Ang “Masidlakong mga Mata” ni Jehova Magausisa sa Tanan

‘Ang masidlakong mga mata ni Jehova magausisa sa mga anak sa mga tawo.’—SAL. 11:4.

1. Masuod kita sa unsang matanga sa mga tawo?

 UNSAY imong pagbati sa mga tawo nga nagpakitag tiunayng interes kanimo? Sila matinud-anong mohatag sa ilang opinyon sa dihang mangayo ka sa ilang hunahuna. Sa dihang manginahanglan kag tabang, andam silang motabang kanimo. Sa dihang mangayo kag tambag, sila mahigugmaong mohatag niana. (Sal. 141:5; Gal. 6:1) Dili ba gusto kang makigsuod nianang matanga sa mga tawo? Buweno, si Jehova ug ang iyang Anak sama gayod niana. Gani, mas interesado sila kanimo kay ni bisan kinsang tawo, ug maayo ang ilang motibo; buot nila nga tabangan ka nga “makapangupot pag-ayo sa tinuod nga kinabuhi.”—1 Tim. 6:19; Pin. 3:19.

2. Sa unsang paagi gipakita ni Jehova nga interesado gayod siya sa iyang mga alagad?

² Gipakita ni salmistang David nga interesado gayod si Jehova kanato sa dihang siya miingon: ‘Ang mga mata ni Jehova magatan-aw, ang iyang masidlakong mga mata magausisa sa mga anak sa mga tawo.’ (Sal. 11:4) Oo, ang Diyos dili lamang motan-aw kanato; siya magausisa kanato. Misulat usab si David: “Ikaw nag-usisa sa akong kasingkasing, ikaw nagsusi panahon sa kagabhion . . . Hikaplagan mo nga wala ako maglaraw ug daotan.” (Sal. 17:3) Tataw nga nahibalo si David nga interesado gayod si Jehova kaniya. Siya nahibalo nga si Jehova masakitan ug masuko kon siya maghambin ug daotang hunahuna o maglaraw ug daotan. Tinuod gayod kang David si Jehova. Tinuod ba usab Siya kanimo?

Makita ni Jehova Kon Unsay Anaa sa Kasingkasing

3. Sa unsang paagi si Jehova nagpakita ug timbang nga panglantaw sa atong mga kahuyangan?

³ Si Jehova interesado gayod sa atong sulod nga pagkatawo—kon unsay anaa sa atong kasingkasing. (Sal. 19:14; 26:2) Sa kamahigugmaon, siya mosabot sa ginagmay natong mga kasaypanan. Pananglitan, sa dihang gilimdan ni Sara nga asawa ni Abraham ang nagmateryalisar nga manulonda, dayag nga nasabtan sa manulonda nga nahadlok ug naulaw si Sara, busa igo lang niya kining gimaymayan. (Gen. 18:12-15) Sa dihang ang patriarka nga si Job nagpahayag sa “iyang kalag nga matarong inay sa Diyos,” si Jehova nagpanalangin gihapon kaniya, kay nasayod siya kon unsa ka pait ang naagoman ni Job sa kamot ni Satanas. (Job 32:2; 42:12) Sa samang paagi, si Jehova wala masuko sa babayeng balo sa Zarepta bisag pintok ang sinultian niini kang manalagnang Elias. Nakasabot ang Diyos nga ang babaye naguol pag-ayo tungod sa kamatayon sa iyang bugtong anak.—1 Hari 17:8-24.

4, 5. Sa unsang paagi si Jehova nagpakitag konsiderasyon kang Abimelek?

⁴ Tungod kay si Jehova nagausisa sa kasingkasing, siya nagpakitag konsiderasyon bisan sa mga dili magtutuo. Tagda ang asoy maylabot kang Abimelek, nga hari sa Filistehanong siyudad sa Gerar. Kay wala mahibalo si Abimelek nga asawa ni Abraham si Sara, iya kining gikuha aron iyang maasawa. Apan, sa wala pa mahilabti ni Abimelek si Sara, si Jehova miingon kaniya diha sa damgo: “Nahibaloan ko usab nga sa pagkamatinud-anon sa imong kasingkasing kini imong nabuhat, ug ako nagpugong usab kanimo nga makasala batok kanako. Mao nga ako wala magtugot kanimo nga hilabtan mo siya. Apan karon iuli ang asawa sa lalaki, kay siya usa ka manalagna, ug siya mangamuyo alang kanimo. Busa magpadayon nga buhi.”—Gen. 20:1-7.

⁵ Siyempre, mahimo gayod untang silotan ni Jehova si Abimelek, kinsa usa ka magsisimba sa bakak nga mga diyos. Apan nakita sa Diyos nga ang hari wala gayod mahibalo nga minyo si Sara. Busa, si Jehova nagpakitag konsiderasyon sa hari ug  giingnan siya kon unsay angay niyang buhaton aron siya mapasaylo ug “magpadayon nga buhi.” Dili ba mao kana ang matang sa Diyos nga gusto nimong simbahon?

6. Sa unsang paagi si Jesus nagsundog sa iyang Amahan?

⁶ Si Jesus hingpit nga nagsundog sa iyang Amahan, nga nagtan-aw sa maayong mga hiyas sa iyang mga tinun-an ug andam nga magpasaylo sa ilang kasaypanan. (Mar. 10:35-45; 14:66-72; Luc. 22:31, 32; Juan 15:15) Ang tinamdan ni Jesus nahiuyon sa iyang gisulti sa Juan 3:17: “Gipadala sa Diyos ang iyang Anak nganhi sa kalibotan, dili aron pagahukman niya ang kalibotan, kondili aron pagaluwason ang kalibotan pinaagi kaniya.” Oo, dako kaayo ug walay paglubad ang gugma ni Jehova ug ni Jesus alang kanato. Makita kini diha sa ilang tinguha nga kita makabaton ug kinabuhi. (Job 14:15) Ang maong gugma nagpakita kon nganong si Jehova nagausisa kanato, kon unsay iyang panglantaw kanato, ug kon unsay iyang reaksiyon sa iyang makita.—Basaha ang 1 Juan 4:8, 19.

Mahigugmaong Giusisa sa Diyos

7. Unsay motibo ni Jehova sa pag-usisa kanato?

⁷ Nan, sayop gayod ang paghunahuna nga si Jehova samag polis nga magbantay kon kanus-a kita masayop! Ang tinuod, si Satanas ang kanunayng mangitag sayop kanato. (Pin. 12:10) Iya pa ganing dudahan ang atong motibo sa pag-alagad sa Diyos! (Job 1:9-11; 2:4, 5) Mahitungod sa Diyos, ang salmista misulat: “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog?” (Sal. 130:3) Dayag nga wala gayod! (Eccl. 7:20) Hinunoa, si Jehova samag mahigugmaong amahan nga nagbantay kanato uban ang kaluoy ug kalulot, kinsa nagtinguha sa pagpanalipod sa iyang pinalanggang mga anak gikan sa kadaot. Kay nasayod nga kita dili hingpit ug adunay mga kahuyangan, siya kanunayng naghatag ug pasidaan aron makalikay kita sa kadaot.—Sal. 103:10-14; Mat. 26:41.

8. Sa unsang paagi si Jehova naghatag ug instruksiyon ug disiplina sa iyang mga alagad?

⁸ Ang gugma sa Diyos gipakita pinaagi sa instruksiyon ug disiplina nga anaa sa Kasulatan ug sa espirituwal nga pagkaon nga gitagana sa “matinumanon ug maalamong ulipon.” (Mat. 24:45; Heb. 12:5, 6) Si Jehova nagatabang usab pinaagi sa Kristohanong kongregasyon ug sa “mga gasa nga mga lalaki.” (Efe. 4:8) Gusto usab niyang makita kon unsay atong pagsanong sa iyang inamahang pagbansay kanato, ug mangita siyag paagi nga makatabang pa kanato. Nag-ingon ang Salmo 32:8: “Ihatag ko kanimo ang hait nga salabotan ug tudloan ko ikaw sa dalan nga imong pagalaktan. Ihatag ko ang tambag nga ang akong mata magatan-aw kanimo.” Nan, hinungdanon gayod nga mamati kita kanunay kang Jehova! Kinahanglang magpaubos kita sa iyang atubangan ug ilhon siya ingong atong mahigugmaong Magtutudlo ug Amahan.—Basaha ang Mateo 18:4.

9. Unsang mga taras ang angay natong likayan, ug ngano?

⁹ Sa laing bahin, hinaot nga dili motig-a ang atong kasingkasing tungod sa garbo, kakulang ug pagtuo, o sa “malimbongong gahom sa sala.” (Heb. 3:13; Sant. 4:6) Kini nga mga taras sagad moturok sa dihang ang usa ka tawo maghambin ug dili maayong hunahuna o tinguha. Sa ngadto-ngadto, basin isalikway pa gani niya ang nahiangay nga tambag sa Kasulatan. Mas grabe pa niini, mahimong makagamot na sa iyang kasingkasing ang pagbuhat ug daotan nga tungod niana mahimo siyang kaaway sa Diyos. Makuyaw gayod kana  nga kahimtang! (Prov. 1:22-31) Tagda ang gibuhat ni Cain, ang panganay ni Adan ug Eva.

Makita ni Jehova ang Tanan ug Andam Siyang Motabang

10. Nganong wala dawata ni Jehova ang halad ni Cain, ug unsay reaksiyon ni Cain?

¹⁰ Sa dihang si Cain ug Abel naghalad ngadto kang Jehova, Siya interesado dili lamang sa ilang gasa kondili sa ilang motibo usab. Tungod niini, gidawat sa Diyos ang halad ni Abel, nga gitanyag tungod sa pagtuo, apan wala dawata ang kang Cain, nga nagpakitag kakulang sa pagtuo. (Gen. 4:4, 5; Heb. 11:4) Imbes makakat-on si Cain gikan niining hitaboa ug mag-usab sa iyang tinamdan, misilaob ang iyang kasuko batok sa iyang igsoon.—Gen. 4:6.

11. Sa unsang paagi nadayag nga malimbongon ang kasingkasing ni Cain, ug unsang pagtulon-an ang atong mapupo niini?

¹¹ Nakita ni Jehova nga ang tinamdan ni Cain mosangpot sa pagbuhat ug daotan, busa maluloton niyang giingnan si Cain nga kon siya magbuhat ug maayo, may katarongan siya nga magmaya. Ikasubo, wala panumbalinga ni Cain ang tambag sa iyang Maglalalang ug iyang gipatay ang iyang igsoon. Nadayag pa ang pagkadaotan sa kasingkasing ni Cain diha sa iyang way-tahod nga tinubagan sa pangutana sa Diyos: “Hain si Abel nga imong igsoon?” Si Cain mitubag: “Ambot. Magbalantay ba ako sa akong igsoon?” (Gen. 4:7-9) Malimbongon gayod ang kasingkasing ug magtukmod pa gani kini sa usa sa pagsalikway sa direktang tambag sa Diyos! (Jer. 17:9) Hinaot nga makapupo kitag pagtulon-an gikan niini ug ato dayong isalikway ang sayop nga tinguha sa dili pa kini makagamot pag-ayo nga maglisod na kita sa pagkontrolar niini. (Basaha ang Santiago 1:14, 15.) Kon kita makadawat ug tambag gikan sa Kasulatan, hinaot nga ato kanang pabilhan ug isipon ingong pamatuod sa gugma ni Jehova.

Walay Sala nga Matago

12. Unsay panglantaw ni Jehova sa buhat nga daotan?

¹² Maghunahuna tingali ang uban nga kon walay makakita kanila nga nagbuhat ug daotan, sila dili masilotan. (Sal. 19:12) Sa tinuoray lang, wala gayoy sala nga matago. “Ang tanang butang hubo ug binuksan sa mga mata niya nga kaniya manubag kita.” (Heb. 4:13) Si Jehova maoy usa ka Maghuhukom nga nagausisa sa atong kinasulorang mga motibo, ug ang iyang panglantaw sa buhat nga daotan nagbanaag ug hingpit nga hustisya. Siya “usa ka Diyos nga maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran.” Apan, sa mga dili mahinulsolon, siya “dili gayod magpahigawas gikan sa silot” kon ang mga indibiduwal “tinuyo nga magpakasala” o maglaraw ug daotan. (Ex. 34:6, 7; Heb. 10:26) Makita kini diha sa pakiglabot ni Jehova kang Acan ug kang Ananias ug Sapira.

13. Sa unsang paagi ang kadalo nakatampo sa daotang buhat ni Acan?

¹³ Si Acan nanguha ug inagaw gikan sa siyudad sa Jerico ug gitagoan kini diha sa iyang tolda, lagmit kakunsabo niya ang iyang pamilya. Kadto maoy tataw nga paglapas sa sugo sa Diyos. Sa dihang nayagyag ang iyang sala, gipakita ni Acan nga iyang naamgohan ang kaseryoso sa iyang nahimo, kay siya miingon: “Ako nakasala batok kang Jehova.” (Jos. 7:20) Sama kang Cain, naugmad ni Acan ang daotan nga kasingkasing. Sa kahimtang ni Acan, ang kadalo maoy pangunang hinungdan, ug kini nakatampo sa iyang pagkahimong malimbongon. Sanglit iya man ni Jehova ang mga inagaw gikan sa Jerico, sama rag gikawatan ni Acan ang Diyos, ug kini nakakalas sa iyang kinabuhi hasta nianang sa iyang pamilya.—Jos. 7:25.

14, 15. Nganong angay lamang nga silotan sa Diyos si Ananias ug Sapira, ug unsay atong makat-onan niini?

¹⁴ Si Ananias ug ang iyang asawa nga si Sapira maoy mga membro sa unang Kristohanong kongregasyon sa Jerusalem. Human sa Pentekostes  33 K.P., ang kongregasyon nagpatunghag pondong salapi nga magamit sa pag-atiman sa panginahanglan sa bag-ong mga magtutuo gikan sa halayong kayutaan nga nagpabilin pa sa Jerusalem. Gihimo nila kini pinaagig boluntaryong mga amot. Si Ananias nagbaligyag yuta ug iyang gidonar ang usa ka bahin sa halin niini. Apan, iyang gipatuo ang mga apostoles nga iyang gidonar ang tanan, ug nahibalo niana ang iyang asawa. Sa walay duhaduha, gusto niining maong magtiayon nga maangkon ang linaing pasidungog sulod sa kongregasyon. Apan namakak sila. Sa milagrosong paagi, gibutyag kana ni Jehova kang apostol Pedro, kinsa misudya kang Ananias. Dihadiha, si Ananias natumba ug nabugtoan sa gininhawa. Wala madugay human niana, namatay usab si Sapira.—Buh. 5:1-11.

¹⁵ Ang gihimo ni Ananias ug Sapira dili lang tungod sa ilang kahuyangan. Ila kadtong giplano ug ilang gibakakan ang mga apostoles. Mas grabe pa, sila ‘namakak sa balaang espiritu ug sa Diyos.’ Ang gihimo ni Jehova nagpakita nga andam gayod siyang manalipod sa kongregasyon batok sa mga salingkapaw. “Makahahadlok [gayod] nga mahulog ngadto sa mga kamot sa buhing Diyos”!—Heb. 10:31.

Hupti ang Imong Integridad sa Tanang Panahon

16. (a) Unsay gibuhat ni Satanas aron mahaylo sa pagpakasala ang katawhan sa Diyos? (b) Unsang mga paagi ang gigamit sa Yawa aron mahaylo sa pagpakasala ang mga tawo diha sa inyong dapit?

¹⁶ Gihimo ni Satanas ang tanan aron kita mahaylo sa pagpakasala ug mawad-an sa pag-uyon ni Jehova. (Pin. 12:12, 17) Ang daotang tuyo sa Yawa tataw kaayong makita sa kalibotan, nga walay laing gihunahuna kondili ang pagbuhat ug imoralidad ug kapintasan. Ang law-ay nga mga hulagway dali na karong makita pinaagi sa mga kompiyuter o sa ubang elektronikong mga kasangkapan. Hinaot nga dili kita magpadaog sa panghaylo ni Satanas. Hinunoa, mahisama unta ang atong gibati nianang kang David, kinsa misulat: “Magagawi ako uban ang pagkamaalamon sa paaging walay-ikasaway. . . . Magalakaw ako sa integridad sa akong kasingkasing sulod sa akong balay.”—Sal. 101:2.

17. (a) Nganong sa ngadto-ngadto iyagyag ra ni Jehova ang tinago nga mga sala? (b) Unsay determinado natong buhaton?

¹⁷ Sa atong adlaw, si Jehova dili magbutyag sa grabeng sala ug malimbongong panggawi sa milagrosong paagi, sama sa iyang gibuhat usahay sa miagi. Bisan pa niana, iyang makita ang tanan, ug sa iyang gitakdang panahon ug paagi iyang iyagyag ang mga butang nga natago. Si Pablo nag-ingon: “Ang mga sala sa pipila ka tawo dayag sa kadaghanan, nga motultol dayon sa paghukom, apan mahitungod sa ubang tawo ang ilang mga sala madayag usab sa ulahi.” (1 Tim. 5:24) Ang pangunang motibo ni Jehova sa pagyagyag sa daotang mga buhat mao ang gugma. Iyang gihigugma ang kongregasyon ug buot niyang panalipdan ang kahinlo niana. Dugang pa, siya nagpakitag kaluoy niadtong nakasala apan tinuod nga naghinulsol. (Prov. 28:13) Busa maningkamot kita sa paghupot ug bug-os nga  kasingkasing atubangan sa Diyos ug isalikway ang tanang makadaot nga mga impluwensiya.

Hupti ang Bug-os nga Kasingkasing

18. Unsay gusto ni Haring David nga bation sa iyang anak ngadto sa Diyos?

¹⁸ Si Haring David nag-awhag sa iyang anak nga si Solomon: “Ilha ang Diyos sa imong amahan ug alagara siya uban ang bug-os nga kasingkasing ug uban ang malipayon nga kalag; kay ang tanang kasingkasing ginasusi ni Jehova, ug ang matag kiling sa hunahuna iyang ginaila.” (1 Cron. 28:9) Gusto ni David nga ang iyang anak dili lang basta motuo nga adunay Diyos. Buot niya nga pabilhan ni Solomon ang tiunay nga interes ni Jehova sa Iyang mga alagad. Imo ba usab kanang gipabilhan?

19, 20. Sumala sa Salmo 19:7-11, unsay nakatabang kang David sa pagpakigsuod kang Jehova, ug sa unsang paagi atong masundog si David?

¹⁹ Si Jehova nahibalo nga ang mga tawong adunay hustong tinamdan madani kaniya ug ang pagkahibalo nila sa iyang mga hiyas makapasuod sa ilang relasyon kaniya. Busa, buot ni Jehova nga kita makaila kaniya ug masinati sa iyang maanindot nga mga hiyas. Sa unsang paagi mahimo nato kana? Pinaagi sa pagtuon sa iyang Pulong ug pagtagamtam sa iyang mga panalangin.—Prov. 10:22; Juan 14:9.

²⁰ Ikaw ba nagabasa sa Pulong sa Diyos sa adlaw-adlaw ug nag-ampo nga unta iya kang tabangan sa pagsunod sa mga tambag niana? Imo bang nakita ang kahinungdanon sa pagkinabuhi sumala sa mga prinsipyo sa Bibliya? (Basaha ang Salmo 19:7-11.) Kon mao, padayon nga modako ang imong pagtuo ug gugma kang Jehova. Ug siya, sa baylo, moduol gayod kanimo ug maglakaw uban kanimo nga daw nagkupot sa imong kamot. (Isa. 42:6; Sant. 4:8) Oo, pamatud-an ni Jehova ang iyang gugma kanimo pinaagi sa pagpanalangin ug pagpanalipod kanimo sa espirituwal samtang ikaw nagasubay sa sigpit nga dalan padulong sa kinabuhi.—Sal. 91:1, 2; Mat. 7:13, 14.

Unsay Imong Tubag?

• Nganong si Jehova nagausisa kanato?

• Nganong ang pipila ka indibiduwal nahimong mga kaaway sa Diyos?

• Sa unsang paagi atong ikapakita nga tinuod gayod si Jehova kanato?

• Sa unsang paagi atong mahuptan ang bug-os nga kasingkasing atubangan sa Diyos?

[Mga Pangutana sa Pagtuon]

[Hulagway sa panid 4]

Sa unsang paagi si Jehova nagbantay kanato sama sa usa ka mahigugmaong amahan?

[Hulagway sa panid 5]

Unsang pagtulon-an ang atong mapupo sa asoy bahin kang Ananias?

[Hulagway sa panid 6]

Unsay motabang kanato sa pagpadayon sa pag-alagad kang Jehova uban ang bug-os nga kasingkasing?