Pagsangyaw Diha sa mga Tiyanggihan

SA DIDTO si apostol Pablo sa Atenas, siya moadto sa tiyanggihan kada adlaw aron sa pagsangyaw sa maayong balita bahin kang Jesus. (Buh. 17:17) Gipili ni Pablo ang tiyanggihan tungod kay ang mga taga-Atenas tig-adtoan didto.

Mga 2,000 ka tuig sa ulahi, ang katawhan ni Jehova moadto gihapon sa mga tiyanggihan aron sa pagsangyaw sa mensahe sa Gingharian sa Diyos. Ngano? Tungod kay daghan ug tawo didto. Sa pagkakaron, ang mga tawo dili lang mamalit diha sa mga tiyanggihan kondili sa mga shopping mall (dagkong tindahan) usab. Human makapangayog permiso gikan sa manedyer o tag-iya sa mall, ang pipila ka Saksi nagbutang ug lamesa o gamayng estante aron displehag mga literatura sa Bibliya.

Pananglitan, sa usa ka shopping mall didto sa New Jersey, U.S.A., giayog displey sa mga igsoon ang lainlaing publikasyon nga naghisgot kon sa unsang paagi mahuptan sa pamilya ang maayong mga prinsipyo. Unsay resulta niini? Sa usa lang ka adlaw, 153 ka libro diha sa unom ka pinulongan ang ilang napahimutang.

Usa ka babaye ang miduol sa ilang puwesto ug namati pag-ayo sa gipatin-aw sa usa sa mga Saksi. Miuyon ang babaye nga hinungdanon nga adunay luna ang Diyos sa atong kinabuhi ug sa atong pamilya. Siya mikuha niini nga mga publikasyon: Pagkakat-on Gikan sa Dakong Magtutudlo, Ang Sekreto sa Kalipay sa Pamilya, ug Mga Pangutanang Gisukna sa mga Batan-on—Mga Tubag nga Mosaler.

Sayo sa hapon, usa ka lalaki ang milabay sa gidisplehag literatura sa dihang mosulod na unta siya sa tindahan tupad niana. Nasiplatan niya ang librong Gisukna sa mga Batan-on ug nakamatikod niini ang sister. Iyang gipangutana ang lalaki, “May nagustohan ka bang libro?” Siya mitando ug iyang gitudlo ang librong Gisukna sa mga  Batan-on. Sa dihang kuhaon na unta sa lalaki ang libro, gitunol kini sa sister kaniya. Miingon ang lalaki nga tulo ang iyang anak ug ang duha kanila tin-edyer na. Samtang nagpadayon ang ilang panagsultiay, iyang nalakbitan nga duna siyay panaghisgot uban sa iyang pamilya kas-a sa usa ka semana. Samtang nagpakli-pakli sa mga panid, siya miingon nga maayo kining gamiton nga giya sa ilang mga panaghisgot sa pamilya. Gipakita usab sa magmamantala ang librong Ang Sekreto sa Kalipay sa Pamilya, ug gipasaligan siya nga kining libroha adunay mapuslanong mga tambag nga makatabang kanilang magtiayon sa paghimog mga desisyon nga makaapektar sa pamilya. Mapasalamaton ang lalaki sa maong sugyot. Siya mihatag ug donasyon ug miuyon nga duawon siya hasta ang iyang pamilya.

Unsay gibati sa mga Saksi bahin sa ilang tibuok-adlaw nga pagsangyaw sa mall? “Giganahan kaayo ko niining paagiha sa pagsangyaw,” miingon ang usa ka sister. “Nindot kaayo kini nga kasinatian!” Ang laing sister miingon: “Si Jehova miingon nga ang maayong balita igawali sa kinalay-ang dapit sa yuta. Karon, dinhi sa Paramus, New Jersey, kining maayong balita nakatandog na sa kasingkasing sa mga tawo nga lainlaig pinulongan. Nalipay kaayo ko nga nakasulay kog sangyaw sa shopping mall. Mao usab kanay gibati sa akong mga kauban. Morag di pa mi kaulion bisag hapon na.”

Makahimo ka ba sa pagsangyaw sa maayong balita sa lainlaing paagi? Ang atong pangunang paagi mao ang pagpamalaybalay. (Buh. 20:20) Apan, gusto ka bang mosulay sa pagsangyaw diha sa tiyanggihan o sa mall?