwensiya sa ilang kinabuhi. Ang pipila ka tigulang nga alagad nagpas-ag bug-at nga mga responsabilidad ug nag-antos ug paglutos tungod sa maayong balita. Gipabilhan gayod ni Jehova ug sa “matinumanon ug maalamong ulipon” ang tanan nilang natabang kaniadto ug karon sa buluhaton sa Gingharian.​—Mat. 24:45.

4. Nganong angay natong tahoron ug iampo ang tigulang nga mga Kristohanon?

⁴ Ang maong matinumanong tigulang nga mga alagad angayng pabilhan ug tahoron sa ubang alagad ni Jehova nga Diyos. Gani, diha sa Balaod sa Diyos nga gihatag pinaagi ni Moises, ang konsiderasyon ug pagtahod sa mga tigulang gilangkit sa pagkahadlok kang Jehova. (Lev. 19:32) Angay natong iampo kanunay sila ug magpasalamat sa Diyos tungod sa ilang mahigugmaong mga buhat. Si apostol Pablo miampo alang sa minahal niyang mga isigkamagbubuhat, batag tigulang.​—Basaha ang 1 Tesalonica 1:2, 3.

5. Sa unsang paagi kita makabenepisyo sa pagpakig-uban sa tigulang nang mga magsisimba ni Jehova?

⁵ Dugang pa, makabenepisyo ang tanan sa kongregasyon sa pagpakig-uban sa tigulang nga mga Kristohanon. Tungod sa pagtuon, pagpaniid, ug kasinatian, ang matinumanong tigulang nga mga magsisimba ni Jehova adunay bililhong kahibalo. Nakakat-on sila sa pagpailob ug pagpakitag  empatiya, ug ang pagtudlo nila sa sunod nga kaliwatan sa ilang nakat-onan makahatag kanilag dakong kalipay ug katagbawan. (Sal. 71:18) Mga batan-on, magmaalamon kamo ug pahimusli kining tuboran sa kahibalo sama sa tubig nga timbaon gikan sa lawom nga atabay.​—Prov. 20:5.

6. Sa unsang paagi ikapakita mo sa mga tigulang nga imo silang gipabilhan?

⁶ Imo bang gipahibalo ang mga tigulang nga imo silang gimahal sama kang Jehova? Ang usa ka paagi mao ang pagsulti kanila nga imo silang gihigugma tungod sa ilang pagkamatinumanon ug gipabilhan ang ilang mga opinyon. Dugang pa, kon imong ipadapat ang ilang tambag ug mga sugyot, imong gipasundayag nga sinsero ang imong pagtahod kanila. Daghang edaran nang mga Kristohanon ang makahinumdom pa sa maalamong tambag nga ilang nadawat gikan sa matinumanong mga tigulang ug nga nakabenepisyo sila sa tibuok nilang kinabuhi tungod sa pagpadapat niana. a

Ipakita ang Pagkamabination sa Praktikal nga mga Paagi

7. Kinsay gihatagan ni Jehova sa pangunang responsabilidad sa pag-atiman sa mga tigulang?

⁷ Ang pangunang responsabilidad sa pagtagana sa mga panginahanglan sa mga tigulang gihatag sa Diyos sa ilang mga pamilya. (Basaha ang 1 Timoteo 5:4, 8.) Makapahimuot kang Jehova kon ang mga pamilya magtuman sa ilang obligasyon ngadto sa tigulang nilang mga paryente ug sa ingon magpakita nga sila may pagtagad sa mga tigulang sama Kaniya. Paluyohan ug panalanginan sa Diyos ang maong mga pamilya tungod sa tanan nilang kahago ug pagsakripisyo. b

8. Nganong ang mga kongregasyon angayng magpakita sa ilang pagkamatinagdanon sa tigulang nang mga Kristohanon?

⁸ Sa susama, si Jehova mahimuot usab kon ang lokal nga mga kongregasyon motabang sa nanginahanglang matinumanong mga tigulang nga walay magtutuong mga paryente nga gustong moatiman kanila. (1 Tim. 5:3, 5, 9, 10) Sa maong paagi ang mga kongregasyon magpakita nga sila may ‘pagbati alang sa isigkaingon, inigsoong pagbati, ug pagkamabination’ alang sa mga tigulang. (1 Ped. 3:8) Ang ilang pagkamatinagdanon sa tigulang nga mga membro sa kongregasyon gihulagway pag-ayo ni Pablo sa naghisgot siya nga kon  magaantos ang usa ka sangkap sa lawas sa tawo, “ang tanang ubang mga sangkap magaantos uban niini.” (1 Cor. 12:26) Ang mabinationg pagtabang sa mga tigulang maoy pagpadapat sa prinsipyo luyo sa tambag ni Pablo: “Magpadayon sa pagpinas-anay sa mga kabug-at sa usag usa, ug sa ingon magtuman sa balaod ni Kristo.”​—Gal. 6:2.

9. Unsang mga suliran ang masinati tingali sa usa ka tigulang?

⁹ Unsa ang mga suliran sa mga tigulang? Daghan kanila dali rang kapoyon. Mahimong bation nila nga dili na sila makahimo sa hinungdanong mga buluhaton sama sa pag-adtog doktor, pag-atiman sa mga bayranan, mga sulat, paglimpiyo sa balay, ug paglutog pagkaon. Sanglit magkamenos man ang gana sa pagkaon ug pag-inom samtang magkatigulang, sila maghunahuna tingali nga di na sila kinahanglang mokaon ug moinom ug daghan. Kana ikaingon usab bahin sa ilang mga batasan sa pagtuon sa Bibliya ug pagtambong sa mga tigom. Kay dili na tin-aw ang panan-aw ug medyo bungol na, lisod na ang pagbasa ug pagpamati panahon sa Kristohanong mga tigom, ug bisan ang pagpangandam alang sa tigom mahimong hago na kaayo. Nan, unsay mahimo sa uban alang kanila?

Kon Unsay Imong Ikatabang

10. Unsay mahimo sa mga ansiyano sa pagtino nga matabangan ang mga tigulang?

¹⁰ Sa daghang kongregasyon, ang mga tigulang ginaatiman sa talagsaong paagi. Gitabangan sila sa mahigugmaong mga igsoon sa pagpamalit, pagpangluto, ug pagpanglimpiyo. Gitabangan nila ang mga tigulang aron sila makatuon, makaandam alang sa mga tigom, ug regular nga makasangyaw. Kuyogan sila sa mga batan-ong Saksi ug tagan-an silag transportasyon. Kon ang mga tigulang dili na makagawas sa balay, ikonektar sila sa mga tigom pinaagig telepono, o himoan silag mga rekording sa mga tigom. Kon posible, tinoon sa mga ansiyano nga ang mga kahikayan ginatuman aron ikatagana ang mga panginahanglan sa mga tigulang sa kongregasyon. c

11. Isaysay kon giunsa pagtabang sa usa ka pamilya ang usa ka tigulang nga brader.

¹¹ Ang tagsatagsa ka Kristohanon mahimong magmaabiabihon usab ug magmahinatagon. Pagkamatay sa iyang asawa, usa ka tigulang nga brader dili na makaabot pagbayad sa abang kay wala na man ang pensiyon sa iyang asawa. May usa ka pamilya nga gilangkoban sa amahan, inahan, ug duha ka dalagita nga gidumalahan niya ug sa iyang asawa ug pagtuon sa Bibliya, ug dako ang ilang balay. Gihatagan nila siyag duha ka kuwarto nga iyang kapuy-an. Sa 15 ka tuig, sila nag-uban sa pagpangaon, paglingawlingaw, ug nagpahimulos sa inigsoong pagmahal. Ang mga batan-on nakabenepisyo gayod tungod sa pagtuo ug daghang kasinatian sa tigulang nga brader, ug siya sa iyang bahin nakapahimulos ug malipayong panag-uban. Ang tigulang nga brader miipon pagpuyo kanila hangtod siya namatay sa edad nga 89. Mapasalamaton gihapon ang pamilya sa daghang panalangin nga ilang nadawat tungod sa pagpakig-uban kaniya. Wala sila ‘mawad-i sa ilang ganti’ tungod sa pagtabang sa isigkatinun-an ni Jesu-Kristo.​—Mat. 10:42. d

12. Sa unsang paagi imong ikapasundayag ang pagkamabination sa tigulang nang mga igsoon?

¹² Dili ka tingali makatabang sa usa ka tigulang nga igsoon sama niining pamilyaha, apan basin makatabang ka sa mga tigulang aron makatambong sila sa mga tigom ug makasangyaw sa kanataran. Mahimong dapiton mo usab sila sa inyong balay ug iapil sa inyong mga ekskursiyon. Makabisita ka kanila, ilabina kon nasakit o naospital sila. Dugang pa, kinahanglang tratahon mo sila kanunay ingong mga hamtong. Basta maayo pa silag paminsar, kinahanglang iapil sila sa tanang desisyong himoon maylabot kanila. Bisan kadtong medyo giangoango na makamatikod baya kon gitahod ba sila.

Dili Gayod Kalimtan ni Jehova ang Imong Buhat

13. Nganong hinungdanon ang pagpakitag konsiderasyon sa pagbati sa tigulang nga mga Kristohanon?

¹³ Hinungdanon ang pagpakitag konsiderasyon sa pagbati sa mga tigulang. Kasagarang mapikal  ang mga tigulang kay dili na nila mabuhat ang tanan nilang naarangan samtang sila batan-on pa ug himsog. Pananglitan, usa ka sister nga aktibong nag-alagad kang Jehova sulod sa mga 50 anyos ug nahimo pang regular payunir grabeng nasakit ug naluya pag-ayo nga siya nalisdan bisan sa pagtambong ug tigom. Sa dihang iyang gitandi ang iyang nahimong pag-alagad kanhi sa mga limitasyon niya karon, siya mihilak. Siya miduko ug naghilak nga miingon, “Wa na gyod koy kapuslanan.”

14. Sa unsang paagi ang mga salmo makapalig-on sa tigulang nga mga alagad ni Jehova?

¹⁴ Kon ikaw usa ka tigulang, mibati ka ba niana? O may higayon ba nga mibati ka nga gibiyaan ka na ni Jehova? Mahimong susama niana ang gibati sa salmista sa tigulang na siya, kay mihangyo man siya kang Jehova: “Ayaw ako isalikway sa panahon sa akong pagkatigulang; sa diha nga ang akong kusog maluya na, ayaw ako pagbiyai. . . . Bisan hangtod sa pagkatigulang ug pagkaubanon, Oh Diyos, ayaw ako pagbiyai.” (Sal. 71:9, 18) Siyempre, wala gayod biyai ni Jehova ang kompositor nianang salmoha, ug Siya dili usab mobiya kanimo. Sa laing salmo, gipahayag ni David ang iyang pagsalig nga siya paluyohan sa Diyos. (Basaha ang Salmo 68:19.) Makasalig ka nga kon ikaw usa ka matinumanong tigulang nga Kristohanon, si Jehova magauban ug padayong maglig-on kanimo adlaw-adlaw.

15. Unsay makatabang sa mga tigulang sa paghupot ug positibong tinamdan?

¹⁵ Dili gayod kalimtan ni Jehova ang tanang nabuhat ug ginabuhat karon sa nagkatigulang nang mga Saksi ni Jehova alang sa iyang kahimayaan. “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan,” matod sa Bibliya. (Heb. 6:10) Busa, buntoga ang negatibo ug makapaguol nga hunahuna, nga mag-isip nga wala ka nay kapuslanan kang Jehova kay tigulang ka na. Paningkamoting mapulihan kanag positibo ug malaomon nga hunahuna. Magmalipayon tungod sa imong nabatonan nga mga panalangin ug sa imong paglaom sa umaabot! Kita may kinamaayohang “kaugmaon ug paglaom” ug kana gipasalig sa atong Maglalalang. (Jer. 29:11, 12; Buh. 17:31; 1 Tim. 6:19) Pamalandonga ang imong paglaom, paningkamoti nga magpabiling batan-on sa kasingkasing ug hunahuna, ug ayaw gayod isipa nga way bili ang imong pagtambong sa tigom sa kongregasyon! e

16. Nganong ang usa ka tigulang nga brader naghunahuna nga dili na siya angayng mag-ansiyano, apan giunsa siya pagpalig-on sa lawas sa mga ansiyano?

¹⁶ Tagda si Johan nga bisag 80 anyos na bug-os panahong nag-atiman sa iyang matinumanon, apan baldado nang asawa nga si Sannie. f Nagturnohay ang mga sister sa pagbantay kang Sannie aron makatambong si Johan sa mga tigom ug makasangyaw. Apan di pa dugay, si Johan mibatig emosyonal nga kaluya ug naghunahuna nga dili na siya angayng mag-ansiyano sa kongregasyon. “Unsay kapuslanan sa akong pagkaansiyano?” nangutana siya nga nanglugmaw ang mga luha sa iyang mga mata. “Dili na ko makahimo sa bisan unsang katungdanan sa kongregasyon.” Gipasaligan siya sa iyang kaubang mga ansiyano nga ang iyang kasinatian ug katakos sa pagpanghukom bililhon kaayo. Giawhag siya nga padayong mag-ansiyano, bisan pag limitado ang iyang mahimo. Kay napalig-on pag-ayo, si Johan padayong nag-alagad nga ansiyano, nga nahimong panalangin sa kongregasyon.

Si Jehova Mabination Gayod

17. Unsay gipasalig sa Bibliya sa tigulang nga mga Kristohanon?

¹⁷ Tin-awng gipahayag sa Kasulatan nga ang mga tigulang makapadayon nga magmabungahon sa pag-alagad bisan pa sa mga suliran nga duyog sa pagkatigulang. Ang salmista mipahayag: “Sila nga natanom diha sa balay ni Jehova . . . magpadayon  pa gihapon sa paglipang panahon sa ilang pagkaubanon, sila magpabiling tambok ug lunhaw.” (Sal. 92:13, 14) Si apostol Pablo, nga tingali nagsagubang ug pisikal nga sakit, ‘wala moangka, bisan pa kon ang iyang pagkatawo sa gawas nagakahugo.’​—Basaha ang 2 Corinto 4:16-18.

18. Nganong ang ubang sakop sa kongregasyon kinahanglang motabang sa tigulang nga mga isigkamagtutuo ug sa ilang mga tig-atiman?

¹⁸ Daghang panig-ingnan sa modernong panahon nagpamatuod nga ang mga tigulang ‘makapadayon sa paglipang.’ Ang mga suliran tungod sa sakit ug pagkatigulang mahimong lisod bisan alang kanilang may mabination ug kasaligang mga membro sa pamilya nga nagtabang kanila. Ang mga tig-atiman mahimong kapoyon usab. Busa pribilehiyo ug responsabilidad sa kongregasyon ang pagpasundayag ug gugma sa mga tigulang ug sa mga tig-atiman kanila. (Gal. 6:10) Kana magpakita nga wala lang nato sila sultihi nga panglakaw kamo ug ‘painiti ug busga ang inyong kaugalingon,’ nga dili sila tabangan sa praktikal nga mga paagi.​—Sant. 2:15-17.

19. Nganong ang matinumanong tigulang nga mga Kristohanon makapanglantaw sa umaabot nga may pagsalig?

¹⁹ Ang espirituwal nga mga kalihokan sa usa ka Kristohanon mahimong mausab tungod sa pagkatigulang, apan ang gugma ni Jehova alang sa iyang matinumanong tigulang nga mga alagad dili gayod molubad paglabay sa panahon. Kasukwahi niana, silang tanan bililhon gayod sa iyang mga mata, ug dili gayod niya sila biyaan. (Sal. 37:28; Isa. 46:4) Lig-onon ug giyahan sila ni Jehova panahon sa ilang pagkatigulang.​—Sal. 48:14.

[Mga footnote]

Unsay Imong Tubag?

• Nganong giisip mong bililhon ang matinumanong tigulang nga mga Kristohanon?

• Sa unsang paagi makapasundayag kitag pagkamabination sa tigulang nga mga isigkamagsisimba?

• Unsay makatabang sa tigulang nang mga alagad ni Jehova sapaghupot ug positibong tinamdan?

[Mga Pangutana sa Pagtuon]

[Mga hulagway sa panid 18]

Ang mga membro sa kongregasyon nagtahod gayod sa mga tigulang