Si Jehova “ang Magtatagana ug Kaikyasan” Kanato

“Si Jehova magatabang ug magataganag kaikyasan kanila.”—SAL. 37:40.

1, 2. Unsang kamatuoran bahin kang Jehova ang makapahupay ug makapalig-on kanato?

 ANG anino o landong nga gipatungha sa adlaw dili magpondo sa usa lang ka dapit. Sa pagtuyok sa yuta, ang landong padayong moirog ug mausab. Apan, ang Maglalalang sa yuta ug sa adlaw dili mausab. (Mal. 3:6) Ang Bibliya nag-ingon: “Kaniya walay pagkausab sa pagbalhin sa landong.” (Sant. 1:17) Kini nga kamatuoran bahin kang Jehova makapahupay ug makapalig-on gayod kanato, ilabina sa dihang mag-atubang kitag mga pagsulay ug mga problema. Ngano man?

² Sama sa ato nang nahisgotan sa miaging artikulo, si Jehova mao gayod “ang Magtatagana ug kaikyasan” sa karaang panahon. (Sal. 70:5) Siya way pagkausab ug motuman kanunay sa iyang gisaad; busa, ang iyang mga magsisimba karon makasalig gayod nga siya ‘motabang ug motaganag kaikyasan kanila.’ (Sal. 37:40) Sa unsang paagi si Jehova nagtaganag kaikyasan sa iyang mga alagad karon? Siya ba naghatag ug kaikyasan sa matag usa kanato?

Giluwas Gikan sa mga Magsusupak

3. Nganong makaingon kita nga ang mga magsusupak dili gayod makapahunong sa katawhan sa Diyos sa pagsangyaw sa maayong balita?

³ Bisan unsa pang pagsupak ang himoon ni Satanas, dili gayod niya mapugngan ang mga Saksi ni Jehova sa paghatag kang Jehova ug eksklusibong pagsimba nga angay gayod kaniya. Ang Pulong sa Diyos nagpasalig kanato: “Bisan unsa nga hinagiban nga buhaton batok kanimo dili  magmalamposon, ug ang matag dila nga mosulti batok kanimo sa paghukom imong pagahukman.” (Isa. 54:17) Ang mga magsusupak naningkamot sa pagpahunong sa katawhan sa Diyos sa ilang buluhatong pagsangyaw, apan napakyas sila. Tagda ang duha ka pananglitan.

4, 5. Unsang pagsupak ang naatubang sa katawhan ni Jehova niadtong 1918, ug unsay resulta niana?

⁴ Sa 1918, ang katawhan ni Jehova nakasinatig grabeng paglutos nga gipaluyohan sa mga klero sa tuyo nga pahunongon ang ilang buluhatong pagsangyaw. Pagka Mayo 7, ang pederal nga gobyerno sa Amerika nagpakanaog ug mando sa pagdakop kang J. F. Rutherford, nga kaniadto maoy nagdumala sa buluhatong pagsangyaw sa tibuok kalibotan, ug sa uban pang kawani sa hedkuwarter. Sulod sa mga duha ka bulan, si Brader Rutherford ug ang iyang mga kauban sayop nga gihukmang sad-an sa kasong panagkunsabo ug gisentensiyahan ug dugay nga pagkabilanggo. Milampos ba ang mga magsusupak sa pagpahunong sa buluhatong pagsangyaw pinaagi sa pagsang-at ug mga kaso sa korte? Wala gayod!

⁵ Hinumdomi ang saad ni Jehova: “Bisan unsa nga hinagiban nga buhaton batok kanimo dili magmalamposon.” Sa wala-damhang panghitabo, pagka Marso 26, 1919—siyam ka bulan human masentensiyahi si Brader Rutherford ug ang iyang mga kauban—sila gipagawas human mapiyansahi. Pagkasunod tuig, sa Mayo 5, 1920, gisibog ang mga kiha batok kanila. Gipahimuslan sa mga igsoon ang ilang kagawasan pinaagi sa pagsangyaw sa Gingharian. Ang resulta? Aw, miuswag pag-ayo ang buluhaton sukad niadto! Tungod niining maong kadaogan, angayan lamang nga atong pasalamatan “ang Magtatagana ug kaikyasan.”—1 Cor. 3:7.

6, 7. (a) Unsang paglutos ang naagoman sa mga Saksi ni Jehova panahon sa pagmando sa Nazi sa Alemanya, ug unsay resulta niana? (b) Unsay gipamatud-an sa kasaysayan sa mga Saksi ni Jehova sa modernong panahon?

⁶ Tagda ang ikaduhang pananglitan. Sa 1934, nagbahad si Hitler nga iyang puohon ang mga Saksi ni Jehova sa Alemanya. Tinuoray gayod ang iyang bahad. Wala madugay human niini, daghan ang gipangdakop ug gibalhog sa bilanggoan. Linibo ka Saksi ang gilutos; ginatos ang gipatay diha sa mga kampo konsentrasyon. Napuo ba ni Hitler ang mga Saksi? Napahunong ba niya ang pagsangyaw sa maayong balita sa Alemanya? Wala gayod! Panahon sa paglutos, ang atong mga igsoon nagpadayon sa pagsangyaw nga tinagotago. Sa dihang napukan na ang pagmando sa Nazi, ilang gipahimuslan ang ilang kagawasan sa pagpadayon sa pagsangyaw. Karon, aduna nay 165,000 kapin ka magmamantala sa Gingharian sa Alemanya. Sa makausa pa, gituman gayod sa “Magtatagana ug kaikyasan” ang iyang saad: “Bisan unsa nga hinagiban nga buhaton batok kanimo dili magmalamposon.”

⁷ Ang kasaysayan sa mga Saksi ni Jehova sa modernong panahon naghatag ug pamatuod nga dili gayod itugot ni Jehova nga mapuo ang iyang katawhan ingong usa ka grupo. (Sal. 116:15) Apan, komosta kita ingong indibiduwal? Sa unsang paagi itagana ni Jehova ang kaikyasan sa matag usa kanato?

 Makadahom ba Kita ug Pisikal nga Proteksiyon?

8, 9. (a) Sa unsang paagi kita nahibalo nga si Jehova dili kanunayng manalipod kanato sa pisikal nga paagi? (b) Unsay angay natong tagdon?

⁸ Kita nahibalo nga si Jehova wala mosaad nga siya kanunayng manalipod sa matag usa kanato sa pisikal nga paagi. Ang atong baroganan susama nianang sa tulo ka matinumanong mga Hebreohanon nga midumili sa pagyukbo sa bulawang imahen nga gipahimo ni Haring Nabukodonosor. Ang maong mahinadlokon-sa-Diyos nga mga batan-on wala magdahom nga si Jehova milagrosong manalipod kanila batok sa kadaot. (Basaha ang Daniel 3:17, 18.) Apan, sumala sa gipadayag sa asoy, si Jehova nagluwas kanila gikan sa nagdilaab nga hurno. (Dan. 3:21-27) Bisan sa karaang panahon, ang pagkaluwas sa milagrosong paagi talagsa rang mahitabo. Daghang matinumanong mga alagad ni Jehova ang namatay sa mga kamot sa ilang mga magsusupak.—Heb. 11:35-37.

⁹ Komosta sa atong panahon karon? Ingong “Magtatagana ug kaikyasan,” si Jehova makahimo gayod sa pagluwas sa matag usa gikan sa kapeligrohan. Makaseguro ba gayod kita kon gimaniobra ni Jehova o wala ang usa ka partikular nga situwasyon? Dili. Bisan pa niana, ang usa ka tawo nga nakalingkawas gikan sa kapeligrohan mahimong mobati nga siya gitabangan ni Jehova. Dili angayng hukman sa uban nga sayop ang gibati sa maong tawo. Sa samang higayon, angay usab natong tagdon nga daghang matinumanong mga Kristohanon ang namatay tungod sa paglutos, sama sa panahon sa pagmando sa Nazi. Ang uban namatay sa aksidente. (Eccl. 9:11) Kita lagmit makapangutana, ‘Pakyas ba si Jehova ingong “Magtatagana ug kaikyasan” alang niadtong matinumanong mga alagad nga nakaagom ug ahat nga kamatayon?’ Dili gayod.

10, 11. Nganong dili mapugngan sa tawo ang iyang kamatayon, ug unsay arang mahimo ni Jehova bahin niini?

¹⁰ Hunahunaa kini: Dili mapugngan sa tawo ang iyang kamatayon, kay walay tawo nga ‘makatagana ug kaikyasan sa iyang kalag gikan sa kamot sa Sheol,’ o Hades, ang komon nga lubnganan sa tawo. (Sal. 89:48) Apan, komosta sa bahin ni Jehova? Usa ka sister, nga naluwas panahon sa mabangis nga pagmando sa Nazi, nahinumdom sa giingon sa iyang Saksi nga inahan sa paghupay kaniya tungod sa kamatayon sa mga minahal diha sa kampo konsentrasyon: “Kon ang mga tawo dili makalingkawas gikan sa talikala sa kamatayon, buot ingnon mas gamhanan kini kay sa Diyos, dili ba?” Siyempre, mas gamhanan gayod ang Tuboran sa kinabuhi kay sa kamatayon! (Sal. 36:9) Ang tanan nga anaa sa Sheol, o Hades, gitipigan diha sa panumdoman ni Jehova, ug siya magtaganag kaikyasan sa matag usa kanila.—Luc. 20:37, 38; Pin. 20:11-14.

¹¹ Sa laing bahin, si Jehova may pagtagad gayod sa iyang matinumanong mga magsisimba karon. Atong hisgotan ang tulo ka paagi nga nagpakitang siya gayod mao ang atong “Magtatagana ug kaikyasan.”

Gipanalipdan sa Espirituwal nga Paagi

12, 13. Nganong hinungdanon kaayo ang espirituwal nga proteksiyon, ug sa unsang paagi gitagana kana ni Jehova kanato?

¹² Si Jehova naghatag kanatog espirituwal nga proteksiyon, nga mao gayod ang labing hinungdanong matang sa panalipod. Ingong matuod nga mga Kristohanon, kita nasayod nga wala nay laing butang nga mas bililhon pa sa atong kinabuhi kay sa atong suod nga relasyon kang Jehova. (Sal. 25:14; 63:3) Kon wala kini, ang atong kinabuhi walay kahulogan ug wala usab kitay paglaom sa umaabot.

¹³ Kita mapasalamaton tungod kay si Jehova naghatag kanato sa tanang tabang nga atong gikinahanglan aron mahuptan ang suod nga relasyon kaniya. Anaa ang iyang Pulong, balaang espiritu, ug ang iyang tibuok-kalibotang organisasyon sa pagtabang kanato. Unsay atong buhaton aron mapahimuslan pag-ayo kining maong mga tagana? Pinaagi sa regular ug makugihong pagtuon sa iyang Pulong, atong mapalig-on ang atong pagtuo ug mahuptang tin-aw sa hunahuna ang atong paglaom. (Roma 15:4) Pinaagi sa pagpangamuyo alang sa iyang espiritu, kita matabangan sa pagsukol sa tentasyon sa paghimog kuwestiyonableng mga buhat. (Luc. 11:13) Kon atong sundon ang mga instruksiyon nga gitagana sa ulipon nga matang pinaagi sa binase-sa-Bibliya nga mga publikasyon, mga tigom, asembliya, ug mga  kombensiyon, kita mapalig-on sa espirituwal nga “pagkaon sa hustong panahon.” (Mat. 24:45) Kana nga mga tagana manalipod kanato sa espirituwal ug motabang kanato nga magpabiling suod sa Diyos.—Sant. 4:8.

14. Iasoy ang kasinatian nga nagpasiugda kon sa unsang paagi si Jehova nanalipod kanato sa espirituwal.

¹⁴ Aron ipasiugda kon sa unsang paagi si Jehova nanalipod kanato sa espirituwal nga paagi, atong tagdon pag-usab ang mga ginikanan nga gihisgotan sa sinugdanan sa miaging artikulo. Wala madugay human masayri nga si Theresa nga ilang anak nawala, sila nakadawat ug makapahugno nga balita: Siya gipatay. a Ang amahan nahinumdom: ‘Nag-ampo ako kang Jehova nga panalipdan siya. Sa dihang siya gipatay, angkonon ko nga sa sinugdan naglibog ako kon nganong wala tubaga ang akong mga pag-ampo. Siyempre, nahibalo ako nga si Jehova wala mogarantiya ug milagrosong panalipod alang sa matag usa sa iyang katawhan. Nagpadayon ako sa pag-ampo nga hatagan ako ug pagsabot. Nahupayan ako sa pagkahibalo nga si Jehova mopanalipod sa iyang katawhan sa espirituwal—sa ato pa, siya mohatag sa atong gikinahanglan aron mapanalipdan ang atong relasyon uban kaniya. Kanang matanga sa panalipod ang labing hinungdanon, kay apektado niini ang atong walay kataposang umaabot. Sa ingon niana nga diwa, gipanalipdan ni Jehova si Theresa; siya matinumanong nag-alagad kaniya hangtod sa panahon sa iyang kamatayon. Nakabaton ako ug kalinaw sa pagkasayod nga ang iyang mga palaaboton sa umaabot nga kinabuhi anaa sa iyang mahigugmaong mga kamot.’

Gipalig-on sa Dihang Nag-antos ug Balatian

15. Unsang mga tabang ang ihatag ni Jehova sa dihang kita mag-antos sa sakit?

¹⁵ Si Jehova makahimo sa paglig-on kanato sa dihang kita mag-antos ug balatian, sama sa nasinati ni David. (Sal. 41:3) Sa atong panahon karon, si Jehova dili magtagana kanatog kaikyasan pinaagi sa pag-ayo sa atong sakit sa milagrosong paagi, apan siya motabang gayod kanato. Sa unsang paagi? Ang mga prinsipyo nga atong mabasa sa iyang Pulong mahimong motabang kanato sa paghimog maalamong mga desisyon bahin sa pagpatambal ug sa uban pang mga butang. (Prov. 2:6) Kita makakuhag mapuslanong impormasyon ug praktikal nga mga tambag gikan sa mga artikulo nga gipatik diha sa Bantayanang Torre ug Pagmata! nga naghisgot sa atong problema sa panglawas. Pinaagi sa iyang espiritu, mahimong hatagan kita ni Jehova ug “gahom nga labaw sa kasarangan” aron atong masagubang ang atong kahimtang ug mahuptan ang atong integridad bisan unsa pay mahitabo kanato. (2 Cor. 4:7) Pinaagi niana, matabangan kita nga dili kaayo mabalaka sa atong sakit nga tungod niana mawad-an na hinuon kitag panimbang.

16. Unsay gihimo sa usa ka brader aron iyang masagubang ang iyang sakit?

¹⁶ Tagda ang kasinatian sa batan-ong brader nga gihisgotan sa sinugdanan sa miaging artikulo. Sa 1998, siya nadayagnos nga may amyotrophic lateral sclerosis, o ALS, nga sa ngadto-ngadto makaparalisar  sa tibuok niyang lawas. b Unsay iyang gihimo aron iyang masagubang ang iyang sakit? Siya nagpatin-aw: “Dihay mga higayon nga mobati kog kasakit ug kahigawad kon akong mahunahunaan nga ang bugtong solusyon sa akong problema mao na lang ang kamatayon. Sa dihang ako malumsan sa kaguol, ako mag-ampo kang Jehova nga iya untang ihatag kanako kining tulo ka butang: pagkakalmado, pailob, ug paglahutay. Gibati nako nga gitubag ni Jehova ang akong mga pag-ampo. Ang pagkakalmado nakatabang kanako sa paghunahuna sa mga butang nga makapahupay kanako, sama sa kon unsay akong kahimtang unya sa bag-ong kalibotan sa dihang ako makalakaw na, makakaon nag lamiang mga potahe, ug mahimo nang makigsulti sa akong pamilya. Ang pailob nakatabang kanako sa pag-antos sa mga kalisdanan tungod sa pagkahimong paralisado. Ang paglahutay nakatabang kanako sa pagpabiling matinumanon ug timbang sa espirituwal. Gibati gayod nako ang gibati ni David tungod kay si Jehova nagpalig-on kanako diha sa higdaanan sa balatian.”—Isa. 35:5, 6.

Gitagan-an ug Materyal nga Panginahanglan

17. Unsay gisaad ni Jehova nga iyang buhaton alang kanato, ug unsay gipasabot sa maong saad?

¹⁷ Si Jehova nagsaad nga siya motabang kanato sa atong mga panginahanglan. (Basaha ang Mateo 6:33, 34 ug Hebreohanon 13:5, 6.) Apan wala kana magpasabot nga dili na kita motrabaho ug magpaabot na lang nga tagan-an kita sa atong materyal nga panginahanglan. (2 Tes. 3:10) Ang gipasabot sa maong saad mao kini: Kon atong unahon ang pagpangita sa Gingharian sa Diyos ug magkugi sa pagtrabaho, kita makasalig kang Jehova sa pagtabang kanato nga makabaton sa atong mga panginahanglan. (1 Tes. 4:11, 12; 1 Tim. 5:8) Iya kanang ihatag sa paagi nga wala nato dahoma, tingali pinaagi sa usa ka igsoon sa pagtuo nga naghatag kanatog materyal nga tabang o nagtanyag kanatog trabaho.

18. Iasoy ang kasinatian nga nagpakitang kita makalaom ug tabang panahon sa panginahanglan.

¹⁸ Tagda ang nag-inusarang inahan nga gihisgotan sa sinugdanan sa miaging artikulo. Sa dihang namalhin sila sa iyang dalagita ngadto sa laing dapit, nalisdan siya sa pagpangita ug trabaho. Siya mipatin-aw: “Mosangyaw ko sa kanataran mabuntag, ug mangita kog trabaho mahapon. Usa ka adlaw niana, miadto ko sa tindahan aron mopalit ug gatas. Mihunong ko kadiyot ug mitan-aw sa mga utanon, apan wala na koy igong kuwarta nga ikapalit niini. Naguol kaayo ko. Pagpauli nako, akong nakita ang sinako nga mga utanon sa likod sa among balay. Igo-igo gyod tong makasapal sa among panginahanglan sulod sa pipila ka bulan. Nakahilak ko nga nagpasalamat kang Jehova.” Wala madugay nasayran sa sister nga gihatag diay kadto sa usa ka igsoon sa kongregasyon nga nananom ug mga utanon. Sa ulahi, iyang gisulatan siya: “Bisan tuod gipasalamatan ta ka nianang adlawa, ako nagpasalamat usab kang Jehova sa paggamit kanimo aron ipahinumdom kanako nga iya kong gimahal.”—Prov. 19:17.

19. Sa dakong kasakitan, sa unsa makasalig ang mga alagad ni Jehova, ug unsay atong kinahanglang buhaton karon?

¹⁹ Dayag kaayo nga ang gibuhat ni Jehova kaniadto ug karon naghatag kanatog katarongan sa pagsalig kaniya ingong atong Magtatabang. Sa dili madugay, sa dihang mohapak na ang dakong kasakitan niining kalibotan ni Satanas, labaw pa natong gikinahanglan ang tabang ni Jehova. Bisan pa niana, ang mga alagad ni Jehova makasalig gayod kaniya sa bug-os. Mahimo nilang ihangad ang ilang mga ulo ug magkalipay kay nahibalo nga ang ilang kaluwasan haduol na. (Luc. 21:28) Samtang nagpaabot niana, kinahanglan gayod kitang mosalig kang Jehova bisan unsa pang pagsulay ang modangat kanato, nga masaligon nga ang atong dili-mausab nga Diyos motagana gayod kanato ug kaikyasan.

[Mga footnote]

Nahinumdom Ka Ba?

• Sa unsang paagi si Jehova magtaganag kaikyasan alang niadtong nakaagom ug ahat nga kamatayon?

• Nganong hinungdanon kaayo ang espirituwal nga proteksiyon?

• Unsay gipasabot sa saad ni Jehova nga siya motabang kanato sa atong mga panginahanglan?

[Mga Pangutana sa Pagtuon]

[Hulagway sa panid 8]

Human dakpa niadtong 1918, si Brader Rutherford ug ang iyang mga kauban sa ulahi gibuhian, ug gisibog ang mga kiha batok kanila

[Hulagway sa panid 10]

Si Jehova makahimo sa paglig-on kanato diha sa “higdaanan sa balatian”