Ikaw ba Nanguna sa Pagpakitag Pasidungog?
Ikaw ba Nanguna sa Pagpakitag Pasidungog?
“Manguna sa pagpakitag pasidungog sa usag usa.”—ROMA 12:10.
1. Unsa ang makapasubong kahimtang diha sa daghang dapit sa kalibotan?
SA PIPILA ka bahin sa kalibotan, ang mga bata moluhod kon adunay mga edaran nga naglingkod isip pagpakitag pagtahod kanila. Pinaagi niini, ang mga bata dili mas taas tan-awon kay sa mga edaran. Sa maong mga dapit, giisip usab nga walay pagtahod ang usa ka bata kon motalikod siya sa usa ka edaran. Ang matag kultura lainlaig paagi sa pagpakitag pagtahod, apan kana nagpahinumdom kanato sa Balaod ni Moises. Kini naglakip sa sugo: “Atubangan sa buhok nga ubanon motindog ka, ug magpakita ka ug pagtamod sa tawong tigulang.” (Lev. 19:32) Apan ikasubo nga sa daghang dapit sa kalibotan, ang mga tawo wala na magpakitag pagtahod sa uban.
2. Sumala sa Pulong sa Diyos, kinsay atong pasidunggan?
2 Ang Pulong sa Diyos nagpasiugda gayod sa paghatag ug pasidungog. Kini nagsulti nga atong pasidunggan si Jehova ug si Jesus. (Juan 5:23) Kini nagsugo usab kanato sa pagpasidungog sa mga membro sa atong pamilya, sa atong mga isigkamagtutuo, ug sa ubang tagagawas. (Roma 12:10; Efe. 6:1, 2; 1 Ped. 2:17) Unsa ang pipila ka paagi nga atong mapasidunggan si Jehova? Sa unsang paagi usab atong mapasidunggan, o mapakitaag lalom nga pagtahod, ang atong mga igsoon? Hisgotan nato kini lakip na ang ubang mga pangutana nga nalangkit niini.
Pasidunggi si Jehova ug ang Iyang Ngalan
3. Unsa ang usa ka hinungdanong paagi sa pagpasidungog kang Jehova?
3 Usa sa hinungdanong paagi nga atong mapasidunggan si Jehova mao ang pagtahod sa iyang ngalan. Haom kana tungod kay kita “usa ka katawhan alang sa iyang ngalan.” (Buh. 15:14) Dako gayod nga kadungganan ang pagdala sa ngalan sa labing gamhanang Diyos, si Jehova. Si manalagnang Miqueas miingon: “Ang tanang mga katawhan, sa ilang bahin, magalakaw ang tagsatagsa sa ngalan sa iyang diyos; apan kita, sa atong bahin, magalakaw sa ngalan ni Jehova nga atong Diyos hangtod sa panahong walay tino, bisan hangtod sa kahangtoran.” (Miq. 4:5) Ang ‘paglakaw diha sa ngalan ni Jehova’ nagpasabot nga kita magkinabuhi adlaw-adlaw sa paagi nga mapasidunggan ang iyang ngalan. Sama sa gipahinumdom ni Pablo sa mga Kristohanon sa Roma, ang ngalan sa Diyos ‘mapasipalahan,’ o mawad-ag maayong reputasyon, kon ang atong pagkinabuhi wala mahiuyon sa maayong balita nga atong gisangyaw.—Roma 2:21-24.
4. Unsay imong panglantaw sa pribilehiyo nga makapamatuod bahin kang Jehova?
4 Atong mapasidunggan usab si Jehova pinaagi sa pagsangyaw. Sa karaang panahon, si Jehova nagdapit sa nasod sa Israel aron mahimong iyang mga saksi, apan napakyas sila sa pagtuman niana. (Isa. 43:1-12) Makadaghan silang mirebelde kang Jehova ug “ilang gipasakitan bisan ang Balaang Usa sa Israel.” (Sal. 78:40, 41) Sa ngadtongadto, ang maong nasod bug-os nga nawad-an sa pabor ni Jehova. Apan sa atong bahin, kita nagpabili gayod sa pribilehiyo sa pagpamatuod bahin kang Jehova ug sa pagpaila sa iyang ngalan. Kita nagbuhat niana tungod kay kita nahigugma sa Diyos ug gusto nato nga mabalaan ang iyang ngalan. Tungod kay nahibalo kita sa kamatuoran bahin sa atong langitnong Amahan ug sa iyang katuyoan, kita matukmod gayod sa pagsangyaw, dili ba? Mobati kita sama kang Pablo sa dihang siya miingon: “Ang panginahanglan gikapatong ibabaw kanako. Sa pagkatinuod, alaot ako kon dili ko ipahayag ang maayong balita!”—1 Cor. 9:16.
5. Sa unsang paagi ang pagtuo kang Jehova nalangkit sa pagtahod kaniya?
5 Ang salmistang si David miingon: “Kadtong nakaila sa imong ngalan mosalig kanimo, kay dili gayod nimo biyaan kadtong mangita kanimo, Oh Jehova.” (Sal. 9:10) Kon kita nakaila ug nagtahod gayod kang Jehova, kita mosalig kaniya sama sa iyang matinumanong mga alagad sa karaang panahon. Ang atong pagsalig ug pagtuo kang Jehova maoy laing paagi sa pagpasidungog kaniya. Matikdi kon giunsa pagpakita sa Bibliya nga ang pagsalig sa Diyos nalangkit sa pagtahod kaniya. Sa dihang ang karaang Israel napakyas sa pagsalig Kaniya, si Jehova nangutana kang Moises: “Hangtod kanus-a ba nga ako dili tahoron niini nga katawhan, ug hangtod kanus-a ba nga sila dili magbutang ug pagtuo kanako bisan pa sa tanang ilhanan nga akong gihimo sa ilang taliwala?” (Num. 14:11) Atong masabtan niining mga pulonga nga kon kita may pagsalig nga si Jehova manalipod ug motabang kanato bisan atubangan sa mga pagsulay, atong gipakita nga kita nagtahod kaniya.
6. Unsay magtukmod kanato sa pagpakitag lalom nga pagtahod kang Jehova?
6 Gipakita ni Jesus nga kinahanglang kinasingkasing gayod ang pagtahod kang Jehova. Sa dihang nakigsulti si Jesus sa mga tawo nga salingkapaw ug pagsimba, gikutlo niya ang giingon ni Jehova: “Kining mga tawhana nagpasidungog kanako pinaagi sa ilang mga ngabil, apan ang ilang kasingkasing halayo kaayo kanako.” (Mat. 15:8) Ang tiunayng gugma kang Jehova magtukmod sa usa sa pagpakitag kinasingkasing nga pagtahod Kaniya. (1 Juan 5:3) Angay usab natong hinumdoman ang saad ni Jehova: “Silang nagpasidungog kanako akong pasidunggan.”—1 Sam. 2:30.
Ang mga Nagapanguna Angayng Motahod sa Uban
7. (a) Nganong sila nga adunay mga katungdanan angayng magpasidungog sa mga igsoon nga ilang gidumala? (b) Sa unsang paagi gipakita ni Pablo ang iyang pagtahod sa mga igsoon?
7 Si apostol Pablo nagtambag sa iyang mga isigkamagtutuo: “Manguna sa pagpakitag pasidungog sa usag usa.” (Roma 12:10) Kadtong adunay katungdanan sa kongregasyon angayng magpakitag panig-ingnan—“manguna”—sa pagpasidungog sa mga igsoon nga ilang gidumala. Bahin niini, kinahanglang sundon niadtong nag-abaga ug mga responsabilidad ang panig-ingnan ni Pablo. (Basaha ang 1 Tesalonica 2:7, 8.) Ang mga igsoon sa mga kongregasyon nga giduaw ni Pablo nahibalo nga dili gayod niya sila pahimoon sa mga butang nga siya mismo dili gustong mobuhat. Si Pablo nagtahod sa iyang mga isigkamagtutuo ug tungod niana sila nagtahod usab kaniya. Sa dihang miingon si Pablo: “Busa, ako nangaliyupo kaninyo, mahimong mga tigsundog kanako,” kita makaseguro nga daghan ang misanong tungod sa iyang maayong panig-ingnan.—1 Cor. 4:16.
8. (a) Unsa ang usa ka hinungdanong paagi nga gitahod ni Jesus ang iyang mga tinun-an? (b) Sa unsang paagi ang mga magtatan-aw karon makasundog sa panig-ingnan ni Jesus?
8 Ang laing paagi nga ikapakita sa usa ka magtatan-aw nga gitahod niya ang mga igsoon mao ang pagpatin-aw kanila kon nganong ipabuhat niya ang usa ka butang. Sa pagbuhat niana iyang gisundog si Jesus. Pananglitan, sa dihang gisultihan ni Jesus ang iyang nga tinun-an sa pag-ampo alang sa dugang mamumuo sa pagpangani, gisultihan sila ni Jesus sa hinungdan. Siya miingon: “Dako ang alanihon, apan diyutay ra ang mga mamumuo. Busa, pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.” (Mat. 9:37, 38) Dugang pa, sa dihang iyang giingnan ang iyang mga tinun-an nga “magpadayon sa pagbantay,” iya usab silang gisultihan sa katarongan kon nganong buhaton kana. Siya miingon: “Tungod kay kamo wala mahibalo kon unsang adlawa moabot ang inyong Ginoo.” (Mat. 24:42) Kasagaran, sultihan ni Jesus ang iyang mga tinun-an dili lamang sa kon unsay angay nilang buhaton kondili sa katarongan usab kon nganong buhaton kana. Gipakita niini nga siya nagtahod gayod kanila. Pagkamaayong panig-ingnan niini alang sa mga magtatan-aw!
Tahora ang Kongregasyon ni Jehova ug ang mga Kahikayan Niini
9. Kinsay atong gipasidunggan kon atong gitahod ang tibuok-kalibotang kongregasyon ug ang mga hawas niini? Ipatin-aw.
9 Sa pagpasidungog kang Jehova, kinahanglang atong tahoron ang tibuok-kalibotang kongregasyon, lakip na ang mga hawas niini. Kon atong sundon ang tambag sa matinumanong ulipon, kita nagtahod sa kahikayan ni Jehova. Sa unang-siglong kongregasyon, gisaway ni Juan kadtong walay pagtahod sa tinudlong mga igsoon. (Basaha ang 3 Juan 9-11.) Ang mga pulong ni Juan nagpakita nga dihay mga Kristohanon nga walay pagtahod sa mga magtatan-aw ug sa ilang pagpanudlo ug pagtultol. Makalilipay nga kadaghanan sa mga Kristohanon dili ingon niana. Sa buhi pa ang mga apostoles, ang mga igsoon sa katibuk-an nagtahod sa mga nagapanguna.—Filip. 2:12.
10, 11. Gamit ang Bibliya, isaysay kon nganong haom nga ang pipila adunay awtoridad diha sa kongregasyon.
10 Sumala sa uban, dili kono angay nga ang pipila hatagag katungdanan sa kongregasyon tungod kay si Jesus miingon sa iyang mga tinun-an nga “kamong tanan mga igsoon.” (Mat. 23:8) Apan diha sa Hebreohanon ug Gregong Kasulatan adunay daghang pananglitan sa mga tawo nga gihatagan sa Diyos ug awtoridad. Ang kasaysayan sa mga patriarka, maghuhukom, ug mga hari sa mga Hebreohanon sa karaang panahon nagpakita nga si Jehova naggamit ug mga tawo sa pagtultol sa iyang katawhan. Sa dihang wala nila tahora ang mga tawo nga gitudlo sa Diyos, sila gidisiplina ni Jehova.—2 Hari 1:2-17; 2:19, 23, 24.
11 Sa samang paagi, giila sa mga Kristohanon sa unang siglo ang awtoridad sa mga apostoles. (Buh. 2:42) Pananglitan, si Pablo adunay awtoridad taliwala sa mga igsoon. (1 Cor. 16:1; 1 Tes. 4:2) Apan, siya usab kinabubut-ong nagpasakop niadtong adunay mas labaw nga awtoridad. (Buh. 15:22; Gal. 2:9, 10) Oo, si Pablo adunay hustong panglantaw sa awtoridad diha sa Kristohanong kongregasyon.
12. Unsang duha ka butang ang atong makat-onan diha sa Bibliya bahin sa awtoridad?
12 Duha ka butang ang atong makat-onan niana. Una, subay sa Kasulatan nga ang “matinumanon ug maalamong ulipon,” pinaagi sa Nagamandong Lawas niini, magtudlog mga lalaki sa pag-abagag mga responsabilidad, ug ang pipila sa maong mga lalaki adunay awtoridad sa ubang tinudlong mga lalaki. (Mat. 24:45-47; 1 Ped. 5:1-3) Ikaduha, kitang tanan, lakip na ang tinudlong mga lalaki, angayng magtahod niadtong gihatagag awtoridad sa pagpanguna kanato. Nan, sa unsang paagi atong ikapakita ang atong pagtahod sa mga magtatan-aw diha sa tibuok-kalibotang kongregasyon?
Pagtahod sa mga Nagapanawng Magtatan-aw
13. Sa unsang paagi atong ikapakita ang atong pagtahod sa modernong-adlaw nga mga hawas sa kongregasyon?
13 Si Pablo miingon: “Kami naghangyo kaninyo, mga igsoon, nga tamdon ninyo silang naghago taliwala kaninyo ug nagdumala kaninyo diha sa Ginoo ug nagpahimangno kaninyo; ug hatagan sila ug labaw sa kasagaran nga pagtahod diha sa gugma tungod sa ilang buhat. Magmadaiton kamo sa usag usa.” (1 Tes. 5:12, 13) Ang mga nagapanawng magtatan-aw lakip gayod sa gitumong ni Pablo nga “naghago.” Busa, hatagan nato sila ug “labaw sa kasagaran nga pagtahod.” Ang usa ka paagi nga mahimo kana mao ang kinasingkasing nga pagsunod sa ilang tambag ug pagdasig. Kon sila maghatag kanatog instruksiyon gikan sa matinumanong ulipon, ang “kaalam nga gikan sa itaas” magtukmod kanato sa ‘pagsunod.’—Sant. 3:17.
14. Sa unsang paagi ikapakita sa kongregasyon ang kinasingkasing nga pagtahod sa mga nagapanawng magtatan-aw, ug unsay resulta niana?
14 Apan komosta kon pabuhaton kitag butang nga lahi sa atong naandan? Ang pagpakitag pagtahod nagkinahanglan usahay nga atong suklan ang kiling nga moreklamo sama sa, “Lahi ang among paagi dinhi” o, “Magsilbi tingali na sa ubang kongregasyon, apan dinhi sa amoa dili.” Hinunoa, kita maningkamot sa pagsunod. Mahimo nato kana kon atong hinumdoman nga si Jehova ang Tag-iya sa kongregasyon ug si Jesus ang Ulo niini. Kon dawaton ug ipadapat sa kongregasyon ang tambag sa nagapanawng magtatan-aw, kana timailhan sa kinasingkasing nga pagtahod. Gidayeg ni apostol Pablo ang mga igsoon sa Corinto tungod sa ilang matinahorong pagsunod sa instruksiyon nga gihatag sa ansiyano nga miduaw kanila, si Tito. (2 Cor. 7:13-16) Karon, kita usab makaseguro nga kon kita andam sa pagpadapat sa mga tambag sa mga nagapanawng magtatan-aw, kita mas magmalipayon sa atong ministeryo.—Basaha ang 2 Corinto 13:11.
“Pasidunggi ang Tanang Matang sa mga Tawo”
15. Unsa ang pipila ka paagi nga atong ikapakita ang atong pagtahod sa mga igsoon?
15 Si Pablo misulat: “Ayaw kasab-i ang usa ka tigulang nga lalaki. Sa kasukwahi, maymayi siya ingon sa usa ka amahan, ang batan-ong mga lalaki ingong igsoong mga lalaki, ang tigulang nga mga babaye ingong mga inahan, ang batan-ong mga babaye ingong igsoong mga babaye uban sa bug-os nga kaputli. Pasidunggi ang mga babayeng balo nga tinuod nga mga balo.” (1 Tim. 5:1-3) Oo, ang Pulong sa Diyos nagtambag kanato nga pasidunggan ang matag usa diha sa kongregasyon. Apan komosta kon nagkabingkil kamo sa usa ka igsoon? Dili na ba nimo siya tahoron tungod niana? O dili ba nimo usbon ang imong tinamdan pinaagi sa pagtan-aw sa iyang maayong mga hiyas? Ang adunay mga katungdanan ilabinang magpakita niini ug dili gayod sila ‘magharihari sa panon.’ (1 Ped. 5:3) Sa pagkatinuod, diha sa kongregasyon diin naglungtad ang tiunay nga gugma, kita daghag kahigayonan sa pagtahod sa usag usa.—Basaha ang Juan 13:34, 35.
16, 17. (a) Nganong hinungdanong tahoron dili lamang ang mga tawo nga atong gisangyawan kondili ang mga magsusupak usab? (b) Sa unsang paagi atong ‘mapasidunggan ang tanang matang sa mga tawo’?
16 Siyempre, dili lamang mga igsoon sa kongregasyon ang atong tahoron. Si Pablo misulat ngadto sa mga Kristohanon sa iyang adlaw: “Samtang kita may kahigayonan alang niini, buhaton nato ang maayo ngadto sa tanan.” (Gal. 6:10) Tinuod, dili sayon ang pagpadapat nianang prinsipyoha kon ang atong kauban sa trabaho o ang atong isigka-estudyante dili maayog tinagdan kanato. Sa dihang makasinati kita niana, kinahanglang atong hinumdoman kining mga pulonga: “Ayaw pagpanginit tungod sa mga mamumuhat ug daotan.” (Sal. 37:1) Ang pagpadapat niining tambaga makatabang kanato sa pagtahod bisan sa mga magsusupak. Diha usab sa ministeryo, ang pagkamapaubsanon makatabang kanato sa pagpakigsulti sa mga tawo uban ang “kalumo sa buot ug halawom nga pagtahod.” (1 Ped. 3:15) Bisan ang atong hitsura ug pamesti magpaila nga atong gitahod ang mga tawo nga atong gisangyawan.
17 Sa pagkatinuod, sa dihang kita makiglabot sa atong mga igsoon o sa mga tagagawas, maningkamot gayod kita sa pagpadapat niining tambaga: “Pasidunggi ang tanang matang sa mga tawo, pagbaton ug gugma alang sa tibuok kapunongan sa mga igsoon, magmahadlokon sa Diyos, magpasidungog sa hari.”—1 Ped. 2:17.
Unsay Imong Tubag?
Sa unsang paagi ikapakita nato ang haom nga pagtahod:
• Kang Jehova?
• Sa mga ansiyano ug mga nagapanawng magtatan-aw?
• Sa matag usa diha sa kongregasyon?
• Sa mga tawo nga atong gisangyawan?
[Mga Pangutana sa Pagtuon]
[Hulagway sa panid 23]
Ang mga Kristohanon sa unang siglo nagtahod sa pagdumala sa Nagamandong Lawas
[Hulagway sa panid 24]
Ang mga ansiyano sa tibuok kalibotan nagtahod sa mga nagapanawng magtatan-aw, kinsa gitudlo sa Nagamandong Lawas