Si Jehova Nagbantay Kanato Alang sa Atong Kaayohan
Si Jehova Nagbantay Kanato Alang sa Atong Kaayohan
‘Ang mga mata ni Jehova nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.’—2 CRON. 16:9.
1. Nganong si Jehova nag-usisa kanato?
MAAYO kaayo nga Amahan si Jehova. Siya nakaila pag-ayo kanato nga bisan ang “matag kiling sa [atong] hunahuna” iyang nahibaloan. (1 Cron. 28:9) Apan, siya wala mag-usisa kanato aron lang mangitag sayop. (Sal. 11:4; 130:3) Hinunoa, siya mahigugmaong nagbantay kanato aron kita iyang panalipdan gikan sa bisan unsang butang nga hayan makadaot sa atong relasyon kaniya ug magpameligro sa atong paglaom nga mabuhi sa walay kataposan.—Sal. 25:8-10, 12, 13.
2. Alang kang kinsa ipakita ni Jehova ang iyang kusog?
2 Si Jehova labing gamhanan ug makita niya ang tanan. Tungod niana, siya makatabang sa iyang maunongong mga alagad sa dihang mosangpit sila kaniya, ug makalig-on kanila panahon sa pagsulay. ‘Ang mga mata ni Jehova nagalibotlibot sa tibuok nga yuta aron ipakita ang iyang kusog [o gahom] alang niadtong kansang kasingkasing maoy bug-os alang kaniya,’ matod pa sa 2 Cronicas 16:9. Matikdi nga si Jehova naggamit sa iyang gahom alang niadtong nag-alagad kaniya uban ang bug-os nga kasingkasing, usa ka kasingkasing nga putli ug matinud-anon. Dili ingon niana ang pagbati sa Diyos sa mga malimbongon o salingkapaw.—Jos. 7:1, 20, 21, 25; Prov. 1:23-33.
Lakaw Uban sa Diyos
3, 4. Unsay kahulogan sa ‘paglakaw uban sa Diyos,’ ug unsang mga pananglitan sa Bibliya ang makatabang sa pagpatin-aw niini?
3 Para sa daghan, dili katuohan nga ang Maglalalang sa atong halapad nga uniberso magtugot sa mga tawo sa paglakaw uban kaniya sa simbolikong paagi. Apan, mao gayod kanay gusto ni Jehova nga atong buhaton. Sa karaang panahon, si Enoc ug si Noe ‘naglakaw uban sa Diyos.’ (Gen. 5:24; 6:9) Si Moises “nagpabiling lig-on nga daw nakakita sa Usa nga dili-makita.” (Heb. 11:27) Si Haring David mapaubsanong naglakaw uban sa iyang langitnong Amahan. Siya nag-ingon: ‘Tungod kay si Jehova ania sa akong tuong kamot, ako dili matarog.’—Sal. 16:8.
4 Siyempre, dili nato literal nga makuptan ang kamot ni Jehova aron molakaw uban kaniya. Apan makahimo kita niana sa masambingayong paagi. Unsaon nato paghimo kana? Ang salmistang si Asap misulat: “Ako nagauban kanunay kanimo; gikuptan mo ang akong tuong kamot. Pinaagi sa imong tambag pagatultolan mo ako.” (Sal. 73:23, 24) Sa ato pa, kita naglakaw uban kang Jehova kon atong sundon pag-ayo ang iyang tambag, nga sa panguna atong nadawat gikan sa iyang sinulat nga Pulong ug pinaagi sa “matinumanon ug maalamong ulipon.”—Mat. 24:45; 2 Tim. 3:16.
5. Ingong mahigugmaong amahan, sa unsang paagi gibantayan ni Jehova ang mga maunongon kaniya, ug unsay angay natong pagbati kaniya?
5 Kay nahimuot si Jehova niadtong naglakaw uban kaniya, siya nagbantay kanila ingong usa ka mahigugmaong amahan, nag-atiman kanila, nanalipod kanila, ug nagtudlo kanila. “Ihatag ko kanimo ang hait nga salabotan ug tudloan ko ikaw sa dalan nga imong pagalaktan,” nag-ingon ang Diyos. “Ihatag ko ang tambag nga ang akong mata magatan-aw kanimo.” (Sal. 32:8) Suknaa ang imong kaugalingon: ‘Ako bang nakita ang akong kaugalingon nga naglakaw uban kang Jehova nga daw nagkupot sa iyang kamot ug namati sa iyang gipamulong? Ako ba masaligon nga siya mahigugmaong nagbantay kanako? Aduna bay epekto sa akong paagi sa paghunahuna, sinultihan, ug binuhatan ang pagkahibalo nga siya nagtan-aw kanako? Ug sa dihang ako makasala, ako bang giisip si Jehova, dili ingong usa ka Diyos nga tig-ag-kasingkasing ug estrikto, kondili ingong mabination ug maluluy-ong Amahan nga andam motabang sa mahinulsolon ug mahinangop nga sila mobalik kaniya?’—Sal. 51:17.
6. Unsay bentaha ni Jehova kon itandi sa tawhanong ginikanan?
6 Usahay, si Jehova motabang na kanato sa dili pa kita mahitipas sa sayop nga dalan. Pananglitan, lagmit iyang makita nga ang atong malimbongong kasingkasing nagsugod na sa pagpangandoy ug dili maayong mga butang. (Jer. 17:9) Dili sama sa tawhanong mga ginikanan, si Jehova makalihok dayon sa pagtabang kanato nianang higayona tungod kay ang iyang “masidlakong mga mata” adunay katakos sa pag-usisa sa sulod sa atong kasingkasing ug hunahuna. (Sal. 11:4; 139:4; Jer. 17:10) Tagda ang reaksiyon sa Diyos sa usa ka panghitabo sa kinabuhi ni Baruk, nga nagsilbing tagsulat ni manalagnang Jeremias ug usa usab niya ka suod nga higala.
Maayong Amahan Kang Baruk
7, 8. (a) Kinsa si Baruk, ug unsang dili-maayong tinguha ang lagmit misugod pagturok sa iyang kasingkasing? (b) Sa unsang paagi gipakita ni Jehova nga sama siya sa usa ka mahigugmaong amahan kang Baruk?
7 Si Baruk maoy usa ka haniting eskriba nga matinumanong nag-alagad uban kang Jeremias sa usa ka malisod nga buluhaton—ang pagpahayag sa mga paghukom ni Jehova batok sa Juda. (Jer. 1:18, 19) Usa ka higayon niana, si Baruk, nga lagmit naggikan sa usa ka prominenteng pamilya, nagsugod sa pagtinguhag “dagkong mga butang” alang sa iyang kaugalingon. Tingali nagsugod siya sa paghunahuna ug hakog nga mga ambisyon o kaha nagtinguha nga moasenso. Bisan unsa pa kana, nakita ni Jehova nga kining dili maayong panghunahuna misugod pagturok sa kasingkasing ni Baruk. Pinaagi ni Jeremias, gipahimangnoan dayon ni Jehova si Baruk: “Ikaw miingon: ‘Alaot ako karon, kay si Jehova nagdugang ug kaguol sa akong kasakit! Ako naluya tungod sa akong pagpanghupaw, ug walay dapit-pahulayan nga akong nakaplagan.’” Dayon ang Diyos nag-ingon: “Ikaw nagpadayon sa pagtinguha ug dagkong mga butang alang sa imong kaugalingon. Ayaw pagpadayon sa pagtinguha.”—Jer. 45:1-5.
8 Bisan tuod gibadlong niya si Baruk, si Jehova wala masuko, hinunoa siya nahingawa kaniya sama sa usa ka amahan. Nakita sa Diyos nga bisan tuod si Baruk adunay mga tinguha nga mahimong magpameligro kaniya, kini wala magpasabot nga siya adunay daotan o malimbongong kasingkasing. Nahibalo usab si Jehova nga ang Jerusalem ug ang Juda anaa na sa kataposang mga adlaw niini, ug dili niya buot nga si Baruk maligas nianang makuyaw nga panahon. Busa, aron makaamgo, ang Diyos nagpahinumdom kaniya nga Siya “magadala ug katalagman diha sa tanang unod,” ug miingon usab nga kon molihok si Baruk nga maalamon, siya mabuhi. (Jer. 45:5) Sama ra nga ang Diyos miingon: ‘Baruk, hinumdomi nga hapit nang laglagon ang Juda ug ang Jerusalem. Pabiling matinumanon aron mabuhi! Panalipdan gyod ti ka.’ Midulot gayod sa kasingkasing ni Baruk ang mga pahinumdom ni Jehova tungod kay siya mipatuo ug naluwas sa dihang gilaglag ang Jerusalem, mga 17 ka tuig sa ulahi.
9. Unsay imong tubag sa mga pangutana nga gisukna sa parapo?
9 Samtang mamalandong ka sa kaagi ni Baruk, tagda ang mosunod nga mga pangutana ug mga teksto: Unsay gipadayag sa paagi sa Diyos sa pagpakiglabot kang Baruk bahin kang Jehova ug sa iyang pagbati sa iyang mga alagad? (Basaha ang Hebreohanon 12:9.) Sama kang Baruk, kita usab nagkinabuhi na sa makuyaw nga panahon. Nan, unsa may atong makat-onan sa tambag sa Diyos kang Baruk ug sa iyang sanong sa maong tambag? (Basaha ang Lucas 21:34-36.) Agig pagsundog kang Jeremias, sa unsang paagi masundog sa Kristohanong mga ansiyano ang kahingawa ni Jehova sa Iyang mga alagad?—Basaha ang Galacia 6:1.
Ang Gugma sa Amahan Makita Diha sa Anak
10. Sa unsang paagi si Jesus nasangkapan sa pagtuman sa iyang katungdanan ingong Ulo sa Kristohanong kongregasyon?
10 Sa wala pa ang Kristohanong panahon, ang gugma ni Jehova alang sa iyang katawhan gipakita pinaagi sa iyang mga manalagna ug sa uban pa niyang matinumanong mga alagad. Sa pagkakaron, kini labaw pang makita diha kang Jesu-Kristo—ang Ulo sa Kristohanong kongregasyon. (Efe. 1:22, 23) Busa, sa basahon sa Pinadayag, si Jesus gihubit ingong usa ka kordero nga may “pito ka mata, kansang mga mata mao ang pito ka espiritu sa Diyos nga gipadala sa tibuok yuta.” (Pin. 5:6) Oo, kay puno sa balaang espiritu sa Diyos, si Jesus adunay hingpit nga katakos sa pag-ila. Busa, siya usab makakita sa atong tibuok nga pagkatawo, ug walay matago kaniya.
11. Unsa ang papel ni Kristo, ug sa unsang paagi iyang gisundog ang iyang Amahan diha sa iyang tinamdan kanato?
11 Apan, sama kang Jehova, si Jesus dili usa ka polis nga nagtan-aw gikan sa langit. Siya nag-usisa kanato sama sa usa ka mahigugmaong amahan. Ang usa sa mga titulo ni Jesus nga “Amahang Walay Kataposan” magpahinumdom kanato sa iyang papel unya sa paghatag ug kinabuhing walay kataposan sa tanang magpasundayag ug pagtuo kaniya. (Isa. 9:6) Dugang pa, ingong Ulo sa Kristohanong kongregasyon, si Kristo makadasig sa usa ka hamtong nga Kristohanon, ilabina sa mga ansiyano, sa paghatag ug kahupayan o tambag niadtong nanginahanglan niini.—1 Tes. 5:14; 2 Tim. 4:1, 2.
12. (a) Unsay gipadayag sa mga sulat nga gipadala ngadto sa pito ka kongregasyon sa Asia Minor bahin kang Jesus? (b) Sa unsang paagi ikapakita sa mga ansiyano ang tinamdan ni Kristo ngadto sa panon sa Diyos?
12 Si Kristo interesado gayod sa panon ug kini masabtan diha sa mga sulat nga gipadala ngadto sa mga ansiyano sa pito ka kongregasyon sa Asia Minor. (Pin. 2:1–3:22) Niana, gipakita ni Jesus nga siya nasayod sa mga nagakahitabo sa matag kongregasyon ug nga siya nahingawa gayod sa iyang mga sumusunod. Tinuod usab kana karon. Gani, mas labaw kanang mapadapat sa atong adlaw tungod kay ang panan-awon sa Pinadayag matuman sa “adlaw sa Ginoo.” a (Pin. 1:10) Ang gugma ni Kristo sagad gipakita pinaagi sa mga ansiyano, nga nag-alagad isip mga magbalantay sa kongregasyon. Iyang mapalihok kining “gasa nga mga lalaki” sa paghupay, pagdasig, ug paghatag ug tambag sa dihang kini gikinahanglan. (Efe. 4:8; Buh. 20:28; basaha ang Isaias 32:1, 2.) Imo bang giisip ang ilang mga paningkamot ingong pamatuod sa tiunay nga interes ni Kristo kanimo?
Tabang sa Hustong Panahon
13-15. Sa unsang paagi mahimong tubagon sa Diyos ang atong mga pag-ampo? Paghatag ug mga pananglitan.
13 Nakasulay ka na ba sa pag-ampo nga kinasingkasing alang sa tabang ug kana gitubag sa dihang ikaw giduaw ug gidasig sa usa ka hamtong sa espirituwal nga Kristohanon? (Sant. 5:14-16) O tingali kana gitubag diha sa usa ka pakigpulong sa Kristohanong tigom o diha sa usa sa atong mga basahon. Si Jehova sagad magtubag sa atong mga pag-ampo nianang mga paagiha. Pananglitan, human sa iyang pakigpulong, ang usa ka ansiyano giduol sa usa ka sister nga biktima sa grabeng inhustisya mga semana na ang milabay. Imbes magpahungaw ang sister sa iyang problema, siya tim-os nga nagpasalamat sa mga punto nga gihisgotan sa pakigpulong. Kini mapadapat sa iyang kahimtang ug nakahupay gayod kaniya. Siya nalipay kaayo nga nakatambong sa tigom!
14 Kon bahin sa tabang nga madawat pinaagi sa pag-ampo, tagda ang pananglitan sa tulo ka binilanggo nga nakakat-on sa kamatuoran sa Bibliya ug nahimong dili-bawtismadong magmamantala sulod sa prisohan. Tungod sa nahitabong kapintasan, ang tanang binilanggo gipahamtangan ug mga restriksiyon. Kana nag-ahat kanila sa pagprotesta. Ang mga piniriso nagkasabot nga dili nila ibalik ang ilang mga plato inigkahuman sa ilang pamahaw. Naproblema niini ang tulo ka dili-bawtismadong magmamantala. Kon moapil sila sa protesta, ilang masupak ang sugo ni Jehova nga mabasa sa Roma 13:1. Kon dili sila moapil, seguradong pahimungtan sila sa mga piniriso.
15 Kay dili sila magkaestoryahanay, ang tulo ka lalaki nag-ampo alang sa kaalam. Pagkabuntag, ilang nasayran nga silang tulo parehas ug nahunahunaang solusyon—ilang balibaran ang rasyon nga ihatag kanila. Sa dihang ang mga guwardiya namalik aron sa pagkuha sa mga plato, ang tulo ka lalaki walay angayng iuli. Pagkadako sa ilang kalipay nga ang “Tigpatalinghog sa pag-ampo” dili halayo kanila!—Sal. 65:2.
Masaligong Naglantaw sa Umaabot
16. Sa unsang paagi ang buluhatong pagsangyaw nagpakita sa kahingawa ni Jehova alang sa mga karnerohon?
16 Ang buluhatong pagsangyaw sa tibuok kalibotan maoy laing pamatuod sa kahingawa ni Jehova sa matinud-anog-kasingkasing nga mga tawo, bisag asa pa sila nagpuyo. (Gen. 18:25) Si Jehova sagad naggamit sa mga manulonda sa paggiya sa iyang mga alagad sa pagpangita sa mga karnerohon—bisan pag sila nagpuyo sa mga dapit nga wala pa sukad masangyawi. (Pin. 14:6, 7) Pananglitan, pinaagi sa usa ka manulonda, ang Diyos nagsugo kang Felipe, nga usa ka ebanghelisador sa unang siglo, sa pagpangita sa usa ka Etiopianhong opisyal aron sa pagpatin-aw kaniya sa kahulogan sa Kasulatan. Unsay resulta? Gidawat sa maong tawo ang maayong balita ug siya nahimong bawtismadong sumusunod ni Jesus. b—Juan 10:14; Buh. 8:26-39.
17. Nganong dili kita angayng mabalaka pag-ayo bahin sa umaabot?
17 Samtang nagkaduol na ang kataposan sa presenteng sistema sa mga butang, ang gitagnang “kaul-ol sa kasakit” mograbe pa gayod. (Mat. 24:8) Pananglitan, ang presyo sa mga pagkaon lagmit mas momahal pa tungod sa pagdaghan sa mga pumapalit, pagkadaot sa klima, ug sa paghuyang sa ekonomiya. Lagmit mas malisdan pa ang usa sa pagpangitag trabaho, ug ang mga empleyado tingali mapugos sa pag-obertaym. Bisan unsa pay mahitabo, ang tanan nga nag-una sa ilang pag-alagad kang Jehova ug naghupot ug ‘yanong mata’ dili angayng mabalaka pag-ayo. Sila nasayod nga ang Diyos nahigugma kanila ug moatiman kanila. (Mat. 6:22-34) Tagda pananglitan kon sa unsang paagi gitagan-an ni Jehova si Jeremias sulod sa magubot nga panahon hangtod nga nalaglag ang Jerusalem niadtong 607 W.K.P.
18. Sa unsang paagi gipamatud-an ni Jehova ang iyang gugma kang Jeremias panahon sa paglikos sa Jerusalem?
18 Sa ulahing yugto sa paglikos sa kasundalohan sa Babilonya sa siyudad sa Jerusalem, si Jeremias gibilanggo didto sa Sawang sa Guwardiya. Sa unsang paagi siya makakaon? Kon gawasnon pa unta siya, makapangita gayod siya niini. Ugaling lang kay gipriso siya. Wala siyay laing mahimo gawas sa pagpaabot nga tagan-an siya sa mga tawo diha sa iyang palibot, nga ang kadaghanan kanila nagdumot kaniya! Bisan pa niana, si Jeremias wala mosalig sa mga tawo kondili sa Diyos, kinsa nagsaad sa pag-atiman kaniya. Gituman ba ni Jehova ang iyang saad? Oo! Giseguro ni Jehova nga sa matag adlaw si Jeremias makadawat ug usa ka “lingin nga tinapay . . . hangtod nahurot ang tanang tinapay sa siyudad.” (Jer. 37:21) Si Jeremias, ingon man usab si Baruk, Ebed-melek, ug ang uban pa, naluwas gikan sa grabeng kagutom, sakit, ug sa kamatayon.—Jer. 38:2; 39:15-18.
19. Samtang nagpaabot sa mahitabo sa unahan, unsay angay natong determinasyon?
19 Oo, “ang mga mata ni Jehova anaa sa mga matarong, ug ang iyang mga igdulungog gikiling sa ilang pangamuyo.” (1 Ped. 3:12) Nalipay ka ba nga ang imong langitnong Amahan nagbantay kanimo? Mibati ka bang luwas sa pagkahibalo nga ang iyang mga mata nagtan-aw kanimo alang sa imong kaayohan? Nan, magmadeterminado nga padayong maglakaw uban sa Diyos—bisan unsa pay mahitabo sa unahan. Kita makasalig nga si Jehova, ingong usa ka mahigugmaong amahan, padayong magbantay sa tanang maunongon kaniya.—Sal. 32:8; basaha ang Isaias 41:13.
[Mga footnote]
a Bisan tuod ang mga sulat pangunang nagtumong sa dinihogang mga sumusunod ni Kristo, ang mga prinsipyo niini mapadapat sa tanang alagad sa Diyos.
b Ang lain pang pananglitan sa pagtultol sa Diyos makita sa Buhat 16:6-10. Niining tekstoha, atong mabasa nga si Pablo ug ang iyang mga kauban “gidid-an sa balaang espiritu” sa pagsangyaw sa Asia ug sa Bitinia. Hinunoa, sila gisugo sa pagsangyaw sa Macedonia, diin daghang malumong mga tawo ang midawat sa maayong balita.
Makapatin-aw Ka Ba?
• Sa unsang paagi atong ikapakita nga kita ‘naglakaw uban sa Diyos’?
• Sa unsang paagi gipakita ni Jehova ang iyang gugma kang Baruk?
• Ingong Ulo sa Kristohanong kongregasyon, sa unsang paagi gisundog ni Jesus ang mga hiyas sa iyang Amahan?
• Sa unsang mga paagi atong ikapakita nga kita may pagsalig sa Diyos niining makuyaw nga panahon?
[Mga Pangutana sa Pagtuon]
[Mga hulagway sa panid 9]
Sama kang Jeremias ug Baruk, ang mga ansiyano karon nagsundog sa kahingawa ni Jehova sa iyang mga alagad
[Hulagway sa panid 10]
Sa unsang paagi si Jehova magtabang kanato sa hustong panahon?