Unsay Imong Isakripisyo Alang sa Kinabuhing Dayon?
Unsay Imong Isakripisyo Alang sa Kinabuhing Dayon?
“Unsay ikahatag sa usa ka tawo baylo sa iyang kalag?”—MAT. 16:26.
1. Nganong gibadlong ni Jesus si Pedro?
DAW dili makatuo si apostol Pedro sa iyang nadungog. Ang iyang hinigugmang Magtutudlo, si Jesu-Kristo, “walay lipudlipod” nga nag-ingon nga hapit na siyang mag-antos ug mamatay! Sa pagtubag, si Pedro—nga dayag maayog motibo—miingon kang Jesus: “Magmaluloton ka sa imong kaugalingon, Ginoo; dili gayod mahitabo kanimo kini nga dulnganan.” Mitalikod si Jesus kang Pedro ug mitan-aw sa ubang mga tinun-an. Lagmit susama usab sa opinyon ni Pedro ang ilang opinyon. Dayon iyang gibadlong si Pedro: “Magpalikod ka kanako, Satanas! Ikaw maoy kapandolan kanako, tungod kay ikaw naghunahuna, dili sa mga hunahuna sa Diyos, kondili nianang sa mga tawo.”—Mar. 8:32, 33; Mat. 16:21-23.
2. Giunsa pagbatbat ni Jesus ang kinahanglang buhaton sa tinuod nga mga sumusunod?
2 Ang misunod nga mga pulong ni Jesus lagmit nakatabang kang Pedro sa pagsabot kon nganong ingon na lamang niadto ka kusganon ang reaksiyon ni Jesus. ‘Gitawag ni Jesus ang panon sa katawhan ngadto kaniya uban sa iyang mga tinun-an’ ug miingon: “Kon adunay buot mosunod kanako, padumilia siya sa iyang kaugalingon ug ipapas-an ang iyang estaka sa pagsakit ug magpadayon sa pagsunod kanako. Kay si bisan kinsa nga buot magluwas sa iyang kalag mawad-an niini; apan si bisan kinsa nga mawad-an sa iyang kalag tungod kanako ug sa maayong balita magaluwas niini.” (Mar. 8:34, 35) Gigamit dinhi ni Jesus ang pulong “kalag” sa pagtumong sa “kinabuhi.” Dayag nga siya nahibalo nga hapit na niyang ihalad ang iyang kinabuhi ug nga ang iyang mga sumusunod kinahanglang andam sa pagsakripisyo sa ilang kinabuhi diha sa pag-alagad sa Diyos. Kon ila kanang buhaton, sila dagayang pagagantihan.—Basaha ang Mateo 16:27.
3. (a) Unsa nga mga pangutana ang gisukna ni Jesus sa iyang mga mamiminaw? (b) Unsa ang lagmit nahinumdoman sa mga mamiminaw ni Jesus sa iyang ikaduhang pangutana?
3 Sa mao ra gihapon nga okasyon, si Jesus misukna ug duha ka makaiikag kaayo nga mga pangutana: “Unsay kapuslanan sa usa ka tawo nga maangkon ang tibuok kalibotan ug mawad-an sa iyang kalag?” ug, “Sa pagkatinuod, unsay ikahatag sa usa ka tawo baylo sa iyang kalag?” (Mar. 8:36, 37) Sayon ra ang tubag sa unang pangutana. Wala gayoy kapuslanan nga maangkon sa usa ka tawo ang tibuok kalibotan kon mawad-an siya sa iyang kinabuhi, o kalag. Aduna lamay kapuslanan ang mga kabtangan kon kita buhi aron pahimuslan kana. Ang ikaduhang pangutana ni Jesus nga: “Sa pagkatinuod, unsay ikahatag sa usa ka tawo baylo sa iyang kalag?” lagmit nagpahinumdom sa iyang mga mamiminaw sa akusasyon ni Satanas sa mga adlaw ni Job: “Ang tanang butang nga anaa sa usa ka tawo iyang ihatag tungod sa iyang kalag.” (Job 2:4) Para sa pipila nga wala magsimba kang Jehova, lagmit tinuod ang mga pulong ni Satanas. Daghang tawo ang andam sa pagbuhat sa bisan unsa, bisan sa pagsupak sa moral nga mga sukdanan, aron lang mabuhi. Apan lahi ang panglantaw sa mga Kristohanon.
4. Nganong mas makahuloganon para sa mga Kristohanon ang mga pangutana ni Jesus?
4 Kita nahibalo nga wala mianhi si Jesus sa yuta aron sa paghatag kanatog maayong panglawas, bahandi, ug taas nga kinabuhi niining kalibotana. Siya mianhi sa paghatag kanatog paglaom nga mabuhi sa walay kataposan sa bag-ong kalibotan, ug gipabilhan gayod nato kana nga paglaom. (Juan 3:16) Para sa mga Kristohanon, ang unang pangutana ni Jesus nagkahulogang, “Unsay kapuslanan nga maangkon sa usa ka tawo ang tibuok kalibotan kon mawad-an siyag paglaom nga mabuhi sa walay kataposan?” Ang tubag mao, Wala gayod kanay kapuslanan. (1 Juan 2:15-17) Aron matabangan kita sa pagtubag sa ikaduhang pangutana ni Jesus, pangutan-on nato ang atong kaugalingon, ‘Unsang pagsakripisyo ang andam nakong buhaton karon aron akong mabatonan ang kinabuhi sa bag-ong kalibotan?’ Ang atong tubag nianang pangutanaha nga makita sa atong pagkinabuhi, magbutyag kon unsa ka lig-on kana nga paglaom diha sa atong kasingkasing.—Itandi ang Juan 12:25.
5. Sa unsang paagi atong mabatonan ang gasa nga kinabuhing dayon?
5 Sa pagkatinuod, si Jesus wala mag-ingon nga mabatonan nato ang kinabuhing dayon pinaagi sa atong kaugalingong paningkamot. Ang kinabuhi—bisan ang atong mubo nga kinabuhi niining sistemaha sa mga butang—maoy usa ka gasa. Dili nato kini mapalit ni may katakos kita sa pagbaton niini. Ang bugtong paagi aron atong mabatonan ang gasa nga kinabuhing dayon mao ang atong “pagtuo kang Kristo Jesus” ug kang Jehova, ang “tigganti sa mga matinuorong nagapangita kaniya.” (Gal. 2:16; Heb. 11:6) Bisan pa niana, ang pagtuo kinahanglang ubanan sa mga buhat, kay “patay ang pagtuo nga walay binuhatan.” (Sant. 2:26) Busa, sa pagpamalandong pag dugang sa pangutana ni Jesus, mas maayo nga atong hunahunaon pag-ayo kon unsa ka dakong sakripisyo ang andam natong himoon niining sistemaha sa mga butang, ug kon unsa ang andam natong buhaton diha sa pag-alagad kang Jehova sa pagpakita nga buhi gayod ang atong pagtuo.
“Si Kristo Wala Magpahimuot sa Iyang Kaugalingon”
6. Unsay giuna ni Jesus sa iyang kinabuhi?
6 Imbes isentro ang iyang pagtagad sa mga butang nga gitanyag sa kalibotan sa iyang mga adlaw, giuna ni Jesus ang hinungdanong mga butang ug wala siya magpahaylo sa materyal nga mga butang. Siya nagsakripisyo ug nagmasinugtanon sa Diyos. Imbes pahimut-an ang iyang kaugalingon, siya miingon: “Ginabuhat ko kanunay ang mga butang nga makapahimuot [sa Diyos].” (Juan 8:29) Unsa ka dako ang gisakripisyo ni Jesus aron mapahimut-an ang Diyos?
7, 8. (a) Sa unsang paagi nagsakripisyo si Jesus, ug unsay giganti kaniya sa paghimo niana? (b) Unsa ang angay natong ipangutana sa atong kaugalingon?
7 Sa usa ka okasyon, si Jesus miingon sa iyang mga tinun-an: “Ang Anak sa tawo mianhi, dili aron pagaalagaran, kondili aron sa pag-alagad ug sa paghatag sa iyang kalag nga usa ka lukat baylo sa daghan.” (Mat. 20:28) Sayosayo niana, sa dihang gipahinumdoman ni Jesus ang iyang mga sumusunod nga hapit na niyang ‘ihatag ang iyang kalag,’ si Pedro miingon kaniya nga magmaluloton sa iyang kaugalingon. Apan, si Jesus nagpabiling lig-on. Iyang gihatag ang iyang kalag, ang iyang hingpit nga kinabuhi ingong tawo, alang sa katawhan. Nahimong segurado ang kaugmaon ni Jesus tungod sa iyang pagkadili-mahakogon. Siya gibanhaw ug ‘gibayaw ngadto sa tuong kamot sa Diyos.’ (Buh. 2:32, 33) Tungod niini, siya nahimong usa ka maayong panig-ingnan alang kanato.
8 Si apostol Pablo nagtambag sa mga Kristohanon sa Roma nga ‘dili pahimut-an’ ang ilang kaugalingon ug siya nagpahinumdom kanila nga “bisan gani si Kristo wala magpahimuot sa iyang kaugalingon.” (Roma 15:1-3) Nan, unsa ka dakong sakripisyo ang andam natong himoon agig pagsundog kang Kristo?
Gusto ni Jehova nga Atong Ihatag ang Atong Kinamaayohan
9. Unsay kahulogan sa pagpahinungod sa usa ka Kristohanon sa Diyos?
9 Ang Balaod ni Moises nga gihatag ngadto sa karaang Israel nag-ingon nga ang Hebreohanong mga ulipon makabaton ug kagawasan sa ikapito ka tuig sa ilang pagkaulipon o sa tuig sa Tinghugyaw. Apan aduna silay laing kapilian. Kon gihigugma sa ulipon ang iyang agalon, mahimo siyang magpabilin sa panimalay sa iyang agalon ingong ulipon sa tibuok niyang kinabuhi. (Basaha ang Deuteronomio 15:12, 16, 17.) Susama niana ang atong kahimtang dihang kita mopili sa pagpahinungod sa atong kaugalingon ngadto sa Diyos. Kinasingkasing kitang mouyon sa pagbuhat sa kabubut-on sa Diyos, dili sa atong kabubut-on. Sa pagbuhat niana, atong ikapakita ang atong dakong gugma kang Jehova ug ang atong tinguha sa pag-alagad kaniya hangtod sa hangtod.
10. Sa unsang diwa nga ang Diyos maoy Tag-iya kanato, ug sa unsang paagi kana makaapektar sa atong panghunahuna ug mga buhat?
10 Kon ikaw nagtuon sa Bibliya uban sa mga Saksi ni Jehova, nagsangyaw sa maayong balita, ug nagtambong sa mga tigom, angay kang komendahan. Kami naglaom nga sa dili madugay ikaw mapalihok sa pagpahinungod sa imong kaugalingon ngadto kang Jehova ug sa pagpangutana sama sa gisukna sa usa ka Etiopianhon kang Felipe: “Unsay nakapugong kanako nga mabawtismohan?” (Buh. 8:35, 36) Kon imo kanang buhaton, ang imong relasyon sa Diyos mahisama nianang sa mga Kristohanon nga gisulatan ni Pablo: “Kamo dili na inyo sa inyong kaugalingon, kay kamo gipalit na sa usa ka bili.” (1 Cor. 6:19, 20) Langitnon man o yutan-on ang atong paglaom, kon ato nang gipahinungod ang atong kaugalingon kang Jehova, siya nay Tag-iya kanato. Nan hinungdanon gayod nga atong pukgoon ang atong hakog nga mga tinguha ug dili na kita ‘magpaulipon sa mga tawo’! (1 Cor. 7:23) Dako gayod nga pribilehiyo ang pagkahimong maunongong alagad ni Jehova ug ang pagbuhat sa mga butang nga iyang gikahimut-an!
11. Unsa nga halad ang kinahanglang ipresentar sa mga Kristohanon, ug unsay kahulogan niana, ingon sa giilustrar sa mga halad ubos sa Balaod ni Moises?
11 Giawhag ni Pablo ang iyang mga isigkamagtutuo: “Itugyan ang inyong mga lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa inyong gahom sa pagpangatarongan.” (Roma 12:1) Kanang mga pulonga nagpahinumdom sa mga Kristohanon sa mga halad nga ilang gigamit sa pagsimba sa wala pa sila mahimong mga sumusunod ni Jesus. Sila nahibalo nga ubos sa Balaod ni Moises, ang mga hayop nga ihalad sa halaran kinahanglang mao ang kinamaayohan, kay kon dili, kini dili dalawaton. (Mal. 1:8, 13) Ingon usab niana ang kahimtang kon atong ipresentar ang atong lawas ingong “halad nga buhi.” Atong ihatag kang Jehova ang atong kinamaayohan, dili ang salin human nato tagbawa ang atong mga tinguha. Sa dihang gipahinungod nato ang atong kaugalingon sa Diyos, bug-os natong gihatag kaniya ang atong “kalag,” o kinabuhi—lakip na ang atong kusog, materyal nga mga kahinguhaan, ug mga katakos. (Col. 3:23) Sa unsang paagi atong mahatag kang Jehova ang atong kinamaayohan?
Gamitang Maalamon ang Imong Panahon
12, 13. Unsa ang usa ka paagi nga atong mahatag kang Jehova ang atong kinamaayohan?
12 Ang usa ka paagi sa paghatag kang Jehova sa atong kinamaayohan mao ang maalamong paggamit sa atong panahon. (Basaha ang Efeso 5:15, 16.) Busa kinahanglang aduna kitay pagpugong-sa-kaugalingon. Tungod sa mga impluwensiya sa kalibotan ug sa atong pagkadili-hingpit, kita makiling sa paggamit sa atong panahon alang lamang sa atong personal nga katagbawan o kaayohan. Tinuod, “adunay tinudlong panahon alang sa tanang butang,” nga naglakip sa atong paglingawlingaw ug pagtrabaho aron matuman ang atong mga kaakohan ingong mga Kristohanon. (Eccl. 3:1) Apan, ang usa ka dedikadong Kristohanon kinahanglang magpabiling timbang ug maalamong maggamit sa iyang panahon.
13 Sa dihang si Pablo miduaw sa Atenas, iyang namatikdan nga “ang tanang taga-Atenas ug ang mga langyaw nga miduong didto walay laing buhaton sa ilang libreng panahon gawas sa pagsulti sa usa ka butang o sa pagpamatig butang bag-o.” (Buh. 17:21) Daghan usab karon ang nag-usik lang sa ilang panahon. Lakip sa mga butang nga makausik sa atong panahon mao ang mga programa sa TV, mga dula sa video, ug Internet. Gawas niana, aduna pay daghang butang nga makausik sa atong panahon. Kon hutdon nato ang atong panahon niana, wala na kitay panahon sa pagtuon. Basin maghunahuna pa gani kita nga wala na kitay panahon alang sa “mas hinungdanong mga butang”—mga butang nga nalangkit sa atong pag-alagad kang Jehova.—Filip. 1:9, 10.
14. Unsa nga mga pangutana ang angay natong pamalandongon?
14 Busa, ingong usa ka dedikadong alagad ni Jehova, pangutan-a ang imong kaugalingon, ‘Gilakip ba nako sa akong eskedyul sa adlaw-adlaw ang pagbasa sa Bibliya, pagpamalandong, ug pag-ampo?’ (Sal. 77:12; 119:97; 1 Tes. 5:17) ‘Naggahin ba kog panahon sa pagpangandam alang sa mga tigom? Tigkomento ba ako panahon sa mga tigom aron akong malig-on ang uban?’ (Sal. 122:1; Heb. 2:12) Ang Bibliya nag-ingon nga si Pablo ug Bernabe migugol ug “taastaas nga panahon nga nagsulti uban ang kaisog pinaagi sa awtoridad ni Jehova.” (Buh. 14:3) Makahimo ka ba sa pagpasibo sa imong mga kalihokan aron makagugol ug dugang panahon, o “taastaas nga panahon,” sa pagsangyaw, o kaha pagpayunir?—Basaha ang Hebreohanon 13:15.
15. Sa unsang paagi maalamong gigamit sa mga ansiyano ang ilang panahon?
15 Sa dihang giduaw ni Pablo ug Bernabe ang kongregasyon sa Antioquia, “sila migugol ug dili diyutay nga panahon uban sa mga tinun-an” aron sa pagdasig kanila. (Buh. 14:28) Ang mahigugmaong mga ansiyano karon naggugol usab ug taas nga panahon aron palig-onon ang uban. Gawas sa pagsangyaw, sila naningkamot usab sa pag-atiman sa panon, pagpangita sa nawala nga mga karnero, pagtabang sa masakiton, ug sa pagtuman sa uban pa nilang mga kaakohan sa kongregasyon. Kon ikaw usa ka bawtismado nga brader, makahimo ka ba sa pagpangab-ot niini nga mga pribilehiyo?
16. Unsa ang pipila ka paagi nga kita ‘nagbuhat ug maayo ngadto sa atong kabanay sa pagtuo’?
16 Daghan ang malipay sa paghatag ug mga hinabang sa mga nag-antos tungod sa kinaiyanhon ug dili-kinaiyanhong mga katalagman. Pananglitan, ang usa ka 65-anyos nga sister nga nag-alagad sa Bethel mibiyahe sa makadaghan aron sa paghatag ug mga hinabang. Nganong iya mang gigamit ang iyang bakasyon alang niana? Siya miingon: “Bisan pag wala koy espesyal nga katakos, makapalipay gayod ang pagbuhat sa mga butang nga kinahanglang buhaton. Nadasig gayod ako sa pagkakita sa lig-ong pagtuo sa mga igsoon nga nawad-an ug daghang kabtangan.” Gawas pa niana, libolibo sa tibuok kalibotan ang mitabang sa pagtukod ug mga Kingdom Hall ug Assembly Hall. Pinaagi sa atong pagpakigbahin sa maong mga buluhaton, kita dili mahakogong ‘nagbuhat ug maayo ngadto sa atong kabanay sa pagtuo.’—Gal. 6:10.
“Ako Magauban Kaninyo sa Tanang Adlaw”
17. Unsa nga sakripisyo ang imong buhaton aron mabatonan ang kinabuhing dayon?
17 Hapit nang laglagon ang mga tawo nga dili modawat sa Diyos. Wala kita mahibalo kon kanus-a gayod kana mahitabo. Apan kita nahibalo nga “ang panahong nabilin mubo na” ug nga “ang talan-awon niining kalibotana nagakausab.” (Basaha ang 1 Corinto 7:29-31.) Tungod niana, mas makahuloganon karon ang pangutana ni Jesus: “Unsay ikahatag sa usa ka tawo baylo sa iyang kalag?” Seguradong buhaton gayod nato ang bisan unsang sakripisyo nga ipabuhat ni Jehova kanato aron atong mabatonan ang “tinuod nga kinabuhi.” (1 Tim. 6:19) Sa pagkatinuod, kinahanglan gayod kitang mosunod sa awhag ni Jesus nga ‘magpadayon sa pagsunod kaniya’ ug ‘pangitaon pag-una ang gingharian.’—Mat. 6:31-33; 24:13.
18. Sa unsa nga kita masaligon, ug ngano?
18 Dayag nga dili kanunayng sayon ang pagsunod kang Jesus, ug sama sa iyang gipasidaan, ang pipila nawad-an pa gani sa ilang kinabuhi niining sistemaha sa mga butang. Bisan pa niana, sundogon nato si Jesus nga likayan ang pagkahimong ‘maluloton sa atong kaugalingon.’ Mosalig kita sa giingon ni Jesus sa iyang dinihogang mga sumusunod sa unang siglo: “Ako magauban kaninyo sa tanang adlaw hangtod sa kataposan sa sistema sa mga butang.” (Mat. 28:20) Busa, atong buhaton ang atong maarangan sa paggamit sa atong panahon ug mga katakos sa sagradong pag-alagad. Sa pagbuhat niana, atong gipakita nga kita nagasalig kang Jehova sa pagluwas kanato sa dakong kasakitan o sa pagbanhaw kanato sa bag-ong kalibotan. (Heb. 6:10) Sa ingon atong ikapakita nga ato gayong gipabilhan ang gasa nga kinabuhing dayon.
Unsay Imong Tubag?
• Sa unsang paagi gipakita ni Jesus nga siya andam gayod sa pag-alagad sa Diyos ug sa tawo?
• Nganong kinahanglang dumilian sa usa ang iyang kaugalingon, ug sa unsang paagi iya kining mahimo?
• Sa karaang Israel, unsa lamang nga halad ang gidawat ni Jehova, ug unsay gitudlo niana kanato karon?
• Sa unsang mga paagi maalamon natong magamit ang atong panahon?
[Mga Pangutana sa Pagtuon]
[Mga hulagway sa panid 26]
Si Jesus kanunayng nagbuhat sa mga butang nga makapahimuot sa Diyos
[Hulagway sa panid 28]
Gihatag sa mapasalamatong mga Israelinhon ang ilang kinamaayohan alang sa matuod nga pagsimba
[Mga hulagway sa panid 29]
Atong mapahimut-an ang Diyos pinaagi sa maalamong paggamit sa atong panahon