Huptan ba Nimo ang Imong Integridad?
Huptan ba Nimo ang Imong Integridad?
“Hangtod nga ako mamatay dili ko wad-on ang akong integridad gikan kanako!”—JOB 27:5.
1, 2. Unsang matang sa pagpanukod ang kinahanglan natong buhaton, ug unsang mga pangutana ang atong hisgotan?
HANDURAWA nga nagtan-aw ka sa plano sa usa ka balay. Nakadayeg ka sa pagkapraktikal sa disenyo niini. Nalipay ka sa paghunahuna sa mga paagi diin ang balay mapuslan nimo ug sa imong pamilya. Apan, dili ka ba mouyon nga walay kapuslanan ang maong plano ug ang imong paghunahuna bahin niana kon dili nimo tukoron, puy-an, ug mentinahon ang balay?
2 Sa samang paagi, maghunahuna tingali kita nga ang integridad hinungdanon kaayo ug mapuslanon alang kanato ug sa atong mga minahal. Apan kawang lang ang paghunahuna sa kapuslanan niana kon dili nato tukoron, o ugmaron, ug mentinahon ang atong Kristohanong integridad. Niining panahona gastoso kaayong magtukod ug balay. (Luc. 14:28, 29) Sa samang paagi, ang pagtukod o pag-ugmad ug integridad nagkinahanglag panahon ug paningkamot, apan makabenepisyo ka gayod niana. Busa hisgotan nato ang tulo ka pangutana: Sa unsang paagi atong ikapakita ang integridad? Sa unsang paagi mahuptan nato ang integridad? Unsay angayng buhaton kon adunay wala magpadayon sa paghupot ug integridad?
Sa Unsang Paagi Atong Ikapakita ang Integridad?
3, 4. (a) Sa unsang mga paagi si Jehova nagtabang kanato sa pag-ugmad ug integridad? (b) Sa unsang paagi atong maugmad ang integridad, sama sa gipakita ni Jesus?
3 Atong nahibaloan sa nag-unang artikulo nga si Jehova nagpasidungog kanato pinaagi sa paghatag kanatog pribilehiyo nga mohukom kon kita ba magpakitag integridad o dili. Apan, ikalipay nga wala niya kita pasagdi nianang bahina. Iya kitang gitudloan kon sa unsang paagi maugmad kining bililhong hiyas, ug siya madagayaong naghatag kanato sa iyang balaang espiritu, nga motabang kanato sa pagpadapat sa iyang mga pagtulon-an. (Luc. 11:13) Nagtagana pa gani siyag espirituwal nga proteksiyon niadtong naningkamot sa paglakaw diha sa integridad.—Prov. 2:7.
4 Sa unsang paagi gitudloan kita ni Jehova sa pagpakitag integridad? Labaw sa tanan, pinaagi sa pagpadala sa iyang Anak, si Jesus, dinhi sa yuta. Si Jesus nagpasundayag ug hingpit nga pagkamasinugtanon. Siya “nagmasinugtanon hangtod sa kamatayon.” (Filip. 2:8) Sa tanan niyang gibuhat, gisugot ni Jesus ang iyang langitnong Amahan, bisan pag usahay malisod kaayo kana. Siya miingon kang Jehova: “Matuman unta dili ang akong kabubut-on, kondili ang imoha.” (Luc. 22:42) Ang matag usa kanato angayng mosukna sa iyang kaugalingon, ‘Masinugtanon ba usab ako sama kang Jesus?’ Pinaagi sa pagsugot sa Diyos uban ang hustong mga motibo, atong ikapakita ang integridad. Tagda ang pipila ka situwasyon diin ilabinang hinungdanon ang pagkamasinugtanon.
5, 6. (a) Sa unsang paagi gipasiugda ni David ang kahinungdanon sa paghupot ug integridad bisag walay tawo nga nagtan-aw kanato? (b) Unsang pagsulay sa integridad ang giatubang sa mga Kristohanon karon sa dihang nag-inusara?
5 Kinahanglang magmasinugtanon kita kang Jehova bisan pag nag-inusara kita. Ang salmista nga si David naghisgot sa pagkahinungdanon sa integridad sa mga higayon nga siya lagmit nag-inusara. (Basaha ang Salmo 101:2.) Ingong hari, si David kanunayng moatubang sa mga tawo. Sa walay duhaduha, dihay daghang higayon nga gatosan, linibo pa gani, ang nag-alirong kaniya. (Itandi ang Salmo 26:12.) Hinungdanon ang paghupot ug integridad nianang mga panahona, kay ang hari kinahanglang magpakita ug maayong ehemplo sa iyang katawhan. (Deut. 17:18, 19) Apan, nakat-onan ni David nga sa dihang siya nag-inusara—‘sa sulod sa iyang balay’—kinahanglan gihapon niyang huptan ang iyang integridad. Komosta sa atong bahin?
6 Sa Salmo 101:3, si David miingon: “Dili ko ibutang sa atubangan sa akong mga mata ang bisan unsang butang nga walay hinungdan.” Adunay daghang higayon karon diin gibutang atubangan sa atong mga mata ang mga butang nga walay hinungdan, ilabina kon kita nag-inusara. Ang paggamit sa Internet nagsulay sa integridad sa daghan. Ang usa dali rang matental sa pagtan-awg malaw-ayng mga hulagway. Apan ang pagbuhat ba niana nagpakitag pagkamasinugtanon sa Diyos kinsa nagdasig kang David sa pagsulat nianang mga pulonga? Ang pagtan-awg malaw-ayng mga hulagway makadaot gayod, kay makapukaw kana sa sayop ug hakog nga mga tinguha, makadaot sa konsensiya, makabungkag sa kaminyoon, ug makahatag ug kaulawan sa tanan nga nalangkit niana.—Prov. 4:23; 2 Cor. 7:1; 1 Tes. 4:3-5.
7. Unsang prinsipyoha ang makatabang kanato sa paghupot ug integridad sa dihang kita nag-inusara?
7 Siyempre, walay alagad ni Jehova nga tinuorayng nag-inusara. Ang atong Amahan mahigugmaong nagatan-aw kanato. (Basaha ang Salmo 11:4.) Malipay gayod si Jehova kon iya kang makita nga misukol sa tentasyon! Sa pagbuhat niana, imong gisunod ang pasidaan nga atong masabtan sa mga pulong ni Jesus sa Mateo 5:28. Nan, magmadeterminado nga dili motan-aw ug mga hulagway nga magtental kanimo sa pagbuhat ug sayop. Ayawg ibaylo ang imong bililhong integridad sa makauulawng buhat nga pagtan-awg malaw-ayng mga hulagway o pagbasag bastos nga mga basahon.
8, 9. (a) Unsang pagsulay sa integridad ang giatubang ni Daniel ug sa iyang mga kauban? (b) Sa unsang paagi mapahimut-an sa batan-ong mga Kristohanon karon si Jehova ug ang ilang mga isigka-Kristohanon?
8 Atong ikapakita usab ang integridad pinaagi sa pagsugot kang Jehova bisag anaa kita sa taliwala sa mga dili-magtutuo. Hunahunaa si Daniel ug ang iyang tulo ka kauban. Nabihag sila sa Babilonya sa batan-on pa sila. Kay gilibotan man sila sa mga dili-magtutuo nga wala kaayoy kabangkaagan bahin kang Jehova, ang upat ka Hebreohanon gipit-os sa pagkaon sa mga pagkaon nga gidili sa Balaod sa Diyos. Mahimong mangatarongan ang maong mga batan-on nga dili ra tantong daotan ang pagkaon niana. Total, ang ilang mga ginikanan, mga saserdote, ug ang mga tigulang dili man makakita sa ilang gibuhat. Kinsa may masayod? Si Jehova mismo. Busa sila mibarog nga malig-on ug misugot kaniya bisan pa sa pagpit-os ug kapeligrohan.—Dan. 1:3-9.
9 Sa tibuok kalibotan, ang batan-ong mga Saksi ni Jehova mibarog usab nga malig-on, nga nagsunod sa mga sukdanan sa Diyos alang sa mga Kristohanon ug wala magpadala sa makadaot nga pagpit-os sa isigkaingon. Kon kamong mga batan-on maglikay sa droga, kapintasan, pagpamalikas, imoralidad, ug uban pang daotang mga buhat, inyong gisugot si Jehova. Sa pagbuhat niana, inyong gihuptan ang inyong integridad. Kana makahatag kaninyog kaayohan, ug inyong mapahimut-an si Jehova ug ang inyong mga isigka-Kristohanon!—Sal. 110:3.
10. (a) Unsang sayop nga mga panghunahuna bahin sa pakighilawas ang nagtultol sa pipila ka batan-on sa pagkompromiso sa ilang integridad? (b) Sa unsang paagi ang integridad motabang kanato sa paglikay sa pakighilawas?
10 Kinahanglang magmasinugtanon usab kita sa Diyos sa dihang makiglabot sa mga membro sa kaatbang nga sekso. Nahibalo kita nga ang Pulong sa Diyos nagdili sa pakighilawas. Apan, dali rang mausab ang atong tinamdan niana. Pananglitan, ang pipila ka batan-on nakigbahin sa pagpakigsekso nga ipaagi sa baba o lubot o sa pag-ugay-ugay sa kinatawo sa usag usa, nga nangatarongan nga kining mga buhata dili man kaayo daotan tungod kay dili sila aktuwal nga “nakigsekso.” Ang maong mga batan-on nalimot—o wala gayod manumbaling—nga sa Bibliya ang pulong alang sa pakighilawas naglakip nianang tanan nga sayop nga mga buhat, ug tungod niana mahimong mapalagpot ang usa. a Apan, mas grabe pa, sila wala maghupot ug integridad. Sanglit naningkamot man kita sa paghupot sa atong integridad, dili kita mangitag paagi nga makalusot sa atong daotang panggawi. Dili nato sulayan ang pagbuhat ug mga sala nga sa atong hunahuna dili ra kaayo bug-at aron masilotan. Likayan nato ang pagpakasala dili lamang tungod sa disiplina nga ipahamtang kanato sa kongregasyon. Hinunoa, gusto natong buhaton kon unsay makapahimuot kang Jehova ug likayan ang mga buhat nga makapasubo kaniya. Imbes mopaduol sa sala, magpahilayo hinuon kita niana ug ‘mokalagiw gikan sa pakighilawas.’ (1 Cor. 6:18) Sa ingon, atong gipasundayag nga kita nagpakita gayod ug integridad.
Sa Unsang Paagi Mahuptan Nato ang Integridad?
11. Nganong hinungdanon ang matag masinugtanong buhat? Iilustrar.
11 Atong maugmad ang integridad pinaagi sa pagkamasinugtanon, busa mahuptan nato ang atong integridad pinaagi sa padayong pagsugot sa mga balaod sa Diyos. Ang usa ka masinugtanong buhat morag dili ra kaayo bililhon—usa lang ka gamay nga butang. Apan sa padayon natong pagbuhat niana makahimo kitag maayong rekord sa paghupot ug integridad. Sa pag-ilustrar: Ang usa ka hollow block morag dili kaayo bililhon, apan kon atong ayohon pagpayl ang daghang hollow block, kita makatukod ug maanindot nga balay. Busa pinaagi sa padayong paghimo ug masinugtanong mga buhat, atong mahuptan ang atong integridad.—Luc. 16:10.
12. Sa unsang paagi nagpakitag panig-ingnan si David sa paghupot ug integridad bisan pa sa dili maayong pagtratar ug inhustisya?
12 Ang atong integridad ilabinang madayag sa dihang kita molahutay bisan pa sa mga kalisdanan, dili-maayong pagtratar, o inhustisya. Tagda ang pananglitan ni David. Sa batan-on pa, siya gilutos sa usa ka hari nga mao untay naghawas sa awtoridad ni Jehova. Apan, si Haring Saul nawad-an sa pabor ni Jehova ug nasina pag-ayo kang David, kinsa maoy giuyonan sa Diyos. Bisan pa niana, taudtaod pang nagmando si Saul ug iyang gigamit ang kasundalohan sa Israel sa paggukod kang David. Gitugotan ni Jehova nga magpadayon kining maong inhustisya sulod sa pipila ka tuig. Nayugot ba si David sa Diyos? Miingon ba siya nga walay kapuslanan ang paglahutay? Wala. Hinunoa, iyang gihuptan ang halalom nga pagtahod sa posisyon ni Saul ingong dinihogan sa Diyos ug wala siya mobalos kang Saul bisan pag diha nay higayon nga mabuhat niya kana.—1 Sam. 24:2-7.
13. Sa unsang paagi atong mahuptan ang integridad kon kita masakitan o masilo?
13 Pagkamaayong ehemplo si David alang kanato karon! Kita maoy bahin sa tibuok-kalibotang kongregasyon sa dili-hingpit nga mga tawo, nga ang bisan kinsa kanila mahimong makabuhat ug sayop kanato o mahimong dili matinumanon. Siyempre, bulahan kita nga nagkinabuhi sa panahon nga ang katawhan ni Jehova sa katibuk-an dili gayod makaagom sa espirituwal nga kadaot. (Isa. 54:17) Bisan pa niana, unsay atong buhaton kon dunay makapahigawad o makapasakit kanato? Kon maghambin kitag kayugot batok sa atong isigkamagsisimba, mahimong mameligro ang atong integridad. Dili gayod rason ang panggawi sa uban nga mayugot kita sa atong Diyos o mobiya sa pag-alagad kaniya. (Sal. 119:165) Ang paglahutay bisan pa sa mga pagsulay motabang kanato sa paghupot sa atong integridad.
14. Unsay angay nga reaksiyon niadtong naghupot ug integridad maylabot sa mga kausaban sa organisasyon ug sa pagdalisay sa mga doktrina?
14 Atong mahuptan usab ang integridad pinaagi sa paglikay sa pagkahinawayon. Siyempre, nagpasabot kana nga kita maunongon kang Jehova. Iya gayong gipanalanginan ang iyang katawhan karon. Ang putli nga pagsimba mas nabayaw karon sa tibuok yuta kay sukad masukad. (Isa. 2:2-4) Sa dihang adunay mga kausaban sa katin-awan sa mga teksto sa Bibliya o sa paagi sa pagbuhat sa mga butang, ato kanang dawaton. Malipay kita nga makita ang pamatuod nga ang espirituwal nga kahayag padayon nga nagakasanag. (Prov. 4:18) Kon malisdan kita sa pagsabot sa kausaban, mangayo kitag tabang kang Jehova nga masabtan kana. Sa kasamtangan, magpabilin kitang masinugtanon nga maghupot sa atong integridad.
Komosta Kon Adunay Wala na Maghupot ug Integridad?
15. Kinsa lamay makakuha sa imong integridad?
15 Makapahinuklog kana nga pangutana, dili ba? Sumala sa atong nakat-onan sa nag-unang artikulo, ang integridad hinungdanon kaayo. Kon wala kana, wala kitay maayong relasyon kang Jehova ug walay tinuod nga paglaom. Hinumdomi kini: Usa lamang ka tawo sa uniberso ang makakuha sa imong integridad—ikaw mismo. Nahibalo gayod niana si Job. Siya miingon: “Hangtod nga ako mamatay dili ko wad-on ang akong integridad gikan kanako!” (Job 27:5) Kon ikaw adunay sama niana nga determinasyon ug magpabiling suod kang Jehova, ikaw matabangan sa paghupot sa imong integridad.—Sant. 4:8.
16, 17. (a) Kon ang usa ka tawo makahimog grabeng sala, unsay dili niya angayng buhaton? (b) Unsay angay niyang buhaton?
16 Bisan pa niana, ang uban napakyas sa paghupot ug integridad. Sama sa nahitabo sa panahon sa mga apostoles, ang pipila ka Kristohanon karon nagbatasan sa pagpakasala. Kon mahitabo kana kanimo, wala na bay paglaom? Dili sa ingon niana. Unsay mahimong buhaton? Hisgotan una nato kon unsay dili angayng buhaton. Lagmit ililong sa usa ang iyang daotang buhat gikan sa iyang mga ginikanan, mga isigka-Kristohanon, o sa mga ansiyano. Apan, ang Bibliya nagpahinumdom kanato: “Siya nga nagatabon sa iyang kalapasan dili molampos, apan siya nga nagasugid ug nagabiya niini pagakaluy-an.” (Prov. 28:13) Pagkadakong sayop kon ang usa maningkamot sa pagtabon sa iyang sala, kay walay bisan unsa nga matago sa atubangan sa Diyos. (Basaha ang Hebreohanon 4:13.) Ang uban aduna gani dobleng kinabuhi, nga nagpakaaron-ingnong nag-alagad kang Jehova samtang nagabuhat ug grabeng sala. Ang maong pagkinabuhi walay integridad—sa pagkatinuod, kana maoy kaatbang sa integridad. Si Jehova dili malipay sa pagsimba nga gihimo sa mga indibiduwal nga nagtago ug seryosong mga sala. Sa kasukwahi, masuko siya sa maong pagkasalingkapaw.—Prov. 21:27; Isa. 1:11-16.
17 Sa dihang ang usa ka Kristohanon nakahimog grabeng sala, tataw kaayo ang giingon sa Bibliya bahin niana. Panahon na nga mangayog tabang sa mga ansiyano. Si Jehova nagtudlo kanila aron motabang niadtong adunay grabeng sakit sa espirituwal. (Basaha ang Santiago 5:14.) Ayaw tugoti ang kahadlok nga disiplinahon o badlongon nga mopugong kanimo sa pagpatambal sa imong espirituwal nga sakit. Kon buot hunahunaon, tugotan ba sa usa ka maalamong tawo ang temporaryong kasakit sa ineksiyon o bisan sa operasyon nga mopugong kaniya sa pagpatambal sa iyang grabeng sakit?—Heb. 12:11.
18, 19. (a) Sa unsang paagi ang pananglitan ni David nagpakita nga mahimong mabatonan pag-usab ang integridad? (b) Unsay imong determinasyon maylabot sa imong integridad?
18 Duna bay paglaom nga maulian? Mabatonan ba pag-usab ang integridad bisag nawala na kini? Tagda pag-usab ang pananglitan ni David. Siya nakahimog grabeng sala. Siya mitan-aw nga maibogon sa asawa sa laing tawo, nakapanapaw, ug naghikay nga mapatay ang inosenteng bana. Lisod hunahunaon nga si David nagpakitag integridad nianang tungora, dili ba? Apan, wala na bay paglaom ang iyang kahimtang? Si David nagkinahanglan ug nakadawat ug bug-at nga disiplina. Dayon, tungod sa iyang sinserong paghinulsol, gipasaylo siya ni Jehova. Si David nakakat-on gikan sa maong disiplina ug iyang nabatonan pag-usab ang iyang integridad pinaagi sa pagsugot sa Diyos ug pagpadayon sa pagbuhat niana. Ang kinabuhi ni David maoy pananglitan sa atong mabasa sa Proverbio 24:16: “Ang tawong matarong mahimong matumba sa makapito, ug siya mobangon gayod.” Unsay resulta niana? Tagda kon unsay giingon ni Jehova kang Solomon bahin kang David human kini mamatay. (Basaha ang 1 Hari 9:4.) Ang Diyos naghinumdom kang David ingong tawo nga naghupot ug integridad. Sa pagkatinuod, si Jehova makahinlo sa mahinulsolong mga makasasala bisan gikan sa lama sa grabeng mga sala.—Isa. 1:18.
19 Oo, imong mahuptan ang imong integridad pinaagi sa pagsugot sa Diyos tungod sa gugma. Hupti ang pagkamaunongon, ug kon makahimo kag grabeng sala, ipakita ang tiunay nga paghinulsol. Pagkabililhon gayod sa integridad! Hinaot nga ang matag usa kanato magbaton sa determinasyon nga sama nianang kang David: “Alang kanako, ako magalakaw sa akong integridad.”—Sal. 26:11.
[Footnote]
Unsay Imong Tubag?
• Sa unsang paagi imong ikapakita ang integridad?
• Sa unsang paagi nimo mahuptan ang imong integridad?
• Sa unsang paagi mabatonan pag-usab ang integridad?
[Mga Pangutana sa Pagtuon]
[Kahon sa panid 8]
“DALAYEGON KAAYO KINI”
Mao kanay giingon sa usa ka babayeng mabdos ug lima ka bulan mahitungod sa kaayo ug integridad sa usa ka estranyo. Gikan siya sa usa ka restawran, ug pipila ka oras sa ulahi iyang namatikdan nga nabiyaan niya didto ang iyang pitaka. Kini adunay sulod nga $2,000, dako kaayong kantidad kay sa naandan niyang daladalaon. “Naguol kaayo ko,” miingon siya sa ulahi sa usa ka tigbalita sa lokal nga mantalaan. Apan, usa ka batan-ong babaye ang nakakita sa maong pitaka ug gipangita dayon niya ang tag-iya niini. Kay wala niya makit-i, siya miadto sa presinto sa polis, ug sa kataposan nakita ra sa mga polis ang mabdos nga babaye. “Dalayegon kaayo kini nga buhat,” miingon ang mapasalamatong tag-iya. Nganong naningkamot man gyod ang batan-on sa pag-uli sa kuwarta? Ang mantalaan nag-ingon nga ingong usa sa mga Saksi ni Jehova, siya “nagpakitag integridad tungod sa iyang relihiyon.”
[Hulagway sa panid 9]
Ang mga batan-on makahupot ug integridad ilalom sa pagsulay
[Hulagway sa panid 10]
Dihay panahon nga napakyas si David sa paghupot ug integridad, apan iya kanang nabatonan pag-usab