“Sukli ang Yawa” Sama sa Gibuhat ni Jesus
“Sukli ang Yawa” Sama sa Gibuhat ni Jesus
“Sukli ang Yawa, ug siya mokalagiw gikan kaninyo.”—SANT. 4:7.
1. Unsang paglutos ang nahibaloan ni Jesus nga iyang atubangon dinhi sa yuta, ug unsay resulta niana?
SI Jesu-Kristo nahibalo nga siya pagalutoson sa Yawa. Dayag kini sa gisulti sa Diyos ngadto sa bitin nga sa pagkatinuod gitumong sa daotang espiritung rebelde nga nagsulti pinaagi niana: “Ibutang ko ang panag-away tali kanimo ug sa babaye [ang langitnong bahin sa samag-asawa nga organisasyon ni Jehova] ug tali sa imong binhi ug sa iyang binhi. Siya [si Jesus] magsamad kanimo sa ulo ug ikaw magsamad kaniya sa tikod.” (Gen. 3:14, 15; Pin. 12:9) Ang pagsamad kang Jesus sa tikod nagpasabot nga siya makasinati lamang ug temporaryong kamatayon samtang dinhi sa yuta, kay banhawon man siya ni Jehova ngadto sa langitnong himaya. Apan ang pagsamad sa ulo sa bitin nagpasabot nga ang Yawa makasinati ug dumalayon nga kamatayon.—Basaha ang Buhat 2:31, 32; Hebreohanon 2:14.
2. Nganong masaligon man si Jehova nga molampos si Jesus sa pagsukol sa Yawa?
2 Masaligon si Jehova nga molampos si Jesus sa pagtuman sa iyang buluhaton ug sa pagsukol sa Yawa samtang dinhi sa yuta. Nganong nakaseguro man niini si Jehova? Tungod kay siya naglalang kang Jesus didto sa langit dugay na kanhi, nakaobserbar kaniya, ug nahibalo nga kining “batid nga magbubuhat” ug “panganay sa tanang kalalangan” masinugtanon ug matinumanon gayod kaniya. (Prov. 8:22-31; Col. 1:15) Busa sa dihang gipadala si Jesus sa yuta ug gitugotan ang Yawa sa pagsulay kaniya hangtod sa kamatayon, masaligon ang Diyos nga magmadaogon gayod ang Iyang bugtong Anak.—Juan 3:16.
Si Jehova Magluwas sa Iyang mga Alagad
3. Unsay tinamdan sa Yawa ngadto sa mga alagad ni Jehova?
3 Gitawag ni Jesus ang Yawa nga “magmamando niining kalibotana” ug gipasidan-an niya ang Iyang mga tinun-an nga sila pagalutoson sama kaniya. (Juan 12:31; 15:20) Ang kalibotan, nga nailalom sa gahom ni Satanas nga Yawa, nagdumot sa matuod nga mga Kristohanon tungod kay sila nag-alagad kang Jehova ug nagsangyaw sa pagkamatarong. (Mat. 24:9; 1 Juan 5:19) Ilabinang gipuntirya sa Yawa ang nanghibilin sa mga dinihogan nga sa ngadtongadto magmando uban kang Kristo sa iyang langitnong Gingharian. Gipuntirya usab ni Satanas ang daghang Saksi ni Jehova nga naglaom nga mabuhi sa walay kataposan sa paraisong yuta. Ang Pulong sa Diyos nagpasidaan kanato: “Ang inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob.”—1 Ped. 5:8.
4. Unsay nagpamatuod nga ang katawhan sa Diyos nagmalamposon sa pagsukol sa Yawa sa atong panahon?
4 Ingong organisasyon nga gipaluyohan ni Jehova nga Diyos, kita nagmalamposon sa pagsukol sa Yawa. Tagda kini: Sa milabayng 100 ka tuig, ang pipila sa labing bangis nga mga diktador sa kasaysayan naningkamot sa pagpapha sa mga Saksi ni Jehova. Apan nagpadayon pag-uswag ang gidaghanon sa mga Saksi, ug sa pagkakaron sila miabot na ug mga 7,000,000 diha sa kapin sa 100,000 ka kongregasyon sa tibuok kalibotan. Ang mapintas nga mga diktador nga naglutos sa katawhan ni Jehova mao ang napuo!
5. Sa unsang paagi ang Isaias 54:17 natuman diha sa mga alagad ni Jehova?
5 Ang kongregasyon sa karaang Israel gitawag sa Diyos nga iyang “babaye” ug iya kining gisaaran: “Bisan unsa nga hinagiban nga buhaton batok kanimo dili magmalamposon, ug ang matag dila nga mosulti batok kanimo sa paghukom imong pagahukman. Mao kini ang panulondon sa mga alagad ni Jehova, ug ang ilang pagkamatarong maoy gikan kanako.” (Isa. 54:11, 17) Kanang saara natuman gayod diha sa katawhan ni Jehova sa tibuok yuta niining “kataposang mga adlaw.” (2 Tim. 3:1-5, 13) Magpadayon kita sa pagsukol sa Yawa, ug walay hinagiban nga iyang gamiton sa pagpapha sa katawhan sa Diyos ang magmalamposon, kay si Jehova dapig kanato.—Sal. 118:6, 7.
6. Sumala sa tagna ni Daniel, unsay mahitabo sa pagmando sa Yawa?
6 Sa nagkaduol na gayod nga kataposan niining daotang sistema sa mga butang, ang tanang bahin sa pagmando ni Satanas pagawagtangon. Gipasulat sa Diyos kang manalagnang Daniel kining tagnaa: “Sa mga adlaw nianang mga haria [nga naglungtad sa atong panahon] ang Diyos sa langit magatukod ug usa ka gingharian [didto sa langit] nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian [nga naglungtad karon], ug kini mobarog hangtod sa panahong walay tino.” (Dan. 2:44) Sa dihang mahitabo kana, ang pagmando ni Satanas ug nianang sa dili-hingpit nga mga tawo matapos na. Ang tanang bahin sa sistema sa mga butang sa Yawa mahanaw sa dayon, ug wala na gayoy mosupak sa pagmando sa Gingharian sa Diyos.—Basaha ang 2 Pedro 3:7, 13.
7. Giunsa nato pagkahibalo nga ang mga alagad ni Jehova ingong indibiduwal mahimong molampos sa pagsukol sa Yawa?
7 Segurado gayod nga ang organisasyon ni Jehova magpabilin ug mouswag sa espirituwal. (Basaha ang Salmo 125:1, 2.) Komosta sa atong bahin? Ang Bibliya nag-ingon nga mahimo kitang molampos sa pagsukol sa Yawa, sama sa gibuhat ni Jesus. Sa pagkatinuod, ang tagna nga gihatag ni Kristo pinaagi kang apostol Juan nagpakita nga bisan pa sa pagsupak ni Satanas, ang “usa ka dakong panon” niadtong adunay yutan-ong paglaom makalabang buhi sa kataposan niining sistemaha. Sumala sa Kasulatan, sila mopatugbaw: “Ang kaluwasan utang namo sa atong Diyos, nga naglingkod sa trono, ug sa Kordero [si Jesu-Kristo].” (Pin. 7:9-14) Ang mga dinihogan gihisgotan nga nagmadaogon batok kang Satanas, ug ang ilang kauban nga “ubang mga karnero” nagmalamposon usab sa pagsukol kaniya. (Juan 10:16; Pin. 12:10, 11) Apan nagkinahanglag dakong paningkamot ug kinasingkasing nga pag-ampo aron ‘maluwas gikan sa usa nga daotan.’—Mat. 6:13.
Ang Hingpit nga Ehemplo sa Pagsukol sa Yawa
8. Unsa ang unang natala nga tentasyon nga gigamit sa Yawa batok kang Jesus didto sa kamingawan, ug unsay reaksiyon ni Jesus niana?
8 Ang Yawa naningkamot sa pagbungkag sa integridad ni Jesus. Sa kamingawan, gitental ni Satanas si Jesus aron ikompromiso niini ang Iyang pagkamatinumanon kang Jehova. Apan, si Jesus nagpakitag hingpit nga ehemplo sa pagsukol kang Satanas. Human magpuasa sulod sa 40 ka adlaw ug 40 ka gabii, lagmit nga gigutom na pag-ayo si Jesus. “Kon ikaw anak sa Diyos,” miingon si Satanas, “sugoa kining mga bato nga mahimong mga tinapay.” Apan wala gamita ni Jesus ang gahom nga gihatag sa Diyos kaniya alang sa iyang kaugalingong kaayohan. Hinunoa, siya miingon: “Kini nahisulat, ‘Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.’”—Mat. 4:1-4; Deut. 8:3.
9. Nganong kinahanglan natong suklan ang paningkamot sa Yawa nga pahimuslan ang atong kinaiyanhong mga tinguha?
9 Sa atong adlaw, gustong pahimuslan sa Yawa ang kinaiyanhong mga tinguha sa mga alagad ni Jehova. Busa magmadeterminado kita nga dili magpadaog sa tentasyon maylabot sa gidili nga mga buhat sa sekso, nga kaylap kaayo niining imoral nga kalibotan. Ang Pulong sa Diyos nagpasidaan kanato: “Unsa! Wala ba kamo mahibalo nga ang mga tawong dili-matarong dili makapanunod sa gingharian sa Diyos? Ayaw pagpahisalaag. Walay mga makihilawason, ni mga tigsimbag idolo, ni mga mananapaw, ni mga lalaking gihuptan alang sa dili-kinaiyanhong mga katuyoan, ni mga lalaking makigdulog sa mga lalaki, . . . nga makapanunod sa gingharian sa Diyos.” (1 Cor. 6:9, 10) Nan, tataw nga ang imoral nga mga tawo nga dili gustong magbag-o dili gayod papuy-on sa bag-ong kalibotan sa Diyos.
10. Sumala sa Mateo 4:5, 6, unsa ang laing tentasyon nga gigamit ni Satanas sa pagbungkag sa integridad ni Jesus?
10 Mahitungod sa usa sa mga tentasyon nga nasinatian ni Jesus didto sa kamingawan, ang Kasulatan nag-ingon: “Gidala siya sa Yawa ngadto sa balaang siyudad, ug iyang gipahimutang siya sa ibabawng bahin sa paril sa templo ug giingnan siya: ‘Kon ikaw anak sa Diyos, ambak; kay kini nahisulat, “Sugoon niya ang iyang mga manulonda maylabot kanimo, ug ikaw ilang pagasapnayon sa ilang mga kamot, aron ang imong tiil dili gayod mapandol sa bato.”’” (Mat. 4:5, 6) Tuyo unta ni Satanas nga ipasundayag ni Jesus ang iyang pagka-Mesiyas. Apan, sa pagkatinuod kadto maoy dili angay, mapagawalon nga buhat ug supak gayod sa kabubut-on sa Diyos. Sa makausa pa, nagmaunongon si Jesus kang Jehova ug mitubag siya pinaagi sa pagkutlo sa Kasulatan. Siya miingon: “Kini nahisulat usab, ‘Dili mo ibutang si Jehova nga imong Diyos sa pagsulay.’”—Mat. 4:7; Deut. 6:16.
11. Sa unsang paagi kita mahimong tentalon ni Satanas, ug unsay lagmit nga sangpotan niana?
11 Mahimong tentalon kita ni Satanas aron magtinguha kitag kadungganan sa lainlaing paagi. Hayan iya kitang hayloon nga sundogon ang mga urog sa sinina ug pamostura sa kalibotan o makigbahin sa kuwestiyonableng kalingawan. Apan kon atong isalikway ang tambag sa Bibliya ug sundogon ang kalibotan, panalipdan kaha kita sa mga manulonda batok sa daotang mga epekto niana? Bisan tuod naghinulsol si Haring David sa iyang sala maylabot kang Batseba, wala siya makalingkawas sa sangpotanan sa iyang gibuhat. (2 Sam. 12:9-12) Dili gayod nato sulayan si Jehova sa sayop nga mga paagi, tingali pinaagi sa pagpakighigala sa kalibotan.—Basaha ang Santiago 4:4; 1 Juan 2:15-17.
12. Unsa ang tentasyon nga gihisgotan sa Mateo 4:8, 9, ug unsay reaksiyon sa Anak sa Diyos?
12 Ang lain pang tentasyon nga gigamit sa Yawa didto sa kamingawan naglangkit sa pagtanyag kang Jesus ug politikanhong gahom. Gipakita ni Satanas kang Jesus ang tanang gingharian sa kalibotan ug ang himaya niini ug siya miingon: “Kining tanan nga butang ihatag ko kanimo kon mohapa ka ug mohimog usa ka buhat sa pagsimba kanako.” (Mat. 4:8, 9) Kini maoy mapangahasong pagpangilog sa pagsimba nga takos lamang kang Jehova ug paghaylo kang Jesus nga magbudhi sa Diyos! Pinaagi sa pagsigeg hunahuna sa tinguha nga simbahon, ang kanhing maunongon nga manulonda nakasala tungod sa iyang daotang pangibog ug busa nahimong daotan kaayo nga maninental, si Satanas nga Yawa. (Sant. 1:14, 15) Apan, si Jesus lahi kaayo kang Satanas kay Siya determinado nga magpabiling maunongon sa iyang langitnong Amahan ug busa siya miingon: “Pahilayo, Satanas! Kay kini nahisulat, ‘Si Jehova nga imong Diyos ang imong pagasimbahon, ug siya lamang ang imong pagahatagan ug sagradong pag-alagad.’” Sa ingon, gisuklan na usab ni Jesus ang Yawa. Ang Anak sa Diyos dili gayod buot nga mahimong bahin sa kalibotan ni Satanas ni mosimba nianang usa nga daotan!—Mat. 4:10; Deut. 6:13; 10:20.
“Sukli ang Yawa, ug Siya Mokalagiw Gikan Kaninyo”
13, 14. (a) Pinaagi sa pagpakita kang Jesus sa tanang gingharian sa kalibotan, unsay gitanyag sa Yawa kaniya? (b) Unsay gigamit ni Satanas aron kita mahugawan?
13 Pinaagi sa pagpakita kang Jesus sa tanang gingharian sa kalibotan, ang Yawa nagtanyag kaniya ug awtoridad nga wala mabatoni ni bisan kinsang tawo. Gusto ni Satanas nga si Jesus madani ug makombinsir sa iyang nakita nga siya may kahigayonan nga mahimong labing gamhanang politikanhong lider. Sa pagkakaron, ang Yawa dili motanyag kanato ug mga gingharian, apan naningkamot siya sa pagdaot sa atong kasingkasing pinaagi sa atong makita, madungog, ug gihunahuna.
14 Ang Yawa maoy nagmando niining kalibotana. Busa ang media nailalom sa iyang impluwensiya. Mao nga dili ikatingala nga ang mga talan-awon, musika, ug mga basahon sa kalibotan natugob sa imoralidad ug kapintasan. Ang mga panganunsiyo sa kalibotan naghaylo kanato sa pagpalit sa mga butang nga wala nato kinahanglana. Pinaagi niana, ang Yawa kanunayng nagtanyag kanato ug materyal nga mga butang nga makapadani sa atong mata, dalunggan, ug hunahuna. Apan kon dili kita motan-aw, mamati, ug mobasa sa mga impormasyon nga supak sa mga prinsipyo sa Bibliya, sama rang miingon kita: “Pahilayo, Satanas!” Pinaagi sa atong hugot nga determinasyon nga isalikway ang mahugaw nga kalibotan ni Satanas, atong gisundog si Jesus. Atong ikapakita usab nga kita dili bahin sa kalibotan ni Satanas pinaagi sa atong maisogong pagpaila sa atong kaugalingon ingong mga Saksi ni Jehova ug mga sumusunod ni Kristo diha sa trabahoan, eskuylahan, kasilinganan, ug sa atong mga partidos.—Basaha ang Marcos 8:38.
15. Nganong kinahanglan nga magmaalisto kanunay diha sa atong pagsukol kang Satanas?
15 Sa dihang napakyas ang Yawa sa pagbungkag sa integridad ni Jesus sa ikatulong higayon, “ang Yawa mibiya kaniya.” (Mat. 4:11) Apan, wala kana magpasabot nga si Satanas mihunong na sa pagtental kang Jesus, kay ang Bibliya nag-ingon: “Busa ang Yawa, kay nakahuman na sa tanang pagtental [didto sa kamingawan], mibiya kaniya hangtod sa laing angay nga higayon.” (Luc. 4:13) Sa dihang molampos kita sa pagsukol sa Yawa, angay natong pasalamatan si Jehova. Apan kinahanglan usab nga padayon natong pangayoon ang tabang sa Diyos, kay ang Yawa mobalik aron sa pagtental kanato sa laing higayon—kasagaran sa panahon nga wala nato dahoma ang tentasyon. Busa, kinahanglang magmaalisto kita sa tanang panahon, nga andam molahutay sa paghatag ug sagradong pag-alagad kang Jehova bisan pa sa mga pagsulay.
16. Unsang gamhanang puwersa ang ihatag ni Jehova kanato, ug nganong kinahanglan nato kining pangayoon kaniya?
16 Aron matabangan kita sa pagsukol sa Yawa, kinahanglang pangayoon nato sa Diyos ang labing gamhanang puwersa sa uniberso—ang iyang balaang espiritu. Kini motabang kanato sa paghimo sa mga butang nga dili nato mahimo pinaagi sa atong kaugalingong kusog. Gipasaligan ni Jesus ang iyang mga sumusunod nga mahimong mabatonan nila ang balaang espiritu sa Diyos sa dihang siya miingon: “Kon kamo, bisan tuod [dili hingpit ug busa] daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!” (Luc. 11:13) Hinaot nga magpadayon kita sa pagpangayo sa balaang espiritu ni Jehova. Sa tabang niini kita molampos sa pagsukol sa Yawa. Gawas pa sa makanunayon ug kinasingkasing nga pag-ampo, kinahanglang isul-ob nato ang kompletong armadura gikan sa Diyos aron “makabarog nga malig-on batok sa mga malipatlipatong kaugdahan sa Yawa.”—Efe. 6:11-18.
17. Unsang kalipay ang nakatabang kang Jesus sa pagsukol sa Yawa?
17 Duna pay laing nakatabang kang Jesus sa pagsukol sa Yawa, ug kana makatabang usab kanato. Ang Bibliya nag-ingon: “Tungod sa kalipay nga gibutang sa iyang atubangan siya nag-antos sa estaka sa pagsakit, nga wala igsapayan ang kaulaw, ug milingkod sa tuong kamot sa trono sa Diyos.” (Heb. 12:2) Atong bation ang susamang kalipay pinaagi sa pagbayaw sa pagkasoberano ni Jehova, pagpasidungog sa iyang balaang ngalan, ug pagtutok sa ganti nga kinabuhing walay kataposan. Pagkadako unyang kalipay ang atong bation sa dihang si Satanas ug ang tanan niyang mga buhat mahanaw na sa walay kataposan ug ‘ang mga maaghop magapanag-iya sa yuta, ug makakaplag sa ilang tumang kalipay sa kadagaya sa pakigdait’! (Sal. 37:11) Busa, magpadayon sa pagsukol sa Yawa, sama sa gibuhat ni Jesus.—Basaha ang Santiago 4:7, 8.
Unsay Imong Tubag?
• Unsay pamatuod nga si Jehova magluwas sa iyang katawhan?
• Sa unsang paagi si Jesus usa ka ehemplo sa pagsukol kang Satanas?
• Sa unsang mga paagi imong masuklan ang Yawa?
[Mga Pangutana sa Pagtuon]
[Hulagway sa panid 29]
Ang pagpakighigala sa kalibotan maghimo kanatong kaaway sa Diyos
[Hulagway sa panid 31]
Gisalikway ni Jesus ang pagtanyag ni Satanas kaniya sa tanang gingharian sa kalibotan