Si Jehova—“Magtatagana ug Kaikyasan” sa Karaang Panahon
Si Jehova—“Magtatagana ug Kaikyasan” sa Karaang Panahon
“Oh Diyos, lihok sa madali alang kanako. Ikaw mao ang akong magtatabang ug ang Magtatagana ug kaikyasan kanako.”—SAL. 70:5.
1, 2. (a) Unsang mga higayona nga ang mga magsisimba sa Diyos mangayog tabang kaniya? (b) Unsang pangutana ang motungha, ug asa nato mabasa ang tubag?
SAMTANG nagbakasyon, nasayran sa mga ginikanan sa usa ka 23-anyos nga minyong babaye nga ang ilang anak kalit lang nawala. Nagduda sila nga dunay daotang nahitabo. Dihadiha, sila nag-empake aron mamauli, ug padayong nangaliyupo kang Jehova nga tabangan unta sila. Ang usa ka 20-anyos nga Saksi nadayagnos nga adunay sakit nga sa ngadtongadto makaparalisar sa iyang tibuok lawas. Dihadiha, nag-ampo siya kang Jehova. Ang usa ka nag-inusarang inahan nga naningkamot sa pagpangitag trabaho walay igong kuwarta nga ikapalit ug pagkaon para sa iyang kaugalingon ug sa iyang 12-anyos nga dalagita. Siya kinasingkasing nga nag-ampo kang Jehova. Oo, sa dihang mag-atubang ug grabeng mga kalisdanan, naandan na sa mga alagad sa Diyos ang pagpangayog tabang kaniya. Diha bay higayon nga nangamuyo ka kang Jehova alang sa tabang?
2 Motungha ang usa ka hinungdanong pangutana: Makadahom ba gayod kita nga dunggon ni Jehova ang atong mga pangamuyo? Ang makapalig-on-sa-pagtuo nga tubag mabasa diha sa Salmo 70. Kining makapadasig nga salmo gisulat ni David, nga usa ka maunongong magsisimba ni Jehova nga nakaatubang ug daghang kalisdanan ug mga problema. Siya natukmod sa pag-ingon kang Jehova: “Oh Diyos, . . . ikaw mao ang akong magtatabang ug ang Magtatagana ug kaikyasan kanako.” (Sal. 70:5) Ang pagsusi sa Salmo 70 makatabang kanato sa pagsabot kon nganong kita usab makadangop kang Jehova sa panahon sa kalisdanan ug bug-os nga makasalig nga siya mahimong atong “Magtatagana ug kaikyasan.”
“Ikaw Mao . . . ang Magtatagana ug Kaikyasan”
3. (a) Unsang pangamuyo ang mabasa diha sa Salmo 70? (b) Unsang pagsalig ang gipahayag ni David diha sa ika-70 nga Salmo?
3 Sa sinugdanan sa Salmo 70 ug sa kataposan niini, nangamuyo si David nga unta tabangan dayon siya sa Diyos. (Basaha ang Salmo 70:1-5.) Siya nag-ampo nga unta si Jehova “magdali” ug ‘molihok sa madali’ sa pagluwas kaniya. Sa bersikulo 2 ngadto sa 4, may lima ka hangyo si David, nga ang matag usa niini adunay pulong nga “unta” nga nagpahayag ug tinguha, o panghinaot. Ang unang tulo ka hangyo naghisgot niadtong nagtinguha sa pagpatay kaniya. Si David mihangyo kang Jehova nga unta maparot ang iyang mga kaaway ug mapakaulawan sila tungod sa ilang pagkadaotan. Ang mosunod nga duha ka hangyo, sa bersikulo 4, adunay kalabotan sa katawhan sa Diyos. Si David nag-ampo nga kadtong mangita kang Jehova matukmod unta sa pagmaya ug sa paghimaya kaniya. Sa pagtapos sa iyang salmo, si David miingon kang Jehova: “Ikaw mao ang akong magtatabang ug ang Magtatagana ug kaikyasan kanako.” Matikdi nga si David wala moingon, “Mahimo ka unta,” nga daw aduna pa siyay laing hangyo. Hinunoa, siya miingon, “Ikaw mao,” nga nagpahayag sa iyang pagsalig. Hugot ang pagtuo ni David nga iyang madawat ang tabang sa Diyos.
4, 5. Unsay atong makat-onan bahin kang David gikan sa Salmo 70, ug sa unsa kita makasalig?
4 Unsay gipaila sa Salmo 70 bahin kang David? Sa dihang ang iyang mga kaaway nagtinguha sa pagpatay kaniya, si David wala mosukol. Hinunoa, siya misalig nga silotan ni Jehova ang mga magsusupak sa iyang gitakdang panahon ug paagi. (1 Sam. 26:10) Kombinsido gayod si David nga si Jehova motabang ug magluwas niadtong nangita kaniya. (Heb. 11:6) Nagtuo si David nga ang matuod nga mga magsisimba may katarongan gayod nga magmaya ug maghimaya kang Jehova pinaagi sa pagsulti sa uban mahitungod sa iyang pagkahalangdon.—Sal. 5:11; 35:27.
5 Sama kang David, kita bug-os makasalig nga si Jehova mao ang atong Magtatabang ug “Magtatagana ug kaikyasan.” Busa, sa dihang kita mag-atubang ug mga kalisdanan o nagkinahanglag dinaliang tabang, haom nga kita moampo nga si Jehova magdali unta sa pagtabang kanato. (Sal. 71:12) Apan, sa unsang paagi tubagon ni Jehova ang atong pag-ampo alang sa tabang? Sa dili pa nato hisgotan kon sa unsang paagi himoon kana ni Jehova, atong susihon ang tulo ka paagi nga siya nagtagana kang David ug kaikyasan, nga nagtabang kaniya sa panahon sa kalisdanan.
Giluwas Gikan sa mga Magsusupak
6. Unsay nakatabang kang David sa pagkahibalo nga si Jehova nagtaganag kaikyasan sa mga matarong?
6 Gikan sa mga bahin sa Bibliya nga nabatonan ni David kaniadto, siya nahibalo nga ang mga matarong makasalig nga tabangan sila ni Jehova. Sa dihang gilunopan ni Jehova ang dili-diyosnong kalibotan, iyang giluwas si Noe ug ang iyang mahinadlokon-sa-Diyos nga pamilya. (Gen. 7:23) Sa dihang gipaulanan ni Jehova ug kalayo ug asupre ang daotang mga molupyo sa Sodoma ug Gomora, iyang gitabangan ang matarong nga si Lot ug ang iyang duha ka anak nga babaye aron sila makaikyas. (Gen. 19:12-26) Sa dihang ang mapahitas-ong si Paraon ug ang iyang kasundalohan gilaglag ni Jehova diha sa Pulang Dagat, Iyang gipanalipdan ang iyang katawhan, busa wala sila makaagom sa kalaglagan. (Ex. 14:19-28) Nan, ikatingala ba kon nganong diha sa laing salmo gitawag ni David si Jehova ingong “Diyos sa mga buhat sa pagluwas”?—Sal. 68:20.
7-9. (a) Unsay katarongan ni David sa pagsalig nga ang Diyos makaluwas kaniya? (b) Kinsa may gipasidunggan ni David sa iyang kaluwasan?
7 Si David may kaugalingon usab nga katarongan sa pagsalig nga si Jehova makaluwas kaniya. Iyang nasinati mismo nga ang “mga bukton nga walay kataposan” ni Jehova makaluwas niadtong nag-alagad Kaniya. (Deut. 33:27, Ang Biblia—Bag-ong Hubad Nga Binisaya) Dili lang kay kausa ra giluwas ni Jehova si David gikan sa kamot sa “mga kaaway nga nasuko.” (Sal. 18:17-19, 48) Tagda ang usa ka pananglitan.
8 Sa dihang ang mga babaye sa Israel nagdayeg kang David tungod sa iyang kabatid sa panggubatan, si Haring Saul nasina pag-ayo nga sa duha ka higayon iyang gibangkaw si David. (1 Sam. 18:6-9) Apan, nianang duha ka higayon nakalihay si David. Tungod lang ba kini kay si David usa ka batid ug abtik nga manggugubat? Dili. Ang Bibliya nagpatin-aw nga “si Jehova nag-uban kaniya.” (Basaha ang 1 Samuel 18:11-14.) Sa ulahi, sa dihang napakyas ang laraw ni Saul nga mapatay si David sa mga Filistehanon, “si Saul nakakita ug nahibalo nga si Jehova nag-uban kang David.”—1 Sam. 18:17-28.
9 Kinsa may gipasidunggan ni David sa iyang kaluwasan? Ang superskripsiyon sa Salmo 18 nag-ingon nga si David “misulti kang Jehova sa mga pulong niini nga awit sa adlaw nga si Jehova nagluwas kaniya . . . gikan sa kamot ni Saul.” Gipahayag ni David ang iyang gibati diha sa usa ka awit, nga nag-ingon: “Si Jehova mao ang akong dakong bato ug ang akong salipdanan ug ang akong Magtatagana ug kaikyasan. Ang akong Diyos mao ang akong bato. Modangop ako kaniya.” (Sal. 18:2) Dili ba makapalig-on ang pagkahibalo nga si Jehova makahimo sa pagluwas sa iyang katawhan?—Sal. 35:10.
Gipalig-on Samtang Naglubog sa Banig
10, 11. Unsay motabang kanato sa pagtino kon kanus-a si David lagmit nakaagom sa balatian nga gihisgotan sa Salmo 41?
10 Dihay panahon nga si Haring David nag-antos sa grabeng balatian, nga gihisgotan sa Salmo 41. Siya naglubog sa banig ug luya kaayo nga nagtuo ang pipila niya ka kaaway nga dili na gayod siya “mobangon pag-usab.” (Bersikulo 7, 8) Kanus-a kana nahitabo? Ang mga sirkumstansiya nga gihisgotan niini nga salmo mahimong nagtumong sa panahon nga ang iyang anak nga si Absalom misulay pag-ilog sa trono.—2 Sam. 15:6, 13, 14.
11 Pananglitan, nag-ingon si David nga ang usa ka sinaligang higala nga nagkaon ug tinapay uban kaniya, nagbudhi kaniya. (Bersikulo 9) Mahimong magpahinumdom kini kanato sa usa ka hitabo sa kinabuhi ni David. Panahon sa pagrebelde ni Absalom, ang sinaligang magtatambag ni David nga si Ahitopel nagbudhi kaniya ug miduyog kang Absalom sa pagrebelde batok sa hari. (2 Sam. 15:31; 16:15) Handurawa ang luya kaayo nga hari nga naglubog sa banig nga dili na makabangon, ug nasayod nga dunay mga tawo nga naglaraw sa pagpatay kaniya aron ila nang matuman ang ilang daotang mga plano.—Bersikulo 5.
12, 13. (a) Unsang pagsalig ang gipahayag ni David? (b) Sa unsang paagi kaha gipalig-on sa Diyos si David?
12 Lig-on gihapon ang pagsalig ni David sa “Magtatagana ug kaikyasan.” Mahitungod sa matarong nga magsisimba nga nag-antos sa balatian, si David miingon: “Sa adlaw sa katalagman itagana ni Jehova ang kaikyasan kaniya. Si Jehova magpalig-on kaniya sa ibabaw sa higdaanan sa balatian; ang tibuok niyang higdaanan imong bag-ohon gayod sa panahon sa iyang pagkasakit.” (Sal. 41:1, 3) Imo gihapong mamatikdan dinhi ang pagsalig ni David. Siya nakaseguro nga si Jehova magtaganag kaikyasan alang kaniya. Sa unsang paagi?
13 Wala magdahom si David nga si Jehova maghimog milagro ug ayohon siya sa iyang sakit. Hinunoa, nakaseguro si David nga si Jehova “magpalig-on kaniya”—sa ato pa, tabangan ug palig-onon siya samtang siya naglubog sa banig. Gikinahanglan gayod ni David ang maong tabang. Gawas pa sa sakit nga nakapaluya kaniya, may mga kaaway siya nga nanghimaraot kaniya. (Bersikulo 5, 6) Hayan gipalig-on ni Jehova si David pinaagi sa pagpahinumdom kaniya sa mga butang nga makapahupay kaniya. Si David miingon: “Tungod sa akong integridad ikaw nagasapnay kanako.” (Bersikulo 12) Lagmit napalig-on usab si David pinaagi sa pagpamalandong sa kamatuoran nga bisan pag siya masakiton ug gipanghimaraot sa iyang mga kaaway, si Jehova nag-isip kaniya nga usa ka tawong lig-on ug integridad. Sa ngadtongadto, naulian ra si David sa iyang sakit. Dili ba makapadasig ang pagkahibalo nga si Jehova makapalig-on niadtong nagmasakiton?—2 Cor. 1:3.
Gitagan-an ug Materyal nga Panginahanglan
14, 15. Sa dihang si David ug ang iyang mga kauban nanginahanglag pagkaon, unsang tabang ang ilang nadawat?
14 Sa dihang si David nahimong hari sa Israel, siya nakapahimulos sa labing lamian nga mga pagkaon ug ilimnon ug nakadapit sa uban sa pagkaon uban kaniya. (2 Sam. 9:10) Apan, nakasinati usab si David ug kakulang sa pagkaon ug ilimnon. Sa dihang ang iyang anak nga si Absalom naghulhog sa uban sa pagrebelde aron iyang mailog ang trono, si David mibiya sa Jerusalem kauban sa mga tawo nga maunongong nagpaluyo kaniya. Sila mikalagiw ngadto sa yuta sa Gilead, nga nahimutang sa sidlakan sa Suba sa Jordan. (2 Sam. 17:22, 24) Kay napugos sa pagtago-tago, si David ug ang iyang mga kauban nahutdan nag pagkaon ug ilimnon, ug kinahanglan usab silang mopahulay. Apan, asa man sila makakuhag pagkaon diha sa kamingawan?
15 Sa kataposan, si David ug ang iyang mga kauban miabot sa siyudad sa Mahanaim. Didto ilang nahibalag ang tulo ka maisog nga lalaki—si Sobi, Makir, ug Barzilai. Andam nilang ipameligro ang ilang kinabuhi aron tabangan ang tinudlo-sa-Diyos nga hari, kay kon mailog ni Absalom ang pagkahari, sa walay duhaduha silotan gayod niya si bisan kinsa nga misuportar kang David. Kay nakita nila ang kalisdanan ni David ug sa iyang mga kauban, kining tulo ka maunongong mga ginsakpan nagtagana sa ilang mga panginahanglan, sama sa mga higdaanan, trigo, sebada, sinangag nga mga lugas, lagpad nga mga liso, lentihas, dugos, mantekilya, ug mga karnero. (Basaha ang 2 Samuel 17:27-29.) Natandog gayod si David sa talagsaong pagkamaunongon ug pagkamaabiabihon niining tulo ka lalaki. Dili gayod niya makalimtan ang kaayo nga ilang gipakita kaniya.
16. Diin man gayod gikan ang pagkaon nga gitagana kang David ug sa iyang mga kauban?
16 Apan, diin man gayod gikan ang pagkaon nga gitagana kang David ug sa iyang mga kauban? Kombinsido si David nga si Jehova nag-atiman gayod sa iyang katawhan. Mahimo gayong palihokon ni Jehova ang iyang mga alagad sa pagtabang niadtong nanginahanglan. Sa dihang namalandong si David sa nahitabo didto sa yuta sa Gilead, sa walay duhaduha naghunahuna siya nga ang kaayo nga gipakita niadtong tulo ka lalaki maoy pamatuod sa mahigugmaong pag-atiman ni Jehova. Sa hapit na siyang mamatay, si David misulat: “Batan-on ako kaniadto, ako natigulang na usab, apan wala ako makakita ug matarong [lakip na siya] nga gibiyaan sa bug-os, ni sa iyang kaliwat nga nagapangita ug tinapay.” (Sal. 37:25) Dili ba makapahupay ang pagkahibalo nga dili gayod mubo ang kamot ni Jehova?—Prov. 10:3.
“Si Jehova Mahibalo Kon Unsaon Pagluwas sa Katawhan”
17. Unsay makadaghan nang gipamatud-an ni Jehova?
17 Usa lamang si David sa daghang magsisimba ni Jehova nga Iyang gitagan-ag kaikyasan sa karaang panahon. Sukad sa panahon ni David, makadaghan nang gipamatud-an sa Diyos nga tinuod ang giingon ni apostol Pedro: “Si Jehova mahibalo kon unsaon pagluwas sa katawhan nga may diyosnong pagkamahinalaron gikan sa pagsulay.” (2 Ped. 2:9) Tagda ang duha pa ka pananglitan.
18. Sa unsang paagi si Jehova nagtaganag kaluwasan sa adlaw ni Ezequias?
18 Sa dihang ang gamhanang kasundalohan sa Asirya misulong sa Juda ug naghulga sa Jerusalem niadtong ikawalong siglo W.K.P., si Haring Ezequias miampo: “Oh Jehova nga among Diyos, luwasa kami . . . aron ang tanang gingharian sa yuta mahibalo nga ikaw, Oh Jehova, mao lamang ang Diyos.” (Isa. 37:20) Ang gikabalak-an pag-ayo ni Ezequias mao ang ngalan ug kadungganan sa Diyos. Gidungog ni Jehova kanang kinasingkasing nga pag-ampo. Sa usa lang ka gabii, ang usa ka manulonda nakapatay ug 185,000 ka Asiryanhon, ug tungod niana, naluwas ang maunongong mga alagad ni Jehova.—Isa. 37:32, 36.
19. Unsang pasidaan ang gisunod sa mga Kristohanon sa unang siglo nga tungod niana wala sila makaagom sa kalaglagan?
19 Pipila ka adlaw una mamatay si Jesus, siya mihatag ug matagnaong pasidaan alang sa kaayohan sa iyang mga tinun-an sa Judea. (Basaha ang Lucas 21:20-22.) Nanglabay ang daghang katuigan, apan pagka 66 K.P., ang kasundalohan sa Roma misulong sa Jerusalem aron sumpoon ang pag-alsa sa mga Hudiyo. Ang kasundalohan ni Cestius Gallus misugod pagguba sa usa ka bahin sa paril sa templo; dayon kalit lang silang miatras. Ang matinumanong mga Kristohanon mikalagiw dayon ngadto sa kabukiran, kay ilang naila nga higayon na kini nga makaikyas sa kalaglagan nga gitagna ni Jesus. Ang Romanong kasundalohan namalik pagka 70 K.P. Niining tungora wala na sila moatras, ug ang Jerusalem bug-os nga gilaglag. Ang mga Kristohanon nga misunod sa pasidaan ni Jesus wala makaagom nianang makalilisang nga kalaglagan.—Luc. 19:41-44.
20. Nganong makasalig kita kang Jehova ingong atong “Magtatagana ug kaikyasan”?
20 Makapalig-on sa pagtuo ang pagpalandong sa mga ebidensiya nga si Jehova nagtabang sa iyang katawhan sa karaang panahon. Ang iyang gibuhat kaniadto naghatag kanatog katarongan nga mosalig kaniya. Bisan unsang mga kalisdanan nga ato tingaling giatubang karon o maatubang sa umaabot, kita usab bug-os nga makasalig kang Jehova ingong atong “Magtatagana ug kaikyasan.” Apan, sa unsang paagi si Jehova magtagana kanato ug kaikyasan? Komosta ang mga alagad sa Diyos nga gihisgotan sa sinugdanan niining artikuloha? Gidungog ba ang ilang pag-ampo? Susihon nato sa sunod nga artikulo.
Nahinumdom Ka Ba?
• Ang Salmo 70 naghatag kanato ug unsang katarongan nga molaom?
• Sa unsang paagi gipalig-on si David panahon sa balatian?
• Unsang mga pananglitan ang nagpakita nga si Jehova makahimo sa pagluwas sa iyang katawhan gikan sa mga magsusupak?
[Mga Pangutana sa Pagtuon]
[Hulagway sa panid 6]
Gidungog ni Jehova ang pag-ampo ni Ezequias