Mga Pangutana Gikan sa mga Magbabasa

Sa iyang sulat ngadto sa mga Hebreohanon, si apostol Pablo naghisgot bahin sa “pagpandong sa mga kamot.” Ang iya bang gitumong dinhi mao ang pagtudlo ug mga ansiyano o aduna siyay laing gipasabot niini?—Heb. 6:2.

Walay katarongan nga mahimo kitang dogmatiko niini, apan lagmit ang gitumong ni Pablo sa pagpandong o pagtapion sa mga kamot mao ang pagpasa ug mga gasa sa espiritu.

Tinuod nga ang Bibliya naghisgot bahin sa pagpandong sa mga kamot may kalambigitan sa pagtudlog mga lalaki sa usa ka katungdanan diha sa organisasyon. Si Moises ‘nagtapion sa iyang kamot diha’ kang Josue sa pagtudlo kaniya ingong iyang kapuli. (Deut. 34:9) Sa Kristohanong kongregasyon, ang pipila ka kuwalipikadong mga lalaki gitudlo usab pinaagi sa pagpandong sa mga kamot. (Buh. 6:6; 1 Tim. 4:14) Si Pablo nagtambag nga dili magdalidali sa pagpandong sa mga kamot diha sa usa ka lalaki.—1 Tim. 5:22.

Hinunoa, si Pablo nag-awhag sa Hebreohanong mga Kristohanon sa ‘pag-uswag ngadto sa pagkahamtong’ karon nga gibiyaan na nila “ang pangunang doktrina,” o ang paninugdang doktrina. Dayon iyang gihisgotan “ang paghinulsol gikan sa patay nga mga buhat, ug ang pagtuo ngadto sa Diyos, ang pagtulon-an bahin sa mga bawtismo ug ang pagpandong sa mga kamot.” (Heb. 6:1, 2) Buot bang ipasabot nga paninugdang butang lang ang pagtudlo ug mga ansiyano ug ayha pa sila mouswag sa pagkahamtong human sila matudlo? Dili. Ang pagkahimong ansiyano sa kongregasyon maoy usa ka pribilehiyo nga angayng kab-oton sa hamtong nga mga brader ug sa dihang makab-ot na nila kini, ila kining pakamahalon.—1 Tim. 3:1.

Apan aduna pay laing katuyoan ang pagpandong sa mga kamot. Sa unang siglo, gisalikway ni Jehova ang kinaiyanhong Israel ingong iyang katawhan ug gipulihan kini sa espirituwal nga Israel, ang kongregasyon sa dinihogang mga Kristohanon. (Mat. 21:43; Buh. 15:14; Gal. 6:16) Ang milagrosong mga gasa sa espiritu, sama sa pagsultig lainlaing pinulongan, nagpamatuod sa maong kausaban. (1 Cor. 12:4-11) Sa dihang si Cornelio ug ang iyang panimalay nahimong mga magtutuo, sila nakadawat sa balaang espiritu, sumala sa gipakita sa ilang pagsultig lainlaing pinulongan.—Buh. 10:44-46.

Usahay, ang milagrosong mga gasa gipasa pinaagi sa pagpandong sa mga kamot. Sa dihang si Felipe nagsangyaw sa maayong balita sa Samaria, daghan ang nabawtismohan. Dayon, si apostol Pedro ug Juan gipadala didto sa nagamandong lawas. Ngano? Atong mabasa: “Unya [silang duha] nagpandong sa ilang mga kamot diha [sa bag-ong nabawtismohan nga mga tawo], ug sila nakadawat ug balaang espiritu.” Nagpasabot gayod kana nga nakadawat sila ug mga gasa sa espiritu, mga katakos nga makita sa uban. Nahibalo kita niini tungod kay si Simon, nga kanhing salamangkero, nakakita sa paglihok sa balaang espiritu diha sa mga tawo nga gikunsaran niini. Ug siya mitanyag ug salapi aron makabaton usab niana nga katakos, ug sa ingon makapandong usab siya sa uban ug makahatag kanilag espiritu nga ilang magamit sa paghimog mga milagro. (Buh. 8:5-20) Sa ulahi, 12 ka tawo sa Efeso ang nabawtismohan. Atong mabasa: “Sa napandongan na sila ni Pablo sa iyang kamot, ang balaang espiritu mikunsad nganha kanila, ug sila misugod sa pagpanulti sa laing mga pinulongan ug nanagna.”—Buh. 19:1-7; itandi ang 2 Timoteo 1:6.

Busa, diha sa Hebreohanon 6:2, lagmit ang gitumong ni Pablo sa pagpandong sa mga kamot mao ang pagpasa ug mga gasa sa espiritu ngadto sa bag-ong mga magtutuo.